12 O le Faaupuga o le “Feagaiga Tuai” ma le “Feagaiga Fou”

O tusi o le Tusi Paia ia na tusia i le gagana Eperu ma le Arama, e masani lava ona faaigoa e tagata i aso nei o le “Feagaiga Tuai.” E māfua lenei mea ona o le manatu o loo taʻua i le 2 Korinito 3:14 e faapea: “Ae na pogisa o latou mafaufau. E oo mai lava i aso nei, e lē o aveesea le ufiufi lava lenā e tasi pe a faitauina le feagaiga tuai, auā ua faaumatia e ala iā Keriso.”

Peitaʻi, e lē o faasino atu le aposetolo o Paulo i le Tusi Paia uma na tusia i le gagana Eperu ma le Arama. E leʻi manatu foʻi Paulo, o le “feagaiga fou” o tusi ia o le Mataio e oo i le Faaaliga na tusia e tane Kerisiano, e ala i le taʻitaʻiga a le agaga paia. Na talanoa le aposetolo o Paulo e faatatau i le feagaiga tuai o le Tulafono (o loo i le Kenese e oo i le Teuteronome) lea na tusia e Mose, ma e na o se vaega lenā o Tusitusiga Paia, na tusia a o leʻi soifua mai Keriso. O le māfuaaga lea na fai mai ai Paulo i le fuaiupu e sosoo ai, “pe a faitauina tusi a Mose.”

O le mea lea, e leai se māfuaaga e taʻua ai Tusitusiga Eperu ma Arama o le “Feagaiga Tuai.” E leai foʻi se māfuaaga e taʻua ai Tusitusiga Eleni o le “Feagaiga Fou.” Na taʻua e Iesu o tusi uma lava e mai le Atua, o “Tusitusiga Paia.” (Mataio 21:42; Mareko 14:49; Ioane 5:39) Na taʻua foʻi e le aposetolo o Paulo na tusi o “Tusitusiga Paia.” (Roma 1:2; 15:4; 2 Timoteo 3:15) E iai la māfuaaga lelei e faaaogā ai faaupuga nei, o “Tusitusiga Eperu” ma “Tusitusiga Eleni.”