O le Tusi Muamua o Nofoaiga a Tupu

29 Ua fai atu Tavita le tupu i le faapotopotoga uma: “O Solomona loʻu atalii, o lē ua filifilia e le Atua,+ e laʻitiiti ma e lē lava lona poto masani,+ a o le galuega e telē, auā e lē o se malumalu* mo se tagata, ae e mo Ieova le Atua.+ 2 Na ou saunia ma loʻu malosi atoa mea mo le fale o loʻu Atua, o le auro e fai ai mea auro, o le siliva e fai ai mea siliva, o le ʻapamemea e fai ai mea ʻapamemea, o le uʻamea e fai ai mea uʻamea,+ ma laupapa+ e fai ai mea laupapa, o maa soama, o maa teuteu ua faapipii faatasi e faaaogā ai le simā, o tamaʻi maa feʻilafi, o maa tāua eseese, ma maa alapasa e matuā tele lava. 3 E lē gata i lea, talu ai ua ou fiafia i le fale o loʻu Atua,+ o loo iai foʻi saʻu oloa faapitoa+ o le auro ma le siliva, ou te foaʻiina atu lea i le fale o loʻu Atua e faaopoopo i mea uma ua ou saunia mo le fale paia, 4 e aofia ai le 3,000 taleni* o auro mai i Ofeira+ ma le 7,000 taleni o le siliva ua faamamāina, e ufiufi ai puipui o fale, 5 o auro e fai ai mea auro, o siliva e fai ai mea siliva, ma galuega uma e faia e lima o tufuga. O lea, o ai e tauofo e foaʻi mai ana mea mo Ieova i le asō?”+

6 Ona tauofo mai lea o alii sili o aiga o tamā, o alii sili o ituaiga o Isaraelu, o taʻitaʻi o le taʻitoʻaafe ma le taʻitoʻaselau,+ ma alii e vaaia galuega a le tupu.+ 7 Ona latou avatu lea mo le galuega o le fale o le Atua moni: e 5,000 taleni o auro, 10,000 tareki,* 10,000 taleni o siliva, 18,000 taleni o ʻapamemea, ma le 100,000 taleni o uʻamea. 8 O tagata uma na iai a latou maa tāua, ua latou foaʻi atu i le potu teuoloa o le fale o Ieova lea na vaaia e Ikielu+ le tagata Keresona.+ 9 Ua olioli lava le nuu i a latou meaalofa tauofo, auā na latou foaʻi atu ma le lotoatoa meaalofa tauofo iā Ieova,+ ma sa matuā olioli foʻi le tupu o Tavita.

10 Ona vivii atu lea o Tavita iā Ieova i luma o le faapotopotoga uma. Ua faapea atu Tavita: “Tau ina ia viia oe Ieova le Atua o Isaraelu, o lo matou tamā, seʻia oo lava i le faavavau.* 11 Ieova e, o oe e ou le silisili ese,+ o le malosi,+ o le matagofie, o le mamalu, ma le malualii,+ auā o oe e ona mea uma i le lagi ma le lalolagi.+ Ieova e, o oe e ou le malo.+ O oe o Lē ua faasilisilia oe lava e silisili i mea uma lava. 12 E mai iā te oe ʻoa ma le mamalu,+ o oe foʻi e pule i mea uma,+ ma o loo i lou aao le mana+ ma le malosi,+ e mafai foʻi e lou aao ona faamamaluina+ ma faamalosia tagata uma lava.+ 13 O lenei, lo matou Atua e, matou te faafetai atu iā te oe ma viia lou suafa matagofie.

