“Se Mea Faapitoa”

Ina ua maeʻa ona faitauina le tusi o Le Tagata Silisili o Ē Uma na Soifua Mai, o se tusi o loo taumafai e faailoa mai mea uma na tutupu i le soifuaga o Iesu a o iai i le lalolagi ia ua faamaumauina i Evagelia e fa, na faapea mai se fafine i Moscow, i Rusia, e 70 tausaga lona matua: “E leai se isi tusi ua ou faitauina muamua e pei o lenei tusi. Ou te manao e iloa atili mea e uiga i le Atua ma Iesu Keriso ma suesueina foi le Tusi Paia.”

E masani ona mauaina e le ofisa o le lālā o Molimau a Ieova i Rusia tusi faapea e uiga i lomiga faale-Tusi Paia. E faapena se tusi na lafoina atu e se fafine i Chelyabinsk, o se aai e silia ma le miliona tagata e iai ma e pe ā ma le afe maila [1,500 kilomita] i saute i sasaʻe o Moscow.

Sa ia faapea mai e uiga i le tusi o Le Tagata Silisili o Ē Uma na Soifua Mai: “O le tusi o se mea faapitoa. Ua totōina e le tusi i tagata se faamoemoe mo se lumanai fiafia ma fesoasoani ia i latou ia iloa le talafaasolopito anamua. A o lei oʻu mauaina lenei tusi, sa lē tāitai ona ou mafaufau i le Atua ma sa lē tāitai foi ona ou fiafia i ni lotu, a o le taimi lenei ua ou manao ou te papatiso. Ou te manao tele e suesueina la outou lomiga. Ou te manao e talanoa atu i aʻu uo, o ē masani, ma tauaiga e uiga i mea ua ou faitau i ai.”

E mafai foi ona e mauaina lomiga e fesoasoani ia te oe e aʻoaʻoina atili ai e faatatau ia Iesu ma le faamoemoe mai le Tusi Paia e faatatau i le olaga i se lalolagi fou. Pe afai e te fia mauaina se kopi o le tusi o Le Tagata Silisili o Ē Uma na Soifua Mai pe manao foi e asiasi atu se tasi e faia se suesuega faale-Tusi Paia ma oe i lou aiga e aunoa ma se totogi, faamolemole tusi atu i le I.B.S.A., Box 673, Apia, Samoa, po o se tuatusi talafeagai o loo lisiina mai i le itulau e 5.