O le Tusi i le Faapotopotoga i Roma
4 O lea la, o le ā sa tatou upu i le mea na maua e Aperaamo lo tatou augātamā i la le tino? 2 Auā pe ana taʻuamiotonuina Aperaamo ona o galuega, semanū e iai se mea e mitamita ai o ia, ae lē i luma o le Atua. 3 O le ā ua fai mai ai tusitusiga paia? “Na faatuatua Aperaamo iā Ieova,* ma na silasila iā te ia o lē e amiotonu.”+ 4 O le totogi o le tagata faigaluega, e vaai i ai o se mea e tatau ona ia mauaina* ae e lē ona o le agalelei faifua. 5 A o le tagata e lē faigaluega ae e faatuatua i Lē e na te taʻuamiotonuina le tagata e lē amioatua, ua silasila i ai e amiotonu o ia i lona faatuatua.+ 6 E pei foʻi ona taʻua e Tavita le fiafia o le tagata e silasila i ai le Atua e amiotonu e aunoa ma galuega: 7 “E fiafia i latou o ē e faamagaloina a latou solitulafono ma ua ufitia a latou agasala; 8 e fiafia foʻi le tagata e lē faitaulia e Ieova* ana agasala.”+
9 Pe e na o tagata ua peritomeina e maua lenei fiafia, pe e fiafia foʻi ma tagata e lē peritomeina?+ Auā ua tatou faapea atu: “Na Ia silasila iā Aperaamo o sē e amiotonu ona o lona faatuatua.”+ 10 O lē fea la tulaga na silasila i ai e amiotonu? Pe ina ua peritomeina o ia pe a o leʻi peritomeina? E lē ina ua peritomeina, ae a o leʻi peritomeina. 11 Na ia maua se faailoga,+ o le peritomeina lea, e avea ma faamaoniga* o le amiotonu ona o lona faatuatua a o leʻi peritomeina o ia, ina ia avea ai o ia ma tamā o i latou uma e faatuatua+ a o leʻi peritomeina, ina ia silasila ai iā i latou o ni ē e amiotonu; 12 ina ia avea ai foʻi o ia ma tamā o fanau ua peritomeina, e lē gata iā i latou o ē e tausisi i le peritomeina, a o i latou foʻi o ē e mulimulituʻi i tulagavae o le faatuatua o lo tatou tamā o Aperaamo,+ a o leʻi peritomeina.
13 Auā e lē o tulafono na maua ai e Aperaamo po o lana fanau le folafolaga e fai o ia ma suli o le lalolagi,+ ae e ala i le amiotonu ona o le faatuatua.+ 14 E faalēaogāina le faatuatua pe a tausisia pea le tulafono e i latou ua fai ma suli, ma ua soloia ai le folafolaga. 15 O le mea moni, o le Tulafono e oo mai ai le toʻasā,+ ae a leai se tulafono e leai foʻi se solitulafono.+
16 O lea la, ua maua lenei mea ona o le faatuatua, ina ia tusa ma le agalelei faifua+ ina ia faamautinoa ai le folafolaga i lana fanau uma,+ e lē na o ē e tausisi i le Tulafono, a o ē foʻi e tausisi i le faatuatua o Aperaamo, o ia o le tamā o i tatou uma lava.+ 17 (E pei ona tusia: “Ua ou tofia oe e fai ma tamā o atunuu e tele.”)+ Na faia lenei mea i luma o le Atua, o lē na ia faatuatua i ai, o lē na te toe faaolaina mai o ē ua maliliu, ma taʻua mea e lē o iai e peiseaʻī ua iai. 18 E ui ua siliga se faamoemoe, ae na faatuatua o ia e faavae i le faamoemoe, ina ia avea o ia ma tamā o atunuu e tele, e tusa ma le mea ua fetalai mai ai: “E faapena foʻi lau fanau.”+ 19 E ui e leʻi vaivai lona faatuatua, ae na ia manatu i lona lava tino ua oti, (ona pe tusa ua 100 ona tausaga),+ e faapea foʻi Sara ua lē mafai ona toe fanau.*+ 20 Ae ona o le folafolaga a le Atua, e leʻi maluelue ai lona faatuatua, ae na malosi tele o ia i le faatuatua, ma vivii atu ai i le Atua, 21 ma ua matuā mautinoa e mafai ona Ia faataunuuina le mea na Ia folafola mai.+ 22 O lea la, “ua silasila iā te ia o lē e amiotonu.”+
23 Peitaʻi, o upu “ua silasila iā te ia” e leʻi tusia mo na o ia lava,+ 24 ae e mo i tatou foʻi o le a silasila i ai, auā ua tatou talitonu iā te Ia, o lē na toe faatūina Iesu lo tatou Alii mai i le oti.+ 25 Na fasiotia o ia ona o a tatou agasala,+ ma toe faatūina o ia ina ia taʻuamiotonuina ai i tatou.+