14 “A o lenei, o ai ea aʻu nei ma o ai ea loʻu nuu, ua matou foaʻi atu ai meaalofa tauofo faapenei? Auā e mai iā te oe mea uma, ma ua matou foaʻiina atu iā te oe mea uma mai i lou aao. 15 Auā o i matou o tagata ese i ou luma ma o ni ē e aumau, e pei o o matou augātamā uma.+ Auā e pei o matou aso i luga o le laueleele o se ata lafoia,+ ua leai se faamoemoe. 16 Ieova e, lo matou Atua, o nei oloa uma ua matou saunia e fausia ai se fale mo lou suafa paia, e mai i lou aao ia, o au mea uma foʻi ia. 17 Loʻu Atua e, ua ou iloa lelei o oe e te suʻesuʻe i loto,+ e te fiafia foʻi i le faamaoni.+ O le faamaoni o loʻu loto ua ou foaʻi atu ai nei meaalofa tauofo uma, ua ou fiafia foʻi e vaai i lou nuu o loo nonofo mai, a o latou foaʻi atu meaalofa tauofo iā te oe. 18 Ieova e, le Atua o Aperaamo, o Isaako, ma Isaraelu o o matou augātamā, ia e fesoasoani i lenei nuu ina ia faatumauina pea se agaga faataulaga e faavavau, ma ia auauna iā te oe ma le lotoatoa.+ 19 Ia foaʻi mai iā Solomona loʻu atalii se lotoatoa,*+ ina ia tausia ai au poloaʻiga,+ o au faamanatuga, o au tulafono, ma ia faia nei mea uma lava, ma ia fausia le malumalu* ua uma ona ou sauniunia.”+

20 Ua faapea atu Tavita i le faapotopotoga uma: “Ia outou vivii atu iā Ieova lo outou Atua.” Ona vivii atu lea o le faapotopotoga uma iā Ieova le Atua o o latou augātamā, ua punonou ma ifo atu iā Ieova ma le tupu. 21 Ua latou faia pea taulaga iā Ieova ma ofo atu taulaga mū+ iā Ieova i le aso na sosoo ai, o tamaʻi povi poʻa e 1,000, o mamoe poʻa e 1,000, o tamaʻi mamoe poʻa e 1,000, ma a latou taulaga i meainu;+ na latou ofo atu le matuā tele o taulaga mo Isaraelu uma.+ 22 Ua faaauau pea ona latou aai ma inu ma le olioli tele+ i luma o Ieova i lenā aso, ma ua latou faia Solomona le atalii o Tavita e avea ma tupu mo le taimi lona lua, ma faauuina o ia i luma o Ieova e fai ma taʻitaʻi,+ faapea foʻi ma Satoka e fai ma ositaulaga.+ 23 Ona nofo lea o Solomona i le nofoālii o Ieova+ e fai ma tupu e sui iā Tavita lona tamā, ua taulau manuia o ia, ma ua usiusitaʻi foʻi Isaraelu uma iā te ia. 24 O alii sili uma,+ o tagata totoa malolosi,+ ma atalii uma o le tupu o Tavita,+ ua latou gauaʻi atu i le tupu o Solomona. 25 Ua faatuputeleina pea e Ieova le mamalu o Solomona i luma o Isaraelu uma, ma foaʻi atu iā te ia le malualii e leʻi tuuina muamua atu lava i se isi tupu o Isaraelu.+

26 A o Tavita le atalii o Iese, na fai o ia ma tupu o Isaraelu uma, 27 ma o le umi* na pule ai o ia i Isaraelu, e 40 tausaga. Na pule o ia i Heperona i tausaga e 7,+ ma e 33 tausaga na ia pule ai i Ierusalema.+ 28 Na maliu Tavita ina ua matuā toeaina lava o ia,+ na faamalieina o ia i aso o lona ola, i ʻoa, ma le mamalu; ona avea lea o Solomona lona atalii ma tupu e sui iā te ia.+ 29 A o le olaga uma o le tupu o Tavita, e mai i le amataga e oo i le faai‘uga, ua tusia ia i le tala a Samuelu le tagata e iloa faaaliga, o Natano+ le perofeta, ma Kato+ lē e faamatalaina faaaliga. 30 Na ta‘ua i nei tusitusiga faamatalaga e faatatau i lana nofoaiga uma, o lona malosi, ma mea na tutupu iā te ia ma Isaraelu, faapea malo uma na si‘omia ai.