O le Tusi Lona Lua o Nofoaiga a Tupu

20 Mulimuli ane, ona ō mai ai lea o le fanauga a Moapi+ ma le fanauga a Amoni,+ faatasi ma nisi o tagata Amonima* e siitaua atu iā Iosefatu. 2 Ona ta‘u mai lea iā Iosefatu e faapea: “O loo ō mai se motu o tagata e toʻatele e siitaua iā te oe mai i le itu o le sami,* e mai i Etoma,+ ma o loo iai i latou i Haseso-tamara, o Enokati lea.”+ 3 Ona fefe ai lea o Iosefatu ma ua maumauaʻi e saʻili atu iā Ieova.+ Ua ia talaʻi foʻi le anapogi iā Iuta uma. 4 Ona faapotopoto faatasi lea o tagata o Iuta ina ia fesili atu iā Ieova.+ Ua ō mai foʻi i latou mai i aai uma o Iuta e fesili atu iā Ieova.

5 Ona tulaʻi lea o Iosefatu i le faapotopotoga o Iuta ma Ierusalema i le fale o Ieova i luma o le lotoā fou, 6 ua ia faapea atu:

“Ieova e, le Atua o o matou augātamā, pe e lē o oe ea o le Atua o le lagi;+ pe e te lē pule ea foʻi i malo uma o nuu?+ Ua i lou aao le mana ma le malosi, ma e leai se tasi e mafai ona faasagatau atu iā te oe.+ 7 Lo matou Atua e, pe e te leʻi tutuliesea ea tagata sa nonofo i lenei nuu mai i luma o lou nuu o Isaraelu, ma foaʻiina atu i le fanau a lau uō o Aperaamo,+ e fai ma o latou tofi e faavavau? 8 Ona latou nonofo lea i le nuu, ma ua latou faia mo oe le malumalu mo lou suafa,+ ua faapea atu, 9 ‘Afai e oo mai iā i matou ni mala, e ala mai i le pelu, o le faasalaga mamafa, le faamaʻi, po o le oge, o le a matou tutū atu i luma o lenei fale ma ou luma (auā o loo i lenei fale lou suafa),+ ma valaau atu i lau fesoasoani i o matou puapuaga, ma ia e faafofoga mai ma e faaola mai.’+ 10 A o lenei, silasila mai fo‘i i le mea ua faia e le fanauga a Amoni, o Moapi, ma vaega maugā o Seira,+ o ē e te le‘i tuuina atu iā Isaraelu ina ia osofaʻia, ina ua latou ō mai mai i le nuu o Aikupito. Na liliuese Isaraelu mai iā i latou, ma e leʻi faaumatia i latou.+ 11 Ae ua latou tauia mai i matou, e ala i le ō mai e tutuliese i matou mai i lou laueleele na e foaʻiina mai e fai ma o matou tofi.+ 12 Lo matou Atua e, pe e te lē faamasinoina ea i latou?+ Auā ua leai se malosi iā i matou i luma o lenei motu o tagata, o loo ō mai e faasagatau iā i matou; ua matou lē iloa se mea e fai,+ ae ua faasaga atu o matou mata iā te oe.”+

13 O le taimi lea, ua tutū tagata uma o Iuta i luma o Ieova, faatasi ma o latou tamaiti, o a latou avā, ma a latou fanau.*

14 Ona oo mai lea o le agaga o Ieova i luga o Iaaseelu le atalii o Sakaria, le atalii o Penaia, le atalii o Ieielu, le atalii o Matania le sa Levī mai i le fanauga a Asafo, a o iai o ia i totonu o le faapotopotoga. 15 Ua ia faapea atu: “Inā uaʻi mai ia Iuta uma, ma outou o nonofo i Ierusalema, ma le tupu o Iosefatu! O le mea lenei ua fetalai mai ai Ieova iā te outou, ‘Aua tou te fefefe pe matataʻu ona o lenei motu o tagata e toʻatele; auā e lē o outou e ona le taua, a o le Atua.+ 16 O taeao e tou te ō ifo ai e tau ma i latou. O le a ō aʻe i latou mai i le mafa o Susa, ma o le a outou maua i latou i le mea e gata ai le vanu* i luma o le toafa o Ieruelu. 17 E tou te lē tau i lenei taua. Ia outou tutū ma ia tutumau,+ ma vāai i le faaolataga a Ieova iā te outou.*+ Iuta ma Ierusalema e, aua tou te fefefe pe matataʻu.+ Inā ō atu ia taeao e tau ma i latou, e faatasi foʻi Ieova ma outou.’”+

18 Ona ifo lea o Iosefatu ma faapaʻū faō i le eleele, ua faapaʻuʻū foʻi Iuta uma ma ē o nonofo i Ierusalema i luma o Ieova ina ia tapuaʻi atu iā Ieova. 19 Ona tutulaʻi lea o sa Levī o le fanauga a Kato+ ma le fanauga a Koru, ina ia vivii atu iā Ieova le Atua o Isaraelu ma le matuā leotetele.+

20 Ua latou tutulaʻi i le taeaopō ma ō atu i le toafa o Tikoa.+ A o latou ō atu, ona tulaʻi lea o Iosefatu ua faapea atu: “Inā faalogo mai ia iā te aʻu, Iuta e, ma outou o loo nonofo i Ierusalema! Ia faatuatua atu iā Ieova lo outou Atua, ina ia outou tutumau ai. Ia faatuatua atu foʻi i ana perofeta,+ ona outou manuia ai lea.”

