FAAMAUMAUGA A MATAIO

1 O le tusi o le gafa o Iesu Keriso,* o le atalii o Tavita,+ o le atalii o Aperaamo:+

17 O tupulaga uma e amata mai iā Aperaamo e oo iā Tavita, e 14 tupulaga; e mai iā Tavita e oo i le taimi na ave faapagota ai i Papelonia, e 14 tupulaga; e mai i le taimi na ave faapagota ai i Papelonia e oo mai i le Keriso, e 14 tupulaga.

18 Ae o le auala lenei na fanau mai ai Iesu Keriso. I le taimi na faamau ai lona tinā o Maria iā Iosefa, na iloa ai ua tō o ia i le agaga paia,*+ a o leʻi faaipoipo i laʻua. 19 Ae ona o lana tane o Iosefa o se tagata amiotonu, ma e leʻi manaʻo e faamāsiasi iā te ia i luma o tagata, na ia mafaufau ai e faateʻa faalilolilo o ia.+ 20 Ina ua uma ona mafaufau o ia i nei mea, faauta! ua faaali mai le agelu a Ieova* iā te ia i le miti, ua faapea mai: “Iosefa e, le atalii o Tavita, aua e te fefe e ave Maria lau avā i lou aiga, auā o lana tō e mai i le agaga paia.+ 21 O le a ia fanaua se tama tama, ma e te faaigoa iā te ia o Iesu,*+ auā o le a ia faaolaina ona tagata mai i a latou agasala.”+ 22 Ua oo nei mea uma ina ia taunuu ai le afioga a Ieova,* e ala i lana perofeta e faapea: 23 “Faauta! O le a tō le taupou ma fanau mai se tama tama, ma o le a latou faaigoa iā te ia o Emanuelu,”+ o lona uiga pe a faaliliuina, “Ua iā i Tatou le Atua.”+

24 Ona ala lea o Iosefa, ua ia faia e pei ona faatonuina ai o ia e le agelu a Ieova,* ma ua ia ave lana avā i lona aiga. 25 Ae e leʻi feusuaʻi i laʻua seʻia oo lava ina fanau mai le tama;+ ma ua faaigoa iā te ia o Iesu.+

2 Ina ua mavae le fanau mai o Iesu i Peteleema+ i Iutaia, i aso o le tupu o Herota,*+ ona ō mai ai lea o ē e saʻiliʻili i fetu* mai Sasaʻe i Ierusalema, 2 ua faapea mai: “O fea o iai lē ua fanau mai o le tupu o tagata Iutaia?+ Auā na matou vaaia lona fetu a o matou iai i Sasaʻe, ma ua matou ō mai e ifo atu iā te ia.” 3 Ua faalogo le tupu o Herota i lenei tala, ona popole ai lea o ia atoa ma Ierusalema uma. 4 Ona ia faapotopoto lea o le ʻaufaitaulaga sili ma le ʻautusiupu* o le nuu, ma fesili atu iā i latou po o fea e fanau ai le Keriso.* 5 Ona latou fai mai lea iā te ia: “O Peteleema+ i Iutaia, auā o le mea lenā ua tusia e le perofeta: 6 ‘O oe Peteleema i le atunuu o Iuta, e lē o oe o le aai e pito i faatauvaa i kovana o Iuta, auā e tupu mai iā te oe o lē e pule, o lē e na te leoleoina loʻu nuu o Isaraelu.’”+

7 Ona aami faalilolilo lea e Herota o ē e saʻiliʻili i fetu, ina ia faamautinoa ai le taimi tonu na latou vaaia ai le fetu. 8 Ina ua ia aauina atu i latou i Peteleema, na ia faapea atu: “Ia outou ō ma matuā saʻili i le tamaitiiti, ma pe a outou maua o ia, ia toe foʻi mai e taʻu mai iā te aʻu, ina ia ou alu atu foʻi e ifo iā te ia.” 9 Ua latou faalogo i le tupu, ona ō ai lea; faauta foʻi! o le fetu na latou vaaia a o iai i Sasaʻe,+ o lea ua muamua atu iā i latou, seʻia oo ina tū i luga aʻe o le mea ua iai le tamaitiiti. 10 Ina ua latou vaaia le fetu, ona matuā olioli ai lea o i latou. 11 Ua latou ō atu i le fale, ma ua vaaia ai le tamaitiiti ma Maria lona tinā, ona latou faapaʻuʻū ai lea ma ifo atu iā te ia. Ua talai foʻi a latou oloa ma avatu meaalofa o auro, o mea manogi ma muro. 12 Peitaʻi, ua lapataʻia i latou e le Atua i se miti,+ ina ia aua neʻi toe foʻi atu iā Herota; ona latou ō ai lea i lo latou atunuu i se isi auala.

13 Ina ua ō i latou, faauta foʻi! ua faaali mai le agelu a Ieova* iā Iosefa e ala i se miti,+ ua faapea mai: “Inā tulaʻi ia ma ave le tamaitiiti ma lona tinā ma sosola i Aikupito, ma nonofo ai seʻia ou toe fai atu, auā o le a saʻili Herota e fasioti le tamaitiiti.” 14 Ona tulaʻi lea o Iosefa ma ave le tamaitiiti ma lona tinā i le pō, ma ō atu i Aikupito. 15 Ua ia nofo ai i inā seʻia mavae le oti o Herota. O lea mea ua taunuu ai le afioga a Ieova* e ala i lana perofeta e faapea: “Na ou valaauina loʻu atalii mai i Aikupito.”+

16 Ua iloa e Herota ua pelogia o ia e ē saʻiliʻili i fetu, ona matuā ita tele ai lea ma aauina atu nisi i Peteleema ma ona itumalo uma, e fasioti tama uma e lua tausaga ma lalo ifo, e fua i le taimi na taʻu mai e ē saʻiliʻili i fetu.+ 17 Ua faataunuuina ai i inā le valoaga na ala mai i le perofeta o Ieremia e faapea: 18 “Ua lagona le leo i Rama, o le tagiauē ma le tagituʻi. Ua tagiauē Rasela+ ona o lana fanau, ma ua lē mafai foʻi ona faamāfanafanaina o ia, auā ua lē toe iai i latou.”+

19 Ina ua oti Herota, faauta! ua faaali mai le agelu a Ieova* i se miti+ iā Iosefa a o iai i Aikupito, 20 ma fai mai: “Tulaʻi ia, inā ave le tamaitiiti ma lona tinā ma toe foʻi i Isaraelu, auā ua feoti i latou na saʻili e fasioti le tamaitiiti.” 21 Ona tulaʻi lea o ia ma ave le tamaitiiti ma lona tinā ma ō atu i Isaraelu. 22 Ae ina ua faalogo o ia ua pule Arekilao i Iutaia e sui i lona tamā o Herota, ona fefe ai lea o ia e alu atu i inā. E lē gata i lea, talu ai na lapataʻia o ia e le Atua i se miti,+ ona alu ai lea o ia i Kalilaia.+ 23 Ua alu atu o ia ma nofo i le aai ua igoa o Nasareta,+ ina ia taunuu ai le upu na faailoa mai e ala i perofeta: “E taʻua o ia o le Nasareta.”*+

3 I na aso, ua talaʻi+ atu ai Ioane+ le Papatiso i le toafa* o Iutaia, 2 ma faapea atu: “Inā salamō ia outou, auā ua latalata mai le Malo o le lagi.”+ 3 E moni, o ia lenei na valoia e le perofeta o Isaia+ e faapea: “O loo alaga se tasi i le toafa: ‘Ia outou saunia le ala o Ieova!* Ia faasaʻosaʻo ala i ona luma.’”+ 4 O ofu o Ioane o le fulufulu kamela ma le fusipaʻu i lona sulugātiti,+ ma o lana meaʻai o sē akerise ma le meli vao.+ 5 Ona ō mai ai lea iā te ia o tagata o Ierusalema ma Iutaia uma, ma le vaipanoa uma o le vaitafe o Ioritana,+ 6 ma ua ia papatisoina* i latou i le vaitafe o Ioritana,+ ma ua latou taʻutino ane a latou agasala.

7 Ua ia iloa atu ua ō mai le toʻatele o le ʻau Faresaio* ma le ʻau Satukaio*+ i le mea o fai ai le papatisoga, ona ia faapea atu lea iā i latou: “O outou o fanau a gata feʻai,+ o ai na lapataʻia outou ia sosola ese mai i le toʻasā o loo faaloloʻi mai?+ 8 O lea, ia outou fua mai ni fua e tatau ma le salamō. 9 Aua neʻi outou manatu ifo e faapea, ‘O lo matou tamā o Aperaamo.’+ Auā ou te fai atu iā te outou, e mafai lava e le Atua ona faia ni fanau mo Aperaamo mai i nei maa. 10 Ua taatia nei le toʻi i pogati o laau. O laau uma e lē fua mai ai ni fua lelei, e tātuu i lalo ma lafo i le afi.+ 11 O aʻu, ou te papatiso atu iā te outou i le vai, auā ua outou salamō,+ a o lē e mulimuli mai, e sili atu ona malosi o ia iā te aʻu, ma e lē aogā ona ou tatalaina ona seevae.+ O ia lenā e papatisoina outou i le agaga paia+ ma le afi.+ 12 O loo i lona aao lana suō, ma o le a ia matuā faamamāina ai le mea e soli ai saito, ma faaputu ana saito i le fale saito, ae o otaota o saito, e na te susunuina i le afi+ e lē mafai ona tineia.”

13 Ona alu atu lea o Iesu mai i Kalilaia i le vai o Ioritana iā Ioane, ina ia papatisoina ai o ia.+ 14 Ae ua taumafai Ioane e taofi iā te ia ma faapea mai: “E tatau ona e papatisoina aʻu, ae aiseā ua e maliu mai ai iā te aʻu?” 15 Ona tali atu lea o Iesu iā te ia: “Inā faia ia o lenei mea, auā o le faia faapea e ta te faataunuuina ai mea tonu uma.” Ona lē toe taofia ai lea o ia e Ioane. 16 Ua uma ona papatisoina Iesu, ona maliu aʻe loa lea o ia mai i le vai. Faauta! ua matala mai le lagi,+ ma ua iloa atu ai e Ioane le agaga o le Atua e pei o se lupe ua alu ifo i ona luga.+ 17 Faauta foʻi! Ua faapea mai le siʻufofoga mai i le lagi:+ “O loʻu Atalii+ pele lenā, o lē ua malie i ai loʻu loto.”+

4 Ua ave Iesu e le agaga i le toafa, ma ua faaosoosoina ai o ia+ e le Tiapolo.+ 2 Ina ua uma ona anapogi o ia i ao e 40 ma pō e 40, ona fia taumafa ai lea. 3 Ua alu ane Lē e faaosooso+ ma faapea mai iā te ia: “Afai o oe o se atalii o le Atua, inā fetalai atu ia i nei maa ia liu falaoa.” 4 Ae ua tali atu o ia: “Ua tusia: ‘E lē na o meaʻai e ola ai le tagata, ae o afioga uma e tulei mai i le fofoga o Ieova.’”*+

5 Ona ave lea o ia e le Tiapolo i le aai paia,+ ma faatū o ia i luga o le pā* o le malumalu+ 6 ma faapea mai: “Afai o oe o se atalii o le Atua, inā oso ia i lalō, auā ua tusia: ‘E na te faatonuina ana agelu e faatatau iā te oe,’ ma ‘E latou te aveina oe i o latou lima, ina neʻi tuʻia lou vae i se maa.’”+ 7 Ua fetalai atu Iesu iā te ia: “Ua tusia foʻi: ‘Aua e te faia se mea e tofotofo ai iā Ieova* lou Atua.’”+

8 Ona toe ave lea o ia e le Tiapolo i se mauga e matuā maualuga lava, ma faaali atu iā te ia malo uma o le lalolagi ma o latou mamalu.+ 9 Ona ia faapea mai lea iā te ia: “Ou te avatu nei mea uma iā te oe, pe afai e tau lava ina e faapaʻū ma tapuaʻi mai iā te aʻu.” 10 Ona fetalai atu lea o Iesu iā te ia: “Inā alu ese ia oe Satani, auā ua tusia: ‘E tatau ona e tapuaʻi iā Ieova* lou Atua,+ ma e na o ia foʻi e tatau ona e avatu i ai le auaunaga paia.’”+ 11 Ona alu ese ai lea o le Tiapolo,+ ae vaai foʻi! ua ō mai agelu ma auauna atu iā te ia.+

12 Ina ua faalogo o ia ua lafo Ioane i le falepuipui,+ ona alu atu ai lea o ia i Kalilaia.+ 13 Mulimuli ane, ina ua ia tuua Nasareta, ua alu atu o ia ma nofo i Kapanaumi,+ i tafatafa ane o le sami i itumalo o Sepulona ma Nafatali, 14 ina ia taunuu ai le valoaga na ala mai i le perofeta o Isaia e faapea: 15 “Kalilaia e, o nuu ese, o le laufanua o Sepulona ma le laufanua o Nafatali i le auala agaʻi i le sami i le isi itu o Ioritana! 16 Ua vaaia e tagata o loo nonofo i le pōuliuli le malamalama tele, ma o i latou ua nonofo i le nuu ua iai le ata o le oti, ua alu aʻe iā i latou le malamalama.”+ 17 E mai lava i lenā taimi, ua amata ai ona talaʻi Iesu ma faapea atu: “Inā salamō ia outou, auā ua latalata mai le Malo o le lagi.”+

18 A o savali i tafatafa ane o le sami* o Kalilaia, ua ia silafia ai le ʻauso e toʻalua, o Simona lea ua igoa foʻi iā Peteru,+ ma Aneterea lona uso, o loo lafo le la upega i le sami, auā o i laʻua o ni tagata faifaiva.+ 19 Ona fetalai atu lea o ia iā i laʻua: “Inā mulimuli mai ia iā te aʻu, ou te faia oulua ma faifaiva i tagata.”+ 20 Ona la tuua loa lea o a la upega, ae mulimuli atu iā te ia.+ 21 Ua alu ese atu o ia ma silafia ai le isi ʻauso e toʻalua. Ua i le vaa Iakopo ma lona uso o Ioane,+ ma lo la tamā o Sepetaio, o loo fono masaesae o a latou upega, ma ua ia valaau atu iā i laʻua.+ 22 Ona la tuua loa lea o le vaa ma lo la tamā, ae mulimuli atu iā te ia.

23 Ona ia femalagaaʻi lea i Kalilaia uma,+ ua aʻoaʻo atu i o latou sunako+ ma talaʻi atu le tala lelei o le Malo, ma faamālōlō faamaʻi eseese uma ma maʻi tigā eseese uma o tagata.+ 24 Ua oo atu le tala e uiga iā te ia i Suria atoa, ona latou aumai lea iā te ia o i latou uma ua mamaʻi ma mafatia i faamaʻi eseese, o maʻi tigāina,+ o ē ua uluitinoina e temoni,+ o ē maʻi māliu,+ ma ē ua pepē tino, ma ua ia faamālōlō i latou uma. 25 Ona mulimuli atu lea iā te ia o le motu o tagata e toʻatele mai Kalilaia, Tekapoli,* Ierusalema, Iutaia ma le isi itu o Ioritana.

5 Ina ua silasila atu o ia i le motu o tagata, ona alu aʻe ai lea i le mauga, ua nofo i lalo, ma ua ō atu iā te ia ona soo. 2 Ua fetalai atu o ia ma aʻoaʻo atu iā i latou e faapea:

3 “E fiafia o ē e manatu mamafa i o latou manaʻoga faaleagaga,*+ auā e fai mo i latou le Malo o le lagi.

4 “E fiafia o ē e faanoanoa, auā e faamāfanafanaina i latou.+

5 “E fiafia o ē e agamalu,+ auā e fai mo latou tofi le lalolagi.+

6 “E fiafia o ē e fia aai ma fia feinu+ i le amiotonu, auā e maoona* i latou.+

7 “E fiafia o ē e alolofa mutimutivale,+ auā e faaalia i ai le alofa mutimutivale.

8 “E fiafia o ē e lotomamā,+ auā e latou te iloa atu le Atua.

9 “E fiafia o ē e faatupuina le filemu,*+ auā e taʻua i latou o atalii o le Atua.

10 “E fiafia o ē e sauāina ona o le amiotonu,+ auā e fai mo i latou le Malo o le lagi.

11 “E fiafia outou pe a upuleagaina,+ sauāina,+ ma tuuaʻia pepelo outou i mea leaga uma ona o aʻu.+ 12 Ia outou olioli ma fiafia,+ auā o loo i le lagi lo outou taui+ e tele, auā na faapena foʻi ona latou faasauā i perofeta na muamua atu iā te outou.+

13 “O outou o le masima+ o le lalolagi, ae afai e magalo le masima, e faapefea ona toe faamāi? E leai se mea e toe aogā i ai, ua na ona lafo i fafo+ ma solia e tagata.

14 “O outou o le malamalama o le lalolagi.+ E lē mafai ona lilo le aai pe a tū i luga o le mauga. 15 Pe a tutu e tagata le molī, e latou te lē tuuina i lalo o se ato,* ae e tuuina i luga o le tuugāmolī, ona susulu atu ai lea i ē uma o i le fale.+ 16 Ia faapea foʻi ona susulu atu lo outou malamalama i luma o tagata,+ ina ia latou iloa ai a outou galuega lelei+ ma vivii atu ai i lo outou Tamā o i le lagi.+

17 “Aua neʻi outou manatu ua ou sau e faalēaogā le Tulafono po o le ʻau Perofeta. Ou te leʻi sau e faalēaogā, ae ia faataunuuina.+ 18 E moni ou te fai atu iā te outou, e faigofie ona mavae atu le lagi ma le lalolagi, ae e faigatā ona mavae atu se mataʻitusi e sili ona laʻitiiti po o sina vaega o le Tulafono, e aunoa ma le faataunuuina.+ 19 O lea, o sē na te solia se poloaʻiga e aupito itiiti o nei poloaʻiga ma aʻoaʻo isi e faia faapea, e taʻua o ia o lē e faatauvaa i le Malo o le lagi. A o sē na te tausia nei poloaʻiga ma aʻoaʻo atu, e taʻua o ia o lē e sili i le Malo o le lagi. 20 Auā ou te fai atu iā te outou, afai e lē sili la outou amiotonu nai lo le ʻautusiupu ma le ʻau Faresaio,+ tou te lē ulu atu lava i le Malo o le lagi.+

21 “Ua outou faalogo na faapea atu i ē anamua: ‘Aua e te fasioti tagata,+ a o sē e fasioti tagata, e nofosala o ia i le faamasinoga.’+ 22 Ae ou te fai atu iā te outou, o sē faaauau ona ita+ i lona uso e faasalaina o ia i le faamasinoga; ma o sē e upu vale i lona uso e faasalaina o ia i le Faamasinoga Sili; a o sē fai atu, ‘Le tagata valea e, e leai sou aogā!’ e nofosala o ia i le afi i Kena.*+

23 “O lea, pe afai e te avatu lau taulaga i le fata faitaulaga,+ ona e manatua ai lea i inā o loo iai se mea e lē o malie ai lou uso iā te oe, 24 ia tuu lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.+

25 “Ia vave ona oulua faalelei ma lē ua molia oe i le tulafono, manū o loo lua iai i le ala, atonu e na te lē tuuina atu ai oe i le faamasino, ona tuuina atu lea o oe e le faamasino i le leoleo, ma lafo ai oe i le falepuipui.+ 26 E moni ou te fai atu iā te oe, e te lē magalo lava mai le falepuipui seʻia e totogi atu tupe uma.*

27 “Ua outou faalogo i nei upu: ‘Aua e te mulilua.’+ 28 Ae ou te fai atu iā te outou, ai se tasi e vaavaai pea i se fafine+ ma manaʻonaʻo i ai, ua uma ona mulilua ma ia i lona loto.+ 29 O lenei, afai e te tausuai ona o lou mata taumatau, ia sali ese ma lafoaʻi.+ Auā e sili ona lelei ona aveese o se vaega o lou tino, nai lo le lafo o lou tino atoa i Kena.*+ 30 Afai foʻi e te tausuai ona o lou lima taumatau, inā tipi ese ia ma lafoaʻi.+ Auā e sili ona lelei ona aveese o se vaega o lou tino, nai lo le lafo o lou tino atoa i Kena.*+

31 “Na taʻua foʻi: ‘O sē na te faateʻa* i lana avā, ia avatu i lana avā se tusi e faamaonia ai ua tatala la laʻua faaipoipoga.’+ 32 Ae ou te fai atu iā te outou, o sē e faateʻa i lana avā ae leʻi faia amioga lē mamā taufeusuaʻiga,* ua ia tuuina lana avā i se tulaga e ono oo ai ina mulilua, ma o sē e faaipoipo atu i le fafine ua faateʻaina, ua mulilua foʻi o ia.+

33 “Ua outou faalogo foʻi na fai atu i ē anamua: ‘Aua e te tautō ae e te lē tausisi i ai,+ ae ia e avatu iā Ieova* mea ua e tautō ai.’+ 34 Ae ou te fai atu iā te outou: Aua neʻi tautō+ i le lagi, auā o le nofoālii lea o le Atua; 35 po o le lalolagi, auā o le mea lea e tū ai ona aao;+ po o Ierusalema auā o le aai lea o le Tupu sili.+ 36 Aua foʻi neʻi tautō i lou ulu, auā e lē mafai ona e faasinasina pe faauliuli se lauulu e tasi. 37 Ae ia avea la outou upu o le ‘Ioe,’ ia Ioe; ma le ‘Leai,’ ia Leai;+ o ni upu e sili i na upu e mai i lē o leaga.+

38 “Ua outou faalogo ua faapea mai le upu: ‘O le mata e sui ai le mata, ma le nifo e sui ai le nifo.’+ 39 Ae ou te fai atu iā te outou: Aua le tetee atu i le tagata amioleaga, ae a pō mai e se tasi lou alafau taumatau, ia liliu atu i ai le isi.+ 40 A manaʻo se tasi e ave oe i le faamasinoga ina ia maua lou ofu pito i totonu, ia avatu foʻi i ai ma lou ofu tele;+ 41 ma pe a faatonu faamalosi oe e se pule lua te ō ma ia i le maila* e tasi, inā ō ia ma ia i maila e lua. 42 Ia e avatu i lē ua talosaga mai iā te oe, aua foʻi e te liliuese mai i lē ua fia nonō se mea* mai iā te oe.+

43 “Ua outou faalogo ua faapea mai le upu: ‘Ia e alofa atu i lē lua te tuaoi+ ae ʻinoʻino i lou fili.’ 44 Ae ou te fai atu iā te outou: Ia alolofa atu pea i o outou fili+ ma tatalo pea mo ē ua sauāina outou,+ 45 ina ia faamaonia ai o outou o atalii o lo outou Tamā o i le lagi,+ o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.+ 46 Auā o le ā se taui tou te maua pe afai tou te alolofa atu i ē e alolofa mai iā te outou?+ Pe e lē o le mea foʻi lenā o loo faia e le ʻauaolafoga? 47 O le ā se mea e sili ua outou faia, pe afai tou te faafeiloa‘ia na o o outou uso? Pe e lē o le mea foʻi lenā o loo faia e tagata o nuu ese? 48 Ia atoatoa ona lelei o la outou amio e pei foʻi o lo outou Tamā o i le lagi, e atoatoa ona lelei o ia.+

6 “Ia faaeteete, ia aua neʻi faaalialia la outou amiotonu i luma o tagata ina ia iloa ai e i latou;+ auā pe a faia faapea, e leai so outou taui mai lo outou Tamā o i le lagi. 2 O lea, pe a foaʻi ni au meaalofa, aua neʻi ilia se pū i ou luma, e pei ona faia e tagata faafiaamiotonu i sunako ma ala tetele, ina ia viiviia ai i latou e tagata. E moni ou te fai atu iā te outou, ua maua e i latou lo latou taui atoatoa. 3 A o oe, pe a foaʻi ni au meaalofa, aua neʻi iloa e lou lima tauagavale le mea o loo faia e lou lima taumatau, 4 ina ia lilo ai lau foaʻi; ona tauia ai lea o oe+ e lou Tamā, o lē o loo silasila mai iā te oe mai le mea lilo.

