Upu Faaiʻu Uigā

ATONU ua uma ona e saʻiliʻili ma le faaeteete ma faamaopoopo le mataupu mo le tino o lau lauga. Atonu ua uma foʻi ona e sauniunia se faatomuaga e faatosina mai ai le naunau. Ae, e toe tasi le mea o loo manaʻomia—o ni upu faaiʻu uigā. Aua neʻi manatu māmā i lona tāua. O au upu mulimuli ua masani ona manatuaina mo se taimi umi. Afai e vaivai upu faaiʻu, o le a leai la se uigā o mea sa talanoaina muamua.

Ia manatunatu i mea o loo mulimuli mai: I le taufaaiʻuiʻuga o lona soifua, sa avatu ai e Iosua se lauga e lē mafaagaloina i toeaina o le nuu o Isaraelu. Ina ua mavae ona toe faamanatu atu feutagaʻiga a Ieova ma Isaraelu talu mai ona pō o Aperaamo, pe sa na ona toe taʻua ea e Iosua o mea matilatila i se aotelega? E leai. Na i lo o lenā, i le faaosofia i lagona loloto na ia apoapoaʻi atu ai i le nuu: “Ia outou matatau ia Ieova, ma auauna ia te ia ma le loto sao ma le faamaoni.” Faitau lava oe i upu faaiʻu a Iosua, ua faamauina i le Iosua 24:14, 15.

O se isi lauga mataʻina, ua maua lea i le Galuega 2:14-36, sa fofoga atu e le aposetolo o Peteru i se motu o tagata i Ierusalema i le Tausamiga o le Penetekoso 33 T.A. Muamua sa ia faamatalaina e faapea o loo latou molimauina le faataunuuga o le valoaga a Ioelu e uiga i le liligiina ifo o le agaga o le Atua. Ona sosoo ai lea ma lona faailoa atu o le auala sa fesootaʻi ai ma valoaga faa-Mesia o loo i le Salamo, lea sa valoia ai le toetū mai o Iesu Keriso ma lona faaeaina e nofo i le itu taumatau o le Atua. Mulimuli ane, i ana upu faaiʻu, na taʻu manino atu ai e Peteru le finauga lea sa manaʻomia ona faafetaiaʻia e i latou uma o i lana aofia. Na ia faapea atu: “O lenei foi, ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.” Sa fesili ane i latou na iai: “Sema e, le au uso e, se a se mea matou te faia?” Na tali atu Peteru: “Ina salamo ia, ma ia taʻitasi ma papatisoina outou uma i le suafa o Iesu Keriso.” (Galu. 2:37, 38) I lenā aso, e pe ā ma le 3,000 tagata i lana aofia, sa mātua uunaʻia i mea sa latou faalogologo i ