“Faamolemole Fesoasoani Mai iā te Aʻu! E na o Outou Lava Loʻu Faamoemoega”

O UPU NA E I LUGA, NA FAAIʻU AI E SE FOMAʻI i le Iunivesite Faafomaʻi i Kauna se tusi na avatu i le ofisa o Molimau a Ieova i lenā atunuu. Na faamatala atu ai e le fomaʻi e faapea:

“I le galuega, sa amata ai ona ou faitauina le tusi Fesili Ua Fesili Mai ai Talavou—Tali e Aogā. Sa ou fuafuaina e faaaogā faamatalaga mai le tusi i nisi o aʻu mataupu, ma na iai se mea na tupu ma ua lē iloa ai le tusi. E foliga mai na ave e se tasi. Na fai si oʻu lē fiafia i lenei mea—ona o le mea moni, ua lēiloa se mea sa sili ona tāua iā te aʻu. Faamolemole ia outou alolofa ma auina mai se isi kopi mo aʻu.

“Ou te matuā manaʻomia lava lenei tusi talu ai ou te asiasi atu i aʻoga ma faaalu se taimi e galulue faatasi ai ma talavou, ma e fesoasoani mai lenei tusi iā te aʻu i le taliina o le tele o a latou fesili. Afai ou te toe maua se isi kopi, o le a ou teuina faalelei i le fale. O loo iai i lenei tusi se mea e matuā tāua lava, ma atonu o le pogai lenā na ave ai e se tasi. I nei aso faigatā, e manaʻomia lava ona maua se malosi mai se isi mea. Faamolemole fesoasoani mai iā te aʻu! E na o outou lava loʻu faamoemoega.”

O le tusi, Fesili ua Fesili Mai ai Talavou, o loo iai le tele o fesili o loo mafaufau i ai talavou, e pei o le: “E Faapefea Ona Ou Faapogaia Oʻu Mātua ia Tuu Mai Atili le Saʻolotoga ia te Aʻu?,” “Pe Tatau Ona Ou Alu Ese Mai le Aiga?,” “E Faapefea Ona Ou Faia ni Uō Moni?,” “O le ā se Galuega e Ao Ona Ou Filifilia?,” “Ae ā Feusuaʻiga a o Leʻi Faaipoipo?” ma “E Faapefea Ona Ou Iloa po o se Alofa Moni?” O fesili na e i luga, ua na o ni ulutala o nisi mataupu. Ina ia talosaga mo se kopi o lenei tusi, ia faatumu le kuponi lea e i lalo ma lafo atu i le meli i le tuatusi o loo i le kuponi po o se tuatusi talafeagai o loo lisiina i le itulau e 5 o lenei mekasini.

□ Auina mai mo aʻu se kopi o le tusi Fesili ua Fesili Mai ai Talavou—Tali e Aogā.

□ Faamolemole faafesootaʻi mai aʻu mo se suʻesuʻega faale-Tusi Paia i le aiga e aunoa ma se totogi.