Numera

32 Ua matuā tele lava lafumanu a atalii o Reupena+ ma atalii o Kato,+ ma ua latou vaavaai atu foʻi i le laueleele o Iasaru+ ma le laueleele o Kiliata, o ni laufanua lelei mo lafumanu. 2 Ona ō mai lea o atalii o Kato ma atalii o Reupena ma faapea mai iā Mose ma Eleasaro le ositaulaga ma taʻitaʻi o le faapotopotoga: 3 “O Atarota, o Tipona, o Iasaru, o Nimara, o Hesepona,+ o Eleale, o Sepema, o Nepo,+ ma Peona,+ 4 o le laufanua lea na faatoʻilaloina e Ieova i luma o le faapotopotoga o Isaraelu,+ o le laufanua e lelei mo lafumanu, ma o loo tele lafumanu+ a au auauna.” 5 Ua latou faapea atili mai: “Afai e te fiafia iā i matou, ia tuu mai lenei laufanua i au auauna e fai mo i matou. Aua neʻi tuua i matou e sopoʻia Ioritana.”

6 Ona faapea atu lea o Mose i atalii o Kato ma atalii o Reupena: “Pe e ō ea o outou uso i le taua a o outou nonofo pea i inei? 7 Aiseā e tou te faalotovaivai ai i le fanauga a Isaraelu mai i le ō atu i le laueleele e mautinoa e avatu e Ieova iā i latou? 8 O le mea lenā na faia e o outou tamā ina ua ou aauina atu i latou mai i Katesa-panea e mataʻi le laueleele.+ 9 Ina ua latou ō aʻe i le vanu* o Esekolo+ ma vāai atu ai i le laueleele, ona latou faalotovaivai ai lea o le fanauga a Isaraelu, ina ia aua neʻi ō atu i le laueleele lea o le a avatu e Ieova iā i latou.+ 10 Ona matuā toʻasā ai lea o Ieova i lenā aso ma tautō+ mai e faapea, 11 ‘O le a lē vāai tane na ō mai mai i Aikupito e 20 tausaga agaʻi i luga le matutua, i le laueleele+ lea na ou tautō atu ai iā Aperaamo, Isaako, ma Iakopo,+ auā ua latou lē mulimuli mai iā te aʻu ma o latou lotoatoa, 12 seʻi vaganā ai Kalepo+ le atalii o Iefune le tagata Kinasa ma Iosua+ le atalii o Nuno, auā ua la mulimuli iā Ieova ma le lotoatoa.’+ 13 Ona matuā toʻasā ai lea o Ieova iā Isaraelu ma ia tuu ai i latou e feofeoaʻi solo i le toafa mo le 40 tausaga,+ seʻia feoti le tupulaga atoa na faia mea leaga i le silafaga a Ieova.+ 14 A o lenei o outou o tagata agasala, ua outou faia le mea na faia e o outou tamā ma atili toʻasā tele ai Ieova iā Isaraelu. 15 Afai tou te liliuese mai i le mulimuli iā te ia, e mautinoa e na te toe tuua i latou i le toafa, ma e tou te faapogaia mea leaga e oo i lenei nuu.”

16 Mulimuli ane, ua latou ō atu iā te ia ma faapea mai: “Ia tuu mai i matou seʻi fausia i inei ni pā maa mo lafumanu ma ni aai mo a matou fanau. 17 Ae o le a matou sauni pea mo le taua,+ ma ō muamua i luma o le fanauga a Isaraelu seʻia matou avatu i latou i lo latou laueleele, ae e nonofo a matou fanau i aai malupuipuia e saogalemu ai mai i tagata o le atunuu. 18 E matou te lē toe foʻi i o matou aiga seʻiloga ua maua e le fanauga a Isaraelu o latou fanua, e taʻitasi ma lona lava tofi.+ 19 Auā e lē maua so matou tofi faatasi ma i latou i le isi itu o Ioritana ma tala atu, ona e maua lo matou tofi i le itu i sasa‘e o Ioritana.”+