21 Ina ua uma ona ia talanoa atu i le nuu, ona ia filifilia lea o tane pepese e usuina viiga+ iā Ieova. E latou te oofu i ofu paia, ma e ō atu e muamua atu i fitafita, ma faapea atu: “Ia faafetai atu iā Ieova, auā e tumau e faavavau lona alofa faamaoni.”+

22 Ina ua amata ona latou usuina viiga ma le fiafia, ona faapogaia lea e Ieova o se osofa‘iga faafuase‘i e faasaga i le fanauga a Amoni, o Moapi, ma le vaega maugā o Seira o ē na ō mai e osofa‘i Iuta, ma ua fasia ai e le tasi le isi.+ 23 Ona faasagatau lea o le fanauga a Amoni ma Moapi i ē o loo nonofo i vaega maugā o Seira,+ ina ia faaumatia i latou ma tafiesea; ma ina ua uma ona latou faaumatia ē o loo nonofo i Seira, ona fasiotia lea e le tasi o le isi.+

24 Ae ina ua oo atu Iuta i le olomatamata o le toafa+ ma vāai atu i le motu o tagata, ona latou iloa ai lea o o latou tino oti o loo taatitia i le eleele,+ e leai se tasi na faasaoina. 25 Ona ō atu lea o Iosefatu ma ona tagata, ua ave le vete mai iā i latou. Na maua foʻi e i latou mai i na mea le tele o oloa, o lavalava ma mea matagofie, lea na latou talai ese mai iā i latou, seʻia oo ina lē mafai ona latou toe aveina ni mea.+ E tolu aso na latou aveina ai le vete, auā e matuā tele lava. 26 Ua latou faapotopoto faatasi foʻi i le aso lona fā i le vanu* o Peraka, auā ua latou vivii* atu iā Ieova i inā. O le mea lea ua latou faaigoa ai lea nofoaga, o le vanu o Peraka,*+ seʻia oo mai i aso nei.

27 Ona toe foʻi mai lea o tagata uma o Iuta ma Ierusalema faatasi ma Iosefatu e muamua atu iā i latou, ua toe foʻi i Ierusalema ma le olioli, auā ua faafiafiaina i latou e Ieova ona ua manumalo i o latou fili.+ 28 Ua latou ō mai i Ierusalema ma meafaifaaili e iai uaua, o kitara,+ ma pū,+ ma ua ō atu i le fale o Ieova.+ 29 Ua matataʻu foʻi i le Atua malo uma o nuu, ina ua latou faalogo ua tau Ieova faasaga i fili o Isaraelu.+ 30 Ua filemu foʻi le malo o Iosefatu mai i taua, ua tuuina atu pea e le Atua iā te ia le mapusaga i itu uma.+

31 Ua pule pea Iosefatu iā Iuta. E 35 ona tausaga ina ua fai o ia ma tupu, ma e 25 tausaga na ia pule ai mai i Ierusalema. O le igoa o lona tinā o Asopa le afafine o Seleki.+ 32 Na savali pea o ia i le ala o Asa+ lona tamā. E leʻi liliuese mai ai lava o ia, ma na ia faia le mea tonu i le silafaga a Ieova.+ 33 Peitaʻi, e leʻi aveeseina mea maualuluga,+ ma e leʻi maumaua‘i loto o le nuu e tapua‘i i le Atua o o latou augātamā.+

34 A o le olaga uma o Iosefatu, e mai i le amataga e oo i le faaiʻuga, ua tusia ia i upu a Ieʻu+ le atalii o Hanani,+ lea o loo iai i le Tusi o Tupu o Isaraelu. 35 Ua mavae ia mea, ona faifaimea faatasi ai lea o Iosefatu le tupu o Iuta ma Aasaia le tupu o Isaraelu, o lē na faia mea leaga.+ 36 Ua ‘au faatasi Iosefatu ma Aasaia i le faia o vaa e ō atu i Tasesa,+ ua la faia foʻi vaa i Esiokape.+ 37 Peitaʻi, ua fai atu e Elisara le atalii o Totava mai i Maresa, se valoaga e faasaga iā Iosefatu e faapea: “Ona ua lua faifaimea faatasi ma Aasaia, o le mea lea e faalēaogāina ai e Ieova au galuega.”+ Ona faaleagaina ai lea o vaa+ ma ua lē mafai ai ona ō atu i Tasesa.