Esekielu
47 Ona ia toe avatu lea o aʻu i le mea e ulufale atu ai i le malumalu,+ ma na ou vaaia ai i inā se vai ua tafe atu i le itu i sasaʻe mai i lalo o le mea e ulu atu ai i le malumalu,+ auā e faasaga luma o le malumalu i le itu i sasaʻe. Ua tafe atu le vai mai i lalo o le itu taumatau o le malumalu, i le itu i saute o le fata faitaulaga.
2 Ua ia avatu aʻu e ala i le faitotoʻa i le itu i mātū,+ ma avatu aʻu i fafo e oo i le faitotoʻa pito i fafo lea e faasaga i le itu i sasaʻe,+ ma na ou vaaia ai le vai ua tafe ifo i le itu taumatau.
3 Ina ua alu ane le tamāloa i le itu i sasaʻe ma se manoa e fua ai i lona lima,+ na ia fuaina ai le 1,000 kupita* ma faaui ane aʻu i le vai; e oo i tapuvae le loloto o le vai.
4 Ona ia fuaina lea o le isi 1,000 kupita ma faaui ane aʻu i le vai, ma ua oo i tulivae le loloto o le vai.
Ua ia fuaina le isi 1,000 kupita ma faaui ane aʻu i le vai, ma ua oo i suilapalapa le loloto o le vai.
5 Ina ua ia fuaina le isi 1,000 kupita, e leʻi mafai ona ou ui ane ai ona o le tatafe, auā ua matuā loloto le vai ma e mana‘omia ai ona aau. Ua tatafe le vai ma ua lē mafai ai ona asā.
6 Ua ia fesili mai iā te aʻu: “Le atalii e o le tagata, po ua e vaai i lenei mea?”
Ona ia faasavali lea o aʻu ma toe faafoʻi i le auvai o le ālia. 7 Ina ua ou toe foʻi, na ou vaaia ai ua iai le tele o laau i auvai o le ālia i ona itu e lua.+ 8 Ona ia faapea mai lea iā te aʻu: “E tafe atu lenei vai i le itu i sasaʻe ma faaauau atu ai i Arapa,*+ seʻia oo i le sami. Pe a tafe atu le vai i le sami,+ ona magalo ai lea o le vai i inā. 9 O le a tele meaola o le a feola i mea uma e tafe atu i ai le vai.* O le a matuā tele iʻa auā o le a tafe atu lenei vai i inā. O le a magalo le suāsami, e ola foʻi mea uma i le mea e tafe atu i ai le vai.
10 “O le a tutū foʻi tagata faifaiva i autafa o le sami, mai i Enokati+ e oo atu i Eno-kelima, lea o le a iai se mea e faamamago ai upega. O le a matuā tele foʻi ituaiga o iʻa eseese e pei o iʻa i le Sami Tele.*+
11 “O le a iai ona vaega e pala ma ona faataufusi, ma e lē magalo ia mea. O le a iai pea le masima i na vaega.+
12 “O le a tutupu ituaiga uma o laau ʻaina i auvai i itu e lua o le ālia. E lē mamae lau o ia laau, e lē uma foʻi o latou fua. E fua mai i masina taʻitasi ia laau, auā o le vai o loo faasūsūina ai e sau mai i le malumalu.+ E avea fua o ia laau ma meaʻai, ma lau o laau e fai ma vailaau.”+
13 O le fetalaiga lenei a le Alii Pule Silisili Ese o Ieova: “O le laueleele lenei e tou te vaevaeina e fai ma tofi mo ituaiga e 12 o Isaraelu, ma e lua tofi e avatu mo Iosefa.+ 14 O le a outou nonofo ai ma o le a vaevae tutusa iā te outou.* Na ou tautō e avatu lenei laueleele i o outou augātamā,+ ma o lenei ua tuuina* atu iā te outou o se tofi.
15 “O le tuaoi lenei o le laueleele i le itu i mātū: E mai i le Sami Tele e ui atu i le ala i Hetelona,+ e agaʻi i Setata,+ 16 o Amato,+ o Perota,+ ma Seperimo lea e i le vā o laueleele o Tamaseko ma laueleele o Amato, e agaʻi atu foʻi i Hasara-tikona lea e lata i le tuaoi o Haurana.+ 17 O lea, e amata le tuaoi mai i le sami e agaʻi atu i Hasa-renona,+ i tala ane o le tuaoi o Tamaseko i le itu i mātū, ma le tuaoi o Amato.+ O le tuaoi lea i le itu i mātū.
18 “O le itu i sasaʻe, e iai i le vā o Haurana ma Tamaseko, ma tala ane o Ioritana, i le vā o Kiliata+ ma le laueleele o Isaraelu. E ao ona e fuaina le mamao mai i le tuaoi e oo i le sami i sasaʻe.* O le tuaoi lea i le itu i sasaʻe.
19 “O le tuaoi i le itu i saute* e amata mai i Tamara e oo atu i vai o Meripa-katesa,+ ona agaʻi atu ai lea i le ālia* ma le Sami Tele.+ O le tuaoi lea i le itu i saute.*
20 “O le itu i sisifo, o le Sami Tele lea, e mai i le tuaoi e oo atu i se vaega e faafesagaʻi ma Lepo-amato.*+ O le tuaoi lea i le itu i sisifo.”
21 “E ao ona outou vaevaeina lenei laueleele mo outou lava, i ituaiga e 12 o Isaraelu. 22 E ao ona outou vaevaeina e fai ma tofi mo outou, faapea ma tagata ese o loo aumau faatasi ma outou, o ē ua fai fanau a o nonofo faatasi ma outou; ma o le a avea i latou iā te outou, e pei o ni tagatānuu o le fanauga a Isaraelu. E latou te maua se tofi faatasi ma outou, o ituaiga o Isaraelu. 23 E ao ona outou avatu i le tagata ese se tofi i le laueleele o le ituaiga o loo nofo ai o ia,” ua fetalai mai ai le Alii Pule Silisili Ese o Ieova.