Numera

14 Ona alalaga lea o le faapotopotoga uma, ua tagiauē pea i latou ma fetagisi i le pō atoa.+ 2 Ua muimui le fanauga a Isaraelu uma e faatatau iā Mose ma Arona,+ ma ua faaseā le faapotopotoga atoa e uiga iā i laʻua e faapea: “E sili pe ana matou feoti i Aikupito, e sili foʻi pe ana matou feoti i lenei toafa! 3 Aiseā ua aumai ai e Ieova i matou i lenei laueleele ina ia feoti ai i le pelu?+ O a matou avā ma fanau o le a ave e fai ma pagota.+ Pe e lē sili ea ona matou toe foʻi i Aikupito?”+ 4 Ua oo lava ina faapea ane le tasi i le isi: “Seʻi o tatou tofia so tatou taʻitaʻi ma tatou toe foʻi i Aikupito!”+

5 Ona faapaʻuʻū faō lea o Mose ma Arona i luma o le faapotopotoga atoa o le fanauga a Isaraelu. 6 Ua saeia e Iosua+ le atalii o Nuno ma Kalepo+ le atalii o Iefune o la ofu, o i laʻua foʻi o nisi na ō faalilolilo e mataʻi le atunuu, 7 ma ua la fai atu i le faapotopotoga atoa o le fanauga a Isaraelu e faapea: “O le atunuu na matou ō atu faalilolilo e mataʻi, e matuā lelei lava.+ 8 Afai e fiafia le finagalo o Ieova iā i tatou, o le a ia avatu i tatou i lea laueleele ma tuuina mai iā i tatou, o le laueleele e tafe ai le suāsusu ma le meli.+ 9 Ae aua neʻi outou fouvale iā Ieova, ma aua tou te fefefe i tagata o le laueleele,+ auā e faigofie ona tatou faato‘ilaloina i latou.* Ua leai so latou puipuiga, ma ua faatasi Ieova ma i tatou.+ Aua tou te fefefe iā i latou.”

10 Peitaʻi, ua faapea ane le faapotopotoga atoa e fetogi i laʻua i maa.+ Ae ua faaali mai le mamalu o Ieova i luga o le faleʻie o le feiloaʻiga a o vāai atu le fanauga uma a Isaraelu.+

11 Ona fetalai mai lea o Ieova iā Mose: “O le ā le umi e lē faaaloalo mai ai nei tagata iā te aʻu,+ o le ā foʻi le umi e latou te lē faatuatua mai ai iā te aʻu, e ui i le tele o faailoga na ou faia iā i latou?+ 12 Seʻi oʻu taia i latou i faamaʻi ma faaumatia ai i latou, ma ou te faia oe ma nuu tele ma malosi e sili atu nai lo o i latou.”+

13 Ae ua faapea atu Mose iā Ieova: “O le a faalogo tagata Aikupito i lenei tala,+ auā na e aumaia i lou mana lenei nuu mai iā i latou, 14 o le a latou taʻu atu foʻi lenei tala i ē o loo nonofo i lenei atunuu. Ua latou faalogo fo‘i o oe o Ieova o loo faatasi ma lenei nuu,+ o lē foʻi na faafesagaʻi ma i latou.+ O oe o Ieova, ua tū lou ao i luga aʻe o i latou, e te afio i o latou luma i le ao faaniutū i le ao, a o le afi faaniutū i le pō.+ 15 Pe afai e te fasiotia lenei nuu atoa i le taimi e tasi,* ona fai ane lea o atunuu ua faalogo i lou taʻutaʻua e faapea: 16 ‘Ua lē mafai e Ieova ona avatu lenei nuu i le laueleele na ia tautō ai iā i latou, o lea ua ia faaumatia ai i latou i le toafa.’+ 17 Faamolemole Ieova e, ia e faaalia le tele o lou mana e pei ona e folafola mai ina ua e fetalai: 18 ‘O Ieova e telegese lona toʻasā ma e tele lona alofa faamaoni,+ e faamagalo mea sesē ma agasala, ae e na te lē faasaoina lava ē e agasala mai faasalaga, e na te faasalaina atalii ona o mea sesē a o latou tamā, e oo lava i le tupulaga e tolu ma le tupulaga e fā.’+ 19 Faamolemole ia faamagalo sesē o lenei nuu e tusa ma le tele o lou alofa faamaoni, e pei foʻi ona e faamagalo i lenei nuu a o iai i Aikupito seʻia oo mai i le asō.”+