5 “Pe a outou tatalo foʻi, aua neʻi outou gaoioi e pei o tagata faafiaamiotonu,+ auā latou te fiafia e tutū ma tatalo i sunako ma magāala o ala tetele, ina ia iloa ai i latou e tagata.+ E moni ou te fai atu iā te outou, ua maua e i latou lo latou taui atoatoa. 6 A o oe, pe a e tatalo, ia ulu atu i lou potu, ma tapuni le faitotoʻa, ma tatalo atu i lou Tamā o loo i le mea lilo.+ Ona tauia ai lea o oe e lou Tamā, o lē o loo silasila mai iā te oe mai le mea lilo. 7 Pe a e tatalo, aua le tautū i upu masani e pei o tagata o nuu ese, auā ua latou manatu o le a faafofogaina i latou i le tele o upu. 8 O lea, aua neʻi outou pei o i latou, auā ua silafia e lo outou Tamā mea o loo outou manaʻomia,+ ae tou te leʻi talosaga atu.

9 “Ia faapea ona outou tatalo:+

“‘Lo matou Tamā e o i le lagi, ia faapaiaina lou suafa.+ 10 Ia oo mai lou Malo.+ Ia faia lou finagalo+ i le lalolagi, e pei ona faia i le lagi.+ 11 Ia e foaʻi mai i le aso nei a matou meaʻai* mo le asō;+ 12 ma faamagalo mai i a matou agasala* e pei foʻi ona matou faamagalo atu i ē o agasala mai iā i matou.+ 13 Aua foʻi neʻi tuua i matou e lolo atu i faaosoosoga,+ ae ia laveaʻi iā i matou mai i lē o loo leaga.’+

14 “Auā afai tou te faamagaloina mea sesē e fai mai e tagata, ona faamagaloina foʻi lea o outou e lo outou Tamā o i le lagi.+ 15 Ae afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.+

16 “Pe a outou anapopogi,+ soia le mata faanoanoa e pei o tagata faafiaamiotonu, auā ua latou lē teuteua o latou foliga, ina ia iloa ai e tagata o loo latou anapopogi.+ E moni ou te fai atu iā te outou, ua maua e i latou lo latou taui atoatoa. 17 A o oe, pe a e anapogi, ia uu lou ulu ma fufulu ou mata, 18 ina ia aua neʻi iloa e tagata o loo e anapogi, ae na o lou Tamā o loo i le mea lilo, ona tauia ai lea o oe e lou Tamā, o lē o loo silasila mai iā te oe mai le mea lilo.

19 “Aua tou te toe faaputuina mo outou ʻoa o le lalolagi,+ auā o loo iai mogamoga* ma le ʻele e faaleagaina ai, o loo iai foʻi tagata gāoi e osofaʻia ma gaoia. 20 Ae ia outou faaputu ʻoa i le lagi+ e lē o iai ni mogamoga po o le ʻele e faaleagaina ai,+ e leai foʻi ni tagata gāoi e osofaʻia ma gaoia. 21 Auā o le mea e iai a outou ʻoa, e iai foʻi ma o outou loto.

22 “O le molī o le tino o le mata lea.+ Pe afai e lelei* lau vaai, e malamalama uma ai lou tino. 23 Ae afai e leaga lau vaai,+ e pōuliuli uma ai lou tino. Afai e pōuliuli le malamalama o loo iā te oe, ona matuā pōuliuli ai lava lea!

24 “E lē mafai ona pologa se tasi i ni matai se toʻalua; auā e ʻinoʻino o ia i le tasi+ ae alofa atu i le isi, pe e pipii atu i le tasi ae manatu faatauvaa i le isi. E lē mafai ona outou pologa i le Atua atoa ma ʻOa.+

25 “O le mea lea ou te fai atu ai iā te outou: Aua tou te toe popole+ i o outou ola i mea tou te aai pe inu ai, po o o outou tino i ofu tou te oofu ai.+ Pe e lē sili ea le ola nai lo o meaʻai ma le tino nai lo o ofu?+ 26 Ia vaavaai lelei i manufelelei o le lagi;+ e latou te lē lūlū ni fatu pe selesele, pe faaputu i se fale teuoloa, ae e fafagaina i latou e lo outou Tamā o i le lagi. Pe e lē sili ea ona tāua outou i lo o na manufelelei? 27 O ai ea se tasi o outou e mafai e lona popole ona toe faaopoopo ai se aso se tasi* i lona olaga?+ 28 Aiseā foʻi e tou te popole ai i o outou ofu? Ia aʻoaʻo se lesona mai lili o le vao ma le auala o loo ola ai; e latou te lē galulue pe milo foʻi, 29 ae ou te fai atu iā te outou, e oo lava iā Solomona+ ma lona mamalu uma, e leʻi tutusa lona matagofie ma se tasi o nei lili. 30 O lenei, afai o le auala lea o loo faaofuina ai e le Atua laau o le vao ia ua iai i le asō, ae lafoina i le ogaumu a taeao, pe e lē sili ea ona ia faaofuina outou o ē faatuatua itiiti? 31 O lea, ia aua lava neʻi outou popole+ ma faapea ane, ‘O le ā se mea tatou te aai ai?’ ‘O le ā se mea tatou te inu ai?’ ‘O le ā foʻi se mea tatou te oofu ai?’+ 32 Auā o mea uma ia o loo saʻilia ma le naunau e tagata o nuu ese. Ua silafia e lo outou Tamā o i le lagi, e tou te manaʻomia nei mea uma.

33 “O lea, ia faaauau pea ona outou saʻili muamua le Malo ma le amiotonu a le Atua, ona faaopoopoina ai lea o nei mea uma iā te outou.+ 34 O lenei, ia aua neʻi outou popole mo le aso a taeao,+ auā e iai foʻi popolega o le aso a taeao. E tofu lava le aso ma ona faafitauli.

7 “Aua tou te toe faamasino atu+ ina neʻi faamasinoina outou. 2 Auā o le faamasinoga tou te faamasino atu ai, e toe faamasinoina ai foʻi outou;+ ma o fua tou te fuaina atu, e toe fuaina mai iā te outou.+ 3 Aiseā la e te vaavaai ai i le fasilaau i le mata o lou uso, ae e te lē vaai i le ogālaau* o loo i lou lava mata?+ 4 E faapefea ona e fai atu i lou uso, ‘Tuu mai seʻi oʻu ʻeuese le fasilaau o loo i lou mata,’ ae vaai! o loo iai le ogālaau i lou lava mata? 5 O oe o le tagata faafiaamiotonu! Ia aveese muamua le ogālaau o loo i lou lava mata, ona e iloa lelei ai lea ʻeuese le fasilaau o loo i le mata o lou uso.

6 “Aua neʻi avatua mea paia i taʻifau, pe lafoina a outou penina i puaa,+ ina neʻi soli ai i o latou vae, ma liliu mai ai ma saeia outou.

7 “Ia talosaga atu pea, ona foaʻiina mai ai lea iā te outou.+ Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou.+ 8 Auā o ē uma e talosaga atu, e foaʻiina mai iā i latou.+ O ē uma e saʻili atu, e maua e i latou. O ē uma e tuʻituʻi atu, e tatalaina mai iā i latou. 9 Auā po o ai se isi o outou e avatu i lona atalii se maa pe a talosaga mai i se falaoa? 10 Pe e avatu iā te ia se gata pe afai e ōle mai mo se iʻa? 11 O lea, pe afai o outou o tagata leaga, ae e tou te iloa avatu meaalofa lelei i a outou fanau, e sili atu la ona foaʻi mai e lo outou Tamā o i le lagi mea lelei+ i ē e ōle atu iā te ia!+

12 “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.+ Auā o le uiga lenei o le Tulafono ma le ʻau Perofeta.+

13 “Ia outou ulu atu i le faitotoʻa vāitiiti,+ auā e vātele le faitotoʻa ma lautele le auala e tau atu i le faaumatiaga, ma e toʻatele foʻi i latou e ui ai. 14 Ae e vāitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou e mauaina.+

15 “Ia mataala pea i perofeta pepelo,+ o ē e ō mai iā te outou i ofu mamoe,+ a o totonu o luko feʻai lava i latou.+ 16 Tou te iloa i latou i o latou fua. Pe e mafai ea e tagata ona tau mai fua o le vine mai i laau tuitui, po o fua o le mati mai i laau talatala?+ 17 E faapea foʻi i laau lelei uma ona fua mai ai o fua lelei, a o laau pala uma, e fua mai ai o fua leaga.+ 18 E lē mafai e le laau lelei ona fua mai ai ni fua leaga, e lē mafai foʻi e se laau pala ona fua mai ai ni fua lelei.+ 19 O laau uma e lē fuaina mai ni fua lelei, e tātuu i lalo ma lafo i le afi.+ 20 O lea la, tou te iloa i latou i fua e latou te fuaina mai.+

21 “E lē ulu atu i le Malo o le lagi i latou uma o ē fai mai iā te aʻu, ‘Le Alii e, le Alii e,’ ae e na o lē na te faia le finagalo o loʻu Tamā o i le lagi.+ 22 E toʻatele e fai mai iā te aʻu i lea aso: ‘Le Alii e, le Alii e,+ pe matou te leʻi faia ea ni valoaga ma tutuli temoni, ma faia le tele o galuega mamana i lou suafa?’+ 23 Ona ou fai atu lea iā i latou: ‘Ou te leʻi iloa lava outou! Inā ō ese ia mai iā te aʻu, o outou o ē faia mea leaga.’+

24 “O lenei, o i latou uma e faalogo i aʻu upu ma faia, ua faatusaina i latou i le tagata faautauta, ua na fausia lona fale i luga o le papa.+ 25 Ona totō mai lea o timuga ma ua oo mai lologa, ma agi mai le matagi ma taia ai le fale, ae e leʻi paʻū, auā ua fausia i luga o le papa. 26 Peitaʻi, o i latou uma ua faalogo i aʻu upu ae lē faia, ua faatusaina i latou i le tagata valea ua na fausia lona fale i luga o le oneone.+ 27 Ona totō mai lea o timuga ma ua oo mai lologa, ua agi mai foʻi le matagi ma taia ai le fale,+ ona paʻū ai lea ma matuā nutipalaina ai.”

28 Ua māeʻa fetalaiga a Iesu, ona matuā ofo ai lea o le motu o tagata i lana aʻoaʻo atu,+ 29 auā ua ia aʻoaʻoina i latou e pei o sē ua iai le pule+ ae lē pei o o latou tusiupu.

8 Ua alu ifo o ia mai i le mauga, ona mulimuli atu lea iā te ia o tagata e toʻatele. 2 Faauta! Ua sau se tagata lepela, ua ifo mai iā te ia ma faapea mai: “Le Alii e, a e finagalo i ai, e mafai lava ona e faamamā iā te aʻu.”+ 3 Ona faaloaloa atu lea o lona aao, ua paʻi atu iā te ia ma faapea atu: “Ou te loto i ai! Inā mamā ia oe.”+ Ona mamā ai loa lea o lona lepela.+ 4 Ona fetalai atu lea o Iesu iā te ia: “Ia aua lava neʻi e taʻu atu i se tasi.+ Ae ia e alu ma faailoa atu oe i le ositaulaga,+ ma avatu le meaalofa e pei ona faatonuina e Mose,+ e fai ma molimau iā i latou.”

5 Ua alu atu o ia i Kapanaumi, ona sau ai lea iā te ia o se taʻitaʻiʻau, ua ʻaiʻoi mai+ 6 e faapea: “Lau susuga e, o loo faataotolia laʻu auauna i le fale, auā ua pē lona tino ma ua matuā tigāina lava.” 7 Ona ia fetalai atu lea: “O le a ou faamālōlō iā te ia pe a ou taunuu atu.” 8 Ona tali mai lea o le taʻitaʻiʻau: “Lau susuga e, e lē talafeagai ona e ulufale atu i loʻu fale, ae e tau lava o sau fetalaiga ona mālōlō ai lea o laʻu auauna. 9 Auā o aʻu foʻi o le tagata ua pule ai isi, ua ou pule foʻi i fitafita ma pe a ou fai atu i le tasi, ‘Alu ia!’ ona alu ai lea, ma le isi, ‘Sau ia!’ ona sau ai lea o ia, ou te fai atu foʻi i laʻu pologa, ‘Ia faia le mea lenei!’ ona fai ai lea e ia.” 10 Ina ua faafofoga atu Iesu i lenā mea, ona matuā ofo ai lea ma faapea atu i ē ua mulimuli mai iā te ia: “Ou te taʻu atu iā te outou le mea moni, ou te leʻi iloa lava i Isaraelu se tasi ua malosi faapea lona faatuatua.+ 11 Ae ou te fai atu iā te outou, e toʻatele e ō mai mai i le itu i sasaʻe ma le itu i sisifo e taooto e aai faatasi ma Aperaamo, Isaako, ma Iakopo i le laoai i le Malo o le lagi.+ 12 A o atalii o le Malo, e lafoina i fafo i le pogisa. O i inā e latou te tagiauē ai ma lilivau o latou nifo.”+ 13 Ona fetalai atu lea o Iesu i le taʻitaʻiʻau: “Alu ia oe. Ia taunuu lenā mea e tusa ma lou faatuatua.”+ Ona mālōlō ai lea o le auauna i lenā lava taimi.+

14 Ua ulufale atu Iesu i le fale o Peteru, ua ia silafia ai o loo taoto le tinā o lana avā,+ ma o loo maʻi i le fiva.+ 15 Ua paʻi atu o ia i lona lima,+ ona teʻa ai lea o lona fiva. Ua tū o ia i luga ma amata ona auauna atu iā te ia. 16 Ua oo i le afiafi, ona aumai ai lea e tagata iā te ia o le toʻatele o ē ua uluitinoina e temoni, ma ua ia tulia agaga leaga i ana upu, ua ia faamālōlō foʻi i latou uma ua mamaʻi tigāina, 17 ina ia taunuu ai le upu na ala mai i le perofeta o Isaia: “Ua ia tauave o tatou maʻi ma tigā.”+

18 Ina ua silafia e Iesu le motu o tagata ua siʻomia o ia, ona ia poloaʻi atu lea i ona soo ina ia latou ō atu i le isi itu.+ 19 Ona sau ai lea o se tusiupu ma faapea mai iā te ia: “Le Aʻoaʻo e, ou te mulimuli atu iā te oe i mea uma e te maliu atu i ai.”+ 20 Ae ua fetalai atu Iesu iā te ia: “E fai lua o alope,* e iai foʻi mea e momoe ai manufelelei o le lagi, a o le Atalii o le tagata e leai se mea e moe ai o ia.”+ 21 Ona fai mai lea o le tasi o le ʻausoo iā te ia: “Le Alii e, tuu mai aʻu seʻi oʻu alu muamua e tanu loʻu tamā.”+ 22 Ona fetalai atu lea o Iesu iā te ia: “Mulimuli mai pea iā te aʻu, ae tuu ai pea ē ua oti e tanu e o latou tagata oti.”+

23 Ua alu aʻe o ia i le vaa, ona mulimuli atu ai lea o ona soo iā te ia.+ 24 Faauta! Ua agi malosi mai le matagi, ua matuā sou ai le sami, ma ua lofia ai le vaa i galu; peitaʻi o loo moe pea Iesu.+ 25 Ona latou ō mai lea ma fafagu iā te ia ma faapea mai: “Le Alii e, ia e faaola mai iā i matou, auā o le a matou feoti!” 26 Ae ua ia fetalai atu iā i latou: “Aiseā ua outou soona fefefe* ai, o outou o ē e faatuatua itiiti?”+ Ona tū lea o ia i luga ma vavao i le matagi ma le sami, ona toʻafilemu ai lea.+ 27 Ua ofo tamāloloa ma fai ane: “O ai ea lenei tagata ua usiusitaʻi i ai le matagi ma le sami iā te ia?”

28 Ua oo atu o ia i le isi itu i le vaipanoa o Katara, ona fetaui ai lea o ia ma tagata e toʻalua ua uluitinoina e temoni, ua ō mai mai le fanuatanu.+ Ua matuā feʻai lava i laʻua, ma ua palaaai tagata e ui i lea auala. 29 Faauta! ua la feʻei mai: “O oe na le Alo o le Atua, aiseā ua e faalavelave mai ai iā i matou?+ Po ua e sau ea e faapuapuagatia i matou+ a o leʻi oo i le taimi ua atofaina?”+ 30 Ae o loo aai mai se lafu puaa tele i se mea mamao.+ 31 Ona ʻaiʻoi mai lea o temoni iā te ia: “Afai e te tutulia i matou, ia e aauina atu i matou i le lafu puaa.”+ 32 Ua fetalai atu o ia iā i latou: “Inā ō ia!” Ona latou ō lea i fafo ma ō atu i le lafu puaa; faauta foʻi! ua taufetuli atu le lafu puaa uma ma feosofi i le tofē i le sami, ma mamate ai i le sami. 33 Ona sosola ai lea i le aai o ē na tausia le lafu, ma faamatala atu mea uma, e aofia ai ma le mea ua tupu i tamāloloa na uluitinoina e temoni. 34 Faauta! Ua ō mai tagata uma o le aai e faafetaui iā Iesu, ma ina ua latou iloa atu o ia, ona latou faatauanau atu lea ina ia alu ese mai i lo latou vaipanoa.+

9 Ona alu aʻe lea o ia i le vaa, ua sopo atu i le isi itu, ma agaʻi atu i lona lava aai.+ 2 Faauta! ua latou aumai iā te ia se tagata ua pē le tino o loo taoto i le moega. Ua silafia e Iesu lo latou faatuatua, ona fetalai atu lea o ia i le tagata maʻi: “Loʻu atalii e, ia e lototele! Ua faamagaloina au agasala.”+ 3 Ae ua faapea ifo nisi o le ʻautusiupu: “Ua upuleaga lenei tagata i le Atua.” 4 Ua silafia e Iesu o latou manatu, ma ua faapea atu: “Aiseā ua manatunatu ai o outou loto i mea leaga?+ 5 Auā o lē fea e sili ona faigofie, o le fai atu ea, ʻUa faamagaloina au agasala,’ po o le fai atu, ʻIa tū i luga ma savali’?+ 6 Peitaʻi, ina ia outou iloa ua iai i le Atalii o le tagata le pule i le lalolagi e faamagalo ai agasala​—” ona ia fetalai atu lea i le tagata maʻi: “Inā tulaʻi ia ma ave lou moega, ma e alu i lou aiga.”+ 7 Ona tū lea o ia i luga ma alu i lona aiga. 8 Ua matuā matataʻu le motu o tagata ina ua latou vāai i lenei mea, ona latou faamamaluina lea o le Atua, o lē ua foaʻi maia lenā pule i tagata.

9 A o malaga ane o ia mai i lea mea, ua silafia ai e Iesu se tamāloa e igoa iā Mataio, o loo nofo i le ofisa aolafoga, ona ia faapea atu lea iā te ia: “Ia e mulimuli mai iā te aʻu.” Ona tū ai lea o ia i luga ma mulimuli iā te ia.+ 10 Mulimuli ane, a o taumafa Iesu* i le fale, faauta! ua ō mai le ʻauaolafoga ma tagata agasala e toʻatele, ma aai* faatasi ma ia ma ona soo.+ 11 Ae ina ua vāai atu le ʻau Faresaio i lenei mea, ona latou faapea mai lea i ona soo: “Aiseā ua aai faatasi ai lo outou aʻoaʻo ma le ʻauaolafoga ma ē e agasala?”+ 12 Ua ia faafofoga atu i a latou upu, ona ia fetalai atu lea: “E lē manaʻomia e tagata malolosi se fomaʻi, ae na o ē mamaʻi.+ 13 Ia outou ō ma aʻoaʻoina le uiga o nei upu: ‘Ou te loto i le alofa mutimutivale, ae lē o le taulaga.’+ Auā ua ou sau e valaau i ē agasala ae lē o ē amiotonu.”

14 Ona ō mai ai lea o soo o Ioane ma fesili mai iā Iesu: “Aiseā ua matou anapopogi ai ma le ʻau Faresaio, ae e lē anapopogi ou soo?”+ 15 Ona fetalai atu lea o Iesu iā i latou: “Pe e iai ea se māfuaaga e faanoanoa ai uō a le alii faaipoipo+ a o faatasi o ia ma i latou? Ae e oo mai aso e aveesea ai le alii faaipoipo mai iā i latou,+ ona latou anapopogi ai lea. 16 E leai se tasi e na te fonoina se ofu tele tuai i se fasi ʻie fou; auā e atili masae ai pe a mimigi le fasi ‘ie fou.+ 17 E lē mafai foʻi e tagata ona utu le uaina fou i fagupaʻu tuai, auā pe a faia faapea, ona pāpā ai lea o fagupaʻu ma masaa ai le uaina ma lē toe aogā ai fagupaʻu. Ae e masani ona utu e tagata le uaina fou i fagupaʻu fou, ona tau fai sao ai lea o nei mea.”

18 A o ia faamatala atu nei mea iā i latou, faauta! ua sau se tasi pule, ua ifo ma faapea mai iā te ia: “E lē taumatea ua oti loʻu afafine i le taimi lenei, ae ia e maliu atu ma faaee lou aao iā te ia, ona toe ola ai lea o ia.”+

19 Ona tulaʻi lea o Iesu faatasi ma ona soo, ma mulimuli atu iā te ia. 20 Faauta! ua alu atu i ona tua se fafine ua 12 tausaga talu ona maʻi i le punatoto,+ ma paʻi atu i le pito o lona ofu tele,+ 21 auā ua faapea ifo pea le fafine iā te ia lava: “Ia tau lava ina oʻu paʻi atu i le pito o lona ofu tele, ona ou malosi ai lea.” 22 Ua faliu Iesu ma ua silafia ai o ia, ona ia faapea atu lea: “Loʻu afafine e, ia e lototele! Ua e malosi ona o lou faatuatua.”+ Ona malosi ai lea o le fafine i lenā lava taimi.+

23 Ua ulufale atu o ia i le fale o le pule, ona silafia ai lea e ia o le motu o tagata o loo fetagisi ma ē o loo tā ni pese faavauvau.*+ 24 Ona faapea atu lea o Iesu: “Ia ō uma i fafo, auā e leʻi oti le teineitiiti, ae o loo moe o ia.”+ Ona latou toē faaʻamuʻamu lea iā te ia. 25 Ua ō i fafo le motu o tagata, ona ulu atu lea o ia ma tago i le lima+ o le teineitiiti, ona tū ai lea i luga o le teineitiiti.+ 26 O le mea moni, ua salalau atu lenei tala i lenā vaipanoa uma.

27 A o agaʻi ese atu Iesu mai i inā, ua mulimuli mai iā te ia ni tamāloloa tauaso se toʻalua+ ma alalaga mai: “Le Alo e, o Tavita, ia e alofa mutimutivale mai iā i maʻua.” 28 Ua alu atu o ia i le fale, ona ō mai ai lea o tamāloloa tauaso iā te ia, ona fesili atu lea o Iesu iā i laʻua: “Pe e te lua faatuatua e mafai ona ou faia lenei mea?”+ Ona la tali mai lea: “O lea lava, le Alii e.” 29 Ona ia papaʻi atu lea i o la mata+ ma faapea atu: “Ia faapea lava ona faia iā te oulua e tusa ma lo oulua faatuatua.” 30 Ona pupula loa lea o o la mata, ma ua matuā lapata‘ia i laʻua e Iesu e faapea: “Ia aua lava neʻi iloa e se tasi lenei mea.”+ 31 Ae ua ō i laʻua i fafo, ma faailoa atu i vaipanoa uma le tala e uiga iā te ia.

