Le Māfuaaga Ou te Lē Ulaula Ai!

O LE mataupu lenā na tuu atu i le faitau selau o tamaiti aʻoga i le setete, o ē na auai i se tauvaga tusigatala na lagolagoina e le Faalapotopotoga Faafomaʻi i Missouri i le Iunaite Setete. E tusa ma le 675 tamaiti mai aʻoga e 42 na auai i le tauvaga. O se teineitiiti e 12 ona tausaga e igoa iā Breanna na mālō i le tauvaga, ma na tusia lana solo na mālō ai i le tusi a lea faalapotopotoga e taʻu o le Missouri Medicine. Na maua foʻi se avanoa o Breanna e faitau ai lana solo i le ʻauusufono na auai i le fono faaletausaga a lea faalapotopotoga. A o leʻi faitauina atu e Breanna lana solo i le aofia, sa ia faapea atu:

“O aʻu o se tasi o Molimau a Ieova, ma o mea uma o loo taʻua i le solo na maua mai i le Ala Mai! O se tasi o fuaiupu e sili ona ou fiafia i ai i le solo, e mai le itulau i luma o le mekasini lea. O loo iai se ata o se ulupoo o loo iai se utufaga i lona gutu ma le faaupuga o loo iai: ‘E te Fia Oti?’ Ua tele tausaga o lomia e le Ala Mai! ni mataupu e faatatau i le leaga o le ulaula.”

E ʻalofia e Molimau a Ieova le faaaogāina o le tapaa. E latou te talitonu o le faaaogāina, o se mea e leaga ai le tino, o le lē āva lea mo le meaalofa o le ola faapea ma Lē na Foafoaina le tagata. (Galuega 17:24, 25) O lea ua latou usitaia ai le faatonuga mai le Tusi Paia: “Ia tatou faamamā iā te i tatou i mea uma e leaga ai le tino atoa ma le agaga.”—2 Korinito 7:1.

O Breanna e pei lava o isi Molimau talavou, e taumafai e ola e tusa ma mataupu silisili a le Tusi Paia. O talavou faapea ua mautinoa lo latou faafiafiaina o Lē na Faia i tatou.—Faataoto 27:11.

[Ata i le itulau 17]

O loo ʻuʻuina e Breanna (ua atoa nei lona 14) lana solo