Faamasino
15 Ua mavae sina taimi i ona pō o le seleselega o saito, ona asiasi atu ai lea o Samasoni i lana avā, na ia ave foʻi se tamaʻi ʻoti. Na ia faapea ane: “Ou te fia alu atu i laʻu avā i le potumoe.”* Ae e leʻi faatagaina o ia e le tamā o lana avā e alu i totonu. 2 Ua fai mai le tamā o lana avā: “Na ou manatu, ʻAi ua e ʻinoʻino iā te ia.’+ O lea na ou tuuina atu ai o ia i lau uō sili.+ Pe e lē sili atu ea le lalelei o lona uso laʻitiiti nai lo o ia? Faamolemole, inā ave ia o ia mo oe.” 3 Ae ua fai atu Samasoni: “E lē mafai la ona tuua‘ia a‘u e Filisitia, pe a ou faia se mea e latou te tigā ai.”
4 Ona alu lea o Samasoni ua pupuʻe alope e 300. Ona ia ave lea o sulu, ua nonoa le siʻusiʻu o le tasi alope i le isi alope, ma tuu le sulu e tasi i le vā o siʻusiʻu e lua. 5 Ona ia tutu lea o sulu i le afi, ma tutuli atu alope i le fanua o loo iai togāsaito o Filisitia. Ona ia susunu ai lea o mea uma o faaputuga saito, o le togāsaito, faapea fo‘i togāvine ma togāolive.
6 Ona fesili ane lea o tagata Filisitia: “O ai na faia lenei mea?” Ua ta‘u atu iā i latou: “O Samasoni, le tane a le afafine o le tagata Timenata, auā na ave e le tamā o lana avā lana avā, ma tuuina atu i lana uō sili.”+ Ona ō aʻe lea o tagata Filisitia ma susunu o ia ma lona tamā i le afi.+ 7 Ona fai atu lea o Samasoni iā i latou: “Afai o le mea lenei ua outou faia, ou te lē mapu se‘iloga ua ou tauimasui atu iā te outou.”+ 8 Ua ia fasia i latou* i le fasiga tele, ona ia alu ifo lea ma nofo i le ana* o le papa o Etama.
9 Mulimuli ane, ua ō aʻe tagata Filisitia ma tolauapi i Iuta, ua latou feoaʻi solo i Leʻi.+ 10 Ona fai atu lea o tane o Iuta: “Aiseā ua outou ō mai ai e tau ma i matou?” ona latou tali mai lea: “Ua matou ō mai ina ia pu‘e* iā Samasoni, e faia iā te ia e pei ona ia faia iā i matou.” 11 Ona ō ifo lea o tane o Iuta e toʻa 3,000 i le ana* o le papa o Etama ma fai mai iā Samasoni: “Pe e te leʻi iloa ea ua pule Filisitia iā i tatou?+ Aiseā ua e faia ai lenei mea iā i matou?” Ona ia fai atu lea: “E pei ona latou faia iā te aʻu, e faapea foʻi ona ou faia iā i latou.” 12 Ae ua latou fai mai iā te ia: “Ua matou ō mai e pu‘e* oe, ma tuuina atu oe i tagata Filisitia.” Ona fai atu lea o Samasoni: “Ia outou tautō mai iā te aʻu, e tou te lē fasia aʻu.” 13 Ua latou faapea mai iā te ia: “E leai, ae tau lava ina matou saisai o oe, ma tuuina atu oe iā i latou; ae matou te lē fasiotia oe.”
Ona latou saisai lea o ia i maea fou e lua, ma ave aʻe o ia mai i le papa. 14 Ua oo o ia i Leʻi, ua alalaga fiafia foʻi Filisitia ina ua latou vaaia o ia. Ona osofia lea o ia e le agaga o Ieova,+ ma ua avea maea sa i ona lima e pei o ni manoa lino ua mū i le afi, ua paʻuʻū ese foʻi faamau mai i ona lima.+ 15 Ona ia maua lea o le ivi auvae fou o le asini poʻa, ua aapa atu lona lima ma tago i ai, ma ua ia fasiotia ai tagata e toʻa 1,000.+ 16 Ona fai ane lea o Samasoni:
“O le ivi auvae o le asini—e tasi le faaputuga, e lua faaputuga!
O le ivi auvae o le asini, ua ou fasiotia ai tagata e toʻa 1,000.”+
17 Ina ua uma ana upu, ona ia togi ese lea o le ivi auvae, ma faaigoa lea nofoaga o Ramaleʻi.*+ 18 Ua matuā fia inu o ia, ona ia valaau atu lea iā Ieova: “O oe na e aumaia lenei manumalo tele i lima o lau auauna. A o lenei, po o le a ou oti ea i loʻu fia inu, ma maua ai aʻu i lima o tagata e lē peritomeina?” 19 Ona faapogaia lea e le Atua o se omo sa i Leʻi ina ia māvae, ma ua sau ai le vai.+ Ina ua inu o ia, ona toe foʻi atu ai lea o lona malosi ma ua toe ola ai. O le mea lea, na ia faaigoa ai lea nofoaga o Eniakori,* o loo i Leʻi e oo mai i aso nei.
20 Na ia faamasino iā Isaraelu i ona pō o Filisitia mo tausaga e 20.+