32 A o ō i laʻua, faauta! ua aumai e tagata iā te ia se tamāloa gūgū ua uluitinoina e se temoni.+ 33 Ina ua uma ona tuliesea le temoni, ona tautala ai lea o le tagata na gūgū.+ Ona matuā taufaiofo ai lea o le motu o tagata ma faapea ane: “E leʻi vaaia muamua lava se mea faapenei i Isaraelu.”+ 34 Ae ua fai ane le ʻau Faresaio: “O le pule o temoni ua mafai ai ona ia tuliesea temoni.”+

35 Ona malaga atu lea o Iesu i aai ma nuu uma, ua aʻoaʻo atu i o latou sunako, ma talaʻi atu le tala lelei o le Malo, ma faamālōlō i maʻi eseese ma maʻi tigāina uma.+ 36 Ua silasila atu o ia i le motu o tagata, ona mutimutivale ai lea o lona alofa iā i latou,+ auā ua pei i latou o mamoe ua faamanuʻalia ma agaleagaina, ua leai so latou leoleo mamoe.+ 37 Ona fetalai atu lea o ia i ona soo: “E moni, e telē le galuega o le seleselega, ae e toʻaitiiti le ʻaufaigaluega.+ 38 O le mea lea, ia outou ʻaiʻoi atu ai i le Matai o le seleselega, ina ia auina mai se ʻaufaigaluega e faia le seleselega.”+

10 Ua valaau atu o ia i ona soo e toʻa 12 ma tuu atu iā i latou le pule i agaga leaga,+ ina ia tutuliese ai i latou ma faamālōlō maʻi eseese ma maʻi tigāina uma.

2 O igoa nei o aposetolo e toʻa 12:+ Muamua, o Simona, ua igoa foʻi iā Peteru,+ ma lona uso o Aneterea;+ o Iakopo le atalii o Sepetaio ma lona uso o Ioane;+ 3 o Filipo, o Patolomaio,+ o Toma,+ ma le aolafoga o Mataio;+ o Iakopo le atalii o Alefaio; ma Tataio; 4 o Simona le Kanana;* ma Iuta le Sekara lea na faalataina mulimuli ane Iesu.+

5 Ua aauina atu e Iesu le toʻa 12 e talaʻi ma faatonuina i latou:+ “Aua tou te ō atu i se ala o nuu ese, aua foʻi le ō atu i so o se aai o Samaria.+ 6 Ae ia ō atu pea i mamoe ua leiloloa o le aiga o Isaraelu.+ 7 Pe a outou ō, ia talaʻi atu e faapea: ‘Ua latalata mai le Malo o le lagi.’+ 8 Ia faamālōlō i ē e mamaʻi,+ faatutū i ē ua oti, faamamā i lepela ma tutuli temoni. Ia outou avatu fua, auā ua outou maua fua. 9 Aua neʻi avea ni auro, siliva po o tupe ʻapamemea i a outou ato tupe.+ 10 Aua foʻi neʻi avea ni taga meaʻai i le malaga, po o ni ofu se lua,* o ni seevae po o se tootoo,+ auā e tatau lava ona avatu le meaʻai i le tagata faigaluega.+

11 “O so o se aai po o se nuu tou te ō atu i ai, ia saʻili po o iai sē ua tatau i ai le feʻau, ma ia nonofo ai seʻia oo ina outou ō.+ 12 A outou ulufale atu, ia faafeiloaʻi i le aiga. 13 Afai ua tatau le feʻau i lea aiga, ia outou faapea atu ia filemu le aiga nei.+ Ae afai e lē tatau, ona toe faafoʻi mai lea o la outou upu. 14 Afai e lē talia outou ma lē fia faalogo foʻi i la outou upu, pe a outou ō ese mai i lenā fale po o lenā aai, ia tūtū atu i ai le pefu mai i o outou vae.+ 15 E moni ou te fai atu iā te outou, e māmā atu le faasalaga o Sotoma ma Komoro+ i le Aso Faamasino, nai lo o lenā aai.

16 “Faauta! Ua ou aauina atu outou e pei o mamoe i le lotolotoi o luko, o lea, ia outou faaeteete e pei o gata ma ia mamā e pei o lupe.+ 17 Ia outou faaeteete i tagata, auā o le a latou tuuina atu outou i faamasinoga maulalo,+ ma matuā sasaina outou+ i o latou sunako.+ 18 O le a molia foʻi outou i luma o kovana ma tupu+ ona o aʻu, ina ia taʻu atu ai iā i latou ma atunuu+ e faatatau iā te aʻu. 19 Peitaʻi, afai latou te molia outou, aua tou te popole pe faapefea ma po o ā foʻi upu tou te tautatala atu ai, auā o le a tuuina atu i lenā lava taimi upu tou te tautatala atu ai.+ 20 Auā e lē na o outou o tautatala atu, a o le agaga o lo outou Tamā lea ua mafai ona outou tautatala atu ai.+ 21 E lē gata i lea, o le a tuuina atu e le uso lona uso ia oti, o le a faia foʻi faapea e le tamā i se tasi o lana fanau, o le a tetee atu foʻi le fanau i mātua ma tuuina atu mātua ina ia fasiotia.+ 22 O le a inosia foʻi outou e tagata uma ona o loʻu igoa,+ a o lē e tumau seʻia oo i le iʻuga, e faaolaina o ia.+ 23 Pe a latou faasauā iā te outou i se tasi aai,+ ia sosola atu i le isi aai. E moni, ou te fai atu iā te outou, e lē soo aai o Isaraelu iā te outou seʻia taunuu mai le Atalii o le tagata.

24 “E lē sili le tagata aʻoga i lona faiaʻoga, e lē sili foʻi le pologa i lona matai.+ 25 E fiafia le tagata aʻoga pe a pei o lona faiaʻoga, ma le pologa pe a pei o lona matai.+ Afai e faaigoa e tagata le matai o le aiga, o Pelesepulo,*+ e mautinoa lava e faaigoa ai foʻi ma tagata o lona aiga! 26 O lea, ia aua neʻi outou fefefe iā i latou, auā e leai se mea e natia e lē faaalia, e leai foʻi se mea e lilo e lē faailoaina.+ 27 O mea ou te taʻu atu i le pōuliuli, ia outou faailoa atu i le malamalama; o mea foʻi ou te musumusu atu ai, ia outou talaʻia atu mai i tumutumu o fale.+ 28 Aua tou te matataʻu i ē e fasiotia le tino, ae e lē mafai ona faaumatia le ola.*+ Ae ia matataʻu i lē e mafai ona faaumatia uma le ola ma le tino i Kena.*+ 29 Po ua lē faatauina atu ea ni tamaʻi manulele se lua i se tupe itiiti?* Ae pe a paʻū se tasi o na tamaʻi manulele i le eleele, e silafia lava e lo outou Tamā.+ 30 E oo foʻi i o outou lauulu, ua faitaulia uma. 31 O lea la, aua neʻi outou fefefe; e sili atu ona tāua outou nai lo o tamaʻi manulele e tele.+

32 “O sē e na te faailoa atu lona faatuatua iā te aʻu i luma o tagata,+ ou te faailoa atu foʻi o ia i luma o loʻu Tamā o i le lagi.+ 33 A o lē e teena aʻu i luma o tagata, ou te teena foʻi o ia i luma o loʻu Tamā o i le lagi.+ 34 Aua tou te manatu ua ou sau e avatu le filemu i le lalolagi; ou te leʻi sau e avatu le filemu a o le pelu.+ 35 Auā ua ou sau e faatupu fevaevaeaʻiga, o le atalii ma lona tamā, o le tama teine ma lona tinā, o le avā foʻi ma le tinā o lana tane.+ 36 O le mea moni, e fai le aiga o le tagata ma ona fili. 37 O lē ua sili lona alofa i lona tamā po o lona tinā nai lo o aʻu, e lē aogā o ia iā te aʻu. O lē ua sili foʻi lona alofa i lona atalii po o lona afafine nai lo o aʻu, e lē aogā foʻi o ia iā te aʻu.+ 38 O lē foʻi e na te lē talia le laau e faapuapuagatia ai* o ia, ma mulimuli mai iā te aʻu, e lē aogā o ia iā te aʻu.+ 39 O lē e fia faasaoina lona ola, e maʻimau ia. A o lē e faamaʻimau lona ola ona o aʻu, e faasaoina lea.+

40 “O lē na te taliaina outou, ua ia talia foʻi aʻu, ma o lē e na te taliaina aʻu, ua talia foʻi e ia o Lē na auina mai aʻu.+ 41 O lē na te taliaina se perofeta ona o ia o se perofeta, e na te mauaina le taui o le perofeta.+ O lē na te taliaina le tagata amiotonu ona o ia o se tagata amiotonu, e na te mauaina le taui o le tagata amiotonu. 42 O sē e avatuina tau lava o se ipu vai mālūlū e inu ai se tasi o ē itiiti, ona o ia o se soo, e moni ou te fai atu iā te outou, e maua lava lona taui.”+

11 Ua uma ona avatu e Iesu faatonuga i ona soo e toʻa 12, ona alu atu lea o ia e talaʻi ma aʻoaʻo atu i isi aai.+

2 Ae ina ua faalogo Ioane mai i le falepuipui+ e uiga i galuega a le Keriso, ona aauina mai lea e ia o ona soo+ 3 e fesili mai iā te ia: “Po o oe ea o Lē e maliu mai, pe e matou te faatali i se isi?”+ 4 Ua tali atu Iesu iā i laʻua: “Ia ō ma faamatala atu iā Ioane mea ua oulua faalogo ma vāai i ai:+ 5 Ua toe pupula tauaso,+ ua savavali pipili, ua faamamāina lepela,+ ua faalogo ē e tutuli, ua toetutū mai tagata oti, ma ua folafola atu le tala lelei i ē e matitiva.+ 6 E fiafia le tagata e lē tausuai ona o aʻu.”+

7 A o la ō atu i le ala, ae ua faapea atu Iesu i le motu o tagata e faatatau iā Ioane: “O le ā se mea na outou ō atu i le toafa e vāai i ai?+ O se ū ea ua felafoa‘iina e le matagi?+ 8 Afai e leai, o le ā la se mea na outou ō atu e vāai i ai? O le tagata ea ua ofu i ofu lelei? Auā o ē ua oofu i ofu lelei, e nonofo i maota o tupu. 9 O le ā ea la le māfuaaga na outou ō ai? Pe ina ia vāai ea i se perofeta? Ioe, ou te fai atu iā te outou, e sili atu o ia nai lo o se perofeta.+ 10 O ia lenei ua tusia e faatatau i ai: ‘Faauta! Ou te auina atu laʻu avefeʻau i ou luma,* o lē e muamua atu na te saunia le ala mo oe!’+ 11 E moni ou te fai atu iā te outou, e leʻi tū mai i ē na fananau mai i fafine sē e sili iā Ioane le Papatiso, a o lē e faatauvaa i le Malo o le lagi e sili o ia iā Ioane.+ 12 Talu mai aso o Ioane le Papatiso seʻia oo mai i le taimi nei, ua avea le Malo o le lagi ma mea e tausinio i ai tagata, ma ua maua e i latou o ē e tausinio i ai.+ 13 Auā a o leʻi oo iā Ioane, na valoia uma e le ʻau Perofeta ma le Tulafono mea o le a tutupu;+ 14 ma afai tou te malilie e talitonu i ai, o ia lea o ‘Elia, o lē na faapea mai perofeta o loo sau.’+ 15 O lē ua iai taliga, inā faalogo ia o ia.

16 “O ai ou te faatusaina i ai lenei tupulaga?+ Ua pei i latou o tamaiti o loo nonofo i le maketi ma tauvalaau atu i a latou uō 17 e faapea: ‘Ua tā atu a matou pese,* ae tou te lē sisiva mai; ua matou tagiauē atu, ae tou te lē tagitu‘i mai.’ 18 I se tulaga taitutusa, na sau Ioane e leʻi ʻai ma e leʻi inu, ae ua fai mai tagata, ‘Ua iā te ia se temoni.’ 19 Ae ua sau le Atalii o le tagata ua ʻai ma inu,+ ae ua faapea mai tagata, ‘Vaai! O le tagata ʻai tele ma inu tele i le uaina, o le uō a le ʻauaolafoga ma ē e agasala.’+ Peitaʻi, e taʻuamiotonuina* le atamai i ana galuega.”*+

20 Ona ia matuā aʻoaʻia lea o aai na faia ai le tele o ana galuega mamana, auā latou te leʻi salamō: 21 “Oi talofa iā te oe Koasini! Oi talofa iā te oe Petesaita! auā ana faia i Turo ma Saitonu o galuega mamana na faia iā te outou, semanū ua leva ona latou salamō i le ʻie talatala ma le lefulefu.+ 22 Ae ou te fai atu iā te outou, e māmā atu le faasalaga o Turo ma Saitonu i le Aso Faamasino, nai lo o outou.+ 23 O oe foʻi Kapanaumi,+ pe e faaeaina ea oe e oo i le lagi? E te alu ifo i le Tuugamau;*+ auā ana faia i Sotoma galuega mamana ia na faia iā te oe, semanū ua tumau lea aai e oo mai i le asō. 24 Ae ou te fai atu iā te outou, e māmā atu le faasalaga o Sotoma i le Aso Faamasino, nai lo o outou.”+

25 Ona fetalai atu lea o Iesu: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e natia nei mea mai i tagata popoto ma ē e atamamai, ae faaalia i tamaiti.+ 26 Ioe, loʻu Tamā e, auā o le mea lea e te finagalo malie i ai. 27 Ua tuuina mai e loʻu Tamā mea uma iā te aʻu,+ ma e leai se tasi e iloa lelei le Atalii, ua na o le Tamā.+ E leai foʻi se tasi e iloa lelei le Tamā, ua na o le Atalii ma sē ua loto le Atalii e faaali i ai.+ 28 Ia ō mai iā te aʻu o outou uma ua tigāina ma mafatia i avega, ona ou faafouina lea o outou. 29 Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo,+ ona faafouina ai lea o outou. 30 Auā e avegofie laʻu amo, ma e māmā foʻi laʻu avega.”

12 I lenā taimi, ua ui atu ai Iesu i le togāsaito i le Sapati. Ua fia aai ona soo, ona latou tau mai lea o fuifui saito ma aai ai.+ 2 Ina ua iloa e le ʻau Faresaio lenei mea, ona latou fai mai lea iā te ia: “Vaai! Ua faia e ou soo le mea e sā i le Sapati.”+ 3 Ua ia fetalai atu iā i latou: “E tou te leʻi faitau ea i le mea na faia e Tavita ma tagata na iā te ia ina ua fia aai?+ 4 Pe e leʻi ulu atu ea o ia i le fale o le Atua, ma latou aai i falaoa e laulauina i luma o le Atua,+ o se mea e sā i le tulafono ona ʻai ai o ia, po o i latou o loo faatasi ma ia, seʻi vaganā ai ositaulaga?+ 5 Pe e tou te leʻi faitau ea foʻi i le Tulafono, e galulue ositaulaga i le malumalu i aso Sapati, ae e leʻi taʻusalaina ai i latou?+ 6 Ae ou te fai atu iā te outou, o loo iai i inei se tasi e sili atu i lo le malumalu.+ 7 Ae pe ana outou malamalama i le uiga o lenei faaupuga, ‘Ou te loto i le alofa mutimutivale+ ae lē o le taulaga,’+ semanū e tou te lē taʻusalaina tagata e lē sala. 8 Auā o le Alii o le Sapati, o le Atalii lea o le tagata.”+

9 Ua tuua e ia lea mea, ona ulu atu ai lea i lo latou sunako, 10 faauta! ua iai se tamāloa ua pē lona lima.+ Ona latou fesili mai lea iā te ia, “Pe e taga i le tulafono ona faamālōlō i le Sapati?” ina ia latou maua ai se mea e molia ai o ia.+ 11 Ona ia fetalai atu lea iā i latou: “Pe afai e iai sa outou mamoe e tasi, ma ua paʻū lenā mamoe i le lua i le aso Sapati, pe e iai se isi o outou e lē alu atu ma ave aʻe i luga?+ 12 E sili atu la ona tāua le tagata i lo o le mamoe! O lea, e taga i le tulafono ona fai le mea lelei i le Sapati.” 13 Ona ia fetalai atu lea i le tamāloa: “Ia faaloaloa mai lou lima.” Ona ia faaloaloa atu lea o lona lima, ma ua toe lelei e pei o le isi lima. 14 Ae ua ō le ʻau Faresaio ma taupulepule ina ia fasiotia o ia. 15 Ina ua silafia e Iesu lenei mea, ona alu ese loa lea o ia. E toʻatele foʻi ē ua mulimuli iā te ia+ ma ua ia faamālōlō iā i latou uma. 16 Ae ua ia matuā faatonuina i latou ia aua neʻi faailoa atu o ia i nisi,+ 17 ina ia taunuu ai le upu e ala mai i le perofeta o Isaia e faapea:

18 “Faauta! O laʻu auauna+ o lē na ou filifilia, o laʻu pele, o lē ua fiafia i ai loʻu loto!+ Ou te tuuina atu loʻu agaga i luga iā te ia,+ ma o le a ia faailoa atu i nuu ese le faamasinotonu. 19 E lē finau o ia+ pe alaga leotele, e lē lagona foʻi e se tasi lona leo i ala tetele. 20 O le a ia lē nutimomomoina se ū ua vaivai, ma o le a ia lē tineia foʻi le vavae ua mū itiiti,+ seʻia aumaia e ia le faamasinotonu. 21 E moni, e faamoemoe nuu uma i lona suafa.”+

22 Ona latou aumaia lea iā te ia o le tagata tauaso toe gūgū ua uluitinoina e le temoni, ma ua ia faamālōlō iā te ia, ona mafai ai lea e le tagata sa gūgū ona toe tautala ma vaai. 23 Ona taufaiofo ai lea o le motu o tagata ma faapea ane: “Pe lē o le Atalii ea lenei o Tavita?” 24 Ina ua faalogo le ʻau Faresaio i lenei mea, ona faapea ane lea: “O Pelesepulo* le pule o temoni, ua mafai ai ona tutuli e lenei tagata o temoni.”+ 25 Ua ia silafia o latou manatu, ona fetalai atu lea iā i latou: “E faaumatia malo uma e fevaevaeaʻi, ma e lē tumau foʻi aai uma po o aiga e fevaevaeaʻi. 26 E faapea foʻi Satani, afai e tulia e ia o ia lava, ua fevaevaeaʻi la o ia; e faapefea la ona tumau lona malo? 27 E lē gata i lea, afai o Pelesepulo ua ou tulia ai temoni, o ai la ua tulia ai e o outou atalii temoni? O le mea lea e fai ai i latou ma faamasino iā te outou. 28 Ae pe afai ou te tulia temoni ona o le agaga o le Atua, ua oo moni mai lava la le Malo o le Atua iā te outou.+ 29 E faapefea ona osofaʻia e se tasi le fale o se tagata malosi ma ave ana meatotino? Seʻiloga e fusifusia muamua le tagata malosi, ona faatoʻā mafai ai lea ona ave ana mea uma mai i lona fale. 30 O sē e lē ʻau ma aʻu, e tetee o ia iā te aʻu. O sē e lē faapotopoto faatasi ma aʻu, e faataapeapeina o ia.+

31 “O le mea lea ou te fai atu ai iā te outou, o agasala eseese uma ma upuleaga ua faia e tagata, e faamagaloina ia, a o lē e upuleaga i le agaga, e lē faamagaloina lava.+ 32 O se faaaʻoaʻoga, o so o se tagata e tautala taufaaleaga i le Atalii o le tagata, e faamagaloina o ia,+ a o sē e tautala taufaaleaga i le agaga paia, e lē faamagaloina o ia i lenei faiga o mea* ma le lumanaʻi.+

33 “Afai e tou te tausia le laau, o le a fua mai ai ni fua lelei, ae pe afai e tou te lē tausia le laau, o le a pala la ona fua, auā e iloa le laau i ona fua.+ 34 O outou o fanau a gata feʻai,+ e faapefea ona outou tautatala i mea lelei a o outou o tagata leaga? Auā o le tele o mea i le loto e tautala mai ai le gutu.+ 35 E aumaia e le tagata lelei mea lelei mai i ana oloa lelei, ae e aumaia e le tagata leaga mea leaga mai i ana oloa leaga.+ 36 Ou te fai atu iā te outou, o le a tali atu tagata+ i le Aso Faamasino e tusa ai ma upu lē aogā uma e latou te tautatala ai. 37 Auā o au upu e taʻuamiotonuina ai oe, o au upu foʻi e taʻusalaina ai oe.”

38 Ona tali mai lea o nisi o le ʻautusiupu ma le ʻau Faresaio iā te ia: “Le Aʻoaʻo e, e matou te fia vāai i se faailoga mai iā te oe.”+ 39 Ona tali atu lea o ia iā i latou: “Ua saʻili mai pea le tupulaga leaga ma le mulilulua* mo se faailoga, ae e leai se faailoga e avatua iā i latou, e na o le faailoga o Iona le perofeta.+ 40 Auā e pei ona iai Iona i le manava o le iʻa telē i ao e tolu ma pō e tolu,+ e faapena foʻi ona iai o le Atalii o le tagata i lalo i le eleele i ao e tolu ma pō e tolu.+ 41 Auā e tutū mai tagata o Nineva faatasi ma lenei tupulaga i le faamasinoga, ma e taʻusalaina ai lenei tupulaga, auā na salamō tagata Nineva i le talaʻiga a Iona.+ Ae faauta! o loo i inei se tasi e sili atu iā Iona.+ 42 E faatūina le tupu tamaʻitaʻi o le itu i saute faatasi ma lenei tupulaga i le faamasinoga, ma e na te taʻusalaina i latou, auā na sau o ia mai tuluʻiga o le lalolagi e faalogo i le atamai o Solomona.+ Ae faauta! o loo i inei se tasi e sili atu iā Solomona.+

43 “Pe a alu i fafo se agaga leaga mai i se tagata, e alu atu o ia i nuu naumati e saʻili se mea e mālōlō ai, ae e lē maua se mea.+ 44 Ona faapea ifo lea o ia, ‘O le a ou toe alu i loʻu fale na ou iai,’ ma ina ua taunuu atu, ua ia iloa ai ua gaogao le fale ma ua uma ona salu mamā ma teuteu. 45 Ona alu ai lea o ia ma aumai isi agaga leaga eseese e toʻafitu e sili atu ona leaga nai lo o ia. Ina ua ulu atu i totonu, ona latou nonofo ai lea, ma ua sili atu ona leaga le iʻuga o lea tagata nai lo o le amataga.+ E faapena foʻi lenei tupulaga leaga.”

46 A o tautala atu o ia i le motu o tagata, ua tutū mai i fafo lona tinā ma ona uso+ e fia talanoa iā te ia.+ 47 Ona fai mai lea o se tasi iā te ia: “Vaai! O loo tutū mai i fafo lou tinā ma ou uso, e fia talanoa iā te oe.” 48 Ona tali atu lea o ia i lē na fai mai iā te ia: “O ai ea loʻu tinā, ma o ai foʻi oʻu uso?” 49 Ona faaloaloa atu lea o lona aao i ona soo ma faapea atu: “Faauta! O loʻu tinā ma oʻu uso ia!+ 50 Auā o lē e faia le finagalo o loʻu Tamā o i le lagi, o ia lenā o loʻu uso, o loʻu tuafafine, ma o loʻu tinā.”+

13 I lenā aso, ua tuua e Iesu le fale ma ua nofo i tafatafa o le sami. 2 Ua faapotopoto mai le motu o tagata e toʻatele iā te ia, ona ia alu aʻe lea i le vaa ma nofo i lalo, ae ua laulaututū uma mai tagata i le matafaga.+ 3 Ua ia faamatala atu iā i latou le tele o mea e ala i talafaatusa,+ ua faapea atu: “Faauta! Na alu atu se tagata lūlū fatu ina ia lūlū ni fatu;+ 4 ma a o ia lūlū, na paʻuʻū ai nisi fatu i tafatafa o le auala, ona ō mai lea o manufelelei ma ʻai.+ 5 Na paʻuʻū nisi fatu i le mea papa e laʻitiiti le eleele, ona tutupu vave ai lea, auā e lē lava le eleele.+ 6 Ina ua oso aʻe le lā, ua velasia ma magumagu ai ona e leʻi mauaa. 7 Ae ua paʻuʻū isi fatu i le vao tuitui, ma ina ua tutupu aʻe le vao tuitui, ona fetina‘iina ai lea.+ 8 Ua paʻuʻū foʻi isi i le eleele lelei, ona fua mai ai lea e taʻi 100 le tasi, e taʻi 60 le isi, ae taʻi 30 le isi.+ 9 O lē ua iai taliga, inā faalogo mai ia o ia.”+

10 Ona ō mai ai lea o ona soo iā te ia, ua faapea mai: “Aiseā ua e fetalai atu ai iā i latou i talafaatusa?”+ 11 Ua tali atu o ia: “Ua tuuina atu iā te outou ina ia outou malamalama i mea lilo paia+ o le Malo i le lagi, ae ua lē tuuina atu iā i latou. 12 Auā o sē ua iai mea, e foaʻiina atu nisi mea iā te ia ina ia atili ai ona tele ana mea, a o sē ua leai se mea, e aveesea le mea ua iā te ia.+ 13 O le pogai lea ua ou tautala atu ai iā i latou i talafaatusa; auā ua latou vāai ma faalogo fua, ae latou te lē malamalama i uiga o na mea.+ 14 Ua taunuu ai iā i latou le valoaga a Isaia e faapea, ‘Tou te faalogo ae lē malamalama, ma e tou te vāai ae lē iloa.+ 15 Auā ua maaa loto o nei tagata, ua faalogo o latou taliga ae e lē tali mai, ma ua moeiini o latou mata, ina neʻi vāai o latou mata, ma faalogo o latou taliga, ma malamalama o latou loto ma liliu mai, ma ou faamālōlōina ai i latou.’+

16 “Peitaʻi, e fiafia outou auā ua vāai o outou mata ma faalogo o outou taliga.+ 17 E moni ou te fai atu iā te outou, e toʻatele perofeta ma tagata amiotonu na naunau e fia vāai i mea ua outou vāai i ai, ae latou te leʻi vāai i ai.+ Na fia faalogo foʻi i mea ua outou faalogo i ai, ae latou te leʻi faalogo i ai.

