NEEMIA

1 O upu a Neemia*+ le atalii o Hakalia: I le masina o Kiselu* i le tausaga lona 20, na ou iai i Susana*+ le nofoaga malupuipuia.* 2 I lenā taimi, na sau ai Hanani+ o se tasi o oʻu uso, o ia faatasi ma isi tagata mai i Iuta, ma na ou fesili atu iā i latou e faatatau i tagata Iutaia o loo totoe, o ē na toe fo‘i mai i le aveina faapagota,+ faapea foʻi ma Ierusalema. 3 Ua latou faapea mai: “O i latou na toe fo‘i atu mai i le aveina faapagota ma o loo nonofo i le itumalo o Iuta, ua matuā leaga lo latou tulaga ma ua faalumaina.+ Ua soloia i lalo pā o Ierusalema,+ ma ua mū ona faitotoʻa i le afi.”+

4 Ina ua ou faalogo i nei upu, ona ou nofo lea i lalo ma ou tagi ma faanoanoa mo ni aso, ma sa ou anapogi pea+ ma tatalo atu i luma o le Atua o le lagi. 5 Na ou faapea atu: “Ieova e, le Atua o le lagi, o le Atua sili ma mataʻutia, o lē e tausia lana feagaiga ma alofa faamaoni i ē e alolofa atu iā te ia ma tausia ana poloaʻiga,+ 6 faamolemole, seʻi e faafofoga mai ma e silasila mai i le tatalo a lau auauna ua ou tatalo atu ai i ou luma i le aso nei, i le ao ma le pō,+ e faatatau i au auauna, o le fanauga a Isaraelu. Ua ou ta‘utino atu agasala a le fanauga a Isaraelu ua agasala ai iā te oe. Ua matou agasala, o aʻu ma le aiga o loʻu tamā.+ 7 Ua matou agaleaga iā te oe+ e ala i le lē tausia o poloaʻiga, o tulafono, ma iʻuga o faamasinoga na e tuuina mai iā Mose+ lau auauna.

8 “Ia e manatua faamolemole le upu na e poloaʻi mai ai iā* Mose lau auauna, e faapea, ‘Pe afai e tou te lē faamaoni, ou te faataapeapeina outou i nuu.+ 9 Ae afai e tou te toe foʻi mai iā te aʻu ma tausia ma usita‘ia aʻu poloaʻiga, e ui lava ina faataapeapeina outou i tuluʻiga o le lagi, ae ou te faapotopotoina outou mai i inā,+ ma aumaia lava outou i le nofoaga na ou filifilia e tuu ai loʻu igoa.’+ 10 O i latou o au auauna ma lou nuu, o ē na e laveaʻia i lou mana tele ma lou aao malosi.+ 11 Ieova e, faamolemole, seʻi e faafofoga mai i le tatalo a lau auauna ma le tatalo a au auauna o ē ua naunau e matataʻu i lou suafa; ma seʻi e faamanuia mai faamolemole i lau auauna i le aso nei, ma ia alofa mutimutivale mai lenei tagata iā te aʻu.”+

O le taimi lea, o loo avea aʻu ma tautū uaina a le tupu.+

2 I le masina o Nisani* i le tausaga lona 20+ o le nofoaiga a le tupu o Aretaseta,+ na iai i ona luma le uaina, ma na ou ave aʻe le uaina ma avatu i le tupu+ e pei ona masani ai. Ae e leʻi faapea ona ou faanoanoa muamua i ona luma. 2 Ona faapea mai lea o le tupu iā te aʻu: “Aiseā ua e foliga faanoanoa ai ae e te lē o maʻi? Ou te vaai atu e iai se mea o loo e popole ai.” Ona ou matuā fefe ai lea.

3 Ona ou faapea atu lea i le tupu: “Ia faafualoa le soifua o le tupu! E faapefea ona ou lē foliga faanoanoa, ae ua faatafunaina le aai o loo tanu ai oʻu augātamā, ma ua faaumatia foʻi ona faitotoʻa i le afi?”+ 4 Ona fai mai lea o le tupu iā te aʻu: “O le ā se mea o e taumafai e fai?” Ona ou tatalo loa lea i le Atua o le lagi.+ 5 Ona ou fai atu lea i le tupu: “Afai e lelei i le tupu, afai foʻi e te finagalo malie i lau auauna, ia e auina atu aʻu i Iuta i le aai o loo tanu ai oʻu augātamā, ina ia ou toe fausiaina.”+ 6 Ua fai mai le tupu iā te aʻu a o nofo lana masiofo i ona tafatafa: “O le ā le umi o lau malaga, a o afea foʻi e te toe foʻi mai ai?” Ua malie le tupu e auina atu aʻu,+ ma na ou taʻu atu iā te ia le taimi ou te toe foʻi mai ai.+

7 Ona ou toe fai atu lea i le tupu: “Afai e lelei i le tupu, ia tuu mai iā te aʻu ni tusi e avatu i kovana o le vaipanoa i tala atu o le vaitafe,*+ ina ia latou faataga aʻu ou te ui atu i o latou laueleele seʻia ou oo i Iuta, 8 faapea foʻi ma se tusi iā Asafo o lē e vaaia le vaomatua a le tupu, ina ia aumaia e ia ni laupapa iā te aʻu e fai ai faitotoʻa o le Nofoaga Malupuipuia+ e lata i le malumalu,* ma pā o le aai,+ ma le fale o le a ou alu atu i ai.” Ona tuuina mai lea e le tupu o tusi iā te aʻu,+ e tusa ai ma le aao agalelei o loʻu Atua sa i luga iā te aʻu.+

9 Mulimuli ane, ona ou oo atu lea i kovana o le vaipanoa i tala atu o le vaitafe, ma avatu iā i latou tusi a le tupu. Ua aauina atu foʻi aʻu e le tupu faatasi ma taʻitaʻi o le ʻautau, ma tagata tiʻetiʻe solofanua. 10 Ina ua faalogo i ai Sanepalata+ le tagata Horono, ma Tovia+ le tagata Amonī,+ o ia o le tagata aloaʻia* a le tupu, ona matuā lē fiafia ai lea o i laʻua ona ua sau se tagata e fai se mea lelei mo le fanauga a Isaraelu.

11 Mulimuli ane, ona ou oo lea i Ierusalema, ma na ou nofo ai i inā mo aso e tolu. 12 Ua ou tulaʻi i le pō, o aʻu ma nai tagata sa iā te aʻu, ae ou te leʻi taʻu atu i se tagata le mea na tuuina e loʻu Atua i loʻu loto e fai mo Ierusalema, e leai foʻi nisi manu na iā te aʻu ae e na o le manu na ou tiʻetiʻe ai. 13 Ua ou alu atu i le pō e ui atu i le Faitotoʻa o le Vanu+ i luma o le Vaipuna o le Gata Tele, ma aga‘i atu ai i le Faitotoʻa o Otaota,+ ma sa ou vaavaai pea i pā o Ierusalema na solofa i lalo ma ona faitotoʻa ua faaumatia e le afi.+ 14 Ona ou ui atu lea i le Faitotoʻa o le Vaipuna+ ma le Vai Tāʻele a le Tupu, ae e leai se mea e ui atu ai le manu na ou tiʻetiʻe ai. 15 Ae ua ou alu aʻe pea i le vanu*+ i le pō ma vaavaai pea i le pā; ona ou toe foʻi mai lea ma ui atu i le Faitotoʻa o le Vanu, ma ou toe foʻi ai loa.

16 E leʻi iloa e sui pule+ le mea na ou alu i ai ma le mea na ou faia, auā ou te leʻi taʻuina atu se mea e tasi i tagata Iutaia, o ositaulaga, o tamālii, o sui pule, ma ē na totoe o le ʻaufaigaluega. 17 Mulimuli ane, ona ou fai atu lea iā i latou: “Ua outou vāai i le tulaga leaga o loo tatou iai, o le auala ua faatafunaina ai Ierusalema ma ua susunuina foʻi ona faitotoʻa i le afi. Inā ō mai ia, seʻi o tatou toe fausia le pā o Ierusalema, ina ia lē faalumaina ai pea i tatou.” 18 Na ou faamatala atu foʻi iā i latou le aao o loʻu Atua lea na agalelei mai iā te aʻu,+ atoa foʻi ma upu a le tupu na fai mai iā te aʻu.+ Ona latou faapea mai lea: “Inā tatou tulaʻi ia ma fausia loa.” Ona faamalolosi lea o i latou lava* mo le galuega lelei.+

19 Ina ua faalogo i lenei mea Sanepalata le tagata Horono, o Tovia+ le tagata Amonī+ le tagata aloaʻia* a le tupu, ma Gesemu le tagata Arapi,+ ona latou taufaifai mai lea iā i matou+ ma ʻinoʻino iā i matou, ua faapea mai: “O le ā lenei mea ua outou faia? Po ua outou fouvale ea i le tupu?”+ 20 Ae na ou tali atu e faapea: “O le Atua o le lagi, o Ia e na te faamanuia mai iā i matou,+ o i matou foʻi o ana auauna, e matou te tutulaʻi ma fausiaina; ae e leai so outou tofi, po o se aiā, po o se mea e manatua ai outou i Ierusalema.”+

3 Ona tulaʻi lea o Eliasipa+ le ositaulaga sili ma ona uso le ʻauositaulaga, ma fausia le Faitotoʻa o Mamoe.+ Ona latou faapaiaina ai lea,+ ma ua faatutūina ona faitotoʻa; ona latou faapaiaina ai lea o lea mea e oo atu i le ʻOlo o Meaa,+ ma e oo atu i le ʻOlo o Hananiali.+ 2 Na pito ane iā i latou tagata o Ieriko+ sa toe faaleleia le pā; ma na pito ane i tagata Ieriko o Sakuro le atalii o Imeri sa toe faaleleia le pā.

3 Ua fausia e le fanauga a Hasenaa le Faitotoʻa o Iʻa;+ ua latou faia i laupapa+ ma faatutūina ona faitotoʻa, o ona faamau, ma ona faamaufaalava. 4 Na pito ane i le fanauga a Hasenaa, o Meremota+ le atalii o Uria le atalii o Hakosa, sa toe faaleleia le pā, na pito ane iā Meremota, o Mesulama+ le atalii o Perekia le atalii o Mesesapelu, sa toe faaleleia le pā, ma na pito ane iā Mesulama, o Satoka le atalii o Paana sa toe faaleleia le pā. 5 Na pito ane iā Satoka o tagata Tikoa+ sa toe faaleleia le pā, ae ua lē faamaulalo alii o tagata Tikoa ina ia fesoasoani i le galuega a o latou matai.

6 Sa toe faaleleia le Faitotoʻa o le Aai Tuai+ e Ioata le atalii o Pasea, ma Mesulama le atalii o Pesotia; ua latou faia i laupapa ma faatutūina ona faitotoʻa, o ona faamau, ma ona faamaufaalava. 7 Na pito ane iā i latou o Melatia le tagata Kipeona+ ma Iatonu le tagata Marono sa toe faaleleia le pā, o i laʻua o tagata Kipeona ma Mesepa,+ o ē e pulea e le kovana o le vaipanoa i tala atu o le vaitafe.*+ 8 Na pito ane iā i laʻua o Usialu le atalii o Haraia, o se tasi o tufuga fai mea auro, sa toe faaleleia le pā, ma na pito ane iā te ia o Hanania, o se tasi e faia uu manogi, sa toe faaleleia le pā; ona latou fola lea o Ierusalema i maa mafolafola e oo atu lava i le Pā Lautele.+ 9 Na pito ane iā i latou o Refaia le atalii o Huro, o se perenise o le ʻafa o le itumalo o Ierusalema, sa toe faaleleia le pā. 10 Na pito ane iā Refaia o Ietaia le atalii o Harumapu, sa toe faaleleia le pā i luma o lona fale; na pito ane iā Ietaia o Hatusa le atalii o Hasapenia, sa toe faaleleia le pā.

11 O le isi vaega* o le pā, sa toe faaleleia e Malakia le atalii o Harima,+ ma Hasupo le atalii o Paka-moapi,+ faapea foʻi ma le ʻOlo o Ogaumu.+ 12 Na pito ane iā i la‘ua o Saluma le atalii o Halokesu, o se perenise o le ʻafa o le itumalo o Ierusalema, sa toe faaleleia le pā, o ia ma ona afafine.

13 Na toe faaleleia e Anuni ma tagata o Sanoa+ le Faitotoʻa o le Vanu;+ na latou faia ma faatutū ona faitotoʻa, o ona faamau, ma ona faamaufaalava, atoa ai ma le 1,000 kupita* o le pā e oo atu i le Faitotoʻa o Otaota.+ 14 Na toe faaleleia le Faitotoʻa o Otaota e Malakia le atalii o Rakapa, o se perenise o le itumalo o Pete-akarema;+ na ia fausia ma faatutū ona faitotoʻa, o ona faamau, ma ona faamaufaalava.

15 Na toe faaleleia le Faitotoʻa o le Vaipuna+ e Saluna le atalii o Kolokuse, o se perenise o le itumalo o Mesepa;+ na ia fausia ma ato, ma faatutū ona faitotoʻa, o ona faamau, ma ona faamaufaalava, faapena foʻi ma le pā o le Alāvai o le Vai+ e oo atu i le Togālaau a le Tupu,+ e oo atu lava i le Faasitepu+ lea e alu ifo mai i le Aai a Tavita.+

16 Na sosoo ane iā Saluna o Neemia le atalii o Asepuka, o se perenise o le ʻafa o le itumalo o Petesura,+ sa toe faaleleia le pā e amata mai i luma o Fanuatanu o Tavita,+ e oo atu i le vai+ na faia, ma e oo atu i le Fale o Ē e Malolosi.

17 Na sosoo ane iā Neemia le ʻau sa Levī sa toe faaleleia le pā: o Rekuma le atalii o Pani; na pito ane iā te ia Hasapea, o se perenise o le ʻafa o le itumalo o Kaila,+ sa toe faaleleia le pā o lona itumalo. 18 Na sosoo ane iā Hasapea isi o le ʻau sa Levī sa toe faaleleia le pā: o Pavai le atalii o Henatati, o se perenise o le ʻafa o le itumalo o Kaila.

19 Na pito ane iā Pavai o Eseri le atalii o Iesua,+ o se perenise o Mesepa sa toe faaleleia le isi vaega o le pā, i luma o le mea e alu aʻe ai i le Fale o Auupega i le Poutū Lagolago.+

20 Na sosoo ane iā Eseri o Paruka le atalii o Sapai,+ sa galue ma le tinoū ma toe faaleleia le isi vaega o le pā, e amata mai i le Poutū Lagolago e oo atu i le mea e ui atu ai i le fale o Eliasipa+ le ositaulaga sili.

21 Na sosoo ane iā Paruka o Meremota+ le atalii o Uria le atalii o Hakosa, sa toe faaleleia le isi vaega o le pā, e amata mai i le mea e ui atu ai i le fale o Eliasipa, e oo atu lava i le isi pito o le fale o Eliasipa.

22 Na sosoo ane iā Meremota le ʻauositaulaga, o tagata o le itumalo o Ioritana,*+ sa toe faaleleia le pā. 23 Na sosoo ane iā i latou Peniamina ma Hasupo, sa toe faaleleia le pā i luma o lo la fale. Na sosoo ane iā i latou o Asaraia le atalii o Maaseia le atalii o Anania, sa toe faaleleia le pā e latalata i lona fale. 24 Na sosoo ane iā Asaraia o Penui le atalii o Henatati, sa toe faaleleia le isi vaega o le pā, e amata mai i le fale o Asaraia e oo atu i le Poutū Lagolago,+ e oo atu foʻi i le tulimanu.

25 Na sosoo ane iā Penui o Palala le atalii o Usai, sa toe faaleleia le pā i luma o le Poutū Lagolago ma le ʻolo lea e alu a‘e mai i le Fale o le Tupu,+ lea e i le Lotoā o le Leoleo.+ Na sosoo ane iā Palala o Petaia le atalii o Parose.+

26 O auauna o le malumalu*+ na nonofo i Ofele,+ sa latou toe faaleleia le pā e oo atu i luma o le Faitotoʻa o le Vai+ i le itu i sasaʻe, ma le ʻolo lea e maualuga atu i le pā.

27 Na sosoo ane iā i latou tagata Tikoa,+ sa toe faaleleia le isi vaega o le pā e amata mai i luma o le ʻolo lea e maualuga atu i le pā, e oo atu i le pā o Ofele.

28 I luga aʻe o le Faitotoʻa o Solofanua,+ sa toe faaleleia ai e le ʻauositaulaga le pā, e taʻitoʻatasi i luma o lona lava fale.

29 Na sosoo ane iā i latou o Satoka+ le atalii o Imere, sa toe faaleleia le pā i luma o lona fale.

Na sosoo ane iā te ia o Semaia le atalii o Sekania, o le leoleo o le Faitotoʻa i Sasaʻe,+ sa toe faaleleia le pā.

30 Na sosoo ane iā te ia o Hanania le atalii o Selemia, ma Anuni, o le atalii lona ono lea o Salafa, sa la toe faaleleia le isi vaega o le pā.

Na sosoo ane iā te ia o Mesulama+ le atalii o Perekia, sa toe faaleleia le pā i luma o lona fale.*

31 Na sosoo ane iā Mesulama o Malakia, o se tufuga o le ʻau fai mea auro, sa toe faaleleia le pā e oo atu i le fale o auauna o le malumalu*+ ma le ʻaufaatauʻoa, i luma o le Faitotoʻa e Suʻesuʻe Ai, ma e oo atu i le potu pito i luga o le tulimanu.

32 Sa toe faaleleia e tufuga fai mea auro ma le ʻaufaatauʻoa le pā i le vā o le potu pito i luga o le tulimanu, ma le Faitotoʻa o Mamoe.+

4 Ina ua faalogo Sanepalata+ ua matou toe fausia le pā, ona ita tele ai lea o ia ma ua lotoa lava, ma ua faaauau ona ia faifai mai i tagata Iutaia. 2 Ona fai atu lea o ia i luma o ona uso ma le ʻautau a Samaria e faapea: “O ā ea mea o loo faia e nei tagata Iutaia vaivai? Pe e latou te manatu ea e mafai ona latou faia lenei galuega tele? Pe e latou te ofoina ea ni taulaga? Pe e uma ea le galuega i se aso e tasi? Pe e mafai ea ona latou toe faaaogā maa ua susunuina ma nutililiia o loo i faaputuga otaota?”+

3 Sa iai Tovia+ le tagata Amonī+ faatasi ma ia, ua ia faapea mai: “Afai e alu aʻe se alope* i le mea o loo latou fausiaina, e na te soloia lava i lalo la latou pā maa.”

4 Ona ou tatalo lea: “Lo matou Atua e, ia e faafofoga mai auā ua inosia i matou,+ ma ia e toe faafoʻi atu i luga o o latou ulu a latou faifaiga,+ ma ia faia i latou ma ni ē ua faoa a latou mea i le nuu e ave faapagota i ai. 5 Aua neʻi ufiufia la latou mea sesē pe soloiesea a latou agasala i ou luma,+ auā ua latou faatigā i ē o loo faia le pā.”

6 Na matou fausia pea le pā, ua soo foʻi le pā atoa ma ua oo i le ʻafa lona maualuga, ma ua loto pea i ai le nuu e faia le galuega.

7 Ina ua faalogo Sanepalata, o Tovia,+ o tagata Arapi,+ o tagata Amonī, ma tagata Asetota,+ o loo agaʻigaʻi pea i luma le toe faaleleia o pā o Ierusalema, ma ua puluti mea na pūpū, ona latou matuā feita ai lea. 8 Ona latou taupulepule faatasi lea ina ia ō mai e siitaua iā Ierusalema, ma faavevesi mai iā i matou. 9 Ae na matou tatalo i lo matou Atua, ma tofia se leoleo e leoleoina i matou mai iā i latou i le ao ma le pō.

10 Peitaʻi, ua faapea mai tagata o Iuta: “Ua vaivai ē e faia galuega masani,* ma ua matuā tele le otaota e tatau ona lafoaʻia; e lē mafai ona matou fausia le pā.”

11 Ua faapea ane foʻi o matou fili: “O le a faateʻia i latou pe a tatou ō atu i totonu iā i latou, ma e tatou te fasiotia lava i latou ma taofia le galuega.”

12 Pe a ō mai foʻi tagata Iutaia na nonofo e lata ane iā i latou, e latou te fai mai pea* iā i matou: “O le a latou osofaʻia i tatou mai i itu uma.”

13 Ona ou tofia lea o tane e leoleo i tua o le pā i fanua maulalalo ma taalaelae, ma ou tofia i latou e tusa ma o latou aiga, e leoleo ma a latou pelu, o tao, ma ʻaufana. 14 Ina ua ou iloaina lo latou fefefe, ona ou tulaʻi loa lea ma faapea atu i tamālii,+ o sui pule, ma le nuu uma: “Aua tou te fefefe iā i latou.+ Ia outou manatuaina pea Ieova o lē e sili ma mataʻutia;+ ma ia outou tau mo o outou uso, o o outou atalii ma afafine, o a outou avā, ma o outou fale.”

15 Ua faalogo o matou fili ua matou iloa le mea o loo latou faia, ma ua faalēaogāina e le Atua moni a latou faufauga. Ina ua uma, ona matou toe faia loa lea o le pā. 16 Talu mai lenā aso, na galulue le ʻafa o oʻu tauleleʻa i le galuega,+ a o le isi ʻafa o i latou sa faaauupegaina i tao, o talipupuni, o ʻaufana, ma ofutau uʻamea. Sa tutū foʻi perenise+ i tua o tagata Iutaia ina ia lagolagoina i latou. 17 O i latou na tauaveina avega, na latou faia le galuega i le lima e tasi, a o le isi lima na uu ai le auupega. 18 Ua taʻitasi ē na faia le pā ma fusi lana pelu i lona puimanava a o faia le galuega, ma na iai foʻi i oʻu tafatafa lē e ilia le pū.+

19 Ona ou fai atu lea i tamālii, o sui pule, ma le nuu uma: “E matuā telē lava le galuega, ma ua salalau solo i tatou i luga o le pā e vavamamao le tasi mai i le isi. 20 Pe a outou faalogo i le leo o le pū, ona outou faapotopoto faatasi mai lea iā i matou. O le a tau lo tatou Atua mo i tatou.”+

21 A o faia le galuega e le isi ʻafa o i matou, ua uu e le isi ʻafa a latou tao e amata mai i le tafa o ata seʻia oo ina aliali mai fetu. 22 Ona ou fai atu lea i le nuu i lenā taimi: “Ia taʻitasi le tagata ma nonofo ma lana auauna i le pō i totonu o Ierusalema, ina ia leoleoina i tatou i le pō, ae galulue i le ao.” 23 A o aʻu, o oʻu uso, o aʻu auauna,+ ma leoleo o ē na mulimuli mai iā te aʻu, e leʻi aveesea o matou ofu, ma na taʻitasi le tagata ma uu lana auupega i lona lima taumatau.

5 Peita‘i, na oo mai se alaga tele mai i tagata ma a latou avā, e faasaga i o latou uso o tagata Iutaia.+ 2 Na faapea mai nisi: “E toʻatele o matou atalii ma afafine. E tatau ona matou maua ni saito e aai ma ola ai.” 3 Ae na faapea mai isi: “Ua matou avatu o matou fanua, o o matou togāvine, ma o matou fale e faamau ai a matou aitalafu, ina ia maua mai ai ni saito i le taimi o le oge.” 4 Na faapea mai foʻi nisi: “Na matou aitalafu mai ni tupe mo meaalofa i le tupu, ae e faamau i o matou fanua ma o matou togāvine.+ 5 O lenei, o i matou o le ituaiga e tasi ma o matou uso,* e faapena fo‘i a matou fanau ma a latou fanau; peitaʻi, ua avea o matou atalii ma afafine ma pologa, e iai foʻi nisi o o matou afafine ua faapologaina.+ Ae ua leai se mea e matou te mafaia e taofia ai lenei mea, auā ua fai mo isi tagata o matou fanua ma togāvine.”

6 Ona ou matuā ita ai lea ina ua ou faalogo i la latou alaga ma ia upu. 7 Ona ou manatunatu lea i ia mea i loʻu loto, ma na ou aʻoaʻia tamālii ma sui pule ma faapea atu iā i latou: “Ua taʻitoʻatasi outou ma tāpā ni tupe faasili se tele mai i lona uso.”+

Na ou faamaopoopoina foʻi se fono tele ona o i latou. 8 Ona ou fai atu lea iā i latou: “Ua tatou faatauina mai o tatou uso Iutaia na faatauina atu i isi atunuu, e tusa ai ma lo tatou malosi; ae po o le a outou faatauina atu ea o o outou uso,+ ma tatou toe faatauina mai i latou?” Ua leai sa latou tala e fai mai, ma ua lē mautali lava i latou. 9 Na ou fai atu foʻi: “E lē lelei le mea o loo outou faia. Pe e lē tatau ea ona outou savavali ma le mataʻu i lo tatou Atua,+ ina ia lē faifai mai ai atunuu, o o tatou fili ia? 10 O aʻu foʻi, o oʻu uso ma aʻu auauna, ua matou nonō atu tupe ma saito i o tatou uso e aunoa ma se pasene. O lea, faamolemole seʻi tuu ia le nonō atu o mea ma ni pasene.+ 11 Faamolemole, inā toe faafoʻi atu ia i le asō o latou fanua,+ o latou togāvine, o latou togāolive, o latou fale, ma le tasi vaeselau* o le tupe, o saito, o uaina fou, ma suāuu, na outou tāpā o ni pasene mai iā i latou.”

12 Ona latou faapea mai lea: “O le a matou toe faafoʻi atu ia mea iā i latou, ma e matou te lē toe talosagaina mai foʻi ni mea. E matou te faia lava e pei ona e fai mai ai.” Ona ou valaau atu lea i ositaulaga ma faatautō ia tagata i luma o ositaulaga, ina ia faia e tusa ai ma lenei folafolaga. 13 Na ou lūlūina foʻi loʻu ofu* ma faapea atu: “Ia faapea ona lūlūina e le Atua moni so o se tagata e lē usitaʻia lenei folafolaga, mai i lona fale ma ana meatotino, ma ia lūlūina o ia, ina ia matuā leai ni ana mea.” Ona faapea mai lea o le faapotopotoga uma: “Amene!”* Ona latou vivii atu lea iā Ieova, ma ua faia e le nuu e tusa ma la latou folafolaga.

14 E lē gata i lea, talu mai le aso na tofia ai aʻu e Aretaseta+ le tupu e fai ma o latou kovana+ i Iuta, e amata mai i le tausaga lona 20+ e oo i le tausaga lona 32+ o lana nofoaiga, e 12 tausaga, e matou te leʻi aai ma oʻu uso i meaʻai a le kovana.+ 15 A o kovana na muamua atu iā te aʻu, na latou faamamafa avega a tagata, ma na latou aumaia mai iā i latou i aso taʻitasi o sekeli* siliva e 40 mo meaʻai ma uaina. Na pule sauā foʻi a latou auauna i tagata. A o aʻu, ou te leʻi faia faapena+ ona o le mataʻu i le Atua.+

16 E lē gata i lea, na ou fesoasoani i le galuega o lenei pā, ma e matou te leʻi maua foʻi se fanua;+ na faapotopoto faatasi foʻi aʻu auauna i inā mo le galuega. 17 Na aai foʻi i laʻu laulau tagata Iutaia ma sui pule e toʻa 150, ma ē na ō mai iā i matou mai i isi atunuu. 18 I aso taʻitasi, na ou faatonuina ai ni tagata e saunia mo i matou se povi poʻa se tasi, o mamoe pepeti e ono, ma manulele, ma e faatasi foʻi i aso e sefulu ona matou maua le tele o ituaiga o uaina eseese. E ui i lea, ou te leʻi tāpā meaʻai a le kovana, auā ua mamafa le avega a le nuu. 19 Ona ou tatalo atu lea: “Loʻu Atua e, ia e manatu alofa mai iā te aʻu, ona o mea uma na ou faia mo lenei nuu.”+

6 Ina ua taʻu atu iā Sanepalata, o Tovia,+ o Gesemu le tagata Arapi,+ ma o matou fili uma e faapea, ua ou toe fausia le pā+ ma ua leai se pū o totoe (e ui e oo ane i lenā taimi ou te leʻi faatutūina faitotoʻa o le pā),+ 2 ona auina mai loa lea e Sanepalata ma Gesemu le feʻau lenei iā te aʻu: “Inā sau ia, seʻi o tatou filifili se taimi e feiloaʻi faatasi ai i se tasi o nuu o le fanua laugatasi* o Ono.”+ Peitaʻi, ua latou faufau e fai se mea leaga iā te aʻu. 3 Ona ou aauina atu lea o avefeʻau iā i la‘ua ma faapea atu: “O loo oʻu faia se galuega tele, ma e lē mafai ona ou alu ifo. Aiseā o le a taofia ai le galuega ae ou alu ifo iā te outou?” 4 E faafā ona la auina mai iā te aʻu lenā lava feʻau, ma na ou tuuina atu iā i laʻua le tali lava e tasi.

5 Ona auina mai lea e Sanepalata o lana auauna iā te aʻu ma le feʻau lava lea e tasi, ua faalima ai lea, ua i lona lima foʻi se tusi ua tatala. 6 O upu nei o loo tusia ai: “Ua logotala atunuu ma ua fai mai ai foʻi Gesemu,+ o loo e taupulepule ma tagata Iutaia e fouvale.+ O le mea lenā ua e fausia ai le pā; ma ua maua mai foʻi i nei lipoti, o le a avea oe ma o latou tupu. 7 E iai foʻi perofeta ua e tofia ina ia talaʻiina atu oe i Ierusalema atoa, e faapea, ‘Ua iai se tupu i Iuta!’ O le a taʻu atu lava ia mea i le tupu. O lea, ia e sau seʻi o tatou talanoa faatasi i ia mea.”

8 Ae na ou auina atu iā te ia se feʻau e faapea: “E leai ma se mea o mea na e fai mai ai o tupu, ae o mea lava ua e fatu i lou lava loto.” 9 Auā ua latou taumafai uma e faafefe i matou, ua faapea ane: “E faavaivaia nei o latou lima i le galuega, ma lē māeʻa ai.”+ Ae na ou tatalo, “Le Atua e, ia e faamalosia oʻu lima.”+

10 Ona ou alu atu lea i le fale o Semaia le atalii o Talaia, le atalii o Meatapala, a o loka ai o ia i inā. Na ia faapea mai: “Seʻi o ta filifilia se taimi ta te feiloaʻi ai i le fale o le Atua moni i le malumalu, ma ta tapunia faitotoʻa o le malumalu, auā o le a latou ō mai e fasioti oe. E latou te ō mai i le pō e fasioti oe.” 11 Ae na ou faapea atu: “Pe e sola ea se tagata e pei o aʻu? Pe e mafai ona ulu atu se tagata e pei o aʻu i le malumalu ma ola ai?+ Ou te lē ulu atu lava!” 12 Ona ou iloa ai lea, e leʻi auina mai o ia e le Atua, ae na totogi o ia e Tovia ma Sanepalata+ ina ia faia lenei valoaga faasaga iā te aʻu. 13 Na totogi o ia ina ia faafefe aʻu ma faapogaia aʻu ia ou agasala, ina ia latou faaleagaina ai loʻu talaaga ma faalumaina ai aʻu.

14 Ona ou tatalo lea, “Loʻu Atua e, ia e manatua Tovia+ ma Sanepalata ma mea ua la faia, faapea foʻi ma Noataia le perofeta fafine, ma isi perofeta na taumafai pea e faafefe aʻu.”

15 Ona māeʻa lea o le pā i le aso lona 25 o Elula,* ma na fausia i aso e 52.

16 Ina ua faalogo o matou fili uma i lenei mea, ma vāai i ai atunuu uma na siʻomiaina i matou, ona latou matuā māsiasi ai lea,+ ma ua latou iloa ai o le fesoasoani a lo matou Atua, ua faamāeʻaina ai lenei galuega. 17 I aso foʻi na, na auina atu ai e tamālii+ o Iuta le tele o a latou tusi iā Tovia, ma na latou mauaina foʻi tusi a Tovia. 18 Auā o le toʻatele i Iuta na tautō e ʻau ma ia, ona o ia o le tane a le afafine o Sekania le atalii o Araka,+ na faiavā foʻi Iokana lona atalii i le afafine o Mesulama+ le atalii o Perekia. 19 Na latou faamatala mai foʻi e lē aunoa iā te aʻu mea lelei e uiga iā Tovia, ma faaoo atu aʻu upu iā te ia. Ona auina mai lea e Tovia o tusi e faafefe ai aʻu.+

7 Ina ua uma ona toe fausia le pā,+ ona ou faatutūina loa lea o faitotoʻa.+ Na tofia foʻi leoleo faitotoʻa+ ma tagata pepese,+ ma le ʻau sa Levī.+ 2 Ona ou tofia lea o Hanani+ loʻu uso e pule i Ierusalema, faatasi ma Hanania le perenise o le Maota,+ auā o Hanania o se tagata maufaatuatuaina, ma e sili atu ona mataʻu i le Atua moni+ nai lo o le toʻatele o isi tagata. 3 Ona ou fai atu lea iā i laʻua: “E lē tatau ona tatalaina pā o Ierusalema seʻiloga ua vevela le lā, ma e tatau i leoleo faitotoʻa ona tapunia faitotoʻa ma faamauina, a o tutū ai i tafatafa. Ia tofia foʻi ni leoleo mai i tagata o Ierusalema, e taʻitasi le tagata ma le mea e na te leoleoina, ma e taʻitasi foʻi le tagata ma tū i luma o lona fale.” 4 E lautele ma telē le aai, e toʻaitiiti foʻi tagata na iai,+ ma e leʻi toe fausia ai ni fale.

