O le Tusi i Kerisiano Eperu

12 O lea la, ona ua iā i tatou se vaega e toʻatele o molimau* o loo siʻomia ai i tatou, seʻi o tatou tuu ese ai foʻi mea mamafa uma ma le agasala o loo faigofie ona faalavelave mai iā i tatou,+ ae ia tatou taufetuli ma le onosaʻi i le tuuga o loo i o tatou luma,+ 2 a o tatou vaavaai totoʻa atu iā Iesu o le Sui Sili, ma o Lē e faaatoatoaina lo tatou faatuatua.+ Ona o le olioli sa i ona luma, na tumau ai o ia e ui ina faapuapuagatia i le laau,* na lē amanaʻia e ia le mā, ma nofo o ia i le itu taumatau o le nofoālii o le Atua.+ 3 Ia manatunatu lelei i lē na tumau e ui i upu faifai a tagata agasala+ ia na taʻusalaina ai i latou, ina neʻi outou lē lavavā ma faavaivai ai.+

4 I la outou taua faasaga i lenā agasala, e tou te leʻi tetee atu e oo lava i le faamaligiina o outou toto. 5 Ua matuā galo foʻi iā te outou le apoapoaʻiga lea na taʻua ai outou o atalii: “Loʻu atalii e, aua le manatu māmā i le aʻoaʻiga mai iā Ieova,* aua foʻi neʻi faavaivai pe a aʻoaʻia oe e ia; 6 auā e aʻoaʻia e Ieova* o lē e alofa i ai; o le mea moni, e na te faasalaina* foʻi atalii uma ua ia taliaina.”+

7 E tatau ona outou tumau i mafatiaga ma manatu i ai o se auala lea o loo aʻoaʻia* ai outou. O loo feutagaʻi le Atua ma outou e pei o ni atalii.+ Auā o ai se atalii e lē aʻoaʻia e lona tamā?+ 8 Ae afai e lē aʻoaʻia outou e pei ona aʻoaʻia o tagata uma lava, o fanau la o le pō outou, ae e lē o ni atalii. 9 E masani foʻi ona aʻoaʻia i tatou e o tatou tamā faaletino, ma na tatou ave i ai le faaaloalo. Pe e lē sili ea ona tatou lotomalilie e gauaʻi atu i le Tamā o lo tatou ola faaleagaga ma ola ai?+ 10 Auā sa latou aʻoaʻia i tatou mo se taimi puupuu, e tusa ma mea e foliga mai e lelei iā i latou, ae ua ia faia faapea mo lo tatou lava lelei ina ia tatou tofusia faatasi ai i lona paia.+ 11 E moni, e foliga mai o aʻoaʻiga e lē o se mea e olioli ai i le taimi lenā, ae o se mea e tigā* ai; peitaʻi, mulimuli ane e fua mai ai e i latou ua aʻoaʻoina fua o le filemu, o le amiotonu lea.

12 O lea la, ia faamalosia lima ua gagase ma tulivae ua vaivai,+ 13 ma ia faasaʻo ala mo o outou vae,+ ina ia lē see sooga o le vae ua pipili, ae ia toe lelei. 14 Ia outou tausisi i le filemu ma tagata uma,+ ma pe a lē faapaiaina+ se tagata, e lē vaai o ia i le Alii. 15 Ia vaai lelei ina neʻi teʻa ese se tasi mai i le agalelei faifua o le Atua, ina neʻi iai se aa oona e tupu aʻe, ma faatupu ai faafitauli, ma faaleagaina ai le toʻatele;+ 16 ma vaai ina neʻi iai se tasi iā te outou e faia amioga lē mamā taufeusua‘iga,* po o se tasi e na te lē talisapaia mea paia e pei o Esau, o lē na lafoaʻia lona tofi o le ulumatua ina ia maua ai se ʻaiga e tasi.+ 17 Auā ua outou iloa na teena o ia ina ua manaʻo mulimuli ane e maua le faamanuiaga, ma e ui lava na taumafai malosi o ia ma loimata+ e sui le mafaufau o lona tamā, ae e leʻi taulau o ia.

18 Auā e tou te leʻi faalatalata atu i se mea e mafai ona paʻi atu i ai,+ lea na iai le afi mumū,+ ma le ao uliuli ma le matuā pogisa, ma le matagi malosi,+ 19 ma le taalili o le pū,+ ma le siʻufofoga na tautala mai,+ ma ina ua faalogo i ai le nuu, ona latou talosaga atu lea e aua neʻi toe faaopoopo maia nisi upu.+ 20 Auā na fefefe i latou i le poloaʻiga e faapea: “E tusa lava foʻi po o se manu e papaʻi i le mauga, ia fetogia i maa.”+ 21 O le mataʻutia foʻi o lea vaaiga, na faapea mai ai Mose: “Ua ou fefe ma gatete.”+ 22 Ae ua outou faalatalata atu i le mauga o Siona+ ma le aai o le Atua soifua, o Ierusalema faalelagi lea,+ ma le faitau sefulu afe* o agelu 23 o loo potopoto faatasi,+ ma le faapotopotoga o ulumatua o ē ua tusia igoa i le lagi, ma le Atua o le Faamasino i mea uma,+ ma ē e amiotonu na fanauina i le agaga,+ ua lelei atoatoa i latou,+ 24 ma Iesu le puluvaga+ o le feagaiga fou,+ ma le toto na sausauina ai, lea o loo tautala mai i se auala e sili atu ona lelei nai lo o le toto o Apelu.+

25 Ia outou faaeteete neʻi o outou lē usiusitaʻi* i lē o loo fetalai mai. Auā afai na lē sao o ē na lē usiusitaʻi i lē na faaooina atu le lapataʻiga mai i le Atua i le lalolagi, e matuā lē sao lava i tatou pe a liliuese mai iā te ia o loo fetalai mai i le lagi!+ 26 Na lūlūina le lalolagi+ i le taimi lenā i lona siʻufofoga, a o lenei ua ia folafola mai: “E toe tasi ona ou lūlūina lea o le lalolagi faapea ma le lagi.”+ 27 O le faaupuga lenei “e toe tasi,” ua faaalia ai le aveesea o mea ua lūlūina, o mea ia na faia e se tasi, ina ia tumau ai mea e leʻi lūlūina. 28 O lea la, talu ai o le a tatou maua se Malo e lē mafai ona lūlūina, seʻi faaauau ona tatou maua le agalelei faifua, lea e mafai ai ona tatou tuuina atu le auaunaga paia e talileleia e le Atua ma le migao ma le mataʻu iā te ia. 29 Auā o lo tatou Atua o le afi lea e faaumatia ai.+