O le Tusi i le Faapotopotoga i Roma

6 O lenei, o le ā sa tatou upu e fai atu? Pe e tatou te nonofo pea ea i le agasala ina ia faatele ai le agalelei faifua? 2 Ia aua lava neʻi faapea! Talu ai ua tatou oti e tusa ai ma le agasala,+ e faapefea la ona tatou faia pea le agasala?+ 3 Pe tou te leʻi iloa ea, o i tatou uma na papatisoina iā Keriso Iesu,+ na papatisoina i lona maliu?+ 4 O lenei, na tanumia faatasi i tatou ma ia i lo tatou papatisoga i lona maliu,+ e pei ona faatūina Keriso mai i le oti i le mamalu o le Tamā, e ao foʻi la ona tatou savavali i le ola fou.+ 5 Afai ua faatasia i tatou ma ia i le faatusa o lona maliu,+ e faapea foʻi ona faatasia i tatou ma ia i le faatusa o lona toetū mai.+ 6 Auā ua tatou iloa na tutuʻi lo tatou tagata tuai i luga o le laau faatasi ma ia,+ ina ia lē toe pulea ai i tatou e le tino agasala,+ ma lē toe faapologaina ai i tatou i le agasala.+ 7 Auā o lē ua oti ua magalo* o ia mai i lana agasala.

8 Afai ua tatou oti faatasi ma Keriso, ua tatou talitonu e tatou te ola foʻi faatasi ma ia. 9 Auā ua tatou iloa ua toe faatūina nei Keriso mai i le oti,+ e lē toe maliu o ia;+ e lē toe pule foʻi le oti iā te ia. 10 I lona maliu, e na o le faatasi lava ona maliu e tusa ai ma le agasala,*+ a o lona soifuaga, ua soifua o ia e tusa ai ma le Atua. 11 E faapea foʻi outou, ia outou manatu ua oti outou e tusa ai ma le agasala, ae ua ola mo le Atua e ala iā Keriso Iesu.+

12 O lenei, aua neʻi pule pea le agasala e pei o se tupu i o outou tino augavale,+ e tou te usiusitaʻi ai i ona tuʻinanau. 13 Aua foʻi neʻi tuuina atu o outou tino i le agasala e fai ma auupega o le amiolētonu, ae ia tuuina atu outou i le Atua e pei o ē ua ola mai i le oti, ia faapea foʻi ona tuuina atu o outou tino i le Atua e fai ma auupega o le amiotonu.+ 14 E lē tatau ona pule le agasala iā te outou, auā ua outou lē toe nonofo i le tulafono,+ a o le agalelei faifua.+

15 Ona ā lea? Pe e tatou te faia ea se agasala ona ua tatou lē nonofo i le tulafono, a o le agalelei faifua?+ Ia aua lava neʻi faapea! 16 Pe e tou te lē iloa ea, afai tou te tuuina atu outou i se tasi e fai ma pologa e usiusitaʻi i ai, o outou o ana pologa auā ua outou usiusitaʻi iā te ia,+ a lē o le agasala+ e iʻu ai i le oti,+ po o le usiusitaʻi e iʻu ai i le amiotonu? 17 Ae faafetai i le Atua, ona e ui sa fai outou ma pologa a le agasala, ae ua outou usiusitaʻi ma o outou loto i lenā aʻoaʻoga na tuuina atu iā te outou. 18 Talu ai ua tuusaʻoloto outou mai i le agasala,+ ua avea ai outou ma pologa a le amiotonu.+ 19 O upu masani a tagata ou te fai atu ai ona o vaivaiga o o outou tino; e pei lava ona outou tuuina atu o outou tino e fai ma pologa i amioga lē mamā ma le solitulafono, lea e iʻu ai i le solitulafono, ia faapea foʻi ona tuuina atu o outou tino, e fai ma pologa i le amiotonu lea e iʻu ai i le faapaiaina.+ 20 Auā sa aunoa outou ma le amiotonu, a o pologa outou i le agasala.

21 O lea la, o ā ni fua na outou fuaina mai i lenā taimi? O mea na ua outou māsiasi ai. Auā o le iʻuga o na mea, o le oti lea.+ 22 Peitaʻi, ona ua faasaʻolotoina outou mai i le agasala ma avea ma pologa a le Atua, ua outou fua mai ai ni fua e faapaiaina ai,+ ma iʻu ai i le ola e faavavau.+ 23 Auā o le totogi o le agasala o le oti lea,+ a o le meaalofa a le Atua o le ola e faavavau lea,+ e ala iā Keriso Iesu lo tatou Alii.+