5 Ae ua tuuina mai e loʻu Atua i loʻu loto se manatu ina ia ou faapotopoto faatasi tamālii, o sui pule, ma le nuu, ina ia tusia o latou igoa i le tusi o gafa.+ Ona ou maua lea o le tusi o gafa o loo tusia ai i latou na ō aʻe muamua, ma ua tusia ai e faapea:

6 O tagata nei o le itumalo na ō aʻe mai i le aveina faapagota, o ē na ave faapagota+ e Nepukanesa+ le tupu o Papelonia, ma na toe foʻi mulimuli ane i Ierusalema ma Iuta, ua taʻitasi ma alu i lona aai,+ 7 o ē na ō mai faatasi ma Serupapelu,+ o Iesua,+ o Neemia, o Asaraia, o Raamia, o Naamani, o Moretekai, o Pilesana, o Mesepara, o Pikevai, o Nekuma, ma Panaa.

O le faitau aofaʻi nei o tane o Isaraelu:+ 8 o le fanauga a Parose, e toʻa 2,172; 9 o le fanauga a Sefatia, e toʻa 372; 10 o le fanauga a Araka,+ e toʻa 652; 11 o le fanauga a Paka-moapi,+ e ala mai iā Iesua ma Ioapo+ o ē na tupuga mai iā te ia, e toʻa 2,818; 12 o le fanauga a Elama,+ e toʻa 1,254; 13 o le fanauga a Satu, e toʻa 845; 14 o le fanauga a Sakai, e toʻa 760; 15 o le fanauga a Penui, e toʻa 648; 16 o le fanauga a Pepai, e toʻa 628; 17 o le fanauga a Asekata, e toʻa 2,322; 18 o le fanauga a Atonikama, e toʻa 667; 19 o le fanauga a Pikevai, e toʻa 2,067; 20 o le fanauga a Atini, e toʻa 655; 21 o le fanauga a Atere o le aiga o Esekia, e toʻa 98; 22 o le fanauga a Hasumu, e toʻa 328; 23 o le fanauga a Pisai, e toʻa 324; 24 o le fanauga a Haripa, e toʻa 112; 25 o le fanauga a Kipeona,+ e toʻa 95; 26 o tagata o Peteleema ma Netopa, e toʻa 188; 27 o tagata o Anatota,+ e toʻa 128; 28 o tagata o Pete-asemau, e toʻa 42; 29 o tagata o Kiriata-iarima,+ o Kafira ma Perota,+ e toʻa 743; 30 o tagata o Rama ma Kepa,+ e toʻa 621; 31 o tagata o Mekemasi,+ e toʻa 122; 32 o tagata o Peteli+ ma Ai,+ e toʻa 123; 33 o tagata o le isi Nepo, e toʻa 52; 34 o le fanauga a le isi Elama, e toʻa 1,254; 35 o le fanauga a Harima, e toʻa 320; 36 o le fanauga a Ieriko, e toʻa 345; 37 o le fanauga a Loto, o Hatito ma Ono,+ e toʻa 721; 38 ma le fanauga a Senaa, e toʻa 3,930.

39 O le ʻauositaulaga:+ o le fanauga a Ietaia o le aiga o Iesua, e toʻa 973; 40 o le fanauga a Imere, e toʻa 1,052; 41 o le fanauga a Pasura,+ e toʻa 1,247; 42 ma le fanauga a Harima,+ e toʻa 1,017.

43 O le ʻau sa Levī:+ o le fanauga a Iesua ma Katameeli,+ e mai i le aiga o Hotevia, e toʻa 74. 44 O tagata pepese:+ o le fanauga a Asafo,+ e toʻa 148. 45 O leoleo faitotoʻa:+ o le fanauga a Saluma, o le fanauga a Atere, o le fanauga a Talemoni, o le fanauga a Akupa,+ o le fanauga a Hatita, ma le fanauga a Sopai, e toʻa 138.

46 O auauna o le malumalu:*+ o le fanauga a Seka, o le fanauga a Hasufi, o le fanauga a Tapaota, 47 o le fanauga a Kirosa, o le fanauga a Seaa, o le fanauga a Patono, 48 o le fanauga a Lepana, o le fanauga a Hakepa, o le fanauga a Salemai, 49 o le fanauga a Hanana, o le fanauga a Kitele, o le fanauga a Gakara, 50 o le fanauga a Reaia, o le fanauga a Resina, o le fanauga a Nekota, 51 o le fanauga a Gasama, o le fanauga a Usa, o le fanauga a Pasea, 52 o le fanauga a Pesai, o le fanauga a Meunima, o le fanauga a Nefasemo, 53 o le fanauga a Pakepura, o le fanauga a Hakupa, o le fanauga a Harekuru, 54 o le fanauga a Paselita, o le fanauga a Mekita, o le fanauga a Haresa, 55 o le fanauga a Parekusa, o le fanauga a Sesera, o le fanauga a Timaka, 56 o le fanauga a Neseka, ma le fanauga a Hatifa.

57 O le fanauga a auauna a Solomona:+ o le fanauga a Sotai, o le fanauga a Soferete, o le fanauga a Feruta, 58 o le fanauga a Iaala, o le fanauga a Tarekono, o le fanauga a Kitele, 59 o le fanauga a Sefatia, o le fanauga a Hatili, o le fanauga a Pokerete-hasepaima, ma le fanauga a Amone. 60 O auauna uma o le malumalu*+ ma le fanauga a auauna a Solomona, e toʻa 392.

61 O i latou nei na ō aʻe mai i Tele-melaka, o Tele-aresa, o Kirova, o Atano, ma Imere, ae e leʻi mafai ona latou iloa aiga o o latou tamā ma o latou tupuaga, po o ni Isaraelu i latou:+ 62 o le fanauga a Talaia, o le fanauga a Tovia, ma le fanauga a Nekota, e toʻa 642. 63 O le ʻauositaulaga: o le fanauga a Hapaia, o le fanauga a Hakosa,+ o le fanauga a Pasili, o lē na faiavā i se tasi o afafine o Pasili+ le tagata Kiliata, ma ua faaigoa ai i le igoa o le tamā o lana avā. 64 O i latou nei na saʻiliʻili i faamaumauga ina ia faamautinoa ai lo latou tupuaga, ae latou te leʻi mauaina, o lea ua latou lē agavaa ai i le faiva faaositaulaga.*+ 65 Ona fai atu lea o le kovana*+ iā i latou, e lē tatau ona latou aai i mea e sili ona paia+ seʻia sau se ositaulaga e faaaogā le Urima ma le Tumema.+

66 O le aofaʻiga atoa o le faapotopotoga uma e toʻa 42,360,+ 67 e ese mai i a latou tane pologa ma teine pologa,+ e toʻa 7,337; na iai foʻi a latou tama pepese ma teine pepese+ e toʻa 245. 68 O a latou solofanua e 736, o a latou asini* e 245, 69 o a latou kamela e 435, ma a latou asini e 6,720.

70 Sa iai nisi o alii sili o aiga o tamā na foaʻi atu ni mea i le galuega.+ Na foaʻi atu e le kovana* i oloa mo le galuega, o tupe auro* e 1,000, o ipu faaofuofu e 50, ma ofu e 530 mo ositaulaga.+ 71 Sa iai foʻi nisi o alii sili o aiga o o latou tamā na foaʻi atu i oloa mo le galuega, o tupe auro e 20,000 ma tupe siliva* e 2,200. 72 O ē na totoe o le nuu, na latou foaʻi atu tupe auro e 20,000, o tupe siliva e 2,000, ma ofu e 67 mo ositaulaga.

73 Ona nonofo lea o le ʻauositaulaga, o le ‘au sa Levī, o leoleo faitotoʻa, o le ‘aupepese,+ o nisi o le nuu, o auauna o le malumalu* ma Isaraelu uma i o latou aai.+ E oo ane i le masina lona fitu,+ ua nonofo le fanauga a Isaraelu i o latou aai.+

8 Ua faapotopoto faatasi le nuu uma ma le lotogatasi i le nofoaga faitele, i luma o le Faitotoʻa o le Vai,+ ma ua latou fai atu iā Esera+ le tusiupu, ina ia aumai le tusi o le Tulafono a Mose+ lea na poloaʻi mai ai Ieova iā Isaraelu.+ 2 I le aso muamua o le masina lona fitu,+ na aumaia ai e Esera le ositaulaga le Tulafono, i luma o le faapotopotoga+ o tane, o fafine, ma ē uma e mafai ona faalogo ma malamalama. 3 Ua ia faitau leotele+ le tusi i le nofoaga faitele i luma o le Faitotoʻa o le Vai, e amata mai i le tafa o ata seʻia tutonu le lā, i luma o tane, o fafine, ma ē uma e mafai ona malamalama; ua matuā faalogologo+ foʻi le nuu uma i le tusi o le Tulafono. 4 Ua tū Esera le tusiupu i luga o le fata laau na latou faia mo lea sauniga; ma sa tutū ai i ona tafatafa i lona itu taumatau o Maatatia, o Sema, o Anaia, o Uria, o Hilikia, ma Maaseialima; a o lona itu tauagavale sa tutū ai Petaia, o Mesaelu, o Malakia,+ o Hasumu, o Hase-patana, o Sakaria, ma Mesulama.

