Esekielu

44 Ua ia toe avatu aʻu e ui atu i le faitotoʻa pito i fafo o le malumalu e faasaga i sasaʻe,+ ae ua tapuni.+ 2 Ona fetalai mai lea o Ieova iā te aʻu: “O le a tapunia pea lenei faitotoʻa. E lē tatau ona tatalaina, ma e leai se tagata e ui atu i ai; auā ua ulufale mai ai Ieova le Atua o Isaraelu,+ ma e ao ona tapunia pea. 3 Peitaʻi, e nofo le taʻitaʻi i lea mea ina ia ʻai ai meaʻai i luma o Ieova,+ ona o ia o le taʻitaʻi. E ulufale mai o ia i le faapaologa o le faitotoʻa, ma e toe ulufafo atu i lea lava ala.”+

4 Ona ia avatu lea o aʻu i luma o le malumalu e ala i le faitotoʻa i mātū. Ina ua ou vaai atu, na ou iloa ai ua faatumuina le malumalu o Ieova i le mamalu o Ieova.+ Ona ou faapaʻū faō ai lea.+ 5 Ona fetalai mai lea o Ieova iā te aʻu: “Le atalii e o le tagata, ia uaʻi atu,* ia vaavaai ou mata, ma ia faalogologo lelei i mea uma ua ou fai atu ai iā te oe e tusa ai ma tuutuuga ma tulafono o le malumalu o Ieova. Ia uaʻi totoʻa atu i le mea e ulu atu ai o le malumalu ma mea uma e ulufafo ai o le malumalu.+ 6 E ao ona e fai atu i le aiga fouvale o Isaraelu, ‘O le fetalaiga lenei a le Alii Pule Silisili Ese o Ieova: “Le aiga e o Isaraelu, ua lava ia na mea inosia ua outou faia. 7 Pe a outou aumaia i loʻu malumalu tagata ese e lē peritomeina le loto ma le tino, e latou te faaleagaina ai loʻu malumalu. Ua outou aumaia laʻu meaʻai, o le gaʻo ma le toto, ae o loo solia laʻu feagaiga ona o mea inosia uma o loo outou faia. 8 Ua outou lē vaavaaia aʻu mea paia,+ ae ua outou tofia isi e faia matafaioi i loʻu malumalu.”’

9 “‘O le fetalaiga lenei a le Alii Pule Silisili Ese o Ieova: “E lē tatau i se tagata ese o loo nofo i Isaraelu, o sē e leʻi peritomeina le loto ma le tino, ona ulufale i loʻu malumalu.”’

10 “‘A o le ʻau sa Levī o ē na sē ese mai iā te aʻu,+ ina ua sē ese Isaraelu mai iā te aʻu ina ia mulimuli i a latou tupua inosia,* o le a latou selesele i āuga o a latou mea sesē. 11 Ona avea ai lea o i latou o ni auauna i loʻu malumalu, e vaavaaia faitotoʻa o le malumalu+ ma auauna i le malumalu. O le a latou fasia taulaga mū ma le taulaga mo le nuu, e latou te tutū foʻi i luma o le nuu ina ia auauna atu iā i latou. 12 Talu ai na latou auauna atu iā i latou i luma o a latou tupua inosia, ma ua avea ma mea e tautevateva ai le aiga o Isaraelu ma latou agasala ai,+ o le mea lea ua ou sii ai loʻu lima i se tautoga e faasagatau iā i latou, ma o le a latou selesele i āuga o a latou mea sesē,’ ua fetalai mai ai le Alii Pule Silisili Ese o Ieova. 13 ʻE latou te lē faalatalata mai iā te aʻu ina ia auauna o ni aʻu ositaulaga, pe faalatalata mai foʻi i so o saʻu mea paia po o mea e sili ona paia, ma o le a oo iā i latou lo latou faalumaina ona o a latou mea inosia na fai. 14 Ae o le a ou faia i latou ma ē e vaavaaia matafaioi o le malumalu, ina ia vaavaaia auaunaga ma mea uma e ao ona faia i inā.’+

