Esekielu

43 Ona ia taʻitaʻi atu lea o aʻu i le faitotoʻa e faasaga i le itu i sasaʻe.+ 2 O i inā, na ou vaaia ai le mamalu o le Atua o Isaraelu o loo sau mai i le itu i sasaʻe,+ ma o lona siʻufofoga ua pei o le taalili o vai e tele;+ ua malamalama foʻi le lalolagi ona o lona mamalu.+ 3 O le mea na ou vaaia, ua pei o le faaaliga na ou vaaia ina ua ou sau* e faaumatia le aai,* ma ua foliga e pei o le faaaliga na ou vaaia i tala ane o le vaitafe o Kepara;+ ona ou faapaʻū faō ai lea i le eleele.

4 Ona sau ai lea o le mamalu o Ieova i le malumalu,* e ala i le faitotoʻa o loo faasaga i le itu i sasaʻe.+ 5 Ua faatū aʻu i luga e le agaga ma avatu i totonu o le lotoā pito i totonu, ma ua ou vaaia ai ua tumu le malumalu i le mamalu o Ieova.+ 6 Ona ou faalogo lea ua tautala mai se isi iā te aʻu mai i le malumalu, ua sau foʻi le tagata ma tū i oʻu autafa.+ 7 Ua faapea mai o ia* iā te aʻu:

“Le atalii e o le tagata, o le mea lenei ua iai loʻu nofoālii+ ma le mea e tuu ai alofivae o oʻu vae,+ lea o le a ou nofo ai i le lotolotoi o le fanauga a Isaraelu e faavavau.+ E lē toe faaleagaina loʻu igoa paia e le aiga o Isaraelu,+ o i latou ma o latou tupu, e ala i a latou faiga faatalitane faaleagaga ma tino oti o o latou tupu pe a feoti.* 8 Na latou faaleagaina lo‘u igoa paia i mea inosia na latou faia, ina ua latou tuuina a latou mea e ulu atu ai i autafa o le mea e ulu atu ai i lo‘u malumalu, ma tuu a latou pou o le faitoto‘a i autafa o le pou o le faitoto‘a o lo‘u malumalu, ma e na o le pā puipui i le vā o i latou ma a‘u.+ O le mea lea, na ou faaumatia ai i latou i lo‘u ita tele.+ 9 O lenei, ia latou lafoaʻi mamao ese a latou faiga faatalitane faaleagaga ma tino oti o o latou tupu mai iā te aʻu, ona ou nofo ai lea i lo latou lotolotoi e faavavau.+

10 “A o oe, le atalii e o le tagata, ia faamatala atu le malumalu i le aiga o Isaraelu,+ ina ia latou lagona ai le māsiasi ona o a latou mea sesē,+ ma e ao ona latou iloiloina le ata o le malumalu.* 11 Afai latou te lagona le māsiasi ona o mea uma na latou faia, e ao ona e faailoa atu iā i latou le ata o le malumalu, o ona faatulagaga, o mea e ulufafo ai, ma mea e ulufale ai.+ Ia faaali atu iā i latou ata uma ma ona tuutuuga uma, o ona ata uma ma ona tulafono uma, ma ia tusi i lalo i luma o o latou mata ina ia latou iloa ai le ata atoa ma tausia ona tuutuuga uma.+ 12 O le tulafono lenei o le malumalu. O le vaega atoa i luga o le mauga i itu uma o le malumalu, o se mea lea e silisili ona paia.+ Faauta! O le tulafono lenei o le malumalu.