5 Ona tatala lea e Esera o le tusi a o vaavaai atu le nuu uma, auā e maualuga atu le mea na tū ai o ia nai lo o le nuu uma. A o ia tatala le tusi, ona tutulaʻi lea o tagata uma. 6 Ona vivii lea o Esera iā Ieova le Atua moni, o Lē e sili, ma ua tali mai le nuu uma, “Amene!* Amene!”+ ma sisii i luga o latou lima. Ona latou punonou lea ma ifo toʻele i luma o Ieova. 7 A o le ʻau sa Levī o Iesua, o Pani, o Serepeia,+ o Iaminu, o Akupa, o Sapetai, o Hotia, o Maaseia, o Kelita, o Asaraia, o Ieosapa,+ o Hanana, ma Pelaia, ua latou faamatala atu le Tulafono i le nuu+ a o laulaututū pea tagata. 8 Ua faaauau pea ona latou faitau leotele le tusi, o le Tulafono lea a le Atua moni, ma faamatala atu i se auala faigofie ma manino le uiga o nei upu. Ua latou fesoasoani i le nuu ina ia malamalama i mea ua faitauina.+

9 Ona fai atu lea o Neemia le kovana,* o Esera+ le ositaulaga ma o le tusiupu, ma le ʻau sa Levī o ē na aʻoaʻoina le nuu, ua faapea atu i tagata uma: “O le aso lenei e paia iā Ieova lo outou Atua.+ Aua tou te faanoanoa pe fetagisi.” Auā na fetagisi tagata uma a o latou faalogologo atu i upu o le Tulafono. 10 Ua faapea atu Neemia iā i latou: “Inā o ia, ia aai i mea e sili ona lelei* ma inu i mea suamalie, ma ia auina atu meaʻai+ i ē e leai ni a latou mea ua saunia; auā e paia lenei aso i lo tatou Alii, aua foʻi neʻi outou tigā auā o le olioli mai iā Ieova, o lo outou malosi lea.” 11 Ua faatoʻafilemu foʻi e le ʻau sa Levī le nuu uma, ua faapea atu: “Ia outou fifilemu! auā e paia lenei aso, ma aua neʻi outou faanoanoa.” 12 Ona ō lea o le nuu uma e aai ma feinu, ma auina atu meaʻai, ma matuā olioli,+ auā ua latou malamalama i upu na faailoa atu iā i latou.+

13 I le aso lona lua, na faapotopoto faatasi mai ai alii sili o aiga o tamā o le nuu uma, o le ʻauositaulaga, ma le ʻau sa Levī, iā Esera le tusiupu, ina ia malamalama atili i upu o le Tulafono. 14 Ona latou iloa ai lea, ua tusia i le Tulafono na poloaʻi mai ai Ieova e ala iā Mose, e tatau ona nonofo le fanauga a Isaraelu i fale lauvao* i le taimi o le tausamiga i le masina lona fitu,+ 15 ma e tatau ona latou folafola atu+ ma faailoa i o latou aai uma ma Ierusalema atoa, e faapea: “Inā ō ia i vaega maugā ma aumai lālā laau o olive, o le olive vao, o le atasi, o le pama, ma lālā laau o isi laau e fai ai fale lauvao e tusa ma le mea ua tusia.”

16 Ona ō atu lea o le nuu ma ua latou aumaia lālā laau ma faia ai fale lauvao mo i latou, e taʻitasi i luga o lona lava fale, i o latou lotoā, i lotoā o le fale o le Atua moni,+ i le nofoaga faitele o le Faitotoʻa o le Vai,+ ma le nofoaga faitele o le Faitotoʻa o Efaraima.+ 17 O i latou uma na toe foʻi mai i le aveina faapagota, ua latou faia fale lauvao ma nonofo ai, auā e leʻi faia faapea e le fanauga a Isaraelu talu mai aso o Iosua+ le atalii o Nuno seʻia oo mai i lenā aso, ona matuā olioli tele ai lea.+ 18 Ua faitauina leotele foʻi le tusi o le Tulafono a le Atua moni+ i aso taʻitasi, e mai i le aso muamua seʻia oo i le aso mulimuli. Ua latou faia foʻi le tausamiga mo aso e fitu, ae i le aso lona valu, na faia ai se fonotaga paia e tusa ma le Tulafono.+

9 I le aso lona 24 o le masina lona fitu, na faapotopoto faatasi ai le fanauga a Isaraelu, ua anapopogi ma oofu i ʻie talatala, ma asu aʻe le efuefu i o latou luga.+ 2 Ona vavaeeseina lea e le fanauga a Isaraelu i latou mai i tagata ese uma,+ ua tutū foʻi ma taʻutino atu a latou agasala, ma mea sesē na faia e o latou tamā.+ 3 Ona latou tutulaʻi lea i le mea na latou iai, ma faitau leotele le tusi o le Tulafono+ a Ieova lo latou Atua, mo le pe ā ma le tolu itula i le ao;* ma ua latou taʻutino atu foʻi a latou agasala ma ifo atu iā Ieova lo latou Atua, mo le isi tolu itula.

4 Ona tutū lea o Iesua, o Pani, o Katameeli, o Sepania, o Puni, o Serepeia,+ o Pani, ma Kanani i luga o le pulelaa+ o le ʻau sa Levī, ma ua alalaga leotetele atu iā Ieova lo latou Atua. 5 Ona faapea atu lea o le ʻau sa Levī o Iesua, o Katameeli, o Pani, o Hasapenia, o Serepeia, o Hotia, o Sepania, ma Petakia: “Inā tutū ia i luga, ia vivii atu iā Ieova lo outou Atua mai i le vavau seʻia oo lava i le faavavau.+ Le Atua e, ia latou vivii i lou suafa mamalu, lea ua faaeaina i faamanū ma viiga uma.

6 “E na o oe lava o Ieova;+ na e faia le lagi, e oo foʻi i le lagi o lagi ma a latou ʻau uma, o le lalolagi ma mea uma o iai, ma le sami ma mea uma o iai. Ua e faaola i latou uma, ua ifo atu foʻi ʻau o le lagi iā te oe. 7 Ieova e, o oe o le Atua moni, o lē na filifilia Aperamo+ ma aumaia o ia mai i Uro+ i Kaletaia, ma faaigoa iā te ia o Aperaamo.+ 8 Na e silafia le faamaoni o lona loto i ou luma,+ ona e osia ai lea o se feagaiga ma ia e foaʻi atu iā te ia le nuu o tagata Kanana, o tagata Hetī, o tagata Amorī, o tagata Perisē, o tagata Iepusē, ma tagata Kirekasē, ina ia foaʻi atu i lana fanau;+ na e tausia foʻi au folafolaga auā e te amiotonu.

9 “Na e silafia le puapuaga o o matou augātamā i Aikupito,+ ma na e faafofoga i la latou alaga atu i le Sami Ulaula. 10 Ona e faia lea o faailoga ma vavega e faasaga iā Farao ma ana auauna uma, ma tagata uma o lona atunuu,+ auā na e silafia lo latou gaoioi ma le faamaualuga+ e faasaga i ou tagata. Na e faia foʻi se suafa mo oe, lea e tumau pea i le aso nei.+ 11 Na e vaeluaina le sami i o latou luma, ma latou sopo atu i le ogatotonu o le sami i le eleele mātūtū,+ na e lafoina foʻi i mea loloto o ē na tuliloaina i latou, e pei ona lafo o se maa i le sami sousou.+ 12 Na e taʻitaʻiina i latou i le ao faaniutū i le ao, ma le afi faaniutū i le pō, e faamalamalama ai mo i latou le ala e ao ona savavali ai.+ 13 Na e afio ifo i le mauga o Sinai+ ma e fetalai mai iā i latou i le lagi,+ ma e tuuina mai foʻi iā i latou o faamasinogatonu, o tulafono faamaoni,* o tuutuuga ma poloaʻiga lelei.+ 14 Na e faailoa mai foʻi iā i latou lau Sapati paia,+ ma tuuina mai iā i latou poloaʻiga, o tuutuuga, ma tulafono e ala iā Mose lau auauna. 15 Na e foaʻi mai iā i latou meaʻai mai i le lagi ona o lo latou fia aai,+ na e faatafe mai iā i latou vai mai i le papa ona o lo latou fia feinu,+ na e fetalai mai foʻi iā i latou e ulu atu ma nonofo i le laueleele na e tautō* e foaʻi mai iā i latou.

16 “Ae na faamaualuluga+ ma faauamaaa+ i latou, o o matou augātamā, ma e latou te leʻi faalogo i au poloaʻiga. 17 Na mumusu i latou e faalogo,+ na latou lē manatuaina foʻi au galuega ofoofogia na e faia iā i latou, ae ua latou faauamaaa ma tofia se tasi e taʻitaʻia i latou ina ia toe foʻi atu ai i lo latou nofo pologa i Aikupito.+ A o oe o le Atua e nofosauni e faamagalo,* e alofa fua, e alofa mutimutivale, e telegese le toʻasā ae e tele le alofa faamaoni,+ ma e te leʻi tuua i latou.+ 18 Ina ua latou faia foʻi se tupua uʻamea o se tamaʻi povi poʻa mo i latou ma faapea ane, ‘O lo outou Atua lenei, o lē na taʻitaʻia outou mai i Aikupito,’+ ma latou faia le tele o gaoioiga e matuā lē faaaloalo, 19 e te leʻi tuua i latou i le toafa*+ ona o le tele o lou alofa mutimutivale. E leʻi alu ese mai i o latou luga le ao faaniutū i le ao na taʻitaʻiina i latou i le ala, po o le afi faaniutū i le pō e faamalamalama ai le ala e ao ona latou savavali ai.+ 20 Na e foaʻi mai lou agaga* ina ia latou faautauta ai,+ e te leʻi taofia foʻi lau manai mai i o latou gutu,+ ma na e foaʻi mai vai ina ua latou fia feinu.+ 21 Na e saunia meaʻai mo i latou i le toafa mo tausaga e 40.+ E leai se mea na latou matitiva ai. E leʻi pala o latou ofu,+ ma e leʻi fulafula foʻi o latou vae.

22 “Na e tuuina atu foʻi iā i latou o malo ma nuu, ma vaevaeina i latou i lea laueleele ma lea laueleele,+ ona latou nonofo ai lea i le laueleele o Sekono,+ o le laueleele lea o le tupu o Hesepona,+ ma le laueleele o Oko+ le tupu o Vasana. 23 Na e faatoʻateleina foʻi a latou fanau e pei o fetu o le lagi.+ Ona e aumaia lea o i latou i le laueleele na e folafola mai i o latou augātamā, e ulu atu i ai ma fai ma o latou tofi.+ 24 Na ō mai a latou fanau ma fai mo latou tofi le laueleele,+ ma na e faatoʻilaloina foʻi i o latou luma o ē na nonofo i le laueleele, o tagata ia o Kanana,+ ma tuuina atu tagata Kanana i o latou lima, o tupu faapea ma tagata o le nuu, ina ia latou faia i tagata Kanana e tusa ma le mea na latou mananaʻo i ai. 25 Na latou faatoʻilalo aai malupuipuia,+ ma le laueleele lafulemu,+ ma nonofo i fale ua tumu i so o se mea lelei, o vaieli ua elia, o togāvine, o togāolive,+ ma laau ʻaina e tele. Na latou aai foʻi ma ua maoona ai, ua puputa ma ua matuā olioli i le tele o lou lelei.

