Lelei le Faatomuaina o Mau

O LE Tusi Paia o loo saunia maia le faavae mo faatonuga o loo avatu i a tatou sauniga a le faapotopotoga. E avea foʻi mau o le Tusi Paia ma taulaʻiga autū o mea tatou te fai atu ai i le faiva i le fanua. Peitaʻi, e faalagolago foʻi le telē o se aogā o nei mea i la tatou talanoaga, i le lelei ona faatomua atu.

E tele mea e manaʻomia na i lo le tau lava ina faasino atu i le mau ma valaaulia se tasi e lua te faitauina le mau. Pe a faatomua se mau, taumafai malosi e faataunuu sini nei e lua: (1) Ia faagaee le naunau fia iloa, ma (2) ia taulaʻi atu manatu i le māfuaaga ua faaaogā ai le mau. E tele auala e mafai ona faataunuuina ai nei sini.

Fai se Fesili. E sili ona aogā le faiga lenei pe afai e leʻi iloa e lau aofia le tali. Taumafai malosi e faaupu le fesili i se auala e faapogaia ai tagata ina ia manatunatu. Sa fai e Iesu le mea lenei. Ina ua faalatalata atu le ʻau Faresaio iā te ia i le malumalu ma tofotofo ai i luma o le lautele lona malamalamaga i le Tusi Paia, na fesili mai i ai Iesu e faapea: “Se a la outou taofi i le Keriso? Se atalii ea ia o ai?” Na latou tali atu: “O le alo o Tavita.” Ona fesili mai lea o Iesu: “O lenei, pe faapefea ona taʻua e Tavita a o i ai o ia i le Agaga, o ia o lona Alii?” A o ia fetalai sa ia sii maia le Salamo 110:1. E leʻi tali atu le ʻau Faresaio. Peitaʻi, sa faalogologo atu ma le naunautaʻi le motu o tagata iā Iesu.—Mata. 22:41-46.

I le faiva i le fanua, e te ono faaaogāina ai faatomuaga e faafesili ona fai e pei o nei: “E tofu i taʻua ma o taʻua lava igoa totino. Pe e iai ea se suafa totino o le Atua lava ia? Ta te maua le tali i le Salamo 83:18.” “Pe e iai ea se taimi o le a tasi ai se malo e pulea le fanau uma a tagata? Mātau le auala o loo taliina ai lenei fesili i le Tanielu 2:44.” “Pe o talanoaina moni ea e le Tusi Paia tulaga o mea o loo tutupu i o tatou aso? Seʻi faatusatusa mea o loo taʻua i le 2 Timoteo 3:1-5 ma tulaga o mea o loo e masani ai.” “Pe e iai ea se taimi o le a faamutaina ai puapuaga ma le oti? E mafai ona maua le tali a le Tusi Paia i le Faaaliga 21:4, 5.”

Pe a fai se lauga, o le faaaogāina ma le faaeteete o fesili e faatomua ai mau e mafai ona faagaeeina ai lau aofia ina ia naunau e suʻe mau, e tusa lava po o mau ua latou masani ai. Peitaʻi pe o le a latou faia ea? E ono faalagolago lenā itu i fesili o le a e lāgā pe o ni fesili o latou naunau moni i ai pe leai. E tusa lava pe e naunau le aofia i le mataupu, ae ono tafatafao solo o latou mafaufau a o e faitauina mau ua latou faalogo soo i ai. Ina ia ʻalofia le tupu o lenā mea, e manaʻomia ona lava se taimi e te mafaufau ai i le mataupu ma fai ina ia faaoso naunau lau taulimaga.

Taʻua se Faafitauli. E te ono taʻua se faafitauli ona tataʻi atu lea o manatu i se mau lea e iai sona fesootaʻiga i le vaifofō. Aua le tataʻia le aofia e faatalitalia le tele o mea na i lo mea o le a latou maua. E masani lava e na o se vaega o le vaifofō e mafai ona maua mai i se mau. Peitaʻi, e te ono fai atu i le aofia e manatunatu, a o e faitauina le mau, po o ā taʻiala o taʻu mai e taulimaina ai le mataupu.

I le auala lava lenā, e te ono taʻua se mataupu silisili o amioga faale-Atua ona faaaogā lea o se tala mai i le Tusi Paia e faataʻitaʻia ai le atamai o le mulimuli i le mataupu silisili. Afai o aofia i se mau ni manatu patino se lua (ia pe sili atu foʻi) e fesootaʻi i manatu o loo talanoaina, o nisi failauga e fai i le aofia e tulimataʻi nei manatu. Afai e iai se faafitauli e foliga mai e faafaigatā naʻuā mo se aofia patino, e mafai ona e faagaeeina manatu e ala i le taʻu atu o nisi o mea e mafai ona fai, ona tuu lea i le mau ma lona faatatauga e maua ai le vaifofō.

