Totoga o le Gufee Mai Hawaii Lea e Maua ai le Malamalama

O LE gufee o le bobtail lea e maua i Hawaii, e tele ina fealuaʻi i le pō e suʻe ni ana meaʻai. E iai i lona tino ni meaola ninii, ia e maua mai ai se malamalama e taitutusa ma le malamalama o le masina ma fetu. O lea malamalama e lē mafai ai ona iloa atu o ia. O le galulue vaavaalua o lenei gufee ma meaola ninii lea e maua mai ai le malamalama, e ono iai ni aogā i lo tatou soifua mālōlōina.

Ia Mātau: E maua le gufee o le bobtail i ogāsami o Hawaii. O le malamalama mai le masina ma fetu e faigofie ai ona iloa atu e meaola feʻai o le sami le tino o le gufee. Peitaʻi, o le gufee o le bobtail, e iai lona totoga mataʻina lea e iai ni meaola ninii e maua ai lona malamalama talafeagai ina ia lē iloa atu ai o ia. E susulu mai le malamalama i le pito i lalo o le bobtail, ma e tutusa lelei ma le malamalama o le masina ma fetu. O le iʻuga, e leai ai sona ata lafoia ma mafai ai ona gaoioi e aunoa ma le iloa atu o ia.

E ono fesoasoani foʻi nei meaola ninii i le faagasologa o le taimi e moe ma ala ai le gufee o le bobtail. Ua naunau tagata suʻesuʻe i lenei tulaga, ona o lenei fesootaʻiga o meaola ninii ma le faagasologa o le taimi e moe ma ala ai, po o le faagasologa masani o mea fai, e foliga mai e lē na o le bobtail e maua ai. O se faataʻitaʻiga, o meaola e māfanafana o latou toto, e iai ni meaola ninii i le vaega e faamalū ai a latou meaʻai, ma e ono fesootaʻi atu foʻi i le faagasologa o le taimi e moe ma ala ai. Pe a lē sologa lelei lenei faasologa, e iʻu ai i le mafatia o le mafaufau, maʻi suka, tino puta, ma le lē lelei o le moe. O lea, o le suʻesuʻeina o meaola ninii o loo i le tino o le gufee o le bobtail, e ono faalautele atu ai le malamalama e faatatau i le soifua mālōlōina o tagata.

O le ā sou manatu? Pe na teʻi lava ua iai le totoga o le gufee o le bobtail mai i Hawaii, lea e maua ai le malamalama? Pe na foafoaina?