26 “Peitaʻi, na latou lē usiusitaʻi ma fouvale iā te oe,+ ma fulitua i lau Tulafono.* Na latou fasiotia foʻi au perofeta, o ē na lapataʻia i latou ina ia toe foʻi mai iā te oe, ma na latou faia le tele o gaoioiga lē faaaloalo.+ 27 Ona o lenei mea, na e tuuina atu ai i latou i lima o o latou fili,+ o ē na faapuapuagatiaina pea i latou.+ Ae na latou alalaga atu iā te oe i taimi o o latou puapuaga, ma na e faafofoga mai i ai mai i le lagi; ma ona o lou alofa mutimutivale, na e tuuina mai ai iā i latou o ē e faaola ina ia faasaoina i latou mai i lima o o latou fili.+

28 “Ae ina ua mapu i latou, ona latou toe faia lea o mea leaga i ou luma,+ ma na e tuuina atu ai i latou i lima o o latou fili o ē na pulea i latou.*+ Ona latou toe foʻi atu lea ma valaau atu iā te oe mo se fesoasoani,+ ma na e faafofoga mai i le lagi ma e laveaʻiina pea i latou, ona o le tele o lou alofa mutimutivale.+ 29 E ui lava na e lapataʻia i latou ina ia toe foʻi mai i lau Tulafono, ae na latou gaoioi ma le faamaualuluga ma mumusu e faalogo i au poloaʻiga;+ na latou agasala ona e latou te leʻi mulimuli i au tapulaa, ia e ola ai le tagata pe a ia tausia.+ Ae na ū atu o latou tua, ua faauamaaa ma mumusu e faalogo. 30 Na e onosaʻi iā i latou+ mo le tele o tausaga ma lapataʻia pea i latou e lou agaga e ala i au perofeta, ae na latou mumusu e faalogo. Mulimuli ane, na e tuuina atu i latou i lima o tagata o nuu.+ 31 O le tele foʻi o lou alofa mutimutivale na e lē faaumatia ai i latou+ pe tuulafoaʻia i latou, auā o oe o le Atua e alofa fua ma alofa mutimutivale.+

32 “O lenei, lo matou Atua e, le Atua sili, malosi ma mataʻutia, o lē e tausia lana feagaiga ma e alofa faamaoni,+ aua neʻi galo iā te oe puapuaga uma ua oo iā i matou, o o matou tupu, o o matou perenise,+ o o matou ositaulaga,+ o o matou perofeta,+ o o matou augātamā, ma lou nuu uma, e mai i aso o tupu o Asuria+ e oo mai i le aso nei. 33 E tonu lava oe e tusa ai o mea uma ua oo mai iā i matou, auā ua e gaoioi faamaoni; a o i matou o tagata ua faia mea leaga.+ 34 Ua lē faia foʻi lau Tulafono e o matou tupu, o o matou perenise, o o matou ositaulaga, ma o matou augātamā, ua lē uaʻi atu foʻi i au poloaʻiga po o au faamanatuga* na e lapataʻia ai i latou. 35 A o pule foʻi o latou tupu ma latou olioli i le tele o mea lelei, ma nonofo i le laueleele telē ma lelei na e foaʻiina mai iā i latou, e latou te leʻi auauna iā te oe+ ma liliuese mai i a latou amioga leaga. 36 O lea, ua avea i matou ma pologa+ i le aso nei, i le laueleele na e foaʻiina mai i o matou augātamā e aai ai i ona fua ma mea lelei. 37 O a matou agasala, ua avea ai le tele o fua o le laueleele mo tupu na e tuuina mai e pule iā i matou.+ Ua pule foʻi i latou i o matou tino ma a matou lafumanu, e tusa ma mea e latou te mananaʻo ai, ma ua matou matuā puapuagatia lava.

38 “Ona o ia mea uma, ua matou osia ai se feagaiga+ moni ua tusia, ma ua faamaufaailogaina e o matou perenise, o o matou tagata sa Levī, ma o matou ositaulaga.”+

10 O i latou nei na faamaufaailogaina le feagaiga:+

9 O le ‘au sa Levī nei na faamaufaailogaina le feagaiga: o Iesua le atalii o Asania, o Penui mai i atalii o Henatati, o Katameeli,+ 10 o Sepania, o Hotia, o Kelita, o Pelaia, o Hanana, 11 o Mika, o Reopa, o Hasapea, 12 o Sakuro, o Serepeia,+ o Sepania, 13 o Hotia, o Pani, ma Peninu.

14 O taʻitaʻi nei o le nuu na faamaufaailogaina le feagaiga: o Parose, o Paka-moapi,+ o Elama, o Satu, o Pani, 15 o Puni, o Asekata, o Pepai, 16 o Atonia, o Pikevai, o Atini, 17 o Atere, o Esekia, o Asure, 18 o Hotia, o Hasumu, o Pisai, 19 o Haripa, o Anatota, o Nepai, 20 o Magefiasa, o Mesulama, o Hesera, 21 o Mesesapelu, o Satoka, o Iatua, 22 o Peletia, o Hanana, o Anaia, 23 o Hosea, o Hanania, o Hasupo, 24 o Halokesu, o Peleka, o Sopeka, 25 o Rekuma, o Hasapena, o Maaseia, 26 o Akia, o Hanana, o Anana, 27 o Maluka, o Harima, ma Panaa.

28 A o i latou ua totoe o le nuu, o le ʻauositaulaga, o le ʻau sa Levī, o leoleo faitotoʻa, o tagata pepese, o auauna o le malumalu,* ma i latou uma na vavaeese mai i tagata o isi atunuu ina ia tausia le Tulafono a le Atua moni,+ faatasi ai ma a latou avā, o o latou atalii, o o latou afafine, ma i latou uma e mafai ona malamalama i le feagaiga, 29 ua latou faatasi atu i o latou uso, o o latou alii sili ia, ma ua latou faia se tautoga* tāua e savavali i le Tulafono a le Atua moni, lea na tuuina mai e ala iā Mose le auauna a le Atua moni, ma ia tausia ma le faaeteete poloaʻiga uma a Ieova lo tatou Alii, o iʻuga o ana faamasinoga, ma ana tulafono. 30 Ua latou faia se tautoga e faapea: “E lē tuuina atu o matou afafine i tagata o le nuu, e matou te lē taliaina foʻi o latou afafine mo o matou atalii.+

31 “Pe a ō mai tagata o le nuu e aumai a latou oloa ma ituaiga saito eseese e faatau i le aso Sapati, e matou te lē faatauina se mea mai iā i latou i le Sapati+ po o se aso paia.+ O le a matou faamālōlō le laueleele i le tausaga lona fitu+ ma faamagalo aitalafu uma.+

32 “Na matou faia foʻi mo i matou se maliega ina ia taʻitasi i matou ma avatu i tausaga taʻitasi, le tasi vaetolu o le sekeli* mo le auaunaga i le fale* o lo matou Atua,+ 33 mo falaoa ua faaputuina,*+ o taulaga i meaʻai*+ e faia e lē aunoa, o taulaga mū e faia e lē aunoa i Sapati+ ma masina faatoʻā vaaia,+ o tausamiga ua faatulagaina,+ o mea paia, o taulaga o agasala+ ina ia togisala ai Isaraelu, ma galuega uma o le fale o lo matou Atua.

34 “Ua matou faia foʻi le vili* e iloa ai le taimi atofaina e aumai ai fafie e aiga taʻitasi o le ʻauositaulaga, o le ʻau sa Levī, ma le nuu, i le fale o lo matou Atua i lea tausaga ma lea tausaga, ina ia faaaogā i le fata faitaulaga a Ieova lo matou Atua, e tusa ma mea ua tusia i le Tulafono.+ 35 E matou te aumaia foʻi i le fale o Ieova i lea tausaga ma lea tausaga, o uluaʻi fua ua pula o lo matou laueleele, ma uluaʻi fua ua pula o so o se ituaiga o laau ʻaina,+ 36 ma ulumatua a o matou atalii ma uluaʻi tama o a matou lafumanu,+ e tusa ai ma mea ua tusia i le Tulafono, ma uluaʻi tama o a matou lafu povi ma lafu mamoe ma ʻoti. E matou te aumaia ia mea i le fale o lo matou Atua, i ositaulaga o loo auauna i le fale o lo matou Atua.+ 37 O uluaʻi falaoamata* foʻi mai i a matou uluaʻi seleselega,+ o a matou foaʻi, o fua o ituaiga o laau uma,+ o uaina fou ma suāuu,+ e ao ona matou aumaia i ositaulaga i potu teuoloa* o le fale o lo matou Atua,+ faapea foʻi le sefuluaʻi mai i lo matou laueleele e avatu i le ʻau sa Levī,+ auā o le ʻau sa Levī e aoina le sefuluaʻi mai i o matou aai uma o faatoʻaga.

38 “O le ositaulaga foʻi, o sē e tupuga mai iā Arona, ia iai faatasi o ia ma le ʻau sa Levī pe a aoina e le ʻau sa Levī le sefuluaʻi; ia ofoina atu foʻi e le ʻau sa Levī le sefuluaʻi o le sefuluaʻi i le fale o lo matou Atua,+ i potu teuoloa* o le fale e teu ai oloa. 39 Auā o potu teuoloa,* e avatu i ai e le fanauga a Isaraelu ma le fanauga a le ʻau sa Levī a latou foaʻi+ o saito, o uaina fou, ma suāuu,+ ma o i inā o loo iai ipu o le malumalu, faapea ma ositaulaga o loo faia le auaunaga, o leoleo faitotoʻa ma tagata pepese. E matou te lē tuulafoaʻia le fale o lo matou Atua.”+

11 Ua nonofo perenise o le nuu i Ierusalema;+ a o ē na totoe o le nuu, ua latou faia le vili+ ina ia aumai ai, e taʻitoʻatasi mai i le taʻitoʻasefulu ina ia nonofo i Ierusalema le aai paia, ae nonofo le to‘aiva i isi aai. 2 E lē gata i lea, ua faamanuia atu le nuu i isi tane uma na tauofo e nonofo i Ierusalema.

3 O taʻitaʻi nei o le itumalo na nonofo i Ierusalema. (A o ē na totoe o Isaraelu, o ositaulaga, o le ʻau sa Levī, o auauna o le malumalu,*+ ma le fanauga a auauna a Solomona,+ na latou nonofo i isi aai o Iuta, e taʻitoʻatasi le tagata ma nofo i lona tofi i lona aai.+

4 Sa nonofo foʻi i Ierusalema nisi o le fanauga a Iuta ma nisi o le fanauga a Peniamina.) E mai i le fanauga a Iuta, o Ataila le atalii o Usia, le atalii o Sakaria, le atalii o Amaria, le atalii o Sefatia, o le atalii o Maalaele mai i le fanauga a Faresa,+ 5 ma Maaseia le atalii o Paruka, le atalii o Kolokuse, le atalii o Hasaia, le atalii o Ataia, le atalii o Ioiaripa, o le atalii o Sakaria mai i le aiga o tagata Selaa. 6 O le fanauga uma a Faresa o ē na nonofo i Ierusalema, e toʻa 468 tane agavaa.

7 O le fanauga lenei a Peniamina: o Salu+ le atalii o Mesulama, le atalii o Ioeta, le atalii o Petaia, le atalii o Kulaia, le atalii o Maaseia, le atalii o Itielu, o le atalii o Iesaia, 8 ma e sosoo ane iā te ia Kapai ma Salai, e toʻa 928 tane; 9 o lo latou ovasia o Ioelu le atalii o Sekari, a o le pule lona lua o le aai, o Iuta le atalii o Hasenua.

