O se Ata na Lē Mafai Ona Galo ia te Ia

NA ILOAINA e Karen, o lē ua silia nei ma le luasefulu tausaga talu ona avea ma Molimau a Ieova e faapea sa lē tāitai ona fia talanoa atu lona tamā ia te ia e uiga i ni lotu. Peitaʻi, talu ai nei lava na suia ai lena tulaga. Na umi se taimi na faataotolia ai lona tamā i le falemaʻi, seʻia toe malosi talu mai se taotoga. I se tasi aso, ina ua fiu e nofo faasamasamanoa, na ia faitauina ai se nusipepa atoa. Na matuā faamataʻuina ai o ia. Mulimuli ane ina ua toe foʻi o ia i le fale, na ia telefoni ai loa i lona afafine. Ua taʻua e Karen: “Na faapea mai Tamā ia te aʻu i luga o le telefoni, ‘Karen, o le a faaleagaina atili le lalolagi.’ Na pito sili ona lē fiafia o ia i auala o loo faileagaina ai tamaiti.”

“A o leʻi mafai ona ou maua se avanoa e faalaeiʻau atu ai ia te ia, na faafuaseʻi ona ia faapea mai: ‘Na ō mai ni tamaʻitaʻi se toʻalua i loʻu fale ananei. E masani lava ona ou i ai i tua i laʻu faatoʻaga ae na maua mai aʻu i luma e i laʻua. Na faaali mai e se tasi tamaʻitaʻi ia te aʻu se āta o se faatoʻaga matagofie. Na ou manaʻo e taʻu atu ia te ia, “Ia lelei, ae e tatau ona lua vāai i tua o loʻu fale—o loo iai se faatoʻaga matagofie,” peitaʻi ou te leʻi fai i ai faapena. Ona ia faapea mai lea ua lē o toe umi ae filemu le lalolagi atoa. Na fai mai o ia o le a pei lava o le faatoʻaga o loo i le ata, ma e mafai ona olioli ai tagata uma. Ou te leʻi taliaina le tusi. Ae ina ua la tuumuli, sa lē mafai ona ou aveesea lena ata mai loʻu mafaufau. Sa na o loʻu mafaufau pea lava i ai faatasi ai ma le manatu e uiga i le filēmū mo tagata uma. E te iloaina le tusi lea e uiga i ai laʻu tala? E mafai ona e aumai se kopi ma aʻu?’”

Na talia fiafia e Karen lona manaʻo. O le ata o loo e tagaʻi mai ai iinei lea na faasino i ai lona tamā. O le tusi ua faaulutalaina o Le Poto e Taʻitaʻia ai i le Ola e Faavavau. Pe e te fia iloa atili e faatatau i le folafolaga a le Tusi Paia e faapea o le a lē toe umi ae faia e le Atua le lalolagi atoa e avea ma faatoʻaga lea o le a ola filēmū ai tagata? E mafai ona e mauaina se kopi e ala i le faatumuina ma lafoina mai le kuponi o loo i lalo i le tuatusi o loo i le kuponi po o se tuatusi talafeagai o loo lisiina i le itulau e 5 o lenei mekasini.

□ Auina mai se kopi mo aʻu o le tusi Le Poto e Taʻitaʻia ai i le Ola e Faavavau.

□ Faamolemole faafesootaʻi mai aʻu e tusa ai o se suʻesuʻega faale-Tusi Paia e aunoa ma se totogi.