O le Mea sa Ia Sailia o le Faamaoni

I Ecuador na alu atu ai se tamaitai talavou e fai sana faatalanoaga mo se avanoa faigaluega. Ina ua uma ona talanoa ma isi foi tagata sa faatalosaga—e 36 pe a tuufaatasi—na ia iloa ai e foliga mai atonu o le a ia lē mauaina le avanoa. O na tagata e iai ni o latou poto masani i galuega ma sa aʻoaʻoina i iunivesite, a o ia e leai. Ma e lua fesili na sese ona ia taliina mai fesili e ono na fesiligia. Ae peitai, o le isi fesili sa faatatau i ni lagona masani o le tagata lava ia e faapea: “O le ā sou manatu i le uiga o le upu moni?”

Na tali le tamaitai: “O le upu moni ua lē na o se mea e tau matemate, ae o se mea e tatau ona tatou ola aʻe ai. E tatau ona tatou tautala i le upu moni a ia lē talapepelo, auā afai tatou te talapepelo, ua tatou mulimuli atu ai i ala o Satani le Tiapolo. Pe afai tatou te tautala i le upu moni, ua tatou faafiafiaina ai le Atua ma maua le tele o aogā mo i tatou lava.”

Ina ua fesiliga e le pule le tapuaiga a le tamaitai, na ia tali atu o ia o se tasi o Molimau a Ieova. O le aso lava na sosoo ai na logoina atu ai ua filifilia o ia mo le galuega. I le masina na sosoo ai, na fesili atu ai le tamaitai i le pule pe aisea na ia filifilia ai o ia, ma na faapea ane le pule ona o lona faamaoni.

Pe ua lē moni ea o le toatele o tagata i aso nei ua lē faamaoni? Ae i le isi itu, o tagata latou te faaaloalo i le Tusi Paia ua lauiloa i lo latou faamaoni. Na faapea mai Le Olomatamata o Iulai 1, 1995: “I le Tusi Paia, o le ‘upu moni’ e lē pei o le manatu sese fenuminumiai lea e fefinauai ai le au faifilosofia.”

O le a e maua aogā mai le faitauina e lē aunoa o Le Olomatamata, lea ua lauiloa i le lalolagi aoao ona o lona lagolagoina atoatoa o le upu moni a le Tusi Paia. Afai e te fia maua se kopi pe faia sau suesuega faale-Tusi Paia i lou aiga e aunoa ma se totogi, faamolemole tusi atu i le I.B.S.A., Box 673 Apia, Western Samoa, po o se tuatusi e latalata atu ia te oe o loo i le itulau e 5.