Esekielu

36 “A o oe, le atalii e o le tagata, ia fai valoaga e faatatau i mauga o Isaraelu, ma fai atu, ‘Mauga o Isaraelu e, inā faalogo mai ia i le afioga a Ieova. 2 O le fetalaiga lenei a le Alii Pule Silisili Ese o Ieova: “Ua faapea mai le fili e faasagatau iā te outou, ‘Ua ā la! E oo foʻi i nofoaga maualuluga mai i aso anamua, ua fai mo i matou!’”’+

3 “O lea, ia fai valoaga ma fai atu, ‘O le fetalaiga lenei a le Alii Pule Silisili Ese o Ieova: “Talu ai ua latou faatafunaina ma osofaʻia outou mai i itu uma, ina ia fai outou mo ē ua faasaoina* o nuu, ma talu ai ua fetalanoaaʻi pea tagata e faatatau iā te outou, ma faia tala taufaaleaga e faatatau iā te outou,+ 4 o lea, mauga o Isaraelu e, inā faalogo mai ia i le afioga a le Alii Pule Silisili Ese o Ieova! O le fetalaiga lenei a le Alii Pule Silisili Ese o Ieova i mauga ma aʻega, i ālia ma vanu, i mea gaogao ua faatafunaina,+ ma i aai tuufua ua faoa ma tauemua e ē ua faasaoina o nuu o loo siʻomia ai i latou;+ 5 o le mea lea ua fetalai mai ai le Alii Pule Silisili Ese o Ieova: ‘O le aasa o loʻu ita,+ o le a ou tautala ai e faasagatau i ē ua faasaoina o nuu ma Etoma uma, o ē ua fai mo i latou loʻu laueleele ma le olioli tele ma le ʻinoʻino o loto,+ ina ia faoa ma pulea laufanua o loʻu laueleele.’”’+

6 “O lea, ia fai valoaga e faatatau i le eleele o Isaraelu, ma ia fai atu i mauga ma aʻega, i ālia ma vanu, ‘O le fetalaiga lenei a le Alii Pule Silisili Ese o Ieova: “Faauta! O le a ou tautala atu i loʻu maelega ma loʻu ita tele, auā ua faamāina outou e nuu.”’+

7 “O lea, o le fetalaiga lenei a le Alii Pule Silisili Ese o Ieova: ‘Ua ou sii loʻu lima i se tautoga, o le a oo i nuu ua siʻomia ai outou lo latou lava māsiasi.+ 8 A o outou, mauga o Isaraelu e, o le a tutupu mai o outou lālā laau ma fua mai o outou fua mo loʻu nuu o Isaraelu,+ auā ua toeitiiti latou toe foʻi mai. 9 Auā ua ou faatasi ma outou ma o le a ou liliu atu iā te outou, o le a galueaʻiina foʻi outou ma lūlūina i ai fatu. 10 O le a ou faatoʻateleina o outou tagata, o le aiga uma o Isaraelu, ma o le a nofoia aai,+ e toe fausia foʻi mea na lepetia.+ 11 Ioe, o le a ou faatoʻateleina o outou tagata ma a outou lafumanu;+ o le a uluola ma fanafanau i latou. O le a ou faapogaia le ʻaināina o outou e pei o lo outou tulaga sa iai,+ ou te faia foʻi outou ia sili atu ona taulau manuia nai lo o le mea sa iai muamua;+ ona outou iloa ai lea o aʻu lava o Ieova.+ 12 O le a ou faapogaia tagata, o loʻu nuu lea o Isaraelu, e savavali i o outou luga, ma e fai outou mo i latou.+ E fai outou ma o latou tofi, ma e tou te lē toe aveesea lava a latou fanau mai iā i latou.’”+

13 “O le fetalaiga lenei a le Alii Pule Silisili Ese o Ieova: ‘Talu ai ua latou faapea atu iā te outou, “O oe o le nuu e faatamaʻia tagata ma aveesea fanau mai i ou nuu,”’ 14 ‘o lea, e te lē toe faatamaʻia ai tagata pe toe aveesea fanau mai i ou nuu,’ ua fetalai mai ai le Alii Pule Silisili Ese o Ieova. 15 ‘Ou te lē tuua oe e toe aafia i tauemuga a nuu pe onosaia taufaifaiga a tagata,+ ma e te lē toe faapogaia ou nuu ia tautevateva,’ ua fetalai mai ai le Alii Pule Silisili Ese o Ieova.”

