I Totonu o se Potu Pito i Luga

UA PO nei le aso Tofi, ua lua aso ua mavae. Na o mai Iesu ma ona aposetolo e 12 i le potu tele lenei o le falealuga e aai ai i le Paseka. O le tamaloa lena ua alu o Iuta le Sekara. O loo alu o ia e taʻu i le au faitaulaga pe faapefea ona latou mauaina Iesu.

I le aso e tasi na muamua atu sa alu ai Iuta ma fesili i a i latou: ‘O le ā soʻu totogi pe a ou fesoasoani i le pueina o Iesu?’ Sa latou fai mai: ‘E tolu sefulu tupe ario.’ Ua alu nei Iuta i nei tamaloloa ina ia taʻitaʻia ane i a Iesu. Pe e le o se mea leaga ea lea?

Ua uma nei le talisuaga o le Paseka. Ae amata e Iesu se isi talisuaga. Na ia avatu i ona aposetolo se papa falaoa ma fai atu: ‘Ia outou aai ai, auā o loʻu tino lenei e foaiina atu mo outou.’ Ona ia avatu lea o se ipu uaina ma fai atu: ‘Ia outou feinu i ai, auā o loʻu toto lenei, o le a faamasaaina mo outou.’ Ua taʻua e le Tusi Paia ‘o le talisuaga afiafi a le Alii,’ po o le ‘talisuaga a le Alii.’

Na aaiina e Isaraelu le Paseka e faamanatu ai le taimi na ‘sopo’ ai e le agelu a le Atua o latou fale i Aikupito, ae fasiotia ulumatua o Aikupito. Ae ua manao Iesu ia manatua o ia e ona soo ma iloa na ia avatua lona ola mo i latou. Ma na ia fai atu i a i latou ia faamanatu pea lana talisuaga faapitoa i tausaga taitasi uma.

Mavae le Talisuaga Afiafi a le Alii, ona fai atu lea o Iesu i ona soo e loto tetele ma malolosi i le faatuatua. Mulimuli ane, ona latou usuina lea o pese i le Atua ona o lea. Ua leva nei le aso e tusa ua tea le vaeluaga o le po. Sei o tatou vaai po o fea na o i ai.