Faasino Atu i le Tusi Paia e Avea ma Pule. Afai ua uma ona e faagaeeina le fiafia i lau mataupu ma taʻua se tasi pe sili atu foʻi o ni vaaiga i nisi o vaega o le mataupu, e te ono faatomua se mau i le tau lava o le faapea atu: “Mātau le mea o fai mai ai le Afioga a le Atua i le manatu lenei.” O le faia faapea e faaalia ai le māfuaaga e aogā ai manatu o le a e faitauina.

Sa faaaogā e Ieova ia tane e pei o Ioane, Luka, Paulo, ma Peteru e tusia ni vaega o le Tusi Paia. Peitaʻi o i latou sa na o ni tusitala; o Ieova Lē na Tusia. Aemaise lava pe a talanoa atu i tagata o ē e lē o ni tagata aʻoga o le Tusi Paia, o le faatomua o se mau e ala i le faapea atu, “na tusia e Peteru” pe faapea atu “na fai mai Paulo,” e ono lē tutusa le malosi ma se faatomuaga e faapea atu ai o le mau o le afioga a le Atua. E mātauina e faapea i nisi taimi, sa faatonu ai e Ieova ia Ieremia e faatomua atu faalauiloaga e ala i le fetalai atu: “Ina faalogologo mai ia i le afioga a Ieova.” (Iere 7:2; 17:20; 19:3; 22:2) E tusa lava pe tatou te faaaogāina le suafa o Ieova i le faatomuaina o mau pe leai, a o tatou leʻi faaiʻuina la tatou talanoaga, e ao ona tatou taumafai malosi e taʻu atu e faapea o mea o i le Tusi Paia o ana afioga ia.

Amanaʻia le Siʻomaga o le Mau. E ao ona e silafia le siʻomaga o le mau pe a filifilia le auala e faatomua ai se mau. I nisi tulaga e te taʻua saʻo lava le siʻomaga; peitaʻi, e ono aafia mea o le a e fai atu ai i le siʻomaga. Mo se faataʻitaʻiga, pe e te faatomua atu ea upu a Iopu le tagata sa mataʻu i le Atua, i le auala lava e tasi e te faatomua ai se faamatalaga na fai e se tasi o ana ʻaufaamāfanafana pepelo? Na tusia le tusi o Galuega e Luka, peitaʻi o loo ia sii maia manatu o isi, e pei o Iakopo, Peteru, Paulo, Filipo, Setefano, ma agelu, faapena foʻi ma Kamalielu ma isi Iutaia sa lē o ni Kerisiano. O ai o le a e taʻua e faapea na tusia le mau ua e sii atu? Ia manatua mo se faaaʻoaʻoga, e lē o salamo uma na fatuina e Tavita, ma e lē o Solomona foʻi na tusia tusi uma o le Faataoto. E aogā foʻi le iloa po o ai sa tusi atu i ai le tusitala o le Tusi Paia ma po o le ā le mataupu lautele lea sa talanoaina.

Faaaogā Faamatalaga Mai i Talaaga. E faapitoa lava le aogā o le faiga lenei pe afai e mafai ona e faaalia e faapea, o mea na tutupu i le taimi na tusia ai le Tusi Paia e taitutusa lava ma mea o loo e talanoaina. I isi tulaga, e manaʻomia faamatalaga o talaaga o mea na tutupu ina ia malamalama ai i se mau patino. O se faataʻitaʻiga, afai e te faaaogāina le Eperu 9:12, 24 i se lauga e faatatau i le togiola, e te ono iloa le talafeagai ona faatomua lou faitauina o le mau i se faamalamalamaga puupuu o le potu tutotonu o le falefetāfaʻi, lea e faailoa mai e le mau o loo faaataina ai le nofoaga na ulu atu i ai Iesu ina ua ia afio aʻe i le lagi. Peitaʻi aua le soona faaaofia ai le tele o faamatalaga i le talaaga, auā e ono lē manino ai le mau o loo e faatomua atu.

Ina ia faaleleia atili le auala e te faatomua atu ai mau, ia tilofaʻia lelei mea e fai e failauga ua iai le poto masani. Mātau metotia eseese latou te faaaogāina. Iloilo le aogā o nei metotia. A o sauni au lava lauga, ia mātau lelei mau autū, ma manatunatu faapitoa i le mea e tatau ona faataunuuina e mau taʻitasi. Ia fuafua ma le faaeteete le faatomuaga o mau taʻitasi ina ia matuā uigā le auala e faaaogā ai. A uma lenā, ona faalautele atu lea ina ia faaaofia uma ai mau o le a e faaaogāina. A o agaʻi ina faaleleia lenei vaega o lau taulimaga, o le a atili ai ona e matuā uaʻi atu i le Afioga a le Atua.