20 Ona fetalai mai lea o Ieova: “Ou te faamagalo i latou e tusa ai ma lau upu.+ 21 E lē gata i lea, ou te tautō iā te a‘u,* o le a faatumulia le lalolagi atoa i le mamalu o Ieova.+ 22 Peita‘i, o tagata uma na vāai i loʻu mamalu ma faailoga+ na ou faia i Aikupito ma le toafa, ae ua faasefulu ona latou tofotofo mai pea iā te aʻu,+ ma lē faalogo i loʻu leo,+ 23 e lē vāai lava i latou i le laueleele na ou tautō ai i o latou augātamā. E leai, e lē vāai i ai i latou uma ua lē faaaloalo mai iā te aʻu.+ 24 A o laʻu auauna o Kalepo,+ talu ai ua ese le agaga ua iā te ia ma ua ia mulimuli pea ma lona lotoatoa iā te aʻu, ou te avatu ai o ia i le laueleele lea na ia alu atu i ai, e fai le laueleele mo lana fanau.+ 25 Talu ai o loo nonofo tagata Amaleka ma tagata Kanana+ i le vanu,* ia outou liliu a taeao ma malaga atu i le toafa i le ala o le Sami Ulaula.”+

26 Ua fetalai atili mai Ieova iā Mose ma Arona: 27 “O le ā le umi e muimui ai lenei faapotopotoga leaga iā te aʻu?+ Ua ou faalogo i muimuiga a le fanauga a Isaraelu, ua latou muimui mai ai iā te aʻu.+ 28 Ia fai atu iā i latou, ‘O loo fai mai Ieova: “Ou te tautō iā te aʻu,* ou te faia lava iā te outou e pei o a outou upu ua ou faalogo i ai!+ 29 O le a taatitia o outou tino oti i lenei toafa,+ o le faitau aofaʻi o outou uma mai i le 20 tausaga agaʻi i luga le matutua ua lesitalaina, o outou uma o ē na muimui mai iā te aʻu.+ 30 E leai se tasi o outou e ulu atu i le atunuu na ou tautō* e tou te nonofo ai,+ seʻi vaganā ai Kalepo le atalii o Iefune ma Iosua le atalii o Nuno.+

31 “ʻ“Ae ou te avatu ai a outou fanau ia ua outou faapea mai e ave e fai ma pagota,+ ma o le a latou iloa ai le atunuu ua outou teena.+ 32 Ae o le a taatitia o outou tino oti i lenei toafa. 33 O le a fai o outou atalii ma leoleo mamoe i le toafa mo le 40 tausaga,+ ma e tali atu i latou i a outou gaoioiga lē faamaoni,* seʻia outou feoti uma i le toafa.+ 34 E tusa ma le aofaʻiga o aso na outou mataʻi faalilolilo ai le atunuu, e 40 aso,+ o le a faatatau atu le aso mo le tausaga, o le aso mo le tausaga, o le a outou tali atu mo o outou sesē i tausaga e 40,+ ona outou iloa ai lea o le i‘uga o le tetee mai iā te a‘u.*

35 “ʻ“O aʻu o Ieova ua ou fai atu ai. O le mea lenei ou te matuā faia i lenei faapotopotoga leaga uma, o i latou ua faapotopoto e tetee mai iā te aʻu: E feoti i latou i lenei toafa, ma faaumatia ai i latou i inei.+ 36 O tamāloloa na aauina atu e Mose e ō faalilolilo e mataʻi le atunuu, ma o ē na faapogaia le muimui o le faapotopotoga atoa iā te ia, ina ua toe fo‘i ane ma se lipoti leaga e uiga i lenā atunuu,+ 37 ioe, o tamāloloa uma na aumaia le lipoti leaga e uiga i le atunuu, o le a faasalaina ma feoti i luma o Ieova.+ 38 A o Iosua le atalii o Nuno ma Kalepo le atalii o Iefune, o i la‘ua o nisi na ō faalilolilo e mataʻi le atunuu, o le a ola pea i laʻua.”’”+

39 Ua tautala atu Mose i nei upu i le fanauga uma a Isaraelu, ona matuā faanoanoa ai lea o le nuu. 40 Ona latou usupō ai lea i le taeao ma taumafai e ō aʻe i le tumutumu o le mauga ma faapea ane: “O lea ua tatou sauni, e ao ona tatou ō aʻe i le mea na fetalai mai ai Ieova, auā ua tatou agasala.”+ 41 Ae ua fai atu Mose: “Aiseā ua outou sopo tapulaa ai i le faatonuga a Ieova? E lē taulau outou i lea mea. 42 Aua tou te ō aʻe ona e lē o faatasi Ieova ma outou; ma o le a faatoʻilaloina outou e o outou fili.+ 43 Auā o loo iai tagata Amaleka ma tagata Kanana e fetaia‘i ma outou,+ ma e tou te feoti i le pelu. Talu ai ua outou liliuese mai iā Ieova, e lē faatasi Ieova ma outou.”+

44 Peitaʻi ua latou ō aʻe ma le faamaualuluga i le tumutumu o le mauga,+ ae e leʻi te‘a ese Mose ma le atolaau o le feagaiga a Ieova mai i le togālauapi.+ 45 Ona ō ifo lea o tagata Amaleka ma tagata Kanana o ē na nonofo i lenā mauga, ua fasiotia i latou ma faataapeapeina i latou seʻia oo atu i Horema.+