Na Uunaia ai o ia e Gaoioi!
O se alii mai Caracas, o le taulaga o Venezuela, na asiasi atu i lona tamā matua, o Rufino. Na nofo le tamā i La Loma, o se nuu maotua. Sa tuu atu e le atalii ia Rufino le tusi E Mafai ona E Ola e Faavavau i Parataiso i Le Lalolagi.
Mulimuli ane, na ō atu ai ni Molimau a Ieova mai Los Humocaros e talaʻi i La Loma. Na faateia i latou, ona sa fai mai pea tagata ua uma ona asiasi atu se Molimau ia i latou. Na matuā iso Molimau ona e latou te iloa e leai ni Molimau e nonofo ai i lea vaipanoa. Ona faasino atu lea e se tasi le fale o lenei tagata sa faapea o se Molimau—o le fale o Rufino!
Sa fiafia Rufino e feiloai ma ana mālō. Aisea ua mataulia ai o ia e le nuu o ia o se Molimau a Ieova? Ia, na amata ona faitau e Rufino le tusi Ola e Faavavau, ma ina ua oo lana faitau i le mataupu e 13, na ia vaaia ai le ata o Iesu o loo ia aauina atu ona soo e faia le galuega talaʻi. O le faaiuga sa faia e Rufino e faapea e tatau i Kerisiano i aso nei ona faia le galuega lava lea e tasi. O lea na amata ai loa ona ia tufa atu i ona tuaoi upu moni o le Tusi Paia lea ua ia aʻoaʻoina.
Na amata se suesuega faale-Tusi Paia a Rufino i se tulaga faifai pea, ma sa faamatala atu ia te ia sauniga a le faapotopotoga. I le Aso Sa na sosoo ai sa iai o ia i le Maota o le Malo. E ui lava o Rufino e 80 tausaga le matua, ae sa ia savali mo le tolu itula ina ia auai i sauniga! Talu mai lena aso, e na te lei toe misia lava se sauniga seʻi vaganā ua gasegase tigaina. Na iu foi ina auai o ia i le Aʻoga o le Faiva Faatiokarate ma faia ai se lauga matagofie. Na gasegase Rufino i le tausaga na teʻa nei, ma na maliu o ia ia Iulai 1996, ma le faamoemoe maumaututu i le toetu i le lalolagi parataiso.
Matou te talitonu o le a e mauaina foi aogā i lou faitauina o le tusi E Mafai ona E Ola e Faavavau i Parataiso i Le Lalolagi, e 256 itulau, e mananaia tele ona ata o loo faaaogaina ai. Pe afai e fia maua sau kopi o lea tusi pe te manao e faia sau suesuega faale-Tusi Paia i le aiga e aunoa ma se totogi, faamolemole, tusi mai i le I.B.S.A., Box 673, Apia, Western Samoa, po o se tuatusi talafeagai o loo lisiina i le itulau e 5 o lenei mekasini.