O le Tusi Muamua o Samuelu
19 Mulimuli ane, ua fai atu Saulo iā Ionatana lona atalii ma ana auauna uma, e mana‘o ina ia fasiotia Tavita.+ 2 Ae ona ua matuā alofa Ionatana le atalii o Saulo iā Tavita,+ ua fai mai ai Ionatana iā Tavita: “O loo lamalama loʻu tamā o Saulo e fasioti oe. Faamolemole, ia e faaeteete taeao, ma ia e alu i se mea lilo ma e lafi ai. 3 A o aʻu, ou te alu atu ma tū i tafatafa o loʻu tamā i le fanua e te iai, ou te tautala atu foʻi i loʻu tamā e uiga iā te oe, ma pe afai ou te iloa le mea o le a tupu, ona ou taʻu atu lea iā te oe.”+
4 Ua tautala atu ma le agalelei Ionatana iā Saulo lona tamā e uiga iā Tavita,+ ua faapea atu iā te ia: “Aua neʻi agasala le tupu i lana auauna o Tavita, auā e leʻi agasala lava o ia iā te oe, ma ua faia e ia galuega lelei mo oe. 5 Na ia tuua lona ola i se tulaga lamatia* ina ia fasia ai le Filisitia,+ ma aumaia ai e Ieova le manumalo* tele mo Isaraelu uma. Na e vaai i ai, ma na e matuā fiafia foʻi i ai. Aiseā la e te agasala ai i le toto o le tagata e lē sala i le fasiotia fua o Tavita?”+ 6 Ona faalogo lea o Saulo i upu a Ionatana, ua tautō foʻi Saulo: “Ou te tautō iā Ieova le Atua soifua, ou te lē fasiotia lava o ia.” 7 Mulimuli ane, ona valaau atu lea o Ionatana iā Tavita, ma taʻu atu iā te ia nei upu uma. Ona aumaia lea e Ionatana o Tavita iā Saulo, ma auauna ai pea i ona luma e pei o aso ua teʻa.+
8 Mulimuli ane, ua toe tau le taua, ua alu atu Tavita e tau ma Filisitia, ma fasia i latou i le fasiga tele, ona latou sosola ese ai lea i ona luma.
9 Ua oo iā Saulo le agaga leaga* mai iā Ieova+ a o nofo o ia i lona fale ma lana tao o loo i lona lima, o loo tā foʻi e Tavita le kitara.+ 10 Ua taumafai Saulo ina ia tutu‘iina Tavita ia mau i le puipui, ae na ʻalo o ia i luma o Saulo, ma ua tū ai le tao i le puipui. Ona sola lea o Tavita i lenā pō. 11 Ua aauina atu e Saulo ana avefeʻau e mataʻi le fale o Tavita ina ia fasiotia o ia i le taeao;+ ae ua fai atu le avā a Tavita o Mekala iā te ia: “Afai e te lē sola i le pō nei, e fasiotia lava oe taeao.” 12 Ona tuutuu ifo faavave lea e Mekala o Tavita mai i le faamalama, ina ia sola ese ma sao ai o ia. 13 Ona ave lea e Mekala o le terafimi* ma tuu i luga o le moega, ma tuu le ʻie fulufulu ʻoti i le mea e taoto ai le ulu, ona ia faa‘afu ai lea i le ʻie.
14 Ua aauina atu e Saulo avefeʻau e puʻe Tavita, ae ua fai mai Mekala: “O loo maʻi o ia.” 15 Ona aauina atu lea e Saulo o avefeʻau e vaai Tavita, ma faapea atu: “Ia aumai o ia iā te aʻu i luga o lona moega, ina ia ou fasiotia o ia.”+ 16 Ina ua ō atu avefeʻau i totonu, vaai! o le terafimi* o loo i luga o le moega, ma le ʻie fulufulu ʻoti o loo i le mea e taoto ai le ulu. 17 Ona fai mai lea o Saulo iā Mekala: “Aiseā ua e faavaleaina ai faapea aʻu, ma e auina ese atu ai loʻu fili+ ina ia sao ai?” Ua fai atu Mekala iā Saulo: “Na ia fai mai iā te aʻu, ‘Ia tuu mai aʻu ou te alu ese! Afai e leai, o le a ou fasiotia oe.’”
18 Ua sola Tavita ma ua sao, ua oo atu iā Samuelu i Rama.+ Ona ia taʻu atu lea iā te ia o mea uma na faia e Saulo iā te ia. Ona la ō lea ma Samuelu ma ua nonofo i Naiota.+ 19 Mulimuli ane, ua taʻu atu iā Saulo e faapea: “Faauta! O loo iai Tavita i Naiota i Rama.” 20 Ona aauina atu loa lea e Saulo o avefeʻau e puʻe Tavita. Ina ua latou iloa atu tagata matutua o le ʻauperofeta o loo faia valoaga, ma o loo tū ai Samuelu e taʻitaʻia i latou, ona osofia lea e le agaga o le Atua o avefeʻau a Saulo, ua latou amioaʻi ai foʻi e pei o ni perofeta.
21 Ina ua latou taʻu atu lea tala iā Saulo, ona ia aauina atu loa lea o isi avefeʻau, ae ua amioaʻi foʻi i latou e pei o ni perofeta. Ona toe aauina atu lea e Saulo o isi avefeʻau, o le lona tolu lea, ae ua amioaʻi foʻi i latou e pei o ni perofeta. 22 Mulimuli ane, ua alu atu foʻi o ia i Rama. Ina ua taunuu o ia i le vaieli tele i Seku, ona ia fesili atu lea: “O fea o iai Samuelu ma Tavita?” Ua latou tali mai: “O loo iai i Naiota+ i Rama.” 23 A o alu atu pea o ia i lona ala mai i inā e agaʻi atu i Naiota i Rama, ua osofia foʻi o ia e le agaga o le Atua, ma ua ia savali ma amioaʻi e pei o se perofeta, seʻia taunuu i Naiota i Rama. 24 Ua tatala ese e ia ona ofu ma ua amioaʻi o ia e pei o se perofeta i luma o Samuelu, ua taoto ai pea o ia ua lē lavalavā* i lenā aso atoa ma le pō atoa. O le mea lea ua latou faapea ane ai: “Po o Saulo ea foʻi o se tasi o le ʻauperofeta?”+