Galuega a le ʻAuaposetolo
18 Ua mavae lenei mea, ona tuua lea e ia o Atenai ae alu atu i Korinito. 2 O i inā ua ia maua ai se tagata Iutaia e igoa iā Akula,+ na fanau i Pono, ma e leʻi leva ona ō mai mai i Italia ma lana avā o Pisila,* ona o le faatonuga a Kalaotio ina ia ō ese tagata Iutaia uma mai i Roma. Ona alu atu lea o ia iā i laʻua 3 ma nofo ai i lo la fale, ma ua latou galulue faatasi auā e tutusa a latou galuega,+ o ni tagata fai faleʻie. 4 I sapati uma,+ e lauga atu ai o ia* i le sunako,+ ma faatalitonu ai tagata Iutaia ma tagata Eleni.
5 Ua ō ifo Sila+ ma Timoteo+ mai i Maketonia, ae ua matuā tinoū Paulo e talaʻi atu le upu i tagata Iutaia, e faamaonia ai o Iesu o le Keriso.+ 6 Ae ua latou tetee mai pea ma fai mai upu leaga, ona ia lūlū lea o ona ofu+ ma faapea atu iā i latou: “Ia i luga o o outou ulu lo outou toto.+ Ua mamā aʻu.+ E amata atu nei ona ou alu i tagata o nuu ese.”+ 7 Ona ia tuua lea o i inā,* ae alu atu i le fale o le tagata tapuaʻi i le Atua e igoa iā Titi Iuso, o lē e sosoo lona fale ma le sunako. 8 A o Kiripo+ le pule o le sunako, ua talitonu o ia i le Alii, atoa foʻi ma lona aiga uma. E toʻatele foʻi tagata i Korinito o ē na faalogo i le feʻau, ua talitonu ma papatisoina i latou. 9 Ona fetalai mai lea o le Alii iā Paulo i le pō i se faaaliga: “Aua e te fefe, ae ia tautala atu pea ma aua le mapu e talaʻi, 10 auā ou te faatasi ma oe+ ma e leai se tagata e faia se mea leaga e te manuʻa ai; auā e toʻatele oʻu tagata i lenei aai.” 11 Ona nofo ai lea o ia i inā mo le tausaga ma masina e ono, ua aʻoaʻo atu iā i latou le afioga a le Atua.
12 A o fai Kaliona ma suikonesula* o Akaia, ua lotogatasi tagata Iutaia e tetee atu iā Paulo, ma taʻitaʻi atu o ia i luma o le nofoa faamasino 13 ma faapea atu: “Ua faatalitonu e lenei tamāloa tagata ina ia tapuaʻi i le Atua, i se auala e lē tusa ma le tulafono.” 14 Peitaʻi, a o tau fai atu se tala a Paulo, ae ua fai mai Kaliona i tagata Iutaia: “Tagata Iutaia e, pe afai e moni na ia faia se mea sesē po o se mea leaga, ou te faalogo atu la iā te outou. 15 Ae afai o ni finauga i ni lauga, ma ni igoa, ma la outou tulafono,+ faitalia outou. Ou te lē manaʻo e fai aʻu ma faamasino i na mea.” 16 Ona ia tutuliese lea o i latou mai i le nofoa faamasino. 17 Ua latou puʻe iā Sosene+ le pule o le sunako, ma sasa iā te ia i luma o le nofoa faamasino. Ae e leʻi popole lava i ai Kaliona i na mea.
18 Ua nofo ai pea i inā Paulo i aso e tele. Ona faamavae lea o ia i le ʻauuso, ma folau atu i Suria faatasi ai ma Pisila ma Akula, ma ua ʻoti faapupuu lona ulu i Kenikerea+ ona o se tautoga na ia faia. 19 Ua latou taunuu i Efeso, ona ia tuua ai lea o i laʻua i inā, ae alu atu i le sunako ma fefulifulisaʻi ai ma tagata Iutaia.+ 20 E ui lava ina latou talosaga atu pea iā te ia ina ia toe nofo mo sina taimi, ae e leʻi manaʻo ai o ia. 21 Ua ia faamavae atu ma faapea atu iā i latou: “Ou te toe foʻi mai iā te outou pe a finagalo i ai Ieova.”* Ona folau atu ai lea o ia mai i Efeso 22 ma alu ifo i Kaisareia. Ua alu aʻe o ia ma feiloaʻi i le faapotopotoga,* ona alu ifo ai lea i Anetioka.+
23 Ua mavae ni nai aso o iai o ia i inā, ona alu atu lea mai i lea nuu i lea nuu i le atunuu atoa o Kalatia ma Ferukia,+ ua faamalosi i le ʻausoo uma.+
24 Ua taunuu ane i Efeso se tagata Iutaia e igoa iā Apolo+ na fanau i Alesania; o ia o se tagata mauupu ma e poto i Tusitusiga Paia. 25 Na aʻoaʻoina* lenei tagata i le ala o Ieova* ma ua tumu o ia i le agaga, ua ia tautala atu ma aʻoaʻo atu ma le saʻo mea e uiga iā Iesu, ae e na o le papatisoga a Ioane na ia iloa. 26 Ua ia tautala atu ma le lototele i le sunako, ma ina ua faalogo Pisila ma Akula+ iā te ia, ona la ave lea o ia, ma faamatala atili atu ma le saʻo iā te ia le ala o le Atua. 27 Ua naunau o ia e alu atu i Akaia, ona tusi atu lea o uso i soo ma ʻaiʻoi atu iā i latou ina ia talileleia mai o ia. Ina ua taunuu atu o ia i inā, ona matuā fesoasoani lea o ia iā i latou ua talitonu ona o le agalelei faifua o le Atua; 28 auā ua ia matuā faamaonia le sesē o tagata Iutaia i luma o le lautele, a o ia faaalia atu iā i latou mai i Tusitusiga Paia, o Iesu o le Keriso lea.+