10 E mai i ositaulaga: o Ietaia le atalii o Ioiaripa, o Iakinu,+ 11 o Seraia le atalii o Hilikia le atalii o Mesulama le atalii o Satoka le atalii o Meraiota le atalii o Akitopo,+ o se taʻitaʻi o le fale* o le Atua moni, 12 ma o latou uso o ē e faia le galuega o le fale, e toʻa 822; ma Ataia le atalii o Ieroama, le atalii o Pelalia, le atalii o Amesi, le atalii o Sakaria, le atalii o Pasura,+ o le atalii o Malakia, 13 ma ona uso, o alii sili o aiga o tamā, e toʻa 242; ma Amasesai le atalii o Asareelu, le atalii o Aasai, le atalii o Meselemota, o le atalii o Imere, 14 ma ona uso o tagata totoa ma malolosi, e toʻa 128; a o lo latou ovasia o Sapetielu o lē e mai i se aiga sili.

15 E mai i le ʻau sa Levī: o Semaia+ le atalii o Hasupo le atalii o Aserikama le atalii o Hasapea le atalii o Puni, 16 ma Sapetai+ ma Ieosapa,+ e mai i taʻitaʻi o le ʻau sa Levī, e pule i galuega i fafo o le fale o le Atua moni; 17 ma Matania+ le atalii o Mika, le atalii o Sapati, o le atalii o Asafo,+ le fuataimi o viiga, o lē sa taʻitaʻia viiga i le taimi o tatalo,+ ma Pakepuia lona fesoasoani, ma Apeta le atalii o Samua, le atalii o Kalali, o le atalii o Iutana.+ 18 O le aofaʻi o le ʻau sa Levī uma sa iai i le aai paia, e toʻa 284.

19 O leoleo faitotoʻa o Akupa, o Talemoni,+ ma o la uso o ē na leoleo i faitotoʻa, e toʻa 172.

20 O isi na totoe o Isaraelu, o le ʻauositaulaga, ma le ʻau sa Levī sa iai i isi aai uma o Iuta, sa taʻitasi ma nofo i lona lava tofi. 21 Sa nonofo auauna o le malumalu*+ i Ofele,+ na pule foʻi Seka ma Gisepa i auauna o le malumalu.*

22 O le ovasia o le ʻau sa Levī i Ierusalema, o Usi le atalii o Pani, le atalii o Hasapea, le atalii o Matania,+ o le atalii o Mika mai i le fanauga a Asafo, o tagata pepese; sa ia vaavaaia le galuega o le fale o le Atua moni. 23 Auā sa iai se poloaʻiga a le tupu mo le lelei o tagata pepese,+ e aofia ai se sauniuniga ua faatulagaina, e tausia ai o latou manaʻoga i aso taʻitasi. 24 A o Petakia le atalii o Mesesapelu, le atalii o Sera, le atalii o Iuta, sa fai ma faufautua a le tupu mo mataupu uma a le nuu.

25 E tusa ai ma nuu e nonofo ai faapea o latou fanua, sa iai nisi o le fanauga a Iuta sa nonofo i Kiriata-arapa+ ma ona tamaʻi aai, o Tipona ma ona tamaʻi aai, o Kapeseelu+ ma nuu e nonofo ai, 26 o Iesua, o Molata,+ o Pete-paleta,+ 27 o Asara-suala,+ o Peresepa ma ona tamaʻi aai, 28 o Sekeleka,+ o Mekoni ma ona tamaʻi aai, 29 o Aino-rimoni,+ o Soraa,+ o Iaremuta, 30 o Sanoa,+ o Atulame ma nuu e nonofo ai, o Lakisa+ ma ona fanua, ma Aseka+ ma ona tamaʻi aai. Ua latou nonofo* e amata mai i Peresepa e oo atu i le vanu o Hinoma.+

31 Sa nonofo le fanauga a Peniamina i Kepa,+ o Mekemase, o Aia, o Peteli+ ma ona tamaʻi aai, 32 o Anatota,+ o Nove,+ o Anania, 33 o Hasora, o Rama,+ o Kitaima, 34 o Hatito, o Sepoima, o Nepalatu, 35 o Loto, ma Ono,+ o le vanu o tagata tufuga. 36 O nisi o vaega o le ʻau sa Levī sa i Iuta, na tofia e nonofo i Peniamina.

12 O ositaulaga nei ma le ʻau sa Levī na ō aʻe faatasi ma Serupapelu+ le atalii o Salatielu,+ ma Iesua:+ o Seraia, o Ieremia, o Esera, 2 o Amaria, o Maluka, o Hatusa, 3 o Sekania, o Rekuma, o Meremota, 4 o Ito, o Gineto, o Avia, 5 o Meamina, o Maatia, o Pileka, 6 o Semaia, o Ioiaripa, o Ietaia, 7 o Salu, o Amoka, o Hilikia, ma Ietaia. O taʻitaʻi ia o ositaulaga ma o latou uso i aso o Iesua.

8 O le ʻau sa Levī, o Iesua, o Penui, o Katameeli,+ o Serepeia, o Iuta, ma Matania.+ Na taʻitaʻia e Matania ma ona uso viiga o le faafetai. 9 O o latou uso o Pakepuia ma Uni, sa tutū faafeagai ma i latou i tiute mo leoleoga.* 10 Na fanaua e Iesua o Ioiakima, na fanaua e Ioiakima o Eliasipa, ma na fanaua e Eliasipa+ o Ioata.+ 11 Na fanaua e Ioata o Ionatana, ma na fanaua e Ionatana o Iatua.

12 O ositaulaga nei i aso o Ioiakima, o alii sili o aiga o o latou tamā: e mai i le aiga o Seraia,+ o Meraia; e mai i le aiga o Ieremia, o Hanania; 13 e mai i le aiga o Esera,+ o Mesulama; e mai i le aiga o Amaria, o Iokana; 14 e mai i le aiga o Melika, o Ionatana; e mai i le aiga o Sepania, o Iosefa; 15 e mai i le aiga o Harima,+ o Atena; e mai i le aiga o Meraiota, o Helekia; 16 e mai i le aiga o Ito, o Sakaria; e mai i le aiga o Ginetonu, o Mesulama; 17 e mai i le aiga o Avia,+ o Sekari; e mai i le aiga o Meneamina, o . . . ;* e mai i le aiga o Moatia, o Piletai; 18 e mai i le aiga o Pileka,+ o Samua; e mai i le aiga o Semaia, o Ionatana; 19 e mai i le aiga o Ioiaripa, o Matenai; e mai i le aiga o Ietaia,+ o Usi; 20 e mai i le aiga o Salai, o Kalai; e mai i le aiga o Amoka, o Epelu; 21 e mai i le aiga o Hilikia, o Hasapea; ma e mai i le aiga o Ietaia, o Netanielu.

22 Na tusia igoa o alii sili o aiga o tamā o le ʻau sa Levī i aso o Eliasipa, o Ioata, o Iokana, ma Iatua,+ atoa foʻi ma igoa o alii sili o aiga o tamā o le ʻauositaulaga, seʻia oo i le nofoaiga a Tariu le Peresia.

23 Na tusia igoa o le ʻau sa Levī o ē na avea ma alii sili o aiga o o latou tamā, i le tusi o talafaasolopito, seʻia oo i aso o Iokana le atalii o Eliasipa. 24 O taʻitaʻi o le ʻau sa Levī, o Hasapea, o Serepeia, ma Iesua+ le atalii o Katameeli.+ A o o latou uso o le ʻauleoleo, na tutū i vaega e faafeagai ma i latou ina ia ofoina atu viiga ma faafetai, e tusa ai ma faatonuga a Tavita+ le tagata o le Atua moni. 25 O Matania,+ o Pakepuia, o Opetaia, o Mesulama, o Talemoni, ma Akupa,+ o ni leoleo faitotoʻa+ na leoleoina fale teuoloa na iai i tafatafa o faitotoʻa. 26 Na latou auauna i aso o Ioiakima le atalii o Iesua,+ le atalii o Iosataka, faapea foʻi ma aso o Neemia le kovana, ma Esera+ le ositaulaga, o ia foʻi o le tusiupu.

27 Ina ua faia le faapaiaga o le pā o Ierusalema, na latou saʻilia le ʻau sa Levī ma aumaia i latou i Ierusalema mai i o latou nuu uma, ina ia faia le faapaiaga ma olioli i viiga o le faafetai,+ faatasi ma sumepalo,* o meafaifaaili e iai uaua, ma kitara.* 28 Ona faapotopoto mai lea o le fanauga a tagata pepese,* mai i le itumalo,* i vaipanoa uma na siʻomia ai Ierusalema, i nuu e nonofo ai tagata Netopa,+ 29 i Pete-kilikala,+ ma e mai i fanua o Kepa+ ma Asemau,+ auā sa iai nuu e nonofo ai, na faia e tagata pepese mo i latou i vaipanoa uma na siʻomia ai Ierusalema. 30 Ua faamamāina e ositaulaga ma le ʻau sa Levī i latou lava, ua latou faapaiaina foʻi i le silafaga a le Atua le nuu,+ o faitotoʻa,+ ma le pā.+

31 Ona ou aveina aʻe lea o perenise o Iuta i luga o le pā. Na ou tofia foʻi ni ʻaufaipese toʻatele se lua e usuina viiga o le faafetai, ma ni vaega e mulimuli atu i ʻaufaipese. O le tasi ʻaufaipese sa savavali i le itu taumatau i luga o le pā, e agaʻi atu i le Faitotoʻa o Otaota.+ 32 Na mulimuli atu i o latou tua Hosaia, o le ʻafa o perenise o Iuta, 33 faatasi ai ma Asaraia, o Esera, o Mesulama, 34 o Iuta, o Peniamina, o Semaia, ma Ieremia. 35 Sa iai iā i latou nisi o atalii o ositaulaga faatasi ma pū:+ o Sakaria le atalii o Ionatana, le atalii o Semaia, le atalii o Matania, le atalii o Mekaio, le atalii o Sakuro, o le atalii o Asafo,+ 36 ma ona uso o Semaia, o Asareelu, o Melali, o Kilali, o Maai, o Netanielu, o Iuta, ma Hanani, faatasi ma meafaifaaili a Tavita+ le tagata o le Atua moni; ma na muamua atu Esera+ le tusiupu i o latou luma. 37 E mai i le Faitotoʻa o le Vaipuna,+ na latou ō saʻo i le ala e alu aʻe i le Faasitepu+ o le Aai a Tavita,+ i le aʻega o le pā e i luga aʻe o le Fale o Tavita e oo atu lava i le Faitotoʻa o le Vai+ i le itu i sasaʻe.

