Ieremia
30 O le afioga a Ieova na oo mai iā Ieremia, ua faapea mai: 2 “O le mea lenei ua fetalai mai ai Ieova le Atua o Isaraelu, ‘Ia e tusi i se tusi upu uma ou te fai atu ai iā te oe. 3 Auā ua fetalai mai Ieova, “Faauta! e oo mai aso, ou te faapotopoto mai ai o ē na ave faapagota o loʻu nuu o Isaraelu ma Iuta,”+ ua fetalai mai ai Ieova, “ma ou toe faafoʻisia i latou i le laueleele na ou foaʻiina atu i o latou augātamā, ma e toe fai lava mo i latou.”’”+
4 O upu nei na fetalai mai ai Ieova iā Isaraelu ma Iuta.
5 O le mea lenei ua fetalai mai ai Ieova:
“Ua matou lagona le leo o le gatete;
Ua iai le mataʻu ma e leai se filemu.
6 Faamolemole, ia outou fesili atu pe e mafai ona fanau se tane?
Aiseā la ua ou vaaia ai tane malolosi uma, ua tuu o latou lima i o latou puimanava*
E pei o se fafine o le a fanau?+
Aiseā ua sesega ai foliga uma?
7 Auē! Auā o le aso mata‘utia* lea aso.+
E leai foʻi se aso e tusa ma lea aso,
O le taimi o puapuaga o Iakopo.
Ae e faaolaina mai ai lava o ia.”
8 Ua fetalai mai Ieova o ʻau, “I lenā aso, ou te gauia ai le amo mai i lou ua, ou te motusia foʻi ou noanoaga; ma e lē toe faia o ia* e tagata ese ma a latou pologa. 9 E latou te auauna iā Ieova lo latou Atua ma Tavita lo latou tupu, o lē ou te faatūina mo i latou.”+
10 “A o oe, laʻu auauna o Iakopo e, aua e te fefe,” ua fetalai mai ai Ieova,
“Aua foʻi e te mataʻu, Isaraelu e.+
Auā ou te faaolaina oe mai i le mea mamao,
Ma lau fanau mai i le nuu na ave faapagota i ai i latou.+
E toe foʻi mai Iakopo, ma e toʻafilemu ae e lē atuatuvale,
E leai foʻi se tasi e faamataʻu iā te ia.”+
11 Auā ua fetalai mai Ieova, “Ou te faatasi ma oe e faaola iā te oe.
12 Auā o le mea lenei ua fetalai mai ai Ieova:
“E leai se togafiti o le faatafunaina o oe.+
E leai se fofō o lou manuʻa.
13 E leai se tasi e finau atu mo oe,
E lē mafai lava ona faamālōlō lou papala.
E lē mafai ona togafitia oe.
14 Ua faagaloina oe e i latou uma e manana‘o tele iā te oe.+
Ua latou lē toe saʻili iā te oe.
Auā ua ou taia oe i le tā a le fili,+
Ma le faasalaga a lē e sauā,
Ona o le tele o lou nofosala ma le tele o au agasala.+
15 Aiseā ua e alaga mai ai ona o lou manuʻa?
Ua lē mafai ona togafitia lou tigā!
Ona o le tele o lou nofosala ma le tele o au agasala,+
Ua ou faia ai lenei mea iā te oe.
16 O le mea lea, e faaumatia ai i latou uma e faaumatiaina oe,+
Ma o ou fili uma, e ave faapagota i latou.+
O i latou foʻi e faoa au mea, e faoa a latou mea,
Ma o i latou uma e ave faagaoia au mea, ou te tuuina atu i latou ia gaoia a latou mea.”+
17 “Ae ou te faafo‘isia lou malosi ma togafitia ou manuʻa,”+ ua fetalai mai ai Ieova,
“E ui na latou taʻua oe o sē ua tuliesea:
‘O Siona lea, e leai se tasi ua saʻili atu i ai.’”+
18 O le mea lenei ua fetalai mai ai Ieova:
“O lenei, ou te faapotopotoina o ē na ave faapagota o faleʻie o Iakopo,+
Ou te tigā alofa foʻi i ona faleʻie paia.
E toe fausia le aai i luga o lona mea maupuʻepuʻe,+
E tū foʻi le ʻolo malosi i lona tulaga tonu.
19 E tupu mai ai foʻi iā i latou le faafetai ma leo o taliēega.+
Ou te faatoʻateleina i latou ae e lē faatoʻaitiitia;+
Ou te matuā faatuputeleina* i latou,
Ma e lē faatauvaa i latou.+
20 E avea lana fanau e pei ona iai i taimi ua mavae,
E matuā faatumauina foʻi lana faapotopotoga i oʻu luma.+
Ou te faasalaina ē uma ua faasauā iā te ia.+
21 E mai iā te ia lona alii mamalu,
O lona pule e tupu mai i totonu iā te ia.
Ou te faalatalata mai foʻi o ia, ma e faalatalata mai lava o ia iā te aʻu.”
“Auā a leai, o ai ea e lototele* e faalatalata mai iā te aʻu?” ua fetalai mai ai Ieova.
22 “E avea outou ma oʻu nuu,+ ma e avea foʻi aʻu ma o outou Atua.”+
23 Faauta! E alu atu ma le maʻemaʻeā le matagi malosi mai iā Ieova,+
E pei o se afā mataʻutia e taavili ifo i ulu o ē e amioleaga.
E tou te malamalama foʻi i ai i le faaiʻuga o aso.+