18 “O lea, inā faalogo mai ia i le talafaatusa i le tagata lūlū+ saito. 19 O le fatu na lūlūina i tafatafa o le auala, o ia lea ua faalogo i le upu o le Malo ae lē malamalama, ona sau ai lea o lē ua leaga+ ma fao ese le mea na lūlūina i lona loto.+ 20 A o le fatu na lūlūina i le mea papa, o ia lea ua faalogo i le upu ma talia loa ma le olioli.+ 21 Ua faaauau mo sina taimi ae e leʻi mauaa le upu iā te ia, ma ina ua oo mai puapuaga ma sauāga ona o le upu, ona tautevateva ai lea o ia. 22 O le fatu na lūlūina i le vao tuitui, o ia lea ua faalogo i le upu, ae ona o popolega o lenei faiga o mea*+ ma le malosi taufaasesē o le ʻoa, ua fetina‘iina ai le upu ma ua lē fua mai ai.+ 23 A o le fatu na lūlū i le eleele lelei, o ia lea ua faalogo i le upu ma malamalama i ai ma ua fua mai ai, e taʻi 100 le tasi, e taʻi 60 le isi, ae e taʻi 30 le isi.”+

24 Ua ia faamatala atu se isi talafaatusa iā i latou e faapea: “Ua faatusaina le Malo i le lagi i le tagata na lūlū le fatu lelei i lona fanua. 25 A o momoe tagata, ona alu ane ai lea o lona fili ma lūlū vao leaga i le saito, ona alu ese ai lea o ia. 26 Ina ua tupu ma fua mai le saito, ona tupu mai ai foʻi lea ma le vao leaga. 27 O lea ua ō mai ai pologa a le matai o le aiga ma faapea mai iā te ia, ‘Le alii e, e te leʻi lūlūina ea le fatu lelei i lou fanua? Ae ua faapefea ona tutupu mai ai vao leaga?’ 28 Ua faapea atu o ia iā i latou, ‘Na faia lenei mea e se tagata, o ia o se fili.’+ Ua fai mai pologa iā te ia, ‘E te manaʻo matou te ō e vele ese?’ 29 Ae ua fai atu o ia, ‘E leai, ina neʻi outou liaʻiese ai ma le saito, a o vele ese le vao leaga. 30 Tuu ai pea e tutupu faatasi seʻia oo i le seleselega, ma pe a oo i le tau e selesele ai, ona ou fai atu lea i ē selesele: Ia vele ese muamua le vao leaga e fusifusi ma susunu i le afi; ona ao mai ai lea o le saito ma tuu i loʻu fale saito.’”+

31 Ua ia faamatala atu iā i latou le isi talafaatusa e faapea: “Ua faatusaina le Malo o le lagi i se fatu o le sinapi, na ave e se tagata ma totō i lona fanua.+ 32 O lenei fatu, e sili ona itiiti i lo o fatu uma, ae a tupu, e sili atu ona telē i lo o isi fualaau faisua ma avea ma laau, e ofaga i ai manufelelei o le lagi i ona lālā.”

33 Ua ia faamatala atu foʻi se isi talafaatusa iā i latou e faapea: “Ua faatusaina le Malo o le lagi i se mea faafefete, na ave e se fafine ma palu faatasi ma fua tetele se tolu o le falaoamata,* seʻia oo ina fefete ai le paluga atoa.”+

34 Ua fetalai atu Iesu i le motu o tagata i nei mea uma e ala i talafaatusa. O le mea moni, e fetalai atu o ia iā i latou i taimi uma i talafaatusa,+ 35 ina ia taunuu ai le upu na ala mai i le perofeta o lē na faapea mai: “Ou te tautala atu i talafaatusa, ou te faailoa atu mea sa natia talu mai le amataga.”*+

36 Ua tuuina atu e ia le motu o tagata e ō, ona alu ai lea o ia i totonu o le fale. Ua ō mai ona soo iā te ia ma faapea mai: “Seʻi e faamatala mai iā i matou le uiga o le talafaatusa i vao leaga i le fanua.” 37 Ua tali atu o ia e faapea: “O lē na lūlūina le fatu lelei, o le Atalii lea o le tagata; 38 o le fanua, o le lalolagi lea;+ o le fatu lelei, o atalii ia o le Malo; a o vao leaga, o atalii ia o lē o loo leaga;+ 39 ma o le fili na lūlūina vao leaga, o le Tiapolo lea. O le seleselega, o le taufaaiʻuiʻuga lea o le faiga o mea a le lalolagi,* ma o ē e selesele, o agelu ia. 40 O lea la, e pei ona vele ese vao leaga ma susunu i le afi, e faapena foʻi pe a oo mai le taufaaiʻuiʻuga o le faiga o mea a le lalolagi.*+ 41 E aauina atu e le Atalii o le tagata ana agelu, ma e latou te ao ese mai i lona Malo, o mea uma e māfua ai ona tausuai, ma tagata e solitulafono, 42 ma lafo i le ogaumu aasa.+ O i inā e latou te tagiauē ai ma lilivau o latou nifo. 43 I lenā taimi, e susulu atu ai ē e amiotonu e pei o le malamalama o le lā,+ i le Malo o lo latou Tamā. O lē ua iai taliga, inā faalogo mai ia o ia.

44 “Ua faatusaina le Malo o le lagi i se oloa, lea o loo natia i le fanua, na maua e se tagata ma nanā ai; ma ona o lona olioli, na alu ai loa ma faatau atu ana mea uma, ae faatau mai ai lenā fanua.+

45 “Ua faatusaina foʻi le Malo o le lagi i se tagata faatauʻoa o loo faimalaga e saʻili penina lelei. 46 Ina ua ia maua se penina tautele, ona alu loa lea ma faatau atu ana mea uma na iai, ae faatau mai ai le penina.+

47 “Ua faatusaina foʻi le Malo o le lagi i se upega ua lafo i le sami ma maua mai ai ituaiga iʻa eseese. 48 Ina ua tumu, ona latou sisi aʻe lea ma toso atu i le matafaga, ua nonofo i lalo ma latou tuu ese iʻa lelei+ i ato, ae lafoaʻi iʻa leaga.+ 49 E faapena foʻi le taufaaiʻuiʻuga o le faiga o mea a le lalolagi.* E ō atu agelu ma tuueseese tagata amioleaga mai i tagata amiotonu, 50 ma lafo i latou i le ogaumu aasa. O i inā e latou te tagiauē ai ma lilivau o latou nifo.

51 “Po ua outou malamalama ea i nei mea uma?” Ua latou faapea mai iā te ia: “Ioe.” 52 Ua ia fetalai atu iā i latou: “Afai o lea, o faiaʻoga uma ua aʻoaʻoina e faatatau i le Malo o le lagi, ua pei o se matai o le aiga o lē na te aumaia mea fou ma mea tuai mai i lona fale teuoloa.”

53 Ina ua uma ona faamatala atu e Iesu nei talafaatusa, ona agaʻi atu lea o ia i le isi nuu. 54 Ua oo atu o ia i lona nuu,+ ona ia aʻoaʻo atu lea iā i latou i lo latou sunako, ma ua taufaiofo i latou ma faapea ane: “O fea na maua mai ai e lenei tagata lenei atamai ma nei galuega mamana?+ 55 Pe e lē o le atalii ea lenei o le kamuta?+ Pe e lē o lona tinā ea Maria, ma o ona uso o Iakopo, Iosefa, Simona, ma Iuta?+ 56 Pe e tatou te lē o faatasi ea foʻi ma ona tuafāfine uma? O fea la na ia maua mai ai nei mea?”+ 57 Ona amata lea ona latou tausuai ona o ia.+ Ae ua fetalai atu Iesu iā i latou: “E lē mamalu se perofeta i lona lava nuu ma lona lava aiga.”+ 58 E lē tele ni galuega mamana na ia faia i inā, ona o lo latou lē faatuatua.

14 I lenā taimi, ua faalogo ai Herota le pule o le itumalo i le tala e uiga iā Iesu,+ 2 ona ia faapea atu lea i ana auauna: “O Ioane le Papatiso lenei. Ua toe faatūina o ia mai le oti, ma o le mea lea ua mafai ai ona ia faatinoina nei galuega mamana.”+ 3 Na puʻeina e Herota* Ioane ma saisai iā te ia, ma tuu i le falepuipui ona o Herotia le avā a lona uso o Filipo.+ 4 Auā na fai atu Ioane iā te ia: “E sā i le tulafono ona fai o ia ma au avā.”+ 5 Peitaʻi, e ui na manaʻo o ia e fasiotia Ioane, ae na fefe o ia i le motu o tagata, auā na latou manatu o Ioane o se perofeta.+ 6 Ae ina ua faamanatuina le aso fanau o Herota,+ na siva ai le tama teine a Herotia ma na matuā faafiafiaina ai Herota.+ 7 O lea, na tautō ai Herota ma folafola atu e na te avatua iā te ia so o se mea lava e talosaga mai ai. 8 Ona faaoso ai lea o ia e lona tinā e fai atu: “Ia aumai iā te aʻu i inei le ulu o Ioane le Papatiso i se ipu.”+ 9 Na tigā le loto o le tupu, ae ona o lona manatu i ana tautoga ma ē na aai* faatasi ma ia, na ia poloaʻi atu ai ina ia avatu iā te ia. 10 Ona ia auina atu lea o se tasi i le falepuipui, ina ia vavaeese le ulu o Ioane. 11 Ona aumai ai lea o lona ulu i se ipu ma avatu i le teine, ona avatu ai lea e ia i lona tinā. 12 Mulimuli ane, ua ō atu ona soo ma aveese lona tino oti ma tanu iā te ia, ona ō atu lea ma taʻu atu iā Iesu. 13 Ina ua faafofoga Iesu i lenei mea, ona tuumuli ai lea o ia i le vaa ina ia iai na o ia i se mea tuufua. Ae ina ua faalogo i ai le motu o tagata, ona latou savavali lea e mulimuli atu iā te ia mai i aai.+

14 Ina ua alu ese o ia mai i le vaa, ona ia silafia ai lea o le motu o tagata e toʻatele ma ua tigā alofa o ia iā i latou,+ ona ia faamālōlō ai lea o o latou tagata mamaʻi.+ 15 Ua oo i le afiafi, ona ō mai ai lea o ona soo iā te ia ma faapea mai: “O le nofoaga tuufua lenei ma ua leva foʻi le aso; ia tuu atu tagata e ō i le aai e faatau mai ni a latou meaʻai.”+ 16 Ae ua fetalai atu Iesu iā i latou: “E lē tatau ona latou ō, ae ia outou avatu ni meaʻai ma i latou.” 17 Ua latou fai mai iā te ia: “E leai ni a tatou meaʻai i inei, ae ua na o falaoa e lima ma iʻa e lua.” 18 Ua ia fetalai atu: “Ia aumai iā te aʻu na mea.” 19 Ona ia faatonuina lea o le motu o tagata ia taooto i le mutia. Ua tago o ia i falaoa e lima ma iʻa e lua, ma tepa aʻe i le lagi, ua faafetai,+ ona ia vaevae lea o falaoa ma tufatufa atu i le ʻausoo, ona avatu lea e le ʻausoo i le motu o tagata. 20 Ona latou aai ai lea ma ua maoona, ua faaputu foʻi i mea ua totoe, ua tutumu ai ato e 12.+ 21 O i latou na aai e tusa ma le toʻa 5,000 tane, ae e leʻi faitauina ai fafine ma tamaiti.+ 22 Ona ia fai atu loa lea i ona soo e ō atu i le vaa ma muamua atu iā te ia i le isi itu, ae ua ia tuuina atu le motu o tagata e ō.+

23 Ina ua uma ona ia tuuina atu le motu o tagata e ō, ona alu aʻe lea na o ia i le mauga e tatalo.+ E oo ane i le afiafi, e na o ia o loo iai i inā. 24 O le taimi lea ua mamao ese le vaa* mai le laueleele, ua felafoa‘iina e peau auā ua agi malosi mai le matagi. 25 Ona alu atu lea o ia iā i latou i le leoleoga lona fā o le pō,* ua savali i luga o le sami. 26 Ua latou iloa atu o ia ua savali i luga o le sami, ona fememeaʻi ai lea o le ʻausoo ma faapea ane: “E uigaese lenei mea!” Ona latou alalaga lea ona o le fefefe. 27 Ona fetalai atu loa lea o Iesu iā i latou: “O aʻu lenei, ia outou lototetele ma aua tou te fefefe.”+ 28 Ona tali mai lea o Peteru iā te ia: “Le Alii e, afai o oe, ia e fai mai iā te aʻu ou te alu atu iā te oe i luga o le vai.” 29 Ua ia fetalai atu: “Inā sau ia!” Ona oso ese ai lea o Peteru mai i le vaa ma savali atu iā Iesu i luga o le vai. 30 Peitaʻi, ina ua vaai atu i le matagi malosi, ona fefe ai lea o ia ma amata ai ona magoto ifo. Ua ia alaga atu: “Le Alii e, ta fia ola!” 31 Ona faaloaloa atu loa lea e Iesu o lona aao, ua taofi iā te ia ma faapea atu: “O oe lenā o lē e faatuatua itiiti, aiseā ua e masalosalo ai?”+ 32 Ua la ō atu i le vaa, ona malū ai lea o le matagi malosi. 33 Ona ifo ai lea o i latou o i le vaa iā te ia ma faapea mai: “E moni o oe lava o le Alo o le Atua.” 34 Ua latou agaʻi atu i le isi itu ma taula ai le vaa i Kenesareta.+

35 Ua iloa mai o ia e tagata o lenā nuu, ona latou auina atu lea o le feʻau i nuu tuaoi uma, ma ua aumai ai e tagata iā te ia o ē ua mamaʻi. 36 Ua latou augani atu iā te ia ina ia tau lava ina latou papaʻi atu i le pito o lona ofu tele;+ ona toe malolosi ai lea o i latou uma na papaʻi atu i ai.

15 Ona ō mai lea iā Iesu o le ʻau Faresaio ma tusiupu mai Ierusalema,+ ma faapea mai: 2 “Aiseā ua solia ai e ou soo tū masani a tagata mai anamua? Auā ua lē fafano* o latou lima a o leʻi aai.”+

3 Ona tali atu lea o ia iā i latou: “Aiseā ua outou solia ai le poloaʻiga a le Atua i a outou tū masani?+ 4 Auā ua fetalai le Atua, ‘Ia e āva i lou tamā ma lou tinā,’+ ma ‘O lē e fai upuleaga i lona tamā ma lona tinā e fasiotia lava o ia.’+ 5 Ae ua outou fai mai, ‘O sē e faapea atu i lona tamā po o lona tinā: “O mea uma ua iā te aʻu na ono aogā iā te oe, ua uma ona ou tuuina atu o se meaalofa i le Atua,”+ 6 e lē manaʻomia la ona āva o ia i lona tamā.’ O lea, ua outou faalēaogā ai le afioga a le Atua i a outou tū masani.+ 7 O outou o tagata faafiaamiotonu, ua moni ai le valoaga a Isaia iā te outou e faapea:+ 8 ‘Ua faamamaluina aʻu e nei tagata i o latou laugutu, ae ua mamao ese lava o latou loto mai iā te aʻu. 9 E leai se aogā e latou te tapuaʻi mai ai iā te aʻu, auā ua faavae a latou aʻoaʻoga i poloa‘iga a tagata.’”+ 10 Ona ia valaau atu lea i le motu o tagata ma fetalai atu: “Inā faalogo ia ma ia malamalama:+ 11 E lē leaga se tagata i mea e ʻai ai, ae e faaleagaina o ia i mea e sau mai i lona fofoga.”+

12 Ona ō mai ai lea o le ʻausoo iā te ia ma faapea mai: “Pe e te silafia ua lē malilie le ʻau Faresaio i au fetalaiga?”+ 13 Ona ia tali atu lea: “O laau uma e leʻi totōina e loʻu Tamā o i le lagi, e liaʻieseina. 14 Tuu ai pea i latou. Auā o i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.”+ 15 Ona tali mai lea o Peteru: “Ia e faamalamalama mai le talafaatusa iā i matou.” 16 Ona ia fetalai atu lea: “Pe e tou te leʻi malamalama lava?+ 17 Pe e tou te lē iloa ea, o meaʻai uma e alu atu i le fofoga, e ui atu i le manava ma toe alu atu i fafo? 18 Peitaʻi, o mea e sau mai i le gutu e sau lea mai i le loto, ma o mea na e leaga ai le tagata.+ 19 Auā e sau mai i le loto o mafaufauga leaga:+ o le fasioti tagata, mulilua, amioga lē mamā taufeusuaʻiga,* gaoi, molimau pepelo, ma le upuleaga. 20 O mea na e leaga ai le tagata; ae e lē leaga se tagata pe a ʻai ae lē fafanoina* ona lima.”

21 Ua tuua e Iesu lea nofoaga, ae alu atu i le vaipanoa o Turo ma Saitonu.+ 22 Faauta! Ua sau se fafine Foinie mai i lenā vaipanoa ma alaga mai: “Le Alii e, le Alo o Tavita, ia e alofa mutimutivale mai iā te aʻu. Ua matuā temonia lava laʻu tama teine.”+ 23 Ae e leʻi tali atu o ia i le fafine. Ona ō mai lea o ona soo ma tauanau o ia e faapea: “Ia fai i ai e alu, auā ua fai o ia ma faalavelave iā i tatou.” 24 Ua tali atu o ia: “E leʻi auina mai aʻu i nisi, ae na o mamoe o le aiga o Isaraelu ua leiloloa.”+ 25 Ae ua sau le fafine, ua ifo ma faapea mai iā te ia: “Le Alii e, ia e fesoasoani mai iā te aʻu!” 26 Ua tali atu o ia: “E lē tatau ona lafo falaoa a tamaiti i tamaʻi taʻifau.” 27 Ua faapea mai le fafine: “E saʻo lava oe le Alii e, a o le mea moni, e ʻai e tamaʻi taʻifau fasi falaoa e paʻuʻū mai i laulau a o latou matai.”+ 28 Ona tali atu lea o Iesu iā te ia: “Tinā e, maʻeu le malosi o lou faatuatua; ia taunuu e pei ona e moomoo i ai.” Ona mālōlōina ai lea o lana tama teine i le taimi lava lenā.

29 Ua tuua e Iesu i inā, ma ui ane e latalata i le sami* o Kalilaia,+ ona alu aʻe lea o ia i le mauga ma nofo ai i lalo. 30 Ona ō mai lea o le motu o tagata e toʻatele iā te ia, ua aumai tagata pipili, mumutu, tauaso, gūgū ma isi lava maʻi eseese, ma tuu atu i latou i ona vae, ma ia faamālōlōina i latou.+ 31 Ona matuā ofo ai lea o le motu o tagata auā ua latou vāai ua tautatala ē na gūgū, ua toe malolosi ē na mumutu, ua savavali pipili, ua pupula foʻi tauaso, ma ua latou faamamaluina le Atua o Isaraelu.+

32 Ua valaau atu Iesu i ona soo ma faapea atu: “Ua ou alofa tele i le motu o tagata,+ ona ua tolu aso talu ona latou faatasi ma aʻu, ae e leai ni a latou meaʻai. Ou te lē manaʻo e tuu atu i latou e ō ae e leʻi aai, ina neʻi matapogia i latou i le auala.”+ 33 Ae ua fai mai le ʻausoo iā te ia: “O fea e tatou te maua mai ai ni falaoa e tele i lenei nofoaga tuufua, e maoona ai lenei motu o tagata e toʻatele?”+ 34 Ona fetalai atu lea o Iesu iā i latou: “E fia ni falaoa o iā te outou?” Ua latou tali mai: “E fitu, ma nai tamaʻi iʻa.” 35 Ina ua uma ona faatonuina le motu o tagata e taooto i lalo, 36 ona tago ai lea o ia i falaoa e fitu ma iʻa, ua fai le faafetai, ona ia vaevae lea ma tuu atu i le ʻausoo, ona tufatufa atu lea e le ʻausoo i le motu o tagata.+ 37 Ua aai i latou uma ma ua maoona, ona latou faaputu lea o meaʻai ua totoe, ma ua tutumu ai ato tetele e fitu.+ 38 E toʻa 4,000 tane na aai ai, ae e leʻi faitauina ai fafine ma tamaiti. 39 Ina ua uma, ona ia tuuina atu lea o le motu o tagata e ō, ona alu atu lea o ia i le vaa ma agaʻi atu i le vaipanoa o Makatala.+

16 Ua faalatalata mai le ʻau Faresaio ma le ʻau Satukaio e tofotofo iā te ia, ma fai mai ia faaali atu iā i latou se faailoga mai i le lagi.+ 2 Ona ia tali atu lea iā i latou: “A oo i le afiafi, e masani ona outou faapea mai, ‘E lelei le tau auā ua mūmū mai le lagi,’ 3 ma i le taeao, ‘E matagi ma timuga le asō, auā ua mūmū ma auaoa mai le lagi.’ Ua outou iloa ona faamatala foliga o le lagi, ae e tou te lē malamalama i le uiga o mea o loo tutupu. 4 Ua saʻili mai pea le tupulaga leaga ma le mulilulua* mo se faailoga, ae e leai se faailoga e avatua iā i latou,+ e na o le faailoga o Iona.”+ Ona alu ese ai lea o ia ae tuua i latou.

5 Ua ō atu le ʻausoo i le isi itu ae ua galo ona ave ni falaoa.+ 6 Ua fetalai atu Iesu iā i latou: “Ia outou mataala ma faaeteete i le mea faafefete a le ʻau Faresaio ma le ʻau Satukaio.”+ 7 Ona latou talatalanoa lea e faapea: “Tatou te leʻi aumaia ni falaoa.” 8 Ae ua silafia e Iesu lenei mea, ona ia fetalai atu lea: “O outou o ē e faatuatua itiiti, aiseā ua outou talatalanoa ai ma faapea ane e leai ni falaoa? 9 Pe tou te leʻi maua lava le manatu? Pe tou te leʻi manatua ea falaoa e lima ia na fafaga ai le toʻa 5,000, ma le tele o ato na tutumu ai?+ 10 Po o falaoa foʻi e fitu ia na fafaga ai tagata e toʻa 4,000, ma le tele o ato tetele na tutumu ai?+ 11 E faapefea la ona outou lē malamalama ou te leʻi tautala atu iā te outou e uiga i ni falaoa? Ae ia outou faaeteete i le mea faafefete a le ʻau Faresaio ma le ʻau Satukaio.”+ 12 Ona latou malamalama ai lea na fetalai o ia, ia latou faaeteete i aʻoaʻoga a le ʻau Faresaio ma le ʻau Satukaio, ae lē o mea e faafefete ai falaoa.