20 Ona tali atu lea o Mose iā i latou: “Afai tou te sauni mo le taua i luma o Ieova,+ 21 ma afai e tou te sauni uma mo le taua ma sopoʻia Ioritana i luma o Ieova, a o ia tuliesea ona fili mai i ona luma+ 22 se‘ia faatoʻilaloina le atunuu i luma o Ieova,+ a mavae lea, ona outou toe foʻi mai lea+ ma saʻoloto ai mai i le nofosala i luma o Ieova ma Isaraelu. Ona fai lea mo outou tofi lenei laueleele i luma o Ieova.+ 23 Ae afai tou te lē faia faapea, o le a outou agasala iā Ieova. Afai o lea, ia outou iloa e tuliloaina lava outou e a outou agasala. 24 O lea, ia outou fausia aai mo a outou fanau, ma ni pā maa mo a outou lafumanu,+ ae ia outou faia mea ua outou folafola mai.”

25 Ona faapea mai ai lea o atalii o Kato ma atalii o Reupena iā Mose: “O le a faia e au auauna mea uma ua poloaʻi mai ai lo matou alii. 26 E nonofo i aai o Kiliata a matou fanau, o a matou avā, o a matou lafumanu, ma a matou manu lalata uma,+ 27 ae o le a sopoʻia le isi itu e au auauna o ē uma ua sauni e tau le taua i luma o Ieova,+ e pei ona fai mai ai lo matou alii.”

28 Ua taʻu atu e Mose le poloaʻiga e faatatau iā i latou iā Eleasaro le ositaulaga, ma Iosua le atalii o Nuno, ma ulu o aiga o ituaiga o le fanauga a Isaraelu. 29 Ua fai atu Mose iā i latou: “Afai e sopoʻia e atalii o Kato ma atalii o Reupena Ioritana faatasi ma outou, o i latou uma ua sauni mo le taua i luma o Ieova, ma e faatoʻilaloina le atunuu i o outou luma, ona outou avatu lea e fai mo latou le laueleele o Kiliata.+ 30 Ae afai e latou te lē sauni mo le taua ma sopoʻia le isi itu faatasi ma outou, ona latou nonofo faatasi lea ma outou i le laueleele o Kanana.”

31 Ona tali mai ai lea o atalii o Kato ma atalii o Reupena: “O mea ua fetalai mai ai Ieova i au auauna, o mea ia matou te faia. 32 O le a matou sauni mo le taua ma sopoʻia le isi itu i luma o Ieova i le laueleele o Kanana,+ ae e fai ma o matou tofi fanua i lenei itu o Ioritana.” 33 Ona avatu lea e Mose iā i latou, o atalii ia o Kato ma atalii o Reupena+ ma le ʻafa o le ituaiga o Manase+ le atalii o Iosefa, o le malo o Sekono+ le tupu o tagata Amorī ma le malo o Oko+ le tupu o Vasana, o le laueleele ma aai o ia vaipanoa ma aai o le laueleele ua si‘omia ai lea mea.

34 Ua fausia* e atalii o Kato o Tipona,+ o Atarota,+ o Aroeru,+ 35 o Atirota-sofano, o Iasaru,+ o Iakepea,+ 36 o Pete-nimara,+ ma Pete-arana,+ o aai malupuipuia, ma ua latou fausia pā maa mo lafumanu. 37 Ua fausia e atalii o Reupena o Hesepona,+ o Eleale,+ o Kiriataima,+ 38 o Nepo,+ o Paala-meona+ (ua suia igoa o ia aai), ma Sepena; ona latou toe faaigoa lea o aai na latou toe fausia.

39 Ona ō atu ai lea i Kiliata o atalii o Makiro+ le atalii o Manase, ma ua latou faatoʻilaloina Kiliata ma tutuliese tagata Amorī sa iai i lea atunuu. 40 Ona foaʻi atu lea e Mose o Kiliata* iā Makiro le atalii o Manase ma ua ia nofo ai i inā.+ 41 Ua alu atu Iairo le atalii o Manase ma faatoʻilaloina nuu e nonofo i fale‘ie, ma ua ia faaigoa foʻi o Havota-iairo.*+ 42 Ua alu atu Nopa ma faatoʻilaloina Kinata ma ona tamaʻi aai, ma ua ia faaigoa foʻi i ai i lona lava igoa o Nopa.