Faaleoga Saʻo

E LĒ o Kerisiano uma na tele ni tausaga na aʻoʻoga ai i aʻoga a le lalolagi nei. E oo lava i aposetolo o Peteru ma Ioane sa taʻua faapea e “lei aʻoaʻoina i laua ma le valelea.” (Galu. 4:13) Ae ui i lea, e tāua le ʻalofia o le faalavelavea o lou taulimaina atu o upu moni o le Tusi Paia, e ala i le leaga o le faaleoina o upu.

O Vala e Ao Ona Tilofaʻia. E leai se faatulagaga se tasi o tulafono mo faaleoga e faatatauina i gagana uma lava. E tele gagana e tusia i mataʻitusi faaalafapeta. E faaopoopo atu i le alafapeta Samoa, e iai foʻi le alafapeta Arapi, Eleni, Eperu, ma le Latina. Na i lo le faaaogā o se alafapeta, pe a tusia le gagana Saina, e faaaogā mataʻitusi na e ono fai aʻe i le tele o mea. O nei mataʻitusi e masani lava ona fai ma sui o se upu po o se vaega o se upu. E ui lava e faaaogā e Iapani ma Korea mataʻitusi faa-Saina, ae atonu latou te faaaogā na mataʻitusi e fai ma sui o ni leo e matuā ese mai lava, ma atonu e lē tutusa uiga.

O gagana e faaaogā ai le alafapeta, e manaʻomia mo faaleoga talafeagai ona faaaogā le leo saʻo mo mataʻitusi taʻitasi po o le tuufaatasiga o ni mataʻitusi. Afai e mulimuli se gagana faapena i tulafono tutusa, e pei ona faia ai e le gagana Eleni, Sepania, ma le Zulu, o le a lē o se faafitauli la le faia o faaleoga. Peitaʻi, o aafiaga i se gagana mai i isi gagana ese e mafai ona iʻu ai i ni faaleoga lea e lagona lelei atu ai lava i siʻuleo le mea na amata mai ai na upu. O le iʻuga, e ono lē tasi ai se faaleoga e faaleo ai se mataʻitusi patino po o se vaega o ni mataʻitusi, ia pe i nisi foʻi taimi ua matuā lē faaleoina lava. Atonu e manaʻomia ona e taulotoina na faaleoga e ese mai le faaleoga masani o le upu, ona e taumafai lea e faaaogā soo pe a e tautala. I le faa-Saina, o faaleoga saʻo e manaʻomia ai ona taulotoina le faitau afe o mataʻitusi. I nisi gagana e suia le uiga o se upu pe a sui le leo e faaleo ai. O le lē matuā uaʻi atu i lenei vala o se gagana e mafai ona iʻu ai i le sesē o manatu e avatu.

Afai e fai aʻe upu o se gagana i silapela, e tāua la ona tuu atu le faamamafaga tāua i le silapela saʻo. O le tele o gagana o loo faaaogāina lenā faatulagaga e tele lava ina tutusa le auala e faaleo mai ai le faamamafaga o upu. O nisi taimi pe afai e faataga ona fai, atonu e mafai ona tuu i ai se faailoga faaleo i le tusiaina o le upu. E fesoasoani lenei ina ia faafaigofie ai ona fai le faaleoga talafeagai. Peitaʻi, afai e lē taotasi le faatulagaga i se faiga se tasi, ua atili ai la ona faigatā le faafitauli. Ina ia lelei ona faafoeina, e manaʻomia ai le tele o mea e ao ona manatua.

I nisi gagana, o le vala autū lava e mafaufau i ai o faailoga mo faaleoga. Lea e aofia ai faailoga i le pito i luga ma lalo o nisi o mataʻitusi o le alafapeta, e pei o le: è, é, ô, ñ, ō, ŭ, č, ö, ç, ā, ʻa. O faailoga mo faaleoga e ono tusiaina i lalo, po o le faatalitalia foʻi o le tagata faitau e fai lava e ia e fua i manatu o loo agaʻi i ai faamatalaga na o loo maua ai le upu. E tusa ai ma le manatu lona lua lea na seʻi faatoʻā taʻua nei, e foliga mai e manaʻomia lava ona sauniuni ma le faaeteete pe a tofia oe i se faitauga tusi i luma o le lautele.

E faatatau atu i faaleoga, e iai ni mailei e ao ona ʻalofia. O le soona faamamafa naʻuā o le saʻo aʻiaʻi o le faaleoga e ono aliali mai ai le uiga fia faalialia, ia po o le fia sili. O le manatu lava foʻi lenā e tusa ai o faaleoga ua lē o toe faaaogāina e le lautele. Na pau le mea e maua o le taulaʻi atu ai o manatu i le failauga. Ae i le isi itu, o se mea lelei foʻi le ʻalofia o le matuā faatalalē lava, e ala i le tautala i se uiga tuulafoaʻi ma le lē manatu mamafa i faaleoga. O nisi o nei manatu ua uma ona talanoaina i lalo o le ulutala “Manino le Taʻuina o Upu.”