16 Ua toe oo mai le afioga a Ieova iā te aʻu e faapea: 17 “Le atalii e o le tagata, a o nonofo le aiga o Isaraelu i lo latou laueleele, na latou faaleagaina ai le laueleele i o latou ala ma a latou gaoioiga.+ Na pei o latou ala i oʻu luma o le lē mamā o le maʻi masina o le fafine.+ 18 O lea, na ou sasaa ifo ai loʻu ita tele i luga o i latou ona o le toto na latou faamaligiina i le laueleele,+ ma ona ua lē mamā le laueleele i a latou tupua inosia.*+ 19 Ona ou faataapeapeina ai lea o i latou i nuu, ma faasalalau atu i latou i atunuu.+ Na ou faamasino iā i latou e tusa ma o latou ala ma a latou gaoioiga. 20 Ae ina ua latou oo atu i na nuu, ona taʻuleagaina ai lea o loʻu igoa paia+ e tagata e ala i le faapea mai e uiga iā i latou, ‘O le nuu lea o Ieova, ae na manaʻomia ona latou ō ese mai i lona laueleele.’ 21 O lea, o le a ou faaalia le manatu mamafa i loʻu igoa paia, lea ua taʻuleagaina e le aiga o Isaraelu i nuu ua latou ō atu i ai.”+

22 “O lea, ia fai atu i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Le aiga e o Isaraelu, ou te lē faia lenei mea ona o outou, ae ona o loʻu igoa paia lea ua outou taʻuleagaina i nuu ua outou ō atu i ai.”’+ 23 ‘O le a ou faapaiaina lava loʻu igoa mamalu+ lea ua taʻuvalea i nuu, lea foʻi ua outou taʻuleagaina i o latou lotolotoi; ma o le a iloa ai e nuu o aʻu lava o Ieova,+ pe a faapaiaina aʻu e ala iā te outou i o latou luma,’ ua fetalai mai ai le Alii Pule Silisili Ese o Ieova. 24 ‘O le a ou aveesea outou mai i nuu ma aoaoina outou mai i atunuu uma ma avatu i lo outou laueleele.+ 25 O le a ou sausauina outou i vai mamā ma outou mamā ai;+ o le a ou faamamāina outou mai i o outou tulaga lē mamā uma+ ma a outou tupua inosia uma.+ 26 O le a ou tuuina atu iā te outou se lotofou,+ ma o le a ou tuuina atu foʻi iā te outou se agaga fou,+ o le a ou aveeseina mai i o outou tino le loto e pei o se maa,+ ma tuu atu iā te outou se loto e vaivai.* 27 Ou te tuuina loʻu agaga i totonu iā te outou, ou te faapogaia outou ina ia savavali i aʻu tulafono,+ ma o le a outou tausia ma faatinoina ai iʻuga o aʻu faamasinoga. 28 Ona outou nonofo ai lea i le laueleele na ou tuuina atu i o outou augātamā, ma o le a avea outou ma oʻu nuu ma avea foʻi aʻu ma o outou Atua.’+

29 “‘O le a ou faaolaina outou mai i o outou tulaga lē mamā uma ma valaau atu i fatu ma faatuputeleina ai, ou te lē tuu atu foʻi se oge iā te outou.+ 30 Ou te faatuputeleina foʻi fua o laau ma faaeleeleaga o le fanua, ina ia lē toe faalumaina ai outou e nuu ona o se oge.+ 31 Ona outou manatua ai lea o o outou ala leaga ma a outou gaoioiga lē lelei, ma o le a outou ʻinoʻino ai iā te outou lava ona o a outou mea sesē ma a outou mea inosia na faia.+ 32 Ae ia outou iloa le mea lenei: Ou te lē o faia lenei mea ona o outou,’+ ua fetalai mai ai le Alii Pule Silisili Ese o Ieova. ‘Nai lo o lea, le aiga o Isaraelu e, ia māsiasi ma lagona le faalumaina ona o o outou ala.’

33 “O le fetalaiga lenei a le Alii Pule Silisili Ese o Ieova: ‘I le aso ou te faamamāina ai outou mai i a outou mea sesē, o le a ou faapogaia ai le ʻaināina o aai+ ma toe fausia mea ua lepetia.+ 34 O le a galueaʻiina le eleele na faatafunaina, lea na matuā faatafunaina i le vaai a i latou uma na ui ane ai. 35 Ona faapea ane lea o tagata: “Ua avea le laueleele na faatafunaina e pei o le faatoʻaga o Etena,+ ma ua malupuipuia ma ʻaināina aai na faaleagaina, faatafunaina ma lepetia.”+ 36 Ona iloa ai lea e nuu ua totoe o loo siʻomia ai outou, o aʻu lava o Ieova, ua ou toe fausia mea na lepetia, ma ua ou totōina le fanua na faatafunaina. O aʻu o Ieova ua ou fai atu ai ma ua ou faia lava.’+

37 “O le fetalaiga lenei a le Alii Pule Silisili Ese o Ieova: ‘O le a ou faatagaina foʻi le aiga o Isaraelu e talosaga mai iā te aʻu, ina ia faatoʻateleina i latou e pei o se lafu mamoe, ma o le a ou faia lava. 38 E pei o le lafu o tagata paia, e pei o le lafu o Ierusalema* i aso o ona tausamiga,+ e faapea foʻi ona faatumulia aai na lepetia i se lafu o tagata;+ ma o le a iloa ai e tagata o aʻu lava o Ieova.’”