15 “‘A o ositaulaga o le ʻau sa Levī, o atalii o Satoka,+ o ē na vaavaaia matafaioi i loʻu malumalu ina ua sē ese le fanauga a Isaraelu mai iā te aʻu,+ o le a latou faalatalata mai ina ia auauna iā te aʻu, ma o le a latou tutū i oʻu luma ina ia ofo mai iā te aʻu le gaʻo+ ma le toto,’+ ua fetalai mai ai le Alii Pule Silisili Ese o Ieova. 16 ‘O i latou ia o le a ulufale mai i loʻu malumalu, ma latou faalatalata mai i laʻu laulau ina ia auauna mai iā te aʻu,+ ma o le a latou faataunuuina a latou matafaioi iā te aʻu.+

17 “‘Pe a latou ulufale mai i faitotoʻa o le lotoā pito i totonu, e ao ona latou ofuina ofu lino.+ E lē tatau ona latou oofu i ni ofu e faia i fulufulu mamoe, pe a latou auauna i faitotoʻa o le lotoā pito i totonu, ma nofoaga i totonu. 18 E ao ona iai ufiulu o ʻie lino i o latou ulu, ma ia oo o latou ofuvae lino i o latou suilapalapa.+ Ia aua neʻi o latou oofu i ni ofu e afu ai. 19 A o latou leʻi ulufafo atu i le lotoā pito i fafo, o le lotoā pito i fafo lea o loo iai le nuu, e ao ona latou aveese o latou ofu na auauna ai+ ma tuu i potu ʻai paia.*+ Ona latou oofu lea i isi ofu, ina ia latou lē faapaiaina ai le nuu i o latou ofu. 20 E lē tatau ona latou sele poo o latou ulu,+ pe faauumi o latou lauulu. E ao ona ʻoti o latou lauulu. 21 E lē tatau i ositaulaga ona inu se uaina pe a ulufale mai i le lotoā pito i totonu.+ 22 E lē tatau ona latou faaipoipo i se fafine ua oti lana tane, po o se fafine ua tatala lana faaipoipoga ma lana tane,+ ae ia faaipoipo i se teine muli o le fanauga a Isaraelu, po o se fafine ua oti lana tane sa avea ma ositaulaga.’+

23 “‘E ao ona latou aʻoaʻo atu i loʻu nuu le eseesega o le mea paia ma le mea e lē paia; ma ia aʻoaʻo foʻi i latou ia iloa le eseesega o le mea mamā ma le mea e lē mamā.+ 24 E ao ona fai i latou ma faamasino i se faamasinoga;+ e ao ona latou faamasino e tusa ma iʻuga o aʻu faamasinoga.+ E ao ona latou tausia aʻu tulafono ma aʻu aiāiga e tusa ma aso o aʻu tausamiga uma,+ ma faapaiaina oʻu sapati. 25 E lē tatau ona latou faalatalata atu i so o se tagata oti, ina neʻi lē mamā ai i latou. Ae e faataga lava ona latou lē mamā pe afai o o latou tamā, tinā, o se atalii po o se afafine, o se uso, po o se tuafafine e leʻi faaipoipo.+ 26 A māeʻa le faamamāina o se ositaulaga, ona latou faitau lea o aso e fitu mo ia. 27 I le aso e ulufale atu ai o ia i le mea paia, i totonu o le lotoā pito i totonu, ina ia auauna ai i le mea paia, e ao ona ia ofo atu lana taulaga o agasala,’+ ua fetalai mai ai le Alii Pule Silisili Ese o Ieova.

28 “‘A o lo latou tofi lenei: O aʻu o lo latou tofi.+ E lē tatau ona avatu se mea e fai ma o latou tofi i Isaraelu, auā o aʻu o lo latou tofi. 29 O i latou ia o le a aai i taulaga i meaʻai,+ i taulaga o agasala, ma taulaga o le nofosala,+ ma o le a fai mo i latou mea uma ua taofia mo se fuafuaga paia i Isaraelu.+ 30 O mea aupito lelei uma o uluaʻi fua ua matua ma foaʻi eseese uma mai iā te outou, o le a fai mo ositaulaga.+ E ao foʻi ona outou avatu i ositaulaga uluaʻi fua o a outou fatu ua tuʻininii.+ O le faia faapea, o le a maua ai faamanuiaga e o outou aiga.+ 31 E lē tatau ona aai ositaulaga i se manulele po o se manu e maua atu ua mate po ua saeia e isi manu.’+