Aafiaga Leaga o Faiga Lē Tonu

I LE 2010, na faasaʻoloto ai Mikaele mai le falepuipui i Texas i Amerika, ina ua mavae le 27 tausaga o lona faasalaga ona o le toso teine—o se solitulafono e na te leʻi faia. Na faasaʻoloto o ia ina ua māeʻa suʻesuʻega o le DNA—lea e leʻi iai i le taimi na tuuaʻia ai o ia—ma na faamaonia ai e lē o ia na faia le solitulafono. Na maua mulimuli ane e leoleo ē na faia le solitulafono, ae e leʻi mafai ona molia i latou ona e tusa ai ma le tulafono, ua tele tausaga ua mavae talu ona faia le solitulafono.

E toʻatele tagata solitulafono ua sao mai i le faasalaina. Mo se faataʻitaʻiga, na lipotia mai i le nusipepa The Telegraph i Peretania e faapea: “I le sefulu tausaga ua mavae, na faaluaina ai le aofaʻi o fasiotiga tagata na lē mafai ona maua ē na faatinoina, ma ua iai le popolega e faapea ua lē mafai e leoleo ma faamasinoga ona foʻia nei solitulafono.”

Iā Aokuso 2011, na taumafai ai leoleo Peretania e taofia se tasi o solitulafono—o fevesiaʻiga i Birmingham, Liverpool, Lonetona ma isi nofoaga. Na amata e se vaega faatupu vevesi se afi, taʻei faamalama o faleoloa ma gaoia oloa, ma na faaleagaina ai pisinisi, fale o aiga ma taavale faapea foʻi ma mea aogā e ola ai tagata. O le ā le māfuaaga? O le toʻatele lava, o le matapeʻapeʻa. Peitaʻi, o nisi e foliga mai o nei gaoioiga e tali atu ai i faiga lē tonu. Na taʻua e se tagata faasalalau, o nei tagata faatupu vevesi atonu o talavou o loo ola aʻe i vaipanoa matitiva, ma ua manatu ua tuulafoaʻia i latou e faigāmalo ma ua leai so latou lumanaʻi.

Na taʻua e le tagata o loo taʻua i le Tusi Paia, o Iopu: “Ua ou alaga atu pea ona o le sauā, ae e leai se tali mai.” (Iopu 19:7) E faapena foʻi i aso nei, e toʻatele ua alalaga atu mo le amiotonu, ae o le tele lava e masani ona lē maua se tali. Ae pe e iai moni lava se tasi e iai le malosi e tafiesea atoatoa ai faiga lē tonu? Pe o le faamoemoe e faapea o le a iai se lalolagi e sili atu ona amiotonu i le lumanaʻi, ua na o se manatu e tau ina faanofo filemu ai? Ina ia maua se tali faamalieloto, e ao ona tatou iloiloina nisi o māfuaaga o faiga lē tonu.