O le Tusi Muamua o Samuelu

2 Ona tatalo lea o Hana e faapea:

11 Ona alu lea o Elekana i lona fale i Rama, ae ua auauna le tama iā Ieova+ i luma o Eli le ositaulaga.

12 A o atalii o Eli o ni tagata e amioleaga;+ e la te leʻi amanaʻia Ieova. 13 O le mea lenei na la faia i mea e tatau ona maua e ositaulaga mai i le nuu:+ Pe a ofoina atu e se tagata se taulaga, ona sau ai lea o le auauna a le ositaulaga ma le tui mata tolu i lona lima a o tunu le aano o le manu, 14 ma tutui i le tanoa, po o le ulo ʻau lua, po o se tasi mea e tunu ai mea, po o se ulo ʻau tasi. O so o se mea e sau i le tui, e ave e le ositaulaga mo ia. E latou te faia faapea i Sailo i tagata Isaraelu uma e ō ane ai i inā. 15 A o leʻi susunuina foʻi le gaʻo+ e le tagata e ana le taulaga, e alu atu le auauna a le ositaulaga ma fai atu iā te ia: “Ia aumai se aano o le manu e tao mo le ositaulaga. E na te lē talia mai iā te oe le aano ua tunu, ae e na o le aano mata o le manu.” 16 Pe a fai mai le tagata iā te ia: “Seʻi faamautinoa ua susunu muamua le gaʻo,+ ona e ave ai lea mo oe o mea uma e te manaʻo i ai,” ae fai atu o ia: “E leai, ia aumai nei loa; afai e leai, o le a ou faoa mai iā te oe!” 17 Ona matuā telē ai lea o le agasala a auauna i luma o Ieova,+ auā ua lē faaaloalo na tagata i taulaga iā Ieova.

18 Ua auauna Samuelu+ i luma o Ieova, ua ofu foʻi i le efota+ e fai i le ʻie lino, e ui ua na o ia o se tamaitiiti. 19 Ua faia foʻi e lona tinā se ofu lima pupuu laʻitiiti mo ia, ua ia avatua iā te ia i lea tausaga ma lea tausaga, pe a ō aʻe o ia faatasi ma lana tane e ofo atu le taulaga i tausaga taʻitasi.+ 20 Ua faamanuia foʻi Eli iā Elekana ma lana avā, ua faapea atu: “Ia foaʻi atu e Ieova iā te oe se fanau mai i lenei avā, e sui ai le tama ua foaʻiina atu iā Ieova.”+ Ona la toe foʻi lea i lo la nuu. 21 Ua manatu mai Ieova iā Hana, ma ua tō ai o ia+ ma ua fanauina ai ni tama tama se toʻatolu, ma ni tama teine se toʻalua. Ua faaauau foʻi ona tuputupu aʻe Samuelu i luma o Ieova.+

22 Ua toeaina Eli, ma ua faalogo o ia i mea uma o loo faia e ona atalii+ i Isaraelu uma, ma ua momoe ona atalii ma fafine na auauna i le faitotoʻa o le faleʻie o le feiloa‘iga.+ 23 E masani ona ia fai atu iā i laʻua: “Aiseā ua lua saga faia ai nei mea? Auā ua ou faalogo i tala i mea leaga e uiga iā te oulua mai i le nuu uma. 24 Soia ia, oʻu atalii e, e lē lelei le tala ua ou faalogo ai, lea e feaveaʻi e le nuu o Ieova. 25 Afai e agasala le tagata i se isi tagata, e mafai ona talosaga atu se tasi iā Ieova mo ia;* ae afai e agasala le tagata iā Ieova,+ o ai ea e tatalo mo ia?” Peitaʻi, ua la mumusu e faalogo i lo la tamā, auā ua maumauaʻi Ieova e faaoo le oti iā i laʻua.+ 26 Ua tupu pea le tama o Samuelu, ma ua sili atu ona alofagia o ia e Ieova atoa ma tagata.+

27 Ua alu atu le tasi tagata o le Atua iā Eli ma faapea atu iā te ia: “O le mea lenei ua fetalai mai ai Ieova, ‘Po ou te leʻi faailoa atu ea aʻu i le aiga o lou augātamā, a o iai i latou i Aikupito o ni pologa i le aiga o Farao?+ 28 Na filifilia o ia mai i ituaiga uma o Isaraelu+ e avea o se ositaulaga mo aʻu, e alu aʻe i loʻu fata faitaulaga+ e faia taulaga mū, e ofoina atu mea manogi,* ma ofu i le efota i oʻu luma; na ou foaʻi atu i le aiga o lou augātamā o taulaga uma na faia i le afi e le fanauga a Isaraelu.*+ 29 Aiseā ua outou lē migao ai i laʻu taulaga ma le taulaga na ou poloaʻi atu ai e faia i loʻu fale?+ Aiseā ua e faamamaluina ai ou atalii nai lo o aʻu, e ala i lo outou aai i mea e sili ona lelei o taulaga uma ua faia e loʻu nuu o Isaraelu?+

30 “‘O le mea lea ua fetalai mai ai Ieova le Atua o Isaraelu: “E moni na ou fai atu, o lou aiga ma le aiga o lou augātamā, e latou te savavali pea i oʻu luma.”+ A o lenei ua toe fetalai mai Ieova: “E lē toe tupu lava lenā mea, auā ou te faamamaluina o ē e faamamaluina aʻu,+ ae ta‘ufaatauvaaina o ē e ʻinoʻino mai iā te aʻu.” 31 Faauta! E oo mai aso ou te aveesea ai lou malosi* ma le malosi o le aiga o lou augātamā, ina ia lē toe iai se tamāloa i lou aiga e aulia le soifua matua.+ 32 E ui i mea lelei uma ua faia iā Isaraelu, e te iloa atu lava le fili i loʻu fale;+ ma e lē toe iai se tamāloa i lou aiga e aulia le soifua matua. 33 E iai se tagata o lou aiga ou te lē aveesea mai i le auauna i loʻu fata faitaulaga, ma o ia e māfua ai ona tauaso ou mata ma vaivai ai lou loto; ae o le toʻatele o lou aiga, e fasiotia e tagata i le pelu.+ 34 O le mea e tupu i ou atalii e toʻalua, o Hofeni ma Fineaso, o le a fai ma faailoga iā te oe: E feoti i laʻua uma i le aso e tasi.+ 35 Ou te faatūina mo aʻu o se ositaulaga faamaoni.+ E na te faia mea e tusa ma loʻu loto ma oʻu manatu; ma ou te faia lona aiga ina ia auauna o ni ositaulaga mo se taimi umi, e savali foʻi o ia i luma o lē ua ou faauuina i aso uma lava. 36 O sē e totoe o lou aiga, e sau ma ifo mai iā te ia ma ōle mai mo se galuega ina ia maua ai sina tupe ma se falaoa, ma e faapea ane: “Faamolemole, ia e tofia mai iā te aʻu se faiva o le ositaulaga, ina ia ou ʻai ai i sina meaʻai.”’”+