13 “O le fua lenei o le vaega pito i lalo o le fata faitaulaga: O lona maualuga e tasi le kupita+ (e faaopoopo i le kupita e tasi, le lautele o le alofilima).* E tasi foʻi le kupita e lautele atu ai i tua le vaega lea, nai lo o le vaega la‘itiiti lea o loo i luga aʻe. E iai i itu o loo lautele i tua, se mea e siʻo faataamilo ai,* e tasi le aga* lona maualuga. 14 O le vaega laʻitiiti, e lua kupita lona maualuga. E tasi le kupita e lautele atu ai le vaega lea, nai lo o le vaega telē lea e i luga aʻe. O lenei vaega telē e fā kupita lona maualuga. E kupita foʻi e lautele atu ai lenei vaega, nai lo o le vaega o loo i luga aʻe. 15 O le vaega aupito i luga, o le taʻinafi lea o le fata faitaulaga ma e fā kupita lona maualuga, e lālā mai ai foʻi agaʻi i luga seu e fā.+ 16 E faatafafā le taʻinafi o le fata faitaulaga, e 12 kupita le umi ma e 12 kupita le lautele.+ 17 O itu e fā o le vaega telē, e 14 kupita lona umi ma e 14 kupita lona lautele; ma e iai se mea e ʻafa kupita e siʻo faataamilo ai, ma o le pito i lalo o le fata faitaulaga, e tasi le kupita le lautele i itu uma.

“E faasaga ona faasitepu i le itu i sasaʻe.”

18 Ona ia fetalai mai lea iā te aʻu, “Le atalii e o le tagata, o le fetalaiga lenei a le Alii Pule Silisili Ese o Ieova: ‘O faatonuga nei e ao ona outou mulimuli i ai pe a faia le fata faitaulaga, ina ia osi ai le taulaga mū ma sausau ai le toto i ona luga.’+

19 “‘Ia e avatu se tamaʻi povi poʻa mai i le lafu mo le taulaga o agasala+ i ositaulaga sa Levī, o le fanau a Satoka,+ o ē e faalatalata mai iā te aʻu e auauna mai iā te aʻu,’ ua fetalai mai ai le Alii Pule Silisili Ese o Ieova. 20 ‘Ia e avatu se vaega o lona toto ma tuu i luga o seu e fā o le fata faitaulaga, i luga foʻi o tulimanu e fā o le vaega telē, ma le mea o loo siʻo faataamilo ai, ina ia faamamā ai mai i le agasala ma faia ai se togisala mo lea mea.+ 21 Ona e avatu lea o le tamaʻi povi poʻa, o le taulaga lea o agasala, ina ia susunu i le mea ua faatulagaina i fafo o le malumalu.+ 22 O le aso lona lua e te ofoina mai ai le ʻoti poʻa e matuā lelei e fai ma taulaga o agasala; ma o le a latou faamamāina le fata faitaulaga mai i le agasala, e pei ona latou faamamāina mai i le agasala e ala i le tamaʻi povi poʻa.’

23 “‘Pe a uma ona e faamamāina le fata faitaulaga mai i le agasala, ona e ofoina mai lea o se tamaʻi povi poʻa e matuā lelei lava mai i le lafu, ma se mamoe poʻa e matuā lelei lava mai i le lafu. 24 E ao ona e avatu ia manu i luma o Ieova ma e ao ona lūlū i ai e ositaulaga le masima,+ ma ofo atu ia manu o le taulaga mū iā Ieova. 25 E ao ona e ofo atu se ʻoti poʻa mo taulaga o agasala i aso taʻitasi mo aso e fitu,+ ma se tamaʻi povi poʻa mai i le lafu ma se mamoe poʻa mai i le lafu; e ao ona e ofo atu manu e lē ponā.* 26 E fitu aso e ao ona latou faia ai le togisala mo le fata faitaulaga, ma e ao ona latou faamamāina ma faaaogā loa. 27 Pe a atoa ia aso, ma ua oo i le aso lona valu+ ma faasolo atu ai, o le a ofo atu ai e ositaulaga a outou* taulaga mū ma a outou taulaga faifaatasi i luga o le fata faitaulaga; ma o le a ou matuā fiafia ai iā te outou,’+ ua fetalai mai ai le Alii Pule Silisili Ese o Ieova.”