13 Ua alu atu Iesu i le vaipanoa o Kaisareia Filipo, ona fesili atu lea i ona soo: “O le ā se tala a tagata, o ai le Atalii o le tagata?”+ 14 Ua latou faapea mai: “Ua fai mai nisi o Ioane le Papatiso,+ a o isi o Elia,+ ae ua faapea mai isi o Ieremia, po o se tasi o le ʻauperofeta.” 15 Ona ia fetalai atu lea iā i latou: “A o outou, o le ā sa outou tala, o ai aʻu?” 16 Ona tali mai lea o Simona Peteru: “O oe o le Keriso,+ o le Alo o le Atua soifua.”+ 17 Ua faapea atu Iesu: “Ia fiafia oe Simona le atalii o Iona, auā e lē o se tagata na faaalia atu iā te oe, a o loʻu Tamā o i le lagi.+ 18 Ou te fai atu foʻi iā te oe: O Peteru oe,+ ma ou te atiaʻe laʻu faapotopotoga i luga o lenei papa,+ e lē mafai ona manumalo ai faitotoʻa o le Tuugamau.* 19 Ou te tuuina atu iā te oe ki o le Malo o le lagi, ma o le mea e te fusifusia i le lalolagi ua uma ona fusifusia i le lagi, o le mea foʻi ua e tatalaina i le lalolagi ua uma ona tatalaina i le lagi.” 20 Ona ia matuā faatonuina lea o le ʻausoo, ina ia aua neʻi taʻuina atu i se tasi e faapea o ia o le Keriso.+

21 E mai lenā taimi, ua faamatala atu ai e Iesu i ona soo e faapea, e tatau ona alu o ia i Ierusalema ma e faapuapuagatia ai i mea e tele e toeaina, o le ʻaufaitaulaga sili, ma le ʻautusiupu. E fasiotia o ia ma toe faatūina i le aso lona tolu.+ 22 Ona taʻitaʻi ese lea o ia e Peteru ma vavao iā te ia, ma faapea atu: “Le Alii e, ia e alofa iā te oe lava, e lē tutupu na mea iā te oe.”+ 23 Ae ua liliu lona tua iā Peteru ma faapea atu: “Satani e, inā alu ese ia oe! Ua fai oe ma mea ou te tautevateva ai, auā e lē o manatu o le Atua ua e manatu ai, a o manatu o tagata.”+

24 Ona fetalai atu lea o Iesu i ona soo: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai* o ia, ma mulimuli mai pea iā te aʻu.+ 25 Auā o lē e fia faasaoina lona ola, e maʻimau ia, a o lē e faamaʻimau lona ola ona o aʻu, e faasaoina lea.+ 26 Auā o le ā le aogā i le tagata, pe afai e na te maua le lalolagi uma ae maʻimau ai lona ola?+ O le ā foʻi se mea e avatu e se tagata e sui aʻi lona ola?+ 27 Auā e afio mai le Atalii o le tagata i le mamalu o lona Tamā faatasi ma ana agelu, ma e na te tauia tagata taʻitoʻatasi e tusa ma lana amio.+ 28 E moni ou te fai atu iā te outou, e iai nisi o loo tutū mai i inei e lē oo i ai le oti, seʻiloga ua latou vāai muamua i le Atalii o le tagata ua sau i lona Malo.”+

17 Ua mavae aso e ono, ona ave lea e Iesu o Peteru, Iakopo, ma lona uso o Ioane, ma ō atu i se mauga maualuga na o i latou.+ 2 Ona liua lea o ia i o latou luma, ma ua pupula ona fofoga e pei o le lā, ua susulu* foʻi lona ofu tele e pei o le malamalama.+ 3 Faauta! ua faaali mai foʻi Mose ma Elia iā i latou, ma o loo talanoa ma ia. 4 Ona fai mai lea o Peteru iā Iesu: “Le Alii e, ua lelei ona ua matou iai i inei. Afai e te finagalo i ai, ou te faatūina i inei ni faleʻie se tolu, o le tasi mo oe, o le tasi mo Mose, ma le isi mo Elia.” 5 A o tautala o ia, faauta! ua ufitia i latou i se ao pupula, faauta foʻi! ua faapea mai se siʻufofoga mai i le ao: “O loʻu Atalii pele lenā, o lē ua malie i ai loʻu loto.+ Ia faalogo iā te ia.”+ 6 Ina ua faalogo le ʻausoo i le siʻufofoga, ona latou faapaʻuʻū faō ai lea ona ua matuā fefefe lava. 7 Ona sōsō atu lea o Iesu, ua paʻi atu iā i latou ma faapea atu: “Tutū ia i luga ma aua tou te fefefe.” 8 Ua tetepa aʻe, ua latou iloa ai ua leai se isi ae e na o Iesu. 9 A o latou ō ifo mai le mauga, ua faatonu i latou e Iesu: “Aua neʻi taʻua atu lenei faaaliga i se tasi, seʻiloga ua toe faatūina le Atalii o le tagata mai le oti.”+

10 Ae ua fesili mai le ʻausoo iā te ia: “Aiseā la ua fai mai ai le ʻautusiupu e tatau ona sau muamua Elia?”+ 11 Ua tali atu o ia: “O loo sau lava Elia ma o le a toe faafoʻisia mea uma.+ 12 Peitaʻi, ou te fai atu iā te outou, ua uma ona sau Elia ae latou te leʻi amanaʻia o ia, ma na latou faia iā te ia mea uma na latou loto i ai.+ O le a faapea foʻi ona latou faapuapuagatia le Atalii o le tagata.”+ 13 Ona malamalama ai lea o le ʻausoo, ua ia fetalai atu iā i latou e uiga iā Ioane le Papatiso.

14 Ua latou agaʻi mai i le motu o tagata,+ ona faalatalata mai lea o se tamāloa iā te ia, ua tootuli i ona luma ma faapea mai: 15 “Le Alii e, ia e alofa mutimutivale i loʻu atalii, auā ua maua o ia i le maʻi māliu ma ua tigāina lava. E masani ona paʻū o ia i le afi ma le vai.+ 16 Na ou aumaia o ia i ou soo, ae ua lē mafai ona latou faamālōlōina o ia.” 17 Ua tali atu Iesu: “Le tupulaga e, lē faatuatua ma le faapiʻopiʻo,+ o le ā le umi ou te feagai ai pea ma outou? O le ā le umi ou te faapalepale ai iā te outou? Ia aumai o ia iā te aʻu.” 18 Ona vavao lea e Iesu o le temoni, ua alu i fafo mai iā te ia, ona malosi ai loa lea o le tama.+ 19 Ona ō mai lea o le ʻausoo iā Iesu, ua na o i latou ma faapea mai: “Aiseā na lē mafai ai ona matou tulia le temoni?” 20 Ua fetalai atu o ia iā i latou: “Ona o le itiiti o lo outou faatuatua. Auā e moni ou te fai atu iā te outou, afai e pei lo outou faatuatua o le fatu o le sinapi, tou te fai atu i lenei mauga, ‘Ia siitia oe i o,’ ona siitia ai lea, ma e leai se mea tou te lē mafaia.”+ 21* ——

22 A o latou faapotopoto ma Iesu i Kalilaia, ua ia fetalai atu: “O le a faalataina ma tuuina atu le Atalii o le tagata i lima o tagata,+ 23 ma e latou te fasiotia o ia, ae e toe faatūina o ia i le aso lona tolu.”+ Ona matuā faanoanoa ai lea o i latou.

24 Ua latou taunuu i Kapanaumi, ona ō mai ai lea o ni tamāloloa e aoina lafoga o le malumalu* ma faapea mai iā Peteru: “Pe e totogi e lo outou aʻoaʻo ni lafoga o le malumalu?”+ 25 Ua ia faapea atu: “Ioe.” Ae ina ua ulu atu o ia i le fale, ua muamua ona faapea atu Iesu iā te ia: “O le ā sou manatu Simona? O ai e tatau ona totogia tupe ma lafoga i tupu o le lalolagi? Po o o latou atalii ea, po o tagata ese?” 26 Ona ia fai mai lea: “O tagata ese.” Ua faapea atu Iesu iā te ia: “O lona uiga la, e saʻoloto atalii mai le totogiina o lafoga. 27 Ae ina neʻi latou tausuai+ ona o i tatou, ia e alu ma lafo le mātau i le sami, ma o le iʻa muamua e te maua, ia e fafasi lona gutu, ona e maua ai lea o le tupe siliva.* Ia ave lenā tupe ma avatu iā i latou mo oe atoa ma aʻu.”

18 I lenā lava taimi, ua faalatalata mai ai le ʻausoo iā Iesu ma faapea mai: “O ai e sili i le Malo o le lagi?”+ 2 Ona ia valaau atu lea i se tamaitiiti ma ua faatū iā te ia i o latou luma 3 ma faapea atu: “E moni ou te fai atu iā te outou, a lē suia outou ma avea e pei o tamaiti,+ tou te lē ulu atu lava i le Malo o le lagi.+ 4 O lea, o sē e faamaulalo e pei o lenei tamaitiiti, e sili o ia i le Malo o le lagi;+ 5 ma o sē e na te talia se tamaitiiti faapenei ona o loʻu igoa, ua ia taliaina foʻi aʻu. 6 A o se tagata e na te faatausuai i se tasi o i latou nei e faatauvaa ua faatuatua iā te aʻu, e lelei pe a nonoa i lona ua se maa e olo ai saito e toso e asini, ma faamāgoto i le moana sausau.+

7 “Oi talofa i le lalolagi ona o mea e tausuai ai! O le mea moni, o le a oo mai lava mea e tausuai ai, ae e malaia le tagata na te aumaia na mea e tausuai ai! 8 O lenei, a e tausuai ona o lou lima po o lou vae, ia tipi ese ma lafoaʻi.+ Auā e sili ona lelei o lou maua o le ola a o e pipili ma mumutu vaega o lou tino, nai lo le lafoina o oe i le afi e faavavau+ ma ou lima ma vae e lua. 9 Afai foʻi e te tausuai ona o lou mata, ia sali ese ma lafoaʻi. Auā e sili ona lelei lou maua o le ola ma lou mata e tasi, nai lo le lafoina o oe ma ou mata e lua i le afi i Kena.*+ 10 Vaai lelei ia aua neʻi outou ʻinoʻino i se tasi o i latou nei e faatauvaa, auā ou te fai atu iā te outou o loo vaavaai atu pea a latou agelu i le lagi, i fofoga o loʻu Tamā o i le lagi.+ 11* ——

12 “O le ā so outou manatu? Afai e iai ni mamoe se 100 a se tagata ma ua sē le tasi,+ pe na te lē tuua ea le 99 i le mauga, ae alu atu e saʻili mai le tasi ua sē?+ 13 A oo ina maua, ou te fai atu iā te outou, e sili atu lona olioli ona o lea mamoe, nai lo o le isi 99 e leʻi sē. 14 E faapena foʻi loʻu* Tamā o i le lagi, e lē finagalo e faaumatia e oo lava i se tasi o i latou nei e faatauvaa.+

15 “E lē gata i lea, afai ua faia e sou uso se agasala, ia e alu lua te talanoa na o oulua+ ma faailoa i ai lana mea sesē.* A faalogo o ia, ua e maua la lou uso.+ 16 Ae afai e lē faalogo o ia, ia lua ō ma se toʻatasi po o se toʻalua, ina ia faamaonia ai mataupu uma i le molimau a le toʻalua po o le toʻatolu.+ 17 Afai e lē faalogo o ia i na tagata, ia talanoa atu i le faapotopotoga. Afai foʻi e oo lava i le faapotopotoga e lē faalogo i ai o ia, ona e vaai lea iā te ia e pei o se tagata o nuu ese+ ma o se aolafoga.+

18 “E moni ou te fai atu iā te outou, o mea uma tou te fusifusia i le lalolagi, ua uma ona fusifusia i le lagi. O mea uma foʻi tou te tatalaina i le lalolagi, ua uma ona tatalaina i le lagi. 19 Ou te fai atu foʻi iā te outou, afai e malilie faatasi se toʻalua o outou i le lalolagi, i se mea tāua la te talosaga atu ai, e faataunuuina lava e loʻu Tamā o i le lagi.+ 20 Auā o so o se mea e faapotopoto ai se toʻalua po o se toʻatolu ona o loʻu igoa,+ ou te iai faatasi ma i latou.”

21 Ona sau lea o Peteru ma faapea mai iā te ia: “Le Alii e, e faafia ona agasala mai loʻu uso iā te aʻu ma ou faamagalo atu iā te ia? Pe e faafitu ea?” 22 Ua fetalai atu Iesu iā te ia: “Ou te fai atu iā te oe, e lē faafitu, ae e faafitu sefulu fitu.+

23 “O le mea lea ua faatusaina ai le Malo o le lagi i se tupu, o lē na manaʻo e totogi mai e ana pologa a latou aitalafu. 24 A o faia lenā mea, na aumaia ai se tagata na nofo aitalafu iā te ia i taleni e 10,000.* 25 Ae ona e leai sana mea e toe totogi ai le aitalafu, na poloaʻi ai lona matai ina ia faatau atu o ia, o lana avā, o lana fanau, ma mea uma o iā te ia, ina ia toe totogi mai ai le aitalafu.+ 26 O lea na faapaʻū ai i lalo le pologa ma augani atu iā te ia, ‘Ia e malie e tuu mai se avanoa, ou te toe totogi atu ai mea uma iā te oe.’ 27 Ona alofa mutimutivale ai lea o le matai i lana pologa, ua faasaʻoloto iā te ia, ma faamagalo lana aitalafu.+ 28 Ae ina ua alu atu lenā pologa, na ia maua ai lona uso a pologa, o lē na aitalafu iā te ia i le 100 tenari.* Ona ia puʻe lea ma titina lea pologa ma faapea atu, ‘Ia e toe totogi mai mea na e aitalafu ai iā te aʻu.’ 29 O lea na faapaʻū ai i lalo lona uso a pologa ma ʻaiʻoi mai iā te ia, ‘Ia e malie e tuu mai se avanoa, ou te toe totogi atu ai laʻu aitalafu.’ 30 Peitaʻi, e leʻi malie ai o ia, ae na faatonu atu e lafo o ia i le falepuipui seʻia toe totogi uma mai lana aitalafu. 31 Ina ua iloa e ona uso a pologa le mea na tupu, ona matuā tigā ai lea o i latou ma ua ō atu ma faamatala atu mea uma i lo latou matai. 32 Ona valaau atu lea o le matai ma faapea atu iā te ia: ‘O oe lenā le pologa leaga, na ou faamagaloina lau aitalafu ina ua e ʻaiʻoi mai iā te aʻu. 33 Pe e lē tatau ea la ona e alofa mutimutivale i lou uso a pologa, e pei foʻi ona ou alofa mutimutivale iā te oe?’+ 34 O lea, na matuā ita ai lona matai, ma tuuina atu o ia i leoleo o le falepuipui, seʻia toe totogi uma mai mea na ia aitalafu ai. 35 E faia foʻi faapena e loʻu Tamā o i le lagi iā te outou,+ pe afai tou te lē faamagalo atu ma o outou lotoatoa i o outou uso.”+

19 Ua uma ona fetalai atu Iesu i nei upu, ona tuua lea e ia o Kalilaia, ua oo atu i tuaoi o Iutaia i le isi itu o Ioritana.+ 2 Ua mulimuli atu foʻi iā te ia le motu o tagata, ma ua ia faamālōlōina i latou i inā.

3 Ua ō ane foʻi le ʻau Faresaio ina ia tofotofo iā te ia, ma faapea mai: “Pe e taga i le tulafono ona faateʻa* e se tamāloa lana avā i so o se māfuaaga?”+ 4 Ona tali atu lea o ia: “E tou te leʻi faitau ea, o lē na foafoaina i laʻua i le amataga, na ia faia i laʻua o le tane ma le fafine+ 5 ma fetalai atu: ‘O le māfuaaga lea e tuua ai e le tane lona tamā ma lona tinā, ma nonofo faatasi* ma lana avā, ona avea ai lea o i laʻua ma tino e tasi’?+ 6 O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.”+ 7 Ona latou fai mai lea iā te ia: “Aiseā la na fai mai ai Mose e avatu se tusi e faamaonia ai ua tatala le faaipoipoga ma faateʻa i le avā?”+ 8 Ua ia fetalai atu iā i latou: “Ona o lo outou lotomaaa, na faataga ai e Mose outou e faateʻa i a outou avā,+ ae e lē o le tulaga lenā mai i le amataga.+ 9 Ou te fai atu iā te outou, o sē e faateʻa i lana avā ae e leʻi faia amioga lē mamā taufeusuaʻiga,* ma toe faaipoipo i se isi fafine, ua mulilua o ia.”+

10 Ona fai mai lea o le ʻausoo iā te ia: “Afai o le tulaga lea o le tane ma lana avā, e sili la pe a aua le faaipoipo se tasi.” 11 Ua ia fetalai atu iā i latou: “E lē o tagata uma e mafai ona talia na upu, ae e na o i latou ua mauaina le meaalofa.+ 12 Auā e iai tane e lē faaipoipo ona o ni faalētonu i o latou tino ina ua fananau mai, o isi ua lē faaipoipo ona na faaleagaina e tagata,* a o isi ua lē faaipoipo ona o le Malo o le lagi. O lē ua lotomalie e lē faaipoipo, ia nofofua pea o ia.”+

13 Ona aumaia ai lea o tamaiti iā te ia, ina ia tuu ona aao i luga iā i latou ma tatalo, ae ua vavao i latou e le ʻausoo.+ 14 Ae ua fetalai atu Iesu: “Tuu ai pea tamaiti e ō mai iā te aʻu ae aua le taofia i latou, auā ua fai le Malo o le lagi ma tofi o ē e pei o nei tamaiti.”+ 15 Ua faaee ona aao i luga iā i latou, ona alu ese lea o ia.

16 Faauta! ua sau se tasi iā te ia ma faapea mai: “Le Aʻoaʻo e, o ā ni mea lelei e tatau ona ou faia ina ia maua ai le ola e faavavau?”+ 17 Ua ia fetalai atu iā te ia: “Aiseā ua e fesili mai ai iā te aʻu i mea e lelei? E na o le toʻatasi lava lē e lelei.+ O lea afai e te fia maua le ola, ia e toʻaga e tausi tulafono.”+ 18 Ua fai mai o ia: “O lē fea tulafono?” Ua faapea atu Iesu: “Aua e te fasioti tagata,+ aua e te mulilua,+ aua e te gaoi,+ aua e te molimau pepelo,+ 19 ia e āva i lou tamā ma lou tinā,+ ma ia e alofa i lou tuaoi e pei o oe lava iā te oe.”+ 20 Ua fai mai le tauleʻaleʻa iā te ia: “Ua ou tausia na mea uma; o le ā se isi mea ou te leʻi faia?” 21 Ua faapea atu Iesu iā te ia: “Afai e te manaʻo ia atoatoa ona lelei, ia e alu e faatau atu au meafaitino ma foaʻi atu i tagata matitiva, ona e maua lea o ʻoa i le lagi,+ ona e sau ai lea ma mulimuli mai iā te aʻu.”+ 22 Ua faalogo le tauleʻaleʻa i ia upu, ona alu ese ai lea o ia, ua tigā lona loto, auā e tele lava ana meafaitino.+ 23 Ona fetalai atu lea o Iesu i ona soo: “E moni, ou te fai atu iā te outou, e faigatā i le mauʻoa ona sao atu i le Malo o le lagi.+ 24 Ou te fai atu foʻi iā te outou, e sili ona faigofie ona sao o se kamela i le pū o le nila, nai lo o le sao atu o se tagata mauʻoa i le Malo o le Atua.”+

25 Ua faalogo i ai le ʻausoo, ona matuā faateʻia ai lea o i latou ma faapea ane: “Pe e iai la se isi e mafai ona faaolaina?”+ 26 Ua silasila totoʻa atu Iesu iā i latou ma faapea atu: “E lē mafaia e tagata lenei mea, ae e mafaia e le Atua mea uma lava.”+

27 Ona tali mai lea o Peteru e faapea: “Faauta! Ua matou tuua mea uma ae mulimuli atu iā te oe; o le ā la se mea e matou te maua?”+ 28 Ona fetalai atu lea o Iesu: “E moni ou te fai atu iā te outou, pe a tiʻetiʻe le Atalii o le tagata i lona nofoālii mamalu i le taimi e toe faafouina ai mea uma, tou te tiʻetiʻe ai foʻi i nofoālii e 12, o outou o ē na mulimuli mai iā te aʻu, ma faamasino atu i ituaiga e 12 o Isaraelu.+ 29 O ē uma e tuua fale po o uso, tuafāfine, tamā, tinā, fanau, po o fanua ona o loʻu igoa, o le a maua e i latou e taʻi 100 o na mea, ma e maua foʻi le ola e faavavau.+

30 “Ae o le toʻatele o ē e muamua e avea ma ē e mulimuli, ma o ē e mulimuli e avea ma ē e muamua.+

20 “Auā ua faatusaina le Malo o le lagi i se matai o le aiga, o lē na usu atu i le taeaopō e saʻili ni tagata e faafaigaluega i lona togāvine.+ 2 Ina ua uma ona malilie faatasi ma le ʻaufaigaluega e galulue mo le tenari* i le aso, ona ia aauina atu lea o i latou i le togāvine. 3 Ina ua toe alu atu i le pe ā o le itula e tolu,* na ia vaaia ai ni tagata o loo tutū i le maketi, e lē o faia ni galuega; 4 ona ia fai atu lea iā i latou, ‘Ia outou ō atu foʻi i loʻu togāvine, ma ou te avatu iā te outou le totogi talafeagai.’ 5 Ona latou ō ai lea. Na ia toe alu atu i le pe ā o le itula e ono* ma le itula e iva* ma faia foʻi faapea. 6 Ona ia alu atu ai lea pe ā o le itula e 11,* ma maua atu ai foʻi isi o loo tutū mai, ona ia fai atu lea iā i latou, ‘Aiseā ua outou tutū ai i le aso atoa ae leai ni a outou galuega e faia?’ 7 Ona latou fai mai lea, ‘Auā e leai se isi e faafaigaluegaina i matou.’ Ona ia fai atu lea, ‘Ia outou ō atu foʻi i le togāvine.’