O faaleoga talafeagai o upu o se gagana e ono eseese mai i le isi atunuu i le isi atunuu, e oo lava i se isi vaega o se atunuu e ese mai i le isi vaega o le atunuu lava lenā. O se tagata mai i se isi atunuu e ono matuā ese lava le faaleoga o ana upu e tautala ai i le gagana o loo tautatala ai lenā vaipanoa. I nisi gagana e ono sili atu i le tasi le faaleoga talafeagai o se upu e lisiina i lomifefiloi. Pe afai e lē o iai ni lomifefiloi i se gagana, o le faalogologo pe fesili atu foʻi iā i latou o loo lelei le tautatala i lenā gagana, o le a sili atu ona fesoasoani lenā i le faaleleia o lou faaleoina o upu. Aemaise lava pe afai sa leʻi tele se avanoa na aʻoaʻoina ai le tagata i aʻoga a le lalolagi, ia po o le gagana foʻi ua ia tautala ai nei e lē o sana gagana, o le a matuā aogā lava la mo ia le faalogologo atu ma le faaeteete iā i latou e lelei le tautatala i lenā gagana, ona taumafai lea e faataʻitaʻi iā i latou i le faaleoina o a latou upu. I le avea ai ma Molimau a Ieova, tatou te mananaʻo e tautatala i se uiga e faamamaluina ai le feʻau o loo tatou talaʻia ma ia faigofie ona malamalama ai tagata i o tatou vaipanoa.

I le talanoa i aso faisoo e sili ona lelei le faaaogā o upu ua e masani lelei ai. O le tulaga masani lava, e lē o se faafitauli faaleoga i talanoaga faasamasamanoa. Peitaʻi, pe a e faitau leotele, e te ono tau i ni upu e te lē faaaogāina i le talanoa i aso uma. Ma e tele ni taimi e faia ai e Molimau a Ieova le faitau leotele atu. Tatou te faitauina i tagata le Tusi Paia pe a tatou molimau atu iā i latou. E tofia nisi uso e faitau palakalafa i le Suʻesuʻega o Le Olomatamata po o le Suʻesuʻega Tautusi a le Faapotopotoga. E tāua tele le saʻo lelei o la tatou faitau ma aua tatou te suia le feʻau e ala i le sesē o le faaleoina o upu.

Auala e Faaleleia Ai. O le toʻatele o i latou e iai faafitauli i le faaleoina o upu e latou te lē o iloaina. Afai e faasino atu e la outou ovasia o le aʻoga vaega o au faaleoga lea e manaʻomia ona e uaʻi atu i ai, ia talisapaia lona agalelei. Afai loa ua e iloa le faafitauli, e mafai faapefea ona e faia ni faaleleiga?

Muamua lava, pe a e maua se tofiga e faitau leotele ai, faaalu se taimi e vaai ai se lomifefiloi. Vaai i upu e te lē iloa. Afai e te lē masani i le faaaogāina o se lomifefiloi, suʻe i uluaʻi itulau mo se faamalamalamaga o faailoga o loo faaaogā, ae pe afai foʻi e manaʻomia, fesili atu i se isi e faamatala ane iā te oe. O le a faailoa mai e se lomifefiloi lelei iā te oe le vaega e tuu i ai le faamamafa i se upu. I nisi tulaga, atonu e tele atu ni faaleoga e faaleo ai se upu se tasi, e fuafua i le auala o loo faaaogā ai i se fuaiupu. O le a faaalia ai le ituaiga leo e faaaogā mo vaueli ma konesane i se upu o loo taʻua. I nisi tulaga, e ono sili atu i le tasi le auala e faaleo ai se upu, e faalagolago i le auala o loo faaaogā ai. Po o le ā lava le upu o e autiloina, ia taʻu leotele mo sina taimi a o e leʻi tuuesea le lomifefiloi.

O le auala lona lua e mafai ona faaleleia ai faaleoga, o le faitau atu lea i se tasi—se tasi e lelei lona faaleoina o upu—ma fai i ai e faasaʻo mai au faaleoga e sesē.

O le auala lona tolu mo le faaleleia o faaleoga, o le faalogologo lelei atu lea i failauga lelei. Afai o mafai ona maua ni kaseti puʻeleo o le New World Translation po o mekasini o le Watchtower ma le Awake! e lelei ona faaaogā. A o e faalogologo, mātau upu e ese le faaleoina mai i le auala e te faaleoina ai. Tusi i lalo upu na, ona faataʻitaʻi lea. E oo mai le taimi, o le a aunoa ai lau tautala ma ni faalētonu o le leaga o faaleoga, ma o le a faaleleia atili ai lau tautala.