O le Tusi Lona Lua o Nofoaiga a Tupu

22 Ona faia lea e tagata o Ierusalema o Aasaia lona atalii aupito i la‘itiiti ma tupu e sui iā te ia, auā na fasiotia uma ē e matutua e ʻau e faoa mea, na ō mai faatasi ma tagata Arapi i le togālauapi.+ Ona pule lea o Aasaia le atalii o Ioramo e fai ma tupu o Iuta.+ 2 E 22 tausaga o Aasaia ina ua fai o ia ma tupu, ma e tasi le tausaga na ia pule ai mai i Ierusalema. O le igoa o lona tinā, o Atalia+ le afafine o le atalii o Omeri.+

3 Na savali foʻi o ia i ala o le aiga o Aapo,+ auā sa avea lona tinā ma ana faufautua i le faia o mea leaga. 4 Ua ia faia pea mea leaga i le silafaga a Ieova, e pei o le aiga o Aapo, auā na avea i latou ma ana faufautua ina ua maliu lona tamā, ma iʻu ai i le faaumatiaina o ia. 5 Na faalogo o ia i la latou fautuaga, ma ua la ō ai ma Ioramo le atalii o Aapo le tupu o Isaraelu, e siitaua iā Asaeli+ le tupu o Suria i Ramota-kiliata,+ lea na faamanuʻalia ai Ioramo e tagata fanafana aū. 6 Ona toe foʻi lea o Ioramo i Isereelu+ e togafiti ona manuʻa, na faamanuʻalia ai o ia i Rama, ina ua tau o ia ma Asaeli le tupu o Suria.+

Ua alu ifo Aasaia* le atalii o Ioramo+ le tupu o Iuta, e vaai Ioramo+ le atalii o Aapo i Isereelu, auā ua faamanuʻalia o ia.*+ 7 Peitaʻi, ua faapogaia e le Atua le oo o le oti iā Aasaia ina ua sau o ia iā Ioramo; ina ua oo mai o ia, na la ō ma Ioramo ina ia faafetaui Ieʻu+ le atalii o le atalii o Nimesi, o lē na faauuina e Ieova e faaumatia* le aiga o Aapo.+ 8 Ina ua faaoo e Ieʻu le sala faafaamasinoga i le aiga o Aapo, ua ia maua atu perenise o Iuta ma atalii o uso o Aasaia, o auauna ia a Aasaia, ma ua ia fasiotia i latou.+ 9 Ona saʻilia lea e Ieʻu o Aasaia; ua latou puʻea o ia i le mea na lafi ai i Samaria, ma aumai o ia iā Ieʻu. Ona latou fasiotia lea o ia ma tanu,+ auā ua latou faapea ane: “O ia o le atalii o le atalii o Iosefatu, o lē na saʻili iā Ieova ma lona lotoatoa.”+ Ua leai foʻi se tasi i le aiga o Aasaia na iai se malosi e pule ai i le malo.

10 Ina ua iloa e Atalia+ le tinā o Aasaia ua oti lana tama, ona tulaʻi lea o ia ma fasiotia fanau uma lava a le tupu o le aiga o Iuta.+ 11 A o Iosepa le afafine o le tupu, ua ia ave Ioasa+ le atalii o Aasaia, ma ave faananā o ia mai i atalii o le tupu o ē na tatau ona fasiotia, ma tuu o ia ma lana tausitama i le potumoe i totonu. Ua faalafi o ia e Iosepa le afafine o le tupu o Ioramo+ (o ia o le avā a Ioiata+ le ositaulaga ma o se tuafafine o Aasaia) ina neʻi iloa e Atalia, ma e leʻi fasiotia ai o ia.+ 12 Ua iai pea o ia ma i latou i le fale o le Atua moni, ua lafi ai mo tausaga e ono, a o pule Atalia i le nuu.