38 Na savavali le isi ʻaufaipese e usuina viiga o faafetai i le isi itu e faafeagai ma le isi ʻaufaipese,* ma na ou mulimuli atu ai i tua faatasi ma le ʻafa o le nuu, i luga o le pā i luga o le ʻOlo o Ogaumu+ ma agaʻi atu i le Pā Lautele,+ 39 ma luga o le Faitotoʻa o Efaraima,+ e agaʻi atu i le Faitotoʻa o le Aai Tuai,+ e agaʻi atu i le Faitotoʻa o Iʻa,+ o le ʻOlo o Hananiali,+ o le ʻOlo o Meaa, ma agaʻi atu i le Faitotoʻa o Mamoe;+ ona latou tutū lea i le Faitotoʻa o Leoleo.

40 Mulimuli ane, ona tutū lea o ʻaufaipese e lua e usuina viiga o faafetai i le fale o le Atua moni; na matou tutū foʻi, o aʻu ma le ʻafa o sui pule na faatasi ma aʻu, 41 ma ositaulaga o Eliakimo, o Maaseia, o Meneamina, o Mekaio, o Elioenai, o Sakaria, ma Hanania o loo iai a latou pū, 42 ma Maaseia, o Semaia, o Eleasaro, o Usi, o Iokana, o Malakia, o Elama, ma Eseri. Ua pepese leotetele foʻi tagata pepese i le vaavaaiga a Isaraia le ovasia.

43 Ona latou faia lea o le tele o taulaga i lenā aso ma ua latou olioli,+ auā ua faapogaia e le Atua i latou ina ia olioli i se olioli tele. Ua olioli foʻi fafine ma tamaiti,+ ma ua lagona mai i nofoaga mamao le olioli o Ierusalema.+

44 Ua tofia foʻi tagata i lenā aso e vaavaaia potu e teu ai oloa+ mo meaalofa,+ o uluaʻi fua+ ma sefuluaʻi.+ O i inā e latou te tuuina ai mea e latou te aoina mai i fanua o aai, o vaega e tusa ai ma le Tulafono+ mo ositaulaga ma le ʻau sa Levī,+ auā ua olioli Iuta ona o ositaulaga ma le ʻau sa Levī na faia le auaunaga. 45 Ua latou faia foʻi le auaunaga a lo latou Atua ma le auaunaga o le faamamāina, e tusa ai ma le poloaʻiga a Tavita ma lona atalii o Solomona, ma ua faia fo‘i faapea e tagata pepese ma leoleo faitotoʻa. 46 Auā talu mai aso anamua i taimi o Tavita ma Asafo, sa iai taʻitaʻi o tagata pepese, ma taʻitaʻi o pese o viiga ma faafetai i le Atua.+ 47 Na tuuina atu foʻi e Isaraelu uma i aso o Serupapelu+ ma aso o Neemia, o meaʻai mo tagata pepese+ ma leoleo faitotoʻa+ e tusa ai ma manaʻoga o aso taʻitasi. Na latou tuuesea foʻi meaʻai mo le ʻau sa Levī,+ ma na avatu e le ʻau sa Levī se vaega o meaʻai na latou maua, i le fanauga a Arona.

13 I lenā aso, na faitau ai le tusi a Mose a o faalogologo mai le nuu,+ ma na maua o tusia ai i le tusi, e lē tatau lava i tagata Amonī po o tagata Moapi+ ona ō mai i le faapotopotoga a le Atua moni,+ 2 auā latou te leʻi faafeiloa‘ia le fanauga a Isaraelu i ni meaʻai ma ni vai, ae na latou totogia Palaamo e faamalaia iā i latou.+ Peita‘i, na suia e lo tatou Atua le malaia i le faamanuiaga.+ 3 Ina ua latou faalogo i le Tulafono, ona latou vavaeeseina loa lea mai i Isaraelu o ē uma na tupuga mai i tagata ese.+

4 A o leʻi tupu lenei mea, sa vaavaaia e Eliasipa+ le ositaulaga potu teuoloa* o le fale* o lo tatou Atua,+ ma e aiga o ia ma Tovia.+ 5 Na faaavanoa e Eliasipa mo Tovia se potu teuoloa* telē, lea sa masani ona latou tuu ai le taulaga i meaʻai, o le lipano,* o ipu, o le sefuluaʻi o saito, o uaina fou ma suāuu,+ ia na poloaʻia e avatu i le ʻau sa Levī,+ o tagata pepese, ma leoleo faitotoʻa, faapea fo‘i ma meaalofa mo le ʻauositaulaga.+

6 O le taimi atoa lenā ou te leʻi iai i Ierusalema, auā na ou alu atu i le tupu i le tausaga lona 32+ o le nofoaiga a Aretaseta+ le tupu o Papelonia; ma mulimuli ane na ou talosaga i le tupu ina ia tuu mai aʻu ou te alu. 7 Ona ou sau lea i Ierusalema ma iloa ai le mea leaga na faia e Eliasipa+ mo Tovia,+ i lona faaavanoa o se potu teuoloa mo Tovia i le lotoā o le fale o le Atua moni. 8 Na matuā leaga lea mea iā te aʻu, o lea na ou tau‘aia ai i fafo o le potu teuoloa* o meafale uma a Tovia. 9 Mulimuli ane, ona ou faatonuina lea o i latou ina ia faamamā potu teuoloa,* ma na ou toe tuu i ai ipu o le fale o le Atua moni,+ faatasi ai ma le taulaga i meaʻai ma le lipano.+

10 Na ou iloa ai foʻi e leʻi aumaia i le ʻau sa Levī+ a latou meaʻai,+ ma ua taʻitasi le ʻau sa Levī ma tagata pepese na faia le auaunaga, ma alu i lona fanua.+ 11 Ona ou aʻoaʻia lea o sui pule,+ ma faapea atu: “Aiseā ua tuulafoaʻia ai le fale o le Atua moni?”+ Ona ou faapotopoto faatasi lea o i latou, ma toe tofia i latou i o latou tofiga. 12 Ua aumaia foʻi e Iuta uma le sefuluaʻi+ o saito, o uaina fou, ma suāuu i potu teuoloa.+ 13 Ona ou tofia lea o Selemia le ositaulaga, o Satoka le tusiupu, ma Petaia le sa Levī e pule i potu teuoloa, ma Hanana le atalii o Sakuro le atalii o Matania e fai ma o latou fesoasoani, auā na manatu iā i latou o ni tagata maufaatuatuaina. O lo latou tiute tauave le tufatufaina atu o mea i o latou uso.

14 Ona ou tatalo lea, “Loʻu Atua e, ia e manatua mai aʻu+ e tusa ai o lenei mea, aua foʻi neʻi e faagaloina aʻu gaoioiga o le alofa faamaoni, na ou faia mo lou fale ma auaunaga o loo faia ai i inā.”+

15 I na aso, na ou vaaia ai i Iuta o tagata na solia mea e soli ai vine i le aso Sapati,+ ma aoina mai fusi saito ma faaee i luga o asini, ma aumaia uaina, o vine, o mati, ma so o se ituaiga o avega i Ierusalema i le aso Sapati.+ Ona ou lapataʻia lea o i latou e faatatau i le faatauina atu o meaʻai i lenā aso.* 16 O tagata Turo foʻi sa nonofo i le aai, na latou aumaia iʻa ma so o se ituaiga o oloa, ma faatau atu i le fanauga a Iuta ma Ierusalema i le aso Sapati.+ 17 Ona ou aʻoaʻia lea o tamālii o Iuta ma faapea atu iā i latou: “O le ā lenei mea leaga ua outou faia, ua soli ai le aso Sapati? 18 Pe e leʻi faapea foʻi ona faia e o outou augātamā, ma aumaia ai e lo tatou Atua nei puapuaga uma iā i tatou faapea ma lenei aai? O lenei ua outou faateteleina le toʻasā aasa iā Isaraelu, e ala i le solia o le Sapati.”+

19 Na ou avatu le faatonuga e tapuni faitotoʻa o Ierusalema a o leʻi oo ina pogisa, a o leʻi amataina le Sapati. Na ou fai atu foʻi e aua neʻi o latou tatalaina faitotoʻa seʻia mavae le Sapati, ma na ou tofia nisi o aʻu auauna e tutū i faitotoʻa ina ia lē aumaia se avega i totonu i le aso Sapati. 20 O lea, e faatasi pe e faalua ona momoe i le pō i fafo o le pā o Ierusalema, tagata faatauʻoa ma ē e faatauina atu so o se ituaiga o oloa. 21 Ona ou lapataʻia lea o i latou ma faapea atu: “Aiseā ua outou momoe ai i le pō i luma o le pā? Afai tou te toe faia, ona ou aveesea faamalosi lea o outou.” Talu mai lenā taimi, e latou te le‘i toe ō mai i le aso Sapati.

22 Na ou fai atu foʻi i le ʻau sa Levī, e tatau ona latou faamamāina e lē aunoa i latou ma ō mai e leoleo faitotoʻa ina ia tumau pea le paia o le aso Sapati.+ Ona ou tatalo lea, “O lenei foʻi, loʻu Atua e, ia e manatua mai aʻu ma ia e alofa mai iā te aʻu, e tusa ma le tele o lou alofa faamaoni.”+

23 I na aso, na ou iloa ai foʻi le ʻau Iutaia ua faaipoipo atu i* fafine Asetota,+ o fafine Amonī, ma fafine+ Moapi.+ 24 O le ʻafa o a latou fanau na tautatala i le gagana a tagata Asetota, o le isi ʻafa na tautatala i gagana a tagata ese, ae e leai se tasi o i latou na iloa tautala i le gagana Iutaia. 25 Ona ou a‘oa‘ia lea o i latou ma fetuu iā i latou, na ou fasia foʻi nisi o tane,+ ma tafuti o latou lauulu, ma faatautō i latou i luma o le Atua, e faapea: “Aua neʻi avatua o outou afafine i o latou atalii, aua foʻi neʻi outou taliaina ni o latou afafine mo o outou atalii, po o outou.+ 26 Pe e leʻi agasala ea Solomona le tupu o Isaraelu ona o nei mea? E leai se tupu e pei o ia i le tele o malo;+ sa alofagia fo‘i o ia e lona Atua,+ ma na tofia ai o ia e le Atua e fai ma tupu i Isaraelu uma. Ae na agasala o ia ona o fafine ese.+ 27 E faapefea ona outou faia lenei mea matuā leaga, ua outou lē faamaoni ai i lo tatou Atua e ala i lo outou faiavā i fafine ese?”+

28 O se tasi o atalii o Ioata+ le atalii o Eliasipa+ le ositaulaga sili, sa faiavā i le afafine o Sanepalata+ le tagata Horono. Ona ou tuliesea lea o ia mai iā te aʻu.

29 Ona ou tatalo lea, “Loʻu Atua e, ia e manatuaina i latou ona ua latou faaleagaina le faiva o ositaulaga, ma le feagaiga o le faiva o ositaulaga+ ma le ʻau sa Levī.”+

30 Ona ou faamamāina lea o le nuu mai i taaʻiga ese uma, ma ou tofia atu tiute i ositaulaga ma le ʻau sa Levī, e taʻitasi ma lana galuega,+ 31 ma faatulaga le aumaia o fafie+ i taimi atofaina faapea ma uluaʻi fua pula.

Ona ou tatalo lea, “Loʻu Atua e, ia e manatu alofa mai iā te aʻu.”+