Isaia
21 O le feʻau faasaga i le toafa o le sami:*+
“O loo sau e pei o matagi malolosi e ui ane i le itu i saute,
E mai i le toafa, mai i le atunuu mataʻutia.”+
2 Ua iai se faaaliga faigatā ua faailoa mai iā te aʻu:
“O lē e amio piʻopiʻo o loo amio faapiʻopiʻo o ia,
Ma o lē e faaumatia mea o loo ia faaumatiaina mea.
Elama e, inā alu aʻe ia! Metai e, inā osofaʻi atu ia!+
O le a ou faamutaina mapuitigā uma ua tutupu ona o ia.”*+
3 O le mea lea ua ou matuā tigā ai.*+
Ua oo iā te aʻu tigā
E pei o le faatigā o le fafine o le a fanau.
Ua ou matuā mafatia ma ua lē mafai ai ona ou faalogo;
Ua ou matuā atuatuvale foʻi ma ua lē mafai ai ona ou vaai.
4 Ua tātāvale loʻu fatu; ma ua ou gatete ona o le fefe.
O le pogipogi lea na ou moomoo i ai ua avea o se mea ou te fefe ai.
5 Ia teu faalelei le laulau, ma faatulaga nofoa!
Ia aai ma feinu!+
Outou ta‘ita‘i e, inā tutulaʻi ia ma faauu* le talita.
6 Auā o le mea lenei ua fetalai mai ai Ieova iā te aʻu:
“Inā alu ia, ia tofia se tagata vāai, ma e na te taʻu mai mea ua ia vaai i ai.”
7 Ona ia vaaia lea o se kariota o le taua ua toso e solofanua e lua,
O se kariota o le taua ua toso e asini,
Ma se kariota o le taua ua toso e kamela.
Ua ia matuā uaʻi atu ma le lē gāsē.
8 Ona ia valaau atu lea e pei o le leona:
“Ieova e, ua ou tū nei e lē aunoa i le ao i luga o le olomatamata,
Ma o loo oʻu tū i le mea ua tofia i ai aʻu e leoleo ai i pō uma.+
9 Seʻi vaai:
O loo ō mai ni tamāloloa i se kariota o le taua, o loo toso e solofanua e lua!”+
Ona ia faapea mai lea:
“Ua paʻū o ia! Ua paʻū Papelonia!+
O faatusa uma ua tā o ona atua, ua nutipalaina i le eleele!”+
10 Oʻu tagata e, o ē ua solia e pei o saito
Ma le saito* o laʻu mea e soli ai saito,+
Ua ou taʻu atu iā te outou tala na ou faalogo ai mai iā Ieova o ʻau, o le Atua o Isaraelu.
11 O le feʻau faasaga iā Tuma:*
Ua valaau mai iā te aʻu se isi mai i Seira:+
“Le leoleo e, po ua tai ao ea?
Le leoleo e, po ua tai ao ea?”
12 Ua faapea atu le leoleo:
“Ua toeitiiti oo mai le taeao, ma e faapea fo‘i le pō.
Afai e tou te fesili mai, ia fesili mai.
Inā toe ō mai ia!”
13 O le feʻau faasaga i le fanua laugatasi o le toafa:
O outou tagata malaga e,* o Titana,+
O le a outou mālōlō i le pō i le vaomatua o le fanua laugatasi o le toafa.
14 O outou o loo nonofo i le laueleele o Tema,+
Ia outou aumai ni vai e faafetaui ai lē ua fia inu,
Ma aumai se meaʻai mo lē ua sola ese.
15 Auā ua latou sosola ona o le pelu, o le pelu foʻi ua tō aʻe,
Ma e mai i le ʻaufana ua loloʻu, ma le sauā o le taua.
16 Auā o le fetalaiga lenei a Ieova iā te aʻu: “O le a faamuta le mamalu uma o Kitara+ a o leʻi uma le tausaga, lea e tusa ma le tausaga e faigaluega totogi ai se tagata. 17 O le a faatoʻaitiitia ē e totoe o le ʻau fanafana aū, o tagata totoa o Kitara, auā o le mea lea ua fetalai mai ai Ieova, o le Atua o Isaraelu.”