8 “Ina ua oo i le afiafi, ona fai atu lea o lē e ana le togāvine i lē e pule i lana ʻaufaigaluega, ‘Ia valaau atu i le ʻaufaigaluega ma avatu o latou totogi,+ e amata i ē na mulimuli e oo i ē na muamua.’ 9 Ina ua ō mai tamāloloa na amata i le itula e 11, na tofu i latou ma le tenari.* 10 Ae ina ua ō mai i latou na muamua, na latou manatu e sili atu se mea latou te maua, ae na latou maua foʻi le totogi o le tenari* e tasi. 11 Ina ua maua le tenari, ona latou muimui ai lea i lē e ana le togāvine 12 ma faapea mai, ‘E na o le tasi le itula na galulue ai i latou na mulimuli mai, ae ua tutusa o matou totogi e ui ua alu le aso atoa o matou tigāina i le vevela o le lā!’ 13 Ae na tali atu o ia i le tasi o i latou, ‘Sole, e leai se mea sesē ua ou faia iā te oe. Pe ta te leʻi malilie faatasi ea i le tenari* e tasi?+ 14 Ia tago loa i lou totogi ma e alu. Ou te manaʻo e avatu i lenei tagata mulimuli le totogi na ou avatu foʻi iā te oe. 15 Po ou te lē pule ea i le mea e fai i aʻu lava mea? Po ua e lotoleaga ea ina ua ou agalelei?’*+ 16 O lenei, o ē e mulimuli e avea ma ē e muamua, ma o ē e muamua e avea ma ē e mulimuli.”+

17 A o agaʻi aʻe i Ierusalema, ona ave ai lea e Iesu o ona soo e toʻa 12 ua na o i latou, ua faapea atu iā i latou i le ala:+ 18 “Faauta! O le a tatou ō aʻe i Ierusalema, ma e tuuina atu ai le Atalii o le tagata i le ʻaufaitaulaga sili ma le ʻautusiupu. O le a latou faasalaina o ia i le oti+ 19 ma tuuina atu o ia i tagata o nuu ese ina ia tauemua, sasa tigāina, ma tutuʻi i luga o le laau;+ ae e toe faatūina o ia i le aso lona tolu.”+

20 Ona faalatalata mai lea o le tinā o atalii o Sepetaio+ faatasi ma lana fanau tama, ua ifo ma talosaga mai mo se mea mai iā te ia.+ 21 Ua ia fetalai atu iā te ia: “O le ā se mea e te manaʻo i ai?” Ua fai mai o ia: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou Malo.”+ 22 Ona tali atu lea o Iesu: “Lua te lē iloa le mea ua oulua talosaga mai ai. Pe e mafai ea ona oulua inu i le ipu lea ua toeitiiti oʻu inu ai?”+ Ua la fai mai iā te ia: “E ma te mafaia.” 23 Ua ia fetalai atu iā i laʻua: “Lua te inu lava i laʻu ipu,+ ae ou te lē pule po o ai e nofo i loʻu itu taumatau ma loʻu itu tauagavale, ae e maua lenā tulaga e i latou ua saunia i ai e loʻu Tamā.”+

24 Ua faalogo le isi toʻasefulu i lenei mea, ona feita ai lea o i latou i lea ʻauso e toʻalua.+ 25 Ae ua valaau atu Iesu iā i latou e ō mai iā te ia ma faapea atu: “Ua outou iloa o taʻitaʻi o malo e pulepuletutū i tagata, ma e pule foʻi o ē ua sili i tagata.+ 26 Ae e lē tatau ona faapena outou;+ o sē e fiasili iā te outou e tatau ona avea o ia ma a outou auauna,+ 27 ma o sē e fia muamua iā te outou, e tatau ona avea ma a outou pologa.+ 28 Auā e leʻi sau le Atalii o le tagata ina ia auauna mai tagata iā te ia, ae ia auauna atu,+ ma foaʻi atu lona ola e fai ma togiola e sui aʻi tagata e toʻatele.”+

29 A o latou tuua Ieriko, ua mulimuli atu le motu o tagata e toʻatele iā te ia. 30 Vaai foʻi! o loo nonofo ni tamāloloa tauaso se toʻalua i tafatafa o le auala, ma ua la faalogo ua alu ane Iesu, ona la alalaga mai lea: “Le Alii e, le Alo o Tavita, ia e alofa mutimutivale mai iā i maʻua!”+ 31 Ae ua matuā fai atu le motu o tagata iā i laʻua e aua le pisa; ae ua atili ai ona alalaga ma faapea mai: “Le Alii e, le Alo o Tavita, ia e alofa mutimutivale mai iā i maʻua!” 32 Ona tū lea o Iesu ma valaau atu iā i laʻua ma faapea atu: “O le ā se mea lua te mananaʻo ou te faia mo oulua?” 33 Ua la faapea mai iā te ia: “Le Alii e, seʻi e faapupulaina o maʻua mata.” 34 Ua mutimutivale le alofa o Iesu ma ua papaʻi atu i o la mata,+ ona pupula ai loa lea o i laʻua ma ua mulimuli mai iā te ia.

21 Ua latalata i latou i Ierusalema ma ua taunuu atu i Petefake i le mauga o Olive, ona aauina atu lea e Iesu o ona soo e toʻalua,+ 2 ma faapea atu: “Ia oulua ō i le nuu lea o loo vaai atu i ai, ma e lua te maua ai se asini o loo nonoa ma lana tama. Ia tatala ma aumai iā te aʻu. 3 Afai e fai mai e se tasi se upu iā te oulua, ia oulua fai atu i ai, ‘E manaʻo i ai le Alii.’ Ona ia tuuina mai loa lea.”

4 Ua tupu lenei mea ina ia taunuu ai le upu na ala mai i le perofeta e faapea: 5 “Ia outou taʻu atu i le tama fafine a Siona: ‘Faauta! Ua afio mai lou tupu iā te oe,+ e agamalu o ia,+ ma o loo tiʻetiʻe i se asini, o se tamaʻi asini, o le tama a le manu ave avega.’”+

6 Ona ō atu lea o ia soo ma fai e pei lava ona faatonuina ai i laʻua e Iesu.+ 7 Ona la aumaia lea o le asini ma lana tama, ua fofola ai i luga o latou ofu tele, ma ua tiʻetiʻe ai o ia.+ 8 Ua fofola foʻi e le toʻatele o le motu o tagata o latou ofu tele i le ala,+ a o isi ua latou tā mai lālā o laau ma fola ai le ala. 9 E lē gata i lea, ua alalaga atu pea le motu o tagata o ē ua muamua atu iā te ia, ma ē o loo mulimuli mai e faapea: “Matou te tatalo ia faaolaina le Alo o Tavita!+ E manuia lē e maliu mai i le suafa o Ieova!*+ Matou te tatalo i lē e afio i mea maualuluga, ina ia faaola iā te ia!”+

10 A o ulu atu o ia i Ierusalema, ua vevesi le aai atoa ma faapea ane: “O ai ea lenei tagata?” 11 Ae ua fai atu pea le motu o tagata: “O Iesu lenei, le perofeta+ mai Nasareta i Kalilaia!”

12 Ua ulufale atu Iesu i le malumalu ma tutuli i fafo ē uma ua fai fefaatauaʻiga i le malumalu, ma fuli laulau a tagata suitupe ma nofoa o le ʻaufaatau lupe.+ 13 Ua ia faapea atu iā i latou: “Ua tusia, ‘E taʻua loʻu fale o le fale tatalo,’+ a o lenei ua outou faia ma ana o ē e faomea.”+ 14 Ua ō ane foʻi tagata tauaso ma pipili i le malumalu, ma ua ia faamālōlōina i latou.

15 Ua iloa e le ʻaufaitaulaga sili ma le ʻautusiupu galuega mamana ua ia faia ma tama o loo alalaga i le malumalu e faapea: “Matou te tatalo ia faaolaina le Alo o Tavita!”+ ona feita ai lea o i latou+ 16 ma fai mai iā te ia: “Po o e faalogo atu ea i a latou upu?” Ua fetalai atu Iesu iā i latou: “Ioe. Pe e tou te leʻi faitau ea e faapea, ‘Ua e saunia le viiga e ala mai i gutu o tamaiti ma pepe’?”+ 17 Ona ia tuua lea o i latou ae alu atu i le aai o Petania ma tofā ai i inā.+

18 A o toe foʻi atu i le aai i le taeaopō, ona fia taumafa ai lea o ia.+ 19 Ua silafia e ia le laau o le mati i tafatafa o le auala, ona ia alu atu lea i ai, ae e leai ni fua ua na o lau.+ Ona ia faapea atu lea i le mati: “Ia aua lava neʻi toe iai ni ou fua.”+ Ona mamae faafuaseʻi ai lea o le mati. 20 Ua iloa atu e le ʻausoo, ona latou ofo ai lea ma faapea ane: “Na faapefea ona mamae faafuaseʻi le mati?”+ 21 Ona tali atu lea o Iesu iā i latou: “E moni ou te fai atu iā te outou, afai tou te faatuatua ae lē masalosalo, e lē gata tou te faia e pei ona ou faia i le mati, ae tou te fai atu foʻi i lenei mauga, ‘Ia siitia ma lafo i le sami,’ ona faia lava lea.+ 22 O mea uma tou te talosaga atu ai i le tatalo ma le faatuatua, tou te maua lava.”+

23 Ua ulufale atu o ia i le malumalu, ona ō mai ai lea o le ʻaufaitaulaga sili ma le ʻautoeaina o le nuu a o ia aʻoaʻo atu, ua faapea mai: “O le pule a ai ua e faia ai nei mea? O ai foʻi na tuuina atu lenei pule iā te oe?”+ 24 Ua tali atu Iesu iā i latou: “E iai foʻi le mea lea ou te fia fesili atu ai iā te outou. Afai tou te taʻu mai iā te aʻu le tali, ona ou taʻuina atu foʻi lea po o le pule a ai ua ou faia ai nei mea: 25 E mai i fea le papatisoga a Ioane? Pe e mai i le lagi ea pe e mai i tagata?”* Ae ua latou talatalanoa ma faapea ane: “Afai tatou te fai atu, ‘E mai i le lagi,’ ona ia faapea mai lea iā i tatou, ‘Aiseā la ua outou lē talitonu ai iā te ia?’+ 26 Ae afai tatou te faapea atu, ‘E mai i tagata,’ o le a lamatia la i tatou i le motu o tagata, auā e latou te manatu o Ioane o le perofeta.” 27 O lea ua latou tali mai ai iā Iesu: “Matou te lē iloa.” Ona ia fetalai atu lea iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.

28 “O le ā so outou manatu? E iai se tamāloa e toʻalua ona atalii. Na alu atu o ia i le atalii muamua ma fai atu iā te ia, ‘Loʻu atalii e, alu e galue i le togāvine i le asō.’ 29 Ona tali mai lea o le atalii, ‘Ou te lē alu,’ ae na mulimuli ane salamō o ia ma alu. 30 Ona ia alu atu lea i le atalii lona lua ma fai atu foʻi faapena. Ua tali mai o ia i lona tamā, ‘Ua lelei, o le a ou alu,’ ae e leʻi alu. 31 O ai o atalii e toʻalua na faia le mea na loto i ai lo la tamā?” Ua latou faapea mai: “O le atalii muamua.” Ona faapea atu lea o Iesu: “E moni ou te fai atu iā te outou, e muamua atu le ʻauaolafoga ma fafine talitane iā te outou i le Malo o le Atua. 32 Auā na sau Ioane iā te outou i le ala o le amiotonu, ae tou te leʻi talitonu iā te ia. Peitaʻi, na talitonu i ai le ʻauaolafoga ma fafine talitane.+ Ae e ui ina outou vāai i ai, e tou te leʻi salamō ma talitonu iā te ia.

33 “Ia faalogo mai i se isi talafaatusa: Sa iai se matai o le aiga o lē na totō se togāvine+ ma siʻo ai i le pā, ma eli le mea e soli ai vine ma faatū se ʻolo;+ ona ia lisiina atu lea i ē galulue vine ae malaga i nuu mamao.+ 34 Ina ua oo i le tau e fua ai laau, ona ia aauina atu lea o ana pologa i ē galulue vine, ina ia aumai ai ni fua. 35 Peitaʻi, na pupuʻe e ē galulue vine ana pologa, ona latou fasi lea o le tasi, fasioti le isi, ae fetogi le isi i maa.+ 36 Ona ia toe aauina atu lea o isi pologa, e toʻatele atu i pologa muamua, a o le mea foʻi lenā na latou faia iā i latou.+ 37 Mulimuli ane, ona ia auina atu lea o lona atalii iā i latou, ua faapea ane, ‘E latou te āva i loʻu atalii.’ 38 Ina ua iloa atu e ē galulue vine le atalii, ona latou faapea ifo lea iā i latou lava, ‘O le suli lenei,+ seʻi tatou ō e fasioti o ia ma ave lona tofi!’ 39 O lea, na latou puʻe ai iā te ia ma lafo i tua o le togāvine ma fasioti iā te ia.+ 40 O lea la, pe a taunuu mai lē e ana le togāvine, o le ā le mea e na te faia i na tagata galulue vine?” 41 Ua latou fai mai iā te ia: “E na te matuā faaumatia i latou ona o lo latou leaga, ma lisi atu le togāvine i isi tagata galulue vine, o ē o le a avatua iā te ia ni fua pe a oo i le tau e fua ai laau.”

42 Ua fetalai atu Iesu iā i latou: “Pe e tou te leʻi faitau ea i Tusitusiga Paia, ‘O le maa lea na tuulafoaʻiina e tufuga, ua avea ma maa tulimanu sili.+ E mai iā Ieova* lenei mea, ma e ofoofogia i la tatou vaai’?+ 43 O le mea lea ou te fai atu ai iā te outou, e aveesea le Malo o le Atua mai iā te outou, ae tuuina atu i se nuu e fua mai ai ona fua. 44 E lē gata i lea, e nutililii le tagata e paʻū i luga o lenei maa.+ Ae o sē e paʻū i ai le maa, e nutipalaina o ia.”+

45 Ua faalogo le ʻaufaitaulaga sili ma le ʻau Faresaio i ana talafaatusa, ona latou iloa ai lea ua faatatau atu ana fetalaiga iā i latou.+ 46 E ui ina latou mananaʻo e puʻe iā te ia, ae ua fefefe i le motu o tagata, auā ua manatu nei tagata, o ia o le perofeta.+

22 Ua toe fetalai atu Iesu iā i latou i talafaatusa e faapea: 2 “Ua faatusaina le Malo o le lagi i se tupu na saunia se ʻaiga o le faaipoipoga+ mo lona atalii. 3 Ona ia aauina atu lea o ana pologa e valaau iā i latou na valaaulia i le ʻaiga o le faaipoipoga, ae latou te leʻi fia ō mai.+ 4 Ona ia toe aauina atu lea o isi pologa ma fai atu i ai, ‘Ia fai atu i le ʻauvalaaulia: “Faauta! o lea ua uma ona ou saunia le ʻaiga, ua fafasi aʻu povi ma manu pepeti, ma ua uma ona saunia mea uma. Ō mai loa i le ʻaiga o le faaipoipoga.”’ 5 Ae latou te leʻi ano ane. Na alu le tasi e vaai lona fanua, a o le isi na alu e vaai lana pisinisi;+ 6 a o isi, na pupuʻe i ana pologa ma agaleaga iā i latou ma fasiotia.

7 “Ona toʻatamaʻi ai lea o le tupu ma aauina atu lana ʻautau, ua faaumatia ai na tagata fasioti tagata ma susunu lo latou aai.+ 8 Ona ia fai atu lea i ana pologa, ‘O lea ua uma ona saunia le ʻaiga o le faaipoipoga, ae ua lē tatau mo le ʻauvalaaulia.+ 9 O lea, ia ō atu i ala tetele i fafo o le aai, ma valaaulia so o se tasi tou te tau atu i ai, i le ʻaiga o le faaipoipoga.’+ 10 Ona ō atu lea o na pologa i ala tetele ma faapotopoto mai i latou uma na latou tau i ai, o ē e leaga ma ē e lelei; ma na tumu ai le potu o le ʻaiga o le faaipoipoga i ē na aai.*

11 “Ina ua taunuu le tupu e asiasi mālō, na ia iloa ai se tamāloa e lē o ofu i le ofu mo le faaipoipoga. 12 O lea, na ia fai atu ai iā te ia, ‘Sole, e faapefea ona e sau i inei ae leai sou ofu mo le faaipoipoga?’ Ae e leʻi tali mai o ia. 13 Ona fai atu lea o le tupu i ana auauna, ‘Ia saisai ona lima ma ona vae, ma lafo i fafo i le mea pogisa. O i inā e tagiauē ai ma lilivau ona nifo.’

14 “Auā e toʻatele le ʻauvalaaulia, ae e toʻaitiiti ē ua filifilia.”

15 Ona ō ai lea o le ʻau Faresaio ma taupulepule ina ia maua se mea e maileia ai o ia i ana upu.+ 16 Ona latou aauina mai lea o o latou soo, ma ē ua ʻau ma Herota,+ ua latou faapea mai iā te ia: “Le Aʻoaʻo e, matou te iloa o oe o se tagata faamaoni ma ua e aʻoaʻo atu le ala o le Atua e tusa ai ma le upu moni, e te lē faailogaina foʻi tagata, auā e te lē silasila i foliga i fafo o tagata. 17 O lea, seʻi e faailoa mai iā i matou po o le ā sou manatu. Pe e taga i le tulafono* ona totogi e tagata uma lafoga iā Kaisara pe leai?” 18 Ae ua silafia e Iesu o latou mafaufauga leaga, ona ia faapea atu lea: “O outou o tagata faafiaamiotonu, aiseā ua outou tofotofo mai ai iā te aʻu? 19 Ia faaali mai iā te aʻu se tupe o le lafoga.” Ua latou aumai iā te ia se tenari.* 20 Ua ia fetalai atu iā i latou: “O ai e ona le ata ma le igoa lea?” 21 Ua latou tali mai: “O Kaisara.” Ona ia fetalai atu lea: “Ia totogi atu mea a Kaisara iā Kaisara, a o mea a le Atua ia avatu i le Atua.”+ 22 Ua latou faalogo i lenā mea, ona taufaiofo ai lea o i latou ma ō ese atu, ae tuua o ia.

23 O le aso lava lenā ua ō mai ai le ʻau Satukaio, o ē e faapea mai e leai se toetū+ ma fesili mai iā te ia:+ 24 “Le Aʻoaʻo e, ua faapea mai Mose: ‘Afai e oti se tane ae leai sana fanau, e ao ona faaipoipo atu lona uso i lana avā ina ia maua ai se fanau mo lona uso.’+ 25 O lenei, e toʻafitu le ʻauso sa iā i matou. Na faaipoipo lē e muamua ma ua oti, ae e leai sana fanau, ma ua tuua ai lana avā mo lona uso. 26 O le mea lenā na tupu i le uso lona lua ma le lona tolu, seʻia oo lava i le uso lona fitu. 27 Mulimuli ane ua oti foʻi le fafine. 28 O lea la, i le toetū, o ai o le toʻafitu lea e fai ma ia le avā? Auā na latou faaipoipo uma iā te ia.”

29 Ona tali atu lea o Iesu iā i latou: “E sesē outou, auā tou te lē iloa Tusitusiga Paia po o le mana o le Atua;+ 30 auā e lē faaipoipo tane, faapena foʻi ma fafine i le toetū, ae e pei i latou o agelu i le lagi.+ 31 Pe e tou te leʻi faitau ea i le fetalaiga a le Atua iā te outou e faatatau i le toetutū mai o ē ua oti e faapea: 32 ‘O aʻu o le Atua o Aperaamo, le Atua o Isaako, ma le Atua o Iakopo’?+ O ia o le Atua o ē e ola, ae lē o ē ua oti.”+ 33 Ina ua faalogo i lenā mea, ona taufaiofo ai lea o le motu o tagata i lana aʻoaʻo atu.+

34 Ua faalogo le ʻau Faresaio ua lē mautali le ʻau Satukaio, ona latou faapotopoto faatasi ai lea. 35 Ua fesili tofotofo mai le tasi o i latou e atamai i le Tulafono e faapea: 36 “Le Aʻoaʻo e, o le ā le poloaʻiga e sili i le Tulafono?”+ 37 Ua ia fetalai atu: “‘Ia e alofa atu iā Ieova* lou Atua ma lou lotoatoa, ma lou ola atoa, ma lou mafaufau atoa.’+ 38 O le poloaʻiga silisili ma le muamua lenā. 39 E faapena foʻi le poloaʻiga lona lua, ‘Ia e alofa atu i lou tuaoi e pei o oe lava iā te oe.’+ 40 O nei poloaʻiga e lua ua faavae ai le Tulafono atoa, ma le ʻau Perofeta.”+

41 A o faapotopoto faatasi le ʻau Faresaio, ona fesili atu lea o Iesu iā i latou:+ 42 “O le ā so outou manatu, o se atalii o ai le Keriso?” Ua latou fai mai iā te ia: “O le alo o Tavita.”+ 43 Ua ia fesili atu iā i latou: “Aiseā la na taʻua ai o ia e Tavita o le Alii ina ua osofia Tavita e le agaga,+ ma faapea mai, 44 ‘Ua fetalai ane Ieova* i loʻu Alii: “Ia e nofo i loʻu itu taumatau seʻia ou faia ou fili ma mea e tū ai ou vae”’?+ 45 Afai la na taʻua o ia e Tavita o le Alii, e faapefea la ona avea o ia ma ona atalii?”+ 46 E leai se tagata na mafai ona toe tali ane iā te ia, ma e talu mai lava lenā aso, e leai se tasi ua lototele e toe fesili mai iā te ia.

23 Ona fetalai atu lea o Iesu i le motu o tagata ma ona soo e faapea: 2 “Ua nonofo le ʻautusiupu ma le ʻau Faresaio i le nofoa o Mose. 3 O lea, o mea uma latou te fai atu ai iā te outou, ia outou faia ma tausia, ae aua tou te faia mea o loo latou faia, auā ua latou fai atu, ae latou te lē o faia mea o loo latou fai atu ai.+ 4 Ua latou saisai avega mamafa ma faaee i ua o tagata,+ ae latou te lē fia sii i na avega i o latou tamatamaʻilima.+ 5 Ua latou faia galuega uma ona o le vaaiga a tagata,+ auā ua latou faatetelē tamaʻi pusa e tuu ai tusitusiga paia ia e fusi i o latou tino, ina ia puipuia ai i latou,+ ma faalautetele fele i pito o latou ofu.+ 6 Ua latou fiafia i nofoaga sili i faigaʻai, ma nofoa pito i luma i sunako,+ 7 ma faafeiloa‘iga aloaʻia i nofoaga faitele,* ma taʻua i latou e tagata o Aʻoaʻo.* 8 A o outou, aua neʻi taʻua outou o Aʻoaʻo,* auā e toʻatasi lo outou Aʻoaʻo,+ ma o le ʻauuso uma outou. 9 Aua foʻi neʻi taʻua se tasi i le lalolagi o lo outou tamā, auā e toʻatasi lo outou Tamā+ o Lē o i le lagi. 10 Aua foʻi neʻi taʻua outou o taʻitaʻi, auā e toʻatasi lo outou Taʻitaʻi o le Keriso lea. 11 A o lē e sili iā te outou uma, e ao ona avea ma a outou auauna.+ 12 O sē na te faaeaina o ia lava, e faamaulaloina o ia,+ a o sē e faamaulalo iā te ia lava, e faaeaina o ia.+

13 “Oi talofa iā te outou le ʻautusiupu ma le ʻau Faresaio faafiaamiotonu! auā ua outou punitia le Malo o le lagi i tagata; auā e tou te lē ulu atu i ai, ma ua outou taofiofia foʻi ē e ulu atu i ai.+ 14* ——

15 “Oi talofa iā te outou le ʻautusiupu ma le ʻau Faresaio faafiaamiotonu!+ auā ua outou faimalaga i le sami ma le laueleele ina ia faaliulotu mai se tagata, ma pe a maua o ia, ona outou faia lea o ia ma tagata e tatau ona alu i Kena,* e sili atu lona faasalaga i lo o outou.

16 “Oi talofa iā te outou taʻitaʻi tauaso+ o ē faapea mai, ‘E lē afāina pe a tautō se tasi i le malumalu; ae pe a tautō se tasi i le auro i le malumalu, e tatau la ona ia faataunuuina.’+ 17 O outou o tagata vālea ma tauaso! O lē fea e sili, o le auro po o le malumalu lea ua faapaiaina ai le auro? 18 Ua outou faapea mai foʻi, ‘E lē afāina pe a tautō se tasi i le fata faitaulaga, ae afai e tautō se tasi i meaalofa o i luga o le fata, e tatau la ona ia faataunuuina.’ 19 O outou o tauaso! O lē fea e sili, o le meaalofa po o le fata faitaulaga lea ua faapaiaina ai le meaalofa? 20 O lē ua tautō i le fata faitaulaga, ua ia tautō i ai ma i mea uma o loo i luga o le fata faitaulaga; 21 o lē ua tautō i le malumalu, ua ia tautō i le malumalu ma i Lē o loo afio ai;+ 22 ma o lē ua tautō i le lagi, ua tautō o ia i le nofoālii o le Atua ma i Lē o loo afio ai.

23 “Oi talofa iā te outou le ʻautusiupu ma le ʻau Faresaio faafiaamiotonu! auā ua outou avatu mea e sefuluaʻi o le mili, o le aneto, ma le kumina,+ ae ua outou manatu māmā i mataupu matuā tāua o le Tulafono, e pei o le faia o mea tonu,+ o le alofa mutimutivale,+ ma le faamaoni. E moni e ao ona outou avatu le sefuluaʻi, ae e lē tatau ai ona outou manatu māmā i isi mea.+ 24 O outou o taʻitaʻi tauaso,+ ua outou vaimamā ese le namu+ ae folo atoa le kamela!+

25 “Oi talofa iā te outou le ʻautusiupu ma le ʻau Faresaio faafiaamiotonu! auā ua outou faamamā i tua o le ipu ma le tanoa,+ a o totonu ua tumu i le matapeʻapeʻa*+ ma le manatu faapito.+ 26 O oe lenā le Faresaio tauaso, ia faamamā muamua totonu o le ipu ma le tanoa, ona faatoʻā mafai lea ona faamamā ma tua.

