Talavou o Iesu i le Malumalu

VAAI i le tama talavou lena e talanoa i tamaloloa matutua. O i latou o faiaʻoga i le malumalu o le Atua i Ierusalema. Ma o le tama o Iesu. Ua tuputupu aʻe o ia. Ma ua 12 nei ona tausaga.

Na tetei faiaʻoga ona e tele mea e iloa e Iesu e uiga i le Atua ma mea ua tusia i le Tusi Paia. Ae ai se ā e le o i ai i ina Iosefa ma Maria? O fea o i ai i laʻua? Sei o tatou sailia.

I tausaga uma, e o ai Iosefa ma lona aiga i Ierusalema mo le faamanatuga faapito e taʻua o le Paseka. O se malaga umi, le sau mai Nasareta i Ierusalema. E leai ni taavale ma ni nofoa afi. O le tele o tagata e savavali, ma e tusa e tolu aso ona faatoa oo lea o i latou i Ierusalema.

Ae o le taimi nei ua toatele le aiga o Iosefa. Ua i ai ni uso ma tuafafine laiti o Iesu e tatau ona vaavaaia. Ia, o le tausaga lenei na malaga ai Iosefa ma Maria ma la la fanau i se malaga umi i Nasareta. Na laua manatu o loo o mai Iesu ma isi o le au malaga. Ae ina ua latou malolo i le iʻuga o le aso, sa laua le mauaina Iesu. Na laua sueina o laua aiga ma uo, ae sa le i ai o ia ma i latou! O lea na laua toe foi ai i Ierusalema e toe sue mai o ia.

Mulimuli ane ona laua maua lea o Iesu i ina ma faiaʻoga. O loo faalogologo i a i latou ma tuufesili i ai. Ma na ofo uma tagata i le poto o Iesu. Ae na faapea atu Maria: ‘Laʻu tama e, ai se ā ua e faia ai lenei mea i a i maua? Ua ma popole tele lou tamā ma aʻu i le sueina o oe.’

‘Aiseā lua te saili mai ai i a te aʻu?’ o le tali lea a Iesu. ‘Pe lua te lei iloa e tatau ona ou i ai i le fale o loʻu Tamā?’

Ioe, e fiafia Iesu i le mea e aʻoaʻoina ai o ia e uiga i le Atua. Pe e le o le ala lena tatou te mananao ai? I lona aiga i Nasareta, e alu ai Iesu i sauniga mo le tapuaiga i vaiaso uma. Ua ia aʻoaʻoina ni mea se tele i le Tusi Paia ona e faalogologo lelei o ia. Sei pei i tatou o Iesu ma mulimuli i lana faataʻitaʻiga.