27 “Oi talofa iā te outou le ʻautusiupu ma le ʻau Faresaio faafiaamiotonu!+ auā ua pei outou o tuugamau ua vali papaʻe,+ ua foliga matagofie mai i fafo a o totonu ua tumu i ponaivi o tagata oti ma mea lē mamā uma. 28 Ua faapena foʻi outou, ua outou faatagā amiotonu i luma o tagata, ae ua tumu o outou loto i le faafiaamiotonu ma le amioleaga.+

29 “Oi talofa iā te outou le ʻautusiupu ma le ʻau Faresaio faafiaamiotonu!+ auā ua outou fausia tuugamau o perofeta ma teuteu tuugamau o ē e amiotonu,+ 30 ma ua outou faapea mai, ‘Ana matou ola i aso o o matou augātamā, matou te lē auai i lo latou faamasaaina o toto o le ʻauperofeta.’ 31 O le mea lea ua fai ai outou ma molimau iā te outou lava, o outou o atalii o ē na fasiotia le ʻauperofeta.+ 32 O lea, ia outou faauma galuega na amata e o outou augātamā.*

33 “O outou gata, o fanau a gata feʻai,+ e faapefea ona outou sosola ese mai le faasalaga i Kena?*+ 34 O le mea lea ua ou aauina atu ai iā te outou o perofeta,+ o tagata atamamai, ma faiaʻoga.+ O nisi o i latou tou te fasiotia+ ma tutuʻi i luga o laau, ma o nisi o i latou tou te fasi faamoʻamoʻa+ i o outou sunako, ma sauāina+ mai lea aai i lea aai, 35 ina ia i o outou luga toto o ē amiotonu lea na faamasaaina i le lalolagi, e amata mai i le toto o le tagata amiotonu o Apelu+ e oo atu i le toto o Sakaria le atalii o Parakaio, o lē na outou fasiotia i le vā o le malumalu ma le fata faitaulaga.+ 36 O le mea moni, ou te fai atu iā te outou, o mea uma na e oo i lenei tupulaga.

37 “Ierusalema e, Ierusalema e, o lē na fasiotia le ʻauperofeta ma fetogi i maa ē na aauina atu iā te ia.+ Ua tele lava loʻu manaʻo e faapotopoto faatasi lau fanau, e pei ona ofaofata‘i e se moa lana toloaʻi i lalo o ona apaʻau! Peitaʻi, ua outou lē mananaʻo i ai.+ 38 Faauta! Ua tuulafoaʻiina e le Atua lo outou fale.+ 39 Auā ou te fai atu iā te outou, tou te lē toe vāai mai iā te aʻu seʻia oo ina outou faapea ane, ‘E manuia lē e maliu mai i le suafa o Ieova!’”*+

24 Ua alu ese atu Iesu mai i le malumalu, ona ō mai lea o ona soo ua faasino atu iā te ia fale o le malumalu. 2 Ona ia tali atu lea iā i latou: “Po ua outou vāai atu ea i nei mea uma? E moni ou te fai atu iā te outou, e lē toe tiʻetiʻe le isi maa i luga o le isi maa, ae e soloia i lalo.”+

3 A o nofo o ia i le mauga o Olive, ua ō mai ona soo iā te ia ua na o i latou, ua faapea mai: “Ia e fetalai mai iā i matou, o afea e oo mai ai ia mea, ma o le ā foʻi le faailoga o lou faatasi mai,*+ ma le taufaaiʻuiʻuga o le faiga o mea a le lalolagi?”*+

4 Ona tali atu lea o Iesu iā i latou: “Ia faaeteete neʻi faasesēina outou e se tasi,+ 5 auā e toʻatele o le a ō mai i loʻu igoa ma faapea ane, ‘O aʻu o le Keriso,’ ma faasesēina ai le toʻatele.+ 6 O le a tou faalogo i taua ma tala o taua. O lea, aua neʻi outou atuatuvale ai, auā e ao ona taunuu o nei mea uma a o leʻi oo mai le iʻuga.+

7 “Auā o le a siitaua atu isi atunuu i isi atunuu, ma isi malo i isi malo,+ o le a iai foʻi oge+ ma mafui‘e i lea mea ma lea mea.+ 8 O le amataga ia o le tigā o puapuaga.

9 “Ona tuuina atu lea o outou e tagata i puapuaga+ ma latou fasiotia outou,+ o le a inosia foʻi outou e nuu uma ona o loʻu igoa.+ 10 O le a tausuai foʻi tagata e toʻatele, o le a faalata e le tasi le isi, o le a feitagaʻi foʻi. 11 O le a tulaʻi mai le toʻatele o perofeta pepelo ma faasesēina le toʻatele o tagata;+ 12 ma o le a maalili le alofa o le toʻatele, ona o le faatuputeleina o le amioleaga. 13 A o lē e tumau seʻia oo i le iʻuga, o le a faaolaina o ia.+ 14 O le a talaʻiina atu foʻi lenei tala lelei o le Malo i le lalolagi atoa e fai ma molimau i atunuu uma,+ ona oo mai ai lea o le iʻuga.

15 “O lea, pe a outou vaaia le mea e inosia e faatafuna aʻi, e pei ona faamatalaina e le perofeta o Tanielu, ua tū i le mea paia+ (o lē faitau, ia iā te ia le faautaga loloto), 16 o ē o i Iutaia, inā sosola atu ia i mauga.+ 17 O lē o loo i luga o le fale, ia aua neʻi alu ifo e aveese ni mea mai i lona fale, 18 ma o lē o loo i le fanua, aua neʻi toe foʻi i le fale e aumai lona ofu tele. 19 Oi talofa i fafine totō ma ē failele i na aso! 20 Ia faaauau ona outou tatalo ina neʻi outou sosola i le tau mālūlū po o le aso Sapati; 21 auā o le a tupu le puapuaga tele,+ e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea.+ 22 O le mea moni, a lē faapuupuuina ia aso, e leai se tagata e faaolaina. Ae o le a faapuupuuina ia aso ona o ē ua filifilia.+

23 “A fai ane se tasi iā te outou i na aso, ‘Faauta! Ua i inei le Keriso’+ pe ‘Ua i inā!’ aua tou te talitonu i ai.+ 24 Auā o le a tulaʻi mai Keriso pepelo ma perofeta pepelo,+ latou te faia foʻi faailoga tetele ma mea ofoofogia ina ia faasesē ai,+ e oo lava i ē ua filifilia pe afai e mafai. 25 Faauta! Ua uma ona ou lapataʻia outou. 26 O lea, pe a fai ane tagata iā te outou, ‘Faauta! Ua iai o ia i le toafa,’ aua tou te ō atu i ai; ‘Faauta foʻi! Ua iai o ia i le potu i totonu o le fale,’ aua tou te talitonu i ai.+ 27 Auā e pei ona emo o le uila mai i sasaʻe ma sulugia ai sisifo, o le a faapena foʻi le faatasi mai* o le Atalii o le tagata.+ 28 O le mea e iai tino oti,* o le mea foʻi lenā o le a faapotopoto i ai aeto.+

29 “A mavae loa le puapuaga o ia aso, ona pogisa lea o le lā,+ o le a lē toe susulu le masina, o le a paʻuʻū foʻi fetu mai i le lagi, ma o le a lūlūina mea malolosi i le lagi.+ 30 Ona iloa ai lea i le lagi o le faailoga o le Atalii o le tagata, ona taufaitagitu‘i ai lea o ituaiga uma o le lalolagi ona o le faanoanoa,+ ma o le a latou vaaia le Atalii o le tagata+ ua sau i ao o le lagi ma le mana ma le mamalu tele.+ 31 O le a ia aauina atu foʻi ana agelu faatasi ma le leotele o le pū, ma o le a latou aoaoina ē ua filifilia mai i matāmatagi e fā, e amata mai i le tasi tuluʻiga o le lagi e oo atu i le isi tuluʻiga.+

32 “Ia iloa lenei mea mai i le faataʻitaʻiga i le laau o le mati: Pe a faatoʻā tutupu ona lālā fou ma oso mai ai foʻi ma ona lau, ona outou iloa ai lea ua latalata le tau māfanafana.+ 33 E faapea foʻi outou, pe a outou vaaia nei mea uma, ia outou iloa ua latalata mai o ia, ua i faitotoʻa lava.+ 34 E moni ou te fai atu iā te outou, e lē mavae atu lenei tupulaga seʻia taunuu nei mea uma. 35 E mavae atu le lagi ma le lalolagi, ae e lē mavae lava aʻu upu.+

36 “A o lea aso ma lea itula e lē iloa e se tasi,+ e oo lava i agelu i le lagi po o le Atalii, ae ua na o le Tamā lava.+ 37 Auā e pei lava o aso o Noa,+ o le a faapena foʻi le faatasi mai* o le Atalii o le tagata.+ 38 E pei o na aso a o leʻi oo i le Lolo, na latou aai ma feinu, na faaipoipo alii ma tamaʻitaʻi, seʻia oo lava i le aso na ulu atu ai Noa i le vaa,+ 39 ma latou te leʻi ano i ai seʻia oo mai le Lolo ma tafiesea ai i latou uma;+ o le a faapena foʻi le faatasi mai o le Atalii o le tagata. 40 O le a iai tane e toʻalua i le fanua; e avea le tasi ae tuulafoaʻia le isi. 41 E olo faatasi foʻi fafine e toʻalua i le mea e olo ai saito; e avea le tasi ae tuulafoaʻia le isi.+ 42 O le mea lea, ia faaauau ai ona outou mataala, auā tou te lē iloa po o le ā le aso e sau ai lo outou Alii.+

43 “Ae ia outou iloa lenei mea: Pe ana iloa e le tagata o le aiga le taimi o le pō e sau ai le gaoi,+ semanū e faaauau ona ia mataala, ma e na te lē tuua lona fale ia gaoia.+ 44 O le mea lea, ia outou nofosauni foʻi,+ auā o le itula tou te lē manatunatu ai, e sau ai le Atalii o le tagata.

45 “O ai la le pologa faamaoni ma le faautauta,* o lē ua tofia e lona matai e vaavaaia lana ʻaufaigaluega, e avatu a latou meaʻai i le taimi tatau?+ 46 E fiafia lenā pologa pe a sau lona matai, ma maua mai o loo faapea ona ia fai!+ 47 E moni ou te fai atu iā te outou, e na te tofia o ia e vaavaaia ana mea uma.

48 “Ae afai e faapea ifo lenā pologa leaga i lona loto, ‘Ua tuai mai loʻu matai,’+ 49 ma amata ai ona ia fasi i ona uso a pologa, ma aai ma inu faatasi ma ē onanā, 50 e sau le matai o lenā pologa i le aso na te leʻi faatalitalia ma le itula na te leʻi iloa,+ 51 ona ia matuā faasala lea iā te ia ma tofia o ia faatasi ma tagata faafiaamiotonu. O i inā e tagiauē ai ma lilivau ona nifo.+

25 “Ua faatusaina le Malo o le lagi i taupou e toʻasefulu, na ave a latou molī+ ma ō atu e faafeiloaʻi le alii faaipoipo.+ 2 E vālea le toʻalima, ae e faautauta*+ le isi toʻalima. 3 Auā na ave e ē vālea a latou molī ae e leʻi aveina ni a latou suāuu, 4 a o ē e faautauta na ave a latou fagu suāuu faatasi ma a latou molī. 5 Ina ua tuai mai le alii faaipoipo, ona tautulemomoe ai lea o i latou uma ma ua momoe loa. 6 Ina ua oo i le vaeluapō, ona sau ai lea o le alaga: ‘Ua sau le alii faaipoipo! Ia ō atu e faafeiloaʻi iā te ia.’ 7 Ona tutulaʻi ai lea o na taupou uma ma sauniuni a latou molī.+ 8 Na fai atu ē e vālea i ē e faautauta, ‘Ia aumai sina suāuu ma i matou, auā o le a pepē a matou molī.’ 9 Na tali mai ē e faautauta: ‘Atonu e lē lava mo i matou ma outou. Ae ia outou ō atu i ē e faatauina atu suāuu, ma faatau mai ai ni a outou suāuu.’ 10 A o latou ō atu e faatau, ae taunuu mai loa le alii faaipoipo. Ua ō taupou ua uma ona sauni, faatasi ma ia i le ʻaiga o le faaipoipoga,+ ona tapuni ai lea o le faitotoʻa. 11 Mulimuli ane, ona ō mai ai lea o isi taupou ma faapea mai, ‘Lau susuga e, lau susuga e, seʻi tatala mai le faitotoʻa iā i matou!’+ 12 Ae ua tali atu o ia, ‘Ou te taʻu atu iā te outou le mea moni, ou te lē iloa outou.’

13 “O le mea lea, ia faaauau ai ona outou mataala,+ auā tou te lē iloa le aso po o le itula.+

14 “Ua faatusaina foʻi le Malo i se tagata na faimalaga i nuu mamao. A o leʻi malaga, na ia aami ana pologa ma tuuina atu iā i latou ana mea.+ 15 Na ia avatu taleni* e lima i le tasi, e lua i le isi, ma le tasi i le isi, e fua i le mea e mafaia e le tagata, ona ia malaga lea i nuu mamao. 16 Ona alu loa lea o lē na avatu i ai taleni e lima ma faaaogā i se pisinisi, ma maua mai ai isi taleni e lima. 17 E faapena foʻi lē na avatu i ai taleni e lua, na maua mai ai le isi lua. 18 A o le pologa na avatu i ai le taleni e tasi, na alu o ia ma eli le palapala ma nanā ai le tupe* a lona matai.

19 “Ina ua mavae se taimi umi, ona sau ai lea o le matai o na pologa ina ia toe totogi atu ana tupe na iā i latou.+ 20 Ona sau lea o lē na avatu i ai taleni e lima ma tuuina mai isi taleni e lima ma faapea mai, ‘Lau susuga e, na e tuuina mai iā te aʻu taleni e lima, ae o lenei ua ou maua ai isi taleni e lima.’+ 21 Na faapea atu lona matai iā te ia: ‘Mālō lava le pologa lelei ma le faamaoni! Na e faamaoni i mea iti, ou te tofia oe e vaaia mea e tele.+ Inā olioli ia faatasi ma lou matai.’+ 22 Ona sau ai lea o le auauna na avatu i ai taleni e lua, ma faapea mai, ‘Lau susuga e, na e tuuina mai iā te aʻu taleni e lua, a o lenei ua ou maua ai isi taleni e lua.’+ 23 Na faapea atu lona matai iā te ia: ‘Mālō lava le pologa lelei ma le faamaoni! Na e faamaoni i mea iti, ou te tofia oe e vaaia mea e tele. Inā olioli ia faatasi ma lou matai.’

24 “Mulimuli ane, ona sau ai lea o le pologa na avatu i ai le taleni e tasi ma faapea mai: ‘Lau susuga e, na ou iloa o oe o se tagata e tagisā, ua e selesele i mea e te leʻi lūlūina, ma ua e aoaoina mea e te leʻi faataapeapeina.+ 25 O lea, na ou fefe ai ma ou alu atu ma nanā lau taleni i le palapala. Ia, o lau taleni lea.’ 26 Ona tali atu lea o le matai iā te ia: ‘Le pologa leaga ma le paiē, na e iloa lava na ou seleseleina mea ou te leʻi lūlūina, ma na ou aoaoina mea ou te leʻi faataapeapeina, a ea? 27 O lea, na tatau ai ona e teuina laʻu tupe* i le faletupe, ma pe a ou taunuu mai e maua ai laʻu tupe ma lona pasene.

28 “‘O lea, ia outou aveese le taleni mai iā te ia ma avatu i lē ua iai taleni e sefulu.+ 29 Auā o sē ua iai mea, e foaʻiina atu nisi mea iā te ia ina ia atili ai ona tele ana mea. A o sē ua leai se mea, e oo lava i mea ua iā te ia, e aveesea mai iā te ia.+ 30 Ia lafo i fafo i le pogisa lea pologa lē aogā. O i inā e tagiauē ma lilivau ai ona nifo.’

31 “Pe a sau le Atalii o le tagata+ i lona mamalu, ma agelu uma faatasi ma ia,+ ona tiʻetiʻe ai lea o ia i lona nofoālii mamalu. 32 O le a faapotopotoina atunuu uma i ona luma, ona tuueseeseina lea e ia o tagata, e pei ona tuueseeseina e se leoleo mamoe o mamoe ma ʻoti. 33 Ona ia tuuina lea o mamoe+ i lona itu taumatau, a o ʻoti i lona itu tauagavale.+

34 “Ona fai atu lea o le Tupu i ē o i lona itu taumatau: ‘Ō mai ia outou o ē ua faamanuiaina e loʻu Tamā, ia fai mo outou tofi le Malo ua saunia mo outou talu ona faavaeina le lalolagi. 35 Auā na ou fia ʻai, ona outou aumai ai lea o se mea ou te ʻai ai; na ou fia inu, ona outou aumai ai lea o ni vai ou te inu ai. Na avea aʻu o se tagata ese, ona outou talileleia lea o aʻu.+ 36 Na ou lē lavalavā,* ona outou faaofuina lea o aʻu.+ Na ou maʻi, ona outou tausia ai lea o aʻu. Na ou iai i le falepuipui, ona outou asiasi mai ai lea iā te aʻu.’+ 37 Ona tali mai lea o ē amiotonu iā te ia: ‘Le Alii e, o anafea na matou iloa ai oe o e fia ʻai ma fafaga iā te oe, pe fia inu ma faainu iā te oe?+ 38 O anafea na matou iloa ai o oe o se tagata ese ma matou talileleia ai oe, pe e lē lavalavā ma matou faaofuina ai oe? 39 O anafea na matou iloa ai oe o e maʻi pe iai i le falepuipui ma matou asiasi atu ai iā te oe?’ 40 Ona tali atu lea o le Tupu iā i latou, ‘E moni ou te fai atu iā te outou, auā na outou faia i se tasi o oʻu uso e sili ona faatauvaa, o aʻu lava lea ua outou faia i ai.’+

41 “Ona ia faapea atu lea iā i latou o i lona itu tauagavale: ‘Inā ō ese atu ia outou mai iā te aʻu,+ auā ua faamalaiaina outou i le afi e faavavau+ ua saunia mo le Tiapolo ma ana agelu.+ 42 Auā na ou fia ʻai, ae tou te leʻi aumai se mea ou te ʻai ai; na ou fia inu, ae tou te leʻi aumai ni vai ou te inu ai. 43 Na avea aʻu ma tagata ese, ae e tou te leʻi talileleia aʻu; na ou lē lavalavā, ae e tou te leʻi faaofu iā te aʻu; na ou maʻi ma iai i le falepuipui, ae e tou te leʻi tausia aʻu.’ 44 Ona latou tali mai foʻi lea: ‘Le Alii e, o anafea na matou iloa ai o e fia ʻai, pe e fia inu, po ua avea o se tagata ese, po ua lē lavalavā, po o maʻi po o iai i le falepuipui, ae e matou te leʻi auauna atu iā te oe?’ 45 Ona ia tali atu lea iā i latou: ‘E moni ou te fai atu iā te outou, auā na outou lē faia i se tasi o ē sili ona faatauvaa o i latou nei, o aʻu lava lea ua outou lē faia i ai.’+ 46 Ona ō atu ai lea o i latou nei i le faaumatiaga e faavavau,+ a o ē e amiotonu e ō atu i le ola e faavavau.”+

26 Ua uma ona fetalai atu Iesu i nei upu, ona ia faapea atu lea i ona soo: 2 “Ua outou iloa ua toe lua aso ona oo lea i le Paseka,+ ma e tuuina atu ai le Atalii o le tagata ina ia tutuʻi i luga o le laau.”+

3 O le taimi lea ua faapotopoto ai le ʻaufaitaulaga sili ma toeaina o le nuu, i le lotoā o le fale o le ositaulaga sili o lē ua igoa iā Kaiafa,+ 4 ma taupulepule+ e fai se togafiti ina ia puʻe ai Iesu ma fasiotia. 5 Peitaʻi, ua latou faapea atu: “Aua le faia i le tausamiga ina neʻi vevesi tagata.”

6 A o iai Iesu i Petania i le fale o Simona le lepela,+ 7 ona sau ai lea o se fafine ma se fagu alapasa ua iai le suāuu manogi taugatā, ma liligi i lona ao a o taumafa.* 8 Ua vāai atu le ʻausoo i lenei mea, ona feita ai lea ma fai ane: “Aiseā ua maʻimau ai? 9 Auā e mafai ona faatau atu lenei suāuu i ni tupe se tele, ma foaʻi atu i tagata matitiva.” 10 Ua silafia e Iesu lenei mea, ona faapea atu lea iā i latou: “Aiseā e tou te faalavelave ai i le fafine? O loo ia faia se gaoioiga lelei iā te aʻu. 11 Auā tou te faatasi pea ma tagata matitiva,+ ae tou te lē faatasi pea ma aʻu.+ 12 Ina ua uu e lenei fafine loʻu tino i le suāuu manogi, ua ia saunia ai loʻu tino mo loʻu tanuga.+ 13 E moni ou te fai atu iā te outou, po o fea lava i le lalolagi e talaʻiina ai lenei tala lelei, e taʻua ai foʻi ma le mea na faia e lenei fafine, e manatua ai o ia.”+

14 Ona alu atu lea o le tasi o le toʻa 12, e igoa iā Iuta le Sekara+ i le ʻaufaitaulaga sili,+ 15 ma faapea atu: “E fia se mea tou te aumaia iā te aʻu ou te faalataina ai o ia iā te outou?”+ Ona latou lotomalilie lea e avatu iā te ia le 30 tupe siliva.+ 16 Ona amata mai ai lea i lenā lava aso, ona ia saʻili se avanoa lelei e faalataina ai o ia.

17 I le aso muamua o le Tausamiga o Falaoa e Lē Faafefeteina,+ ua ō mai ai soo iā Iesu ma faapea mai: “O fea e te finagalo e matou te saunia, e te taumafa ai le Paseka?”+ 18 Ua ia faapea atu: “Ia ō atu i le aai i le tasi tagata ma fai atu i ai, ‘Ua fai mai le Aʻoaʻo: “Ua lata mai loʻu taimi ua atofaina; o le a ou faamanatuina le Paseka ma oʻu soo i lou fale.”’” 19 Ona faia lea e le ʻausoo e pei ona faatonuina ai i latou e Iesu, ma ua latou saunia mea mo le Paseka.

20 Ua oo i le afiafipō,+ ua taoto o ia e aai faatasi ma ona soo e toʻa 12.+ 21 A o latou aai, ua fetalai atu o ia: “E moni ou te fai atu iā te outou, e iai se tasi o outou e na te faalataina aʻu.”+ 22 Ona o le matuā tigā i lenei mea, ua latou taʻitasi ma fesili mai iā te ia: “Le Alii e, o aʻu ea?” 23 Ua ia tali atu: “O lē e loiloi faatasi a ma falaoa i le ipu, o ia lenā e faalataina aʻu.+ 24 E moni, e pei ona tusia e faatatau iā te ia, e alu lava le Atalii o le tagata, a o lē na te faalataina le Atalii o le tagata,+ oi talofa iā te ia!+ Sa sili ai pe ana lē fanau mai o ia.”+ 25 Ona tali mai lea o Iuta, o lē ua toeitiiti ona faalataina lea o ia, e faapea: “Le Aʻoaʻo e,* o aʻu ea?” Ua fetalai atu Iesu: “O lenā tonu lava ua e fai mai ai.”

26 A o latou aai, ona tago lea o Iesu i le areto, ua faia le faafetai, ona ia vaevae lea+ ma avatu i ona soo, ma faapea atu: “Ia outou aai. Auā o le faatusa lenei o loʻu tino.”+ 27 Ua ia tago foʻi i le ipu, ua faia le faafetai, ma avatu iā i latou, ua faapea atu: “Inā inu ia outou uma i ai,+ 28 auā o le faatusa lenei o loʻu toto+ o le ‘toto o le feagaiga,’+ e faamaligiina mo tagata e toʻatele+ e faamagalo ai agasala.+ 29 Ae ou te fai atu iā te outou: Ou te lē toe inu i lenei uaina, seʻia oo i le aso ou te inu faatasi ai ma outou i le uaina fou i le Malo o loʻu Tamā.”+ 30 Mulimuli ane, ina ua uma ona usu o viiga,* ona latou ō atu lea i le mauga o Olive.+

31 Ua fetalai atu Iesu iā i latou: “O le a outou tuulafoaʻia aʻu* i lenei pō, auā ua tusia: ‘Ou te taia le leoleo mamoe, ona taapeape ai lea o le lafu mamoe.’+ 32 Peitaʻi, pe a mavae loʻu toetū, ona ou muamua atu lea iā te outou i Kalilaia.”+ 33 Ae ua tali mai Peteru iā te ia: “E tusa lava pe tuulafoaʻia oe e i latou uma, ae ou te lē tuulafoaʻia lava oe!”*+ 34 Ua fetalai atu Iesu iā te ia: “E moni, ou te fai atu iā te oe, i le pō lava lenei a o leʻi vivini le toa, ae ua faatolu ona e faafiti iā te aʻu.”+ 35 Ua fai mai Peteru iā te ia: “E tusa lava po ou te oti faatasi ma oe, ou te lē faafitia lava oe.”+ Ua fai mai foʻi faapena isi soo uma.

36 Ona ō atu lea o Iesu ma ona soo i le mea ua taʻua o Ketesemane,+ ma ua ia faapea atu iā i latou: “Ia nonofo atu i inei, ae seʻi oʻu alu i o ou te tatalo ai.”+ 37 Ua ia ave Peteru ma atalii e toʻalua o Sepetaio, ua amata ona tigā lona finagalo, ma ua matuā atuatuvale lava.+ 38 Ona ia fetalai atu lea iā i latou: “Ua ou matuā tigā lava e oo i le oti. Ia outou nonofo i inei ma ia faaauau ona mataala faatasi ma aʻu.”+ 39 Ua maliu teisi atu o ia i luma, ua faapaʻū faō ma tatalo+ e faapea: “Loʻu Tamā e, afai e mafai, ia aveese lenei ipu+ mai iā te aʻu. Ae aua le faia loʻu loto a o lou finagalo.”+

40 Ua sau o ia i ona soo, ua maua i latou o momoe, ona ia fetalai atu lea iā Peteru: “Pe e tou te lē mafai ea ona faaauau ona mataala faatasi ma aʻu i se itula e tasi?+ 41 Ia faaauau ona mataala+ ma tatalo e lē aunoa,+ ina ia aua neʻi outou lolo atu i faaosoosoga.+ Ua naunau* i ai le loto, ae ua vaivai le tino.”+ 42 Ua toe alu atu faalua o ia ma tatalo e faapea: “Loʻu Tamā e, afai e lē mafai ona aveese lenei ipu seʻi vaganā ua ou inu ai, ia faia lou finagalo.”+ 43 Ua toe alu ane o ia ma maua i latou ua momoe auā ua vaivai. 44 Ua ia tuua i latou ma toe alu ese, ma o le faatolu ai lea ona tatalo atu i upu lava na. 45 Ona toe alu ane lea o ia i le ʻausoo ma faapea atu: “Aiseā ua outou momoe ai ma mālōlō i lenei taimi? Faauta! Ua oo mai le itula e faalataina ai le Atalii o le tagata, ma tuuina atu i tagata agasala. 46 Inā tutū ia i luga ma tatou ō. Faauta! Ua latalata mai lē na te faalataina aʻu.” 47 A o fetalai o ia, vaai foʻi! ua sau Iuta, o se tasi o le toʻa 12, faatasi ma le motu o tagata ma a latou pelu ma pouvai, o ē na auina mai e le ʻaufaitaulaga sili ma toeaina o le nuu.+

48 Ua uma ona tuuina e lē na te faalataina o ia le faailoga iā i latou e faapea: “O lē ou te sogi i ai, o ia lenā; ia outou puʻe iā te ia.” 49 Ona savali saʻo mai lea o ia iā Iesu ma faapea mai: “Mālō lava iā te oe le Aʻoaʻo e!”* ma sogi lemū mai iā te ia. 50 Ae ua fetalai atu Iesu iā te ia: “Sole, o le ā le mea ua e sau ai?”+ Ona latou fetagofi atu lea ma puʻe iā Iesu. 51 Faauta! ua iai se tasi ua faatasi ma Iesu, ua tago o ia i lana pelu ua seʻi, ma tā ai le pologa a le ositaulaga sili, ma tipiesea ai lona taliga.+ 52 Ona fetalai atu lea o Iesu iā te ia: “Ia toe sulu lau pelu i lona faamoega,+ auā o i latou uma e fetagofi i le pelu, e faaumatia i le pelu.+ 53 Pe e te manatu e lē mafai ona ou ʻaiʻoi atu i loʻu Tamā, ia aauina mai loa iā te aʻu i le taimi nei le sili atu ma le 12 o lekeono o agelu?+ 54 Afai o lea, e faapefea la ona faataunuuina mea ua tusia i Tusitusiga Paia e tatau ona tutupu?” 55 Ona fetalai atu lea o Iesu i lenā taimi i le motu o tagata: “Po ua outou ō mai ea ma a outou pelu ma pouvai e puʻe iā te aʻu, e pei o se tagata faomea? O aso taʻitasi na ou nofo ai i le malumalu ma aʻoaʻo atu,+ ae tou te leʻi puʻeina aʻu.+ 56 Ae ua oo nei mea uma ina ia taunuu ai tusitusiga* a le ʻauperofeta.”+ Ona tuulafoaʻia lea o ia e ona soo uma ae latou sosola.+

57 Ona ō atu lea o ē na puʻeina Iesu ma taʻitaʻi atu o ia iā Kaiafa+ le ositaulaga sili, ma o i inā ua potopoto faatasi ai le ʻautusiupu ma le ʻautoeaina.+ 58 Ae ua mulimuli mamao mai Peteru iā te ia, ua oo i le lotoā o le fale o le ositaulaga sili ma ua ulu atu i ai, ua nofo o ia faatasi ma auauna o le fale ina ia iloa po o le ā le mea o le a oo i ai.+

59 Ua saʻilia e le ʻaufaitaulaga sili ma alii uma o le Faamasinoga Sili,* ni molimau pepelo e faasaga iā Iesu ina ia faasalaina ai o ia i le oti.+ 60 Ae e leʻi maua lava, e ui ina toʻatele molimau pepelo na ō mai.+ Mulimuli ane, ona ō mai ai lea o isi molimau e toʻalua 61 ma faapea mai: “Na fai mai lenei tagata, ‘E mafai ona ou tala i lalo le malumalu o le Atua ma toe fausia i aso e tolu.’”+ 62 O lea, ua tulaʻi ai le ositaulaga sili ma faapea mai iā te ia: “E te lē tali mai ea? O le ā lenei mea ua molia ai oe e nei tagata?”+ 63 Ae ua lē tali atu Iesu.+ Ona faapea mai lea o le ositaulaga sili iā te ia: “Ou te fai atu iā te oe, ia e tautō i le Atua soifua e te tautala i le mea moni, ma taʻu mai iā i matou po o oe o le Keriso, le Alo o le Atua!”+ 64 Ua fetalai atu Iesu iā te ia: “O lenā tonu lava ua e fai mai ai. Ae ou te fai atu iā te outou: E amata atu nei, o le a outou vāai i le Atalii o le tagata+ o loo nofo i le itu taumatau o Lē e Malosi,*+ ma e sau foʻi o ia i ao o le lagi.”+ 65 Ona saeia lea e le ositaulaga sili o ona ofu tele ma faapea ane: “Ua upuleaga o ia i le Atua! O le ā le aogā o nisi molimau iā i tatou? O lenā ua outou faafofoga i lona upuleaga i le Atua. 66 O le ā so outou finagalo?” Ua latou tali ane: “E tatau ona oti o ia.”+ 67 Ona latou tuufeanu lea i ona fofoga+ ma tatuʻi iā te ia.+ Ua tapō foʻi e isi ona fofoga,+ 68 ma fai mai: “Le Keriso e, afai o oe o se perofeta, ia taʻu mai iā i matou po o ai na pō atu iā te oe?”

69 O le taimi lea o loo nofo ai Peteru i fafo i le lotoā, ma ua alu atu se auauna teine ma faapea atu: “O oe foʻi le isi na faatasi ma Iesu le Kalilaia!”+ 70 Ae ua ia faafiti i o latou luma ma faapea ane: “Ou te lē iloa le mea o e fai mai ai.” 71 Ua alu atu o ia i le faapaologa o le faitotoʻa, ua mātauina o ia e se isi foʻi teine ma ua ia faapea atu i ē ua iai i inā: “Sa faatasi lenei tagata ma Iesu le Nasareta.”+ 72 Ua toe faafiti o ia ma tautō ane: “Ou te lē iloa lenā tagata!” 73 E leʻi leva lava, ae ō ane ē ua tutū mai ma faapea atu iā Peteru: “E moni, o oe o se tasi o i latou, auā e iloa i lau gagana.” 74 Ona ia tautō lea ma fai atu ma le maumauaʻi: “Ou te lē iloa lava lenā tagata!” Ona vivini loa lea o le toa. 75 Ua manatua ai e Peteru le fetalaiga a Iesu: “A o leʻi vivini le toa, ae ua faatolu ona e faafiti iā te aʻu.”+ Ona alu lea o ia i fafo ma tagi masūsū.

27 Ua oo i le taeao, ona taupulepule ai lea o le ʻaufaitaulaga sili ma toeaina o le nuu ina ia fasiotia Iesu.+ 2 Ua latou saisai o ia, ona taʻitaʻiina atu lea ma tuuina atu i le kovana o Pilato.+

3 Ua iloa e Iuta le faalata ua faasalaina Iesu, ona salamō ai lea o ia ma toe faafoʻi atu tupe siliva e 30 i le ʻaufaitaulaga sili ma toeaina,+ 4 ua faapea atu: “Ua ou agasala ina ua ou faalataina le tagata lē sala.”* Ae ua latou faapea mai: “O le ā la le matou mea e fai i ai? Faitalia oe!” 5 Ona ia lafoaʻi lea o tupe siliva i le malumalu, ua alu ese ma sisi iā te ia lava.+ 6 Peitaʻi, ua ave e le ʻaufaitaulaga sili tupe siliva ma faapea ane: “E sā ona tuu nei tupe i le mea e teu ai oloa, auā o le tau lea o le toto.” 7 Ua latou talatalanoa faatasi, ona latou faaaogā lea o le tupe e faatau ai le fanua o le fai ipu omea e fai ma fanuatanu mo tagata ese. 8 O le mea lea ua taʻua ai lenā fanua, o le Fanua o le Toto+ e oo mai lava i le asō. 9 Ua taunuu ai le upu na ala mai i le perofeta o Ieremia e faapea: “Ua latou ave tupe siliva e 30, o le tau lea o le tagata ua faatauina, o lē ua tuu i ai e nisi o le fanauga a Isaraelu se tau, 10 ma ua latou faatau ai le fanua o le fai ipu omea, e tusa ma le mea ua poloaʻi mai ai Ieova* iā te aʻu.”+

11 Ona tulaʻi lea o Iesu i luma o le kovana, ma ua fesili mai le kovana iā te ia: “Po o oe ea o le Tupu o tagata Iutaia?” Ua tali atu Iesu: “O lenā tonu lava ua e fai mai ai.”+ 12 Peitaʻi, a o tuuaʻia o ia e le ʻaufaitaulaga sili ma toeaina, e leʻi tali atu o ia.+ 13 Ona fai mai lea o Pilato iā te ia: “E te lē o faalogo atu ea i le tele o mea ua latou tuuaʻia ai oe?” 14 Ae e leʻi tali atu lava o ia i se upu e tasi, ona matuā ofo ai lea o le kovana.

15 I tausamiga taʻitasi o le Paseka, e masani ona faasaʻoloto ai e le kovana se pagota e mananaʻo i ai le motu o tagata.+ 16 I le taimi lenā, o loo latou taofia ai se pagota e sili ona leaga, e igoa iā Parapa. 17 O lea, a o latou faapotopoto faatasi, ua faapea atu Pilato: “O ai tou te mananaʻo ou te faasaʻolotoina, o Parapa po o Iesu o lē ua taʻua o le Keriso?” 18 Auā ua iloa e Pilato, o lo latou matauʻa ua latou tuuina atu ai o ia. 19 E lē gata i lea, a o nofo o ia i le nofoa faamasino, ona auina mai lea e lana avā o se feʻau iā te ia, e faapea: “Aua neʻi e faia se mea i lenā tagata amiotonu, auā ua ou matuā tigāina lava i le asō i se miti ona o ia.” 20 Ae ua tauanau e le ʻaufaitaulaga sili ma toeaina le motu o tagata ina ia talosaga atu mo Parapa,+ ae ia fasiotia Iesu.+ 21 Ua tali atu le kovana iā i latou: “O ai o i laʻua tou te mananaʻo ou te faasaʻolotoina?” Ua latou fai mai: “O Parapa.” 22 Ua fai atu Pilato iā i latou: “O le ā la se mea ou te faia iā Iesu, o lē ua taʻua o le Keriso?” Ae ua latou faapea mai: “Ia tutuʻi o ia i luga o le laau!”+ 23 Ua ia faapea atu: “Aiseā? O le ā se mea leaga ua ia faia?” Ae ua atili ai ona latou alalaga mai: “Ia tutuʻi o ia i luga o le laau!”+

24 Ina ua iloa e Pilato ua lē aogā ana upu, ma ua atili ai ona latou vāvāō, ona aumaia lea e Pilato o le vai ma fafano ai ona lima i luma o le motu o tagata, ma faapea atu: “E mamā aʻu mai le toto o lenei tagata. Faitalia outou.” 25 O lea, ua tali mai ai tagata uma: “Ia i luga o i matou ma a matou fanau lona toto.”+ 26 Ona ia faasaʻolotoina lea o Parapa, ae faatonuina e sasa Iesu+ ma tuu atu o ia ina ia tutuʻi i luga o le laau.+

27 Ona ave lea o Iesu i le maota o le kovana e fitafita a le kovana, ma ua latou faapotopoto faatasi atu iā te ia le ʻaufitafita uma.+ 28 Ua latou toese lona ofu ae faaofu iā te ia i le ofu mūmū sesega,+ 29 ua latou fili foʻi le pale tuitui ma tuu i lona ao, ma tuu foʻi le ū i lona aao taumatau. Ua latou tootutuli i ona luma ma tauemu iā te ia, ma faapea mai: “Talofa* le Tupu o tagata Iutaia!” 30 Ua latou tuufeanu iā te ia+ ma fetagofi i le ū ma tā ai lona ao. 31 Ina ua uma ona latou tauemu iā te ia, ona latou tatala ese lea o le ofu ae faaofu i lona ofu tele, ma taʻitaʻi atu o ia ina ia tutuʻi i luga o le laau.+

32 A o ō atu i fafo, ua latou maua ai le tagata Kurene e igoa iā Simona. Ua latou faatonu lenei tagata ina ia amo le laau e faapuapuagatia ai* Iesu.+ 33 Ina ua latou taunuu i le nofoaga e taʻua o Kolokota, o lona uiga o le fanua ua taʻua o le Ulupoo,+ 34 ona latou avatu lea iā te ia o le uaina ua fefiloi ma laau oona ina ia inu ai,+ ae ina ua tofo i ai, na musu o ia e na te inuina. 35 Ua latou tutuʻi o ia i luga o le laau, ona tufatufa lea o ona ofu tele e ala i le faia o le vili,*+ 36 ma ua latou nonofo ai i inā ina ia leoleoina o ia. 37 Ua latou tuu foʻi i luga aʻe o lona ao se faailoilo ua tusia ai le mea ua tuuaʻia ai o ia, e faapea: “O Iesu lenei, o le Tupu o tagata Iutaia.”+

38 Ua tutuʻi foʻi i ona autafa ni tagata faomea se toʻalua, o le tasi i lona itu taumatau ma le isi i lona itu tauagavale.+ 39 Ua tauemu iā te ia+ tagata ua ui ane ma lūlū o latou ulu+ 40 ma faapea mai: “O oe na o lē sa faapea mai e mafai ona e tala i lalo le malumalu ma toe faia i aso e tolu,+ ia e faaola iā te oe! Afai o oe o le alo o le Atua, inā alu ifo ia i lalo mai i le laau e faapuapuagatia ai!”*+ 41 Ua faapena foʻi ona tauemu le ʻaufaitaulaga sili, o le ʻautusiupu, ma toeaina iā te ia ma faapea mai:+ 42 “Sa ia faaolaina isi; ae ua lē mafai ona ia faaola iā te ia lava! O ia o le Tupu o Isaraelu;+ seʻi tuu pe alu ifo o ia i lalo mai i le laau e faapuapuagatia ai* ona tatou talitonu ai lea iā te ia. 43 Na faatuatua o ia i le Atua; seʻi tuu atu la i le Atua e na te laveaʻiina o ia pe a finagalo malie iā te ia,+ auā ua ia faapea mai, ‘O aʻu o le Atalii o le Atua.’”+ 44 Ua faapena foʻi ona faifai iā te ia+ o ē e faomea na tutuʻi i laau i ona autafa.

45 Ua amata ona pogisa le nuu atoa i le itula e ono* seʻia oo i le itula e iva.*+ 46 Pe e tusa o le itula e iva, ona alaga leotele ai lea o Iesu e faapea: “Eli, Eli, lama sapatani?” o lona uiga, “Loʻu Atua e, loʻu Atua e, aiseā ua e tuulafoaʻia ai aʻu?”+ 47 Ina ua faalogo mai isi tagata o loo tutū latalata ane, ona latou faapea lea: “O loo valaau atu lenei tagata iā Elia.”+ 48 Ona tamoʻe loa lea o le tasi o i latou, ua aumai le omomi ma fufui i le uaina oona, ua tuu i le pito o le ū ma avatu e inu ai o ia.+ 49 Ae ua faapea atu isi o i latou: “Tuu ai pea o ia! Seʻi tatou vāai pe e sau Elia e faaola o ia.” 50 Ua toe alaga leotele Iesu, ona tuuina atu ai lea e ia o lona agaga.+

51 Faauta! Ua saeluaina+ le ʻie puipui o le malumalu,+ e mai lava i luga e oo i lalo,+ ma ua lūlūina le eleele, ma māvaevae papa. 52 Ua matalatala tuugamau, ma ua lafoina mai i fafo le tele o tino o tagata paia ua maliliu,* 53 ma ua iloa atu e le toʻatele o tagata. (Ina ua mavae le toetū o Iesu, e iai nisi na ō mai mai i fanuatanu na ulu atu i le aai paia.) 54 A o le taʻitaʻiʻau ma i latou na leoleoina Iesu, ina ua latou vaaia le mafuiʻe ma mea ua tutupu, ona matuā fefefe ai lea o i latou ma faapea ane: “E moni, o le Alo lava lenei o le Atua.”+

55 Ua vaavaai mamao mai foʻi le toʻatele o fafine o ē na ō mai faatasi ma Iesu mai Kalilaia e auauna iā te ia;+ 56 ua latou faatasi ma Maria le Makatala, Maria le tinā o Iakopo ma Iose, ma le tinā o atalii o Sepetaio.+

57 Ua oo i le afiafi, ona sau lea o se tagata mauʻoa mai Arimataia e igoa iā Iosefa, o se tasi o soo o Iesu.+ 58 Ua alu atu lenei tagata iā Pilato ma talosaga atu mo le tino o Iesu.+ Ona faatonuina lea e Pilato ina ia tuuina atu iā te ia.+ 59 Ua ave e Iosefa le tino ma tāʻai i le ʻie lino mamā ma lelei,+ 60 ma ua tuu i lona tuugamau fou+ sa ia vaneina i le papa. Ona ia tuu lea o le maa telē i le gutu o le tuugamau ma alu ese. 61 Ae ua nonofo ai pea Maria le Makatala ma le isi Maria i luma o le tuugamau.+

62 I le aso na sosoo ai, ina ua uma le aso o le Sauniuniga,+ ona faapotopoto ai lea o le ʻaufaitaulaga sili ma le ʻau Faresaio i luma o Pilato 63 ma faapea atu: “Lau susuga e, ua matou manatua na fai mai lenā tagata pepelo a o ola, ‘E toe faatūina mai aʻu pe a mavae aso e tolu.’+ 64 O le mea lea, ia poloaʻi atu ina ia leoleoina le tuugamau seʻia oo i le aso lona tolu, ina neʻi ō atu ona soo ma gaoia lona tino+ ma faapea atu i tagata, ‘Ua toe faatūina o ia mai le oti!’ Ona sili ai lea ona leaga o lenei pepelo nai lo le pepelo muamua.” 65 Ua faapea atu Pilato iā i latou: “Ia ō ma nei leoleo ma ia outou matuā leoleoina lelei le tuugamau.” 66 Ona latou ō atu lea ma faamau lelei le tuugamau, ua faamauina i le maa ma tuu ai leoleo.

28 Ua mavae le Sapati, ma ua tafa mai ata o le uluaʻi aso o le vaiaso, ua ō atu ai Maria le Makatala ma le isi Maria e matamata i le tuugamau.+

2 Faauta! na lūlū se mafuiʻe tele; auā na sau le agelu a Ieova* mai i le lagi, ma fuliese le maa, ma nofo ai i luga.+ 3 O ona foliga ua pei o le uila, ma ona ofu ua papaʻe e pei o le kiona.+ 4 Ioe, ua tetemū leoleo ona o le fefefe iā te ia, ma ua pei ai o ni tagata ua feoti.

5 Ae ua fai atu le agelu i fafine: “Aua lua te fefefe, auā ua ou iloa o loo oulua saʻilia Iesu o lē na tutuʻi i luga o le laau.+ 6 E lē o i inei o ia auā ua toe faatūina e pei ona ia fetalai ai.+ Ō mai e vāai i le mea na tuu ai o ia. 7 Inā vave ō ia ma taʻu atu i ona soo e faapea, ua toe faatūina o ia mai i le oti, faauta foʻi! ua muamua atu o ia iā te outou i Kalilaia.+ O le a outou vāai iā te ia i inā. Faauta! o le feʻau lenā na ou sau e taʻu atu iā te oulua.”+

8 Ona la ō ese faatopetope lea mai i le tuugamau ma le matataʻu ma le olioli tele, ua la taufetuli e taʻu atu i ona soo.+ 9 Faauta! ua feiloaʻi Iesu ma i laʻua ma faapea atu: “Si oʻu alofa!” Ua la faalatalata atu ma fetagofi i ona vae ma ifo atu iā te ia. 10 Ona fetalai atu lea o Iesu iā i laʻua: “Aua lua te fefefe! Ia oulua ō ma taʻu atu i oʻu uso, ina ia latou ō atu ai i Kalilaia, ma o i inā e latou te vāai mai ai iā te aʻu.”

11 A o la ō atu i le ala, ae ua ō atu nisi o leoleo+ i le aai ma taʻu atu i le ʻaufaitaulaga sili mea uma ua tutupu. 12 Ua faapotopoto le ʻaufaitaulaga sili ma toeaina e fai la latou fono, ona latou tuuina atu lea o tupe siliva e tele i fitafita 13 ma faapea atu: “Ia outou fai atu, ‘Na ō mai ona soo i le pō ma gaoia lona tino a o matou momoe.’+ 14 Ae afai e faalogo i ai le kovana, ona matou faamatala atu lea o le mea na tupu iā te ia* ma tou lē afāina ai.” 15 Ona latou ave lea o tupe siliva ma faia e pei ona faatonuina ai i latou, ma ua salalau atu foʻi lenei tala i tagata Iutaia e oo mai i le asō.

16 Peitaʻi, ua ō atu soo e toʻa 11 i Kalilaia+ i le mauga na faatonuina i latou e Iesu e latou te feiloaʻi ai.+ 17 Ina ua latou vāai iā te ia, ona latou ifo atu lea iā te ia, peitaʻi ua masalosalo nisi. 18 Ua faalatalata atu Iesu ma fetalai atu iā i latou: “Ua tuuina mai iā te aʻu le pule uma i le lagi ma le lalolagi.+ 19 O le mea lea, ia outou ō atu e fai tagata o nuu uma lava+ ma soo, ma papatiso atu iā i latou+ i le suafa o le Tamā, ma le Atalii, ma le agaga paia, 20 ma ia aʻoaʻoina i latou ia tausi i mea uma ua ou poloaʻi atu ai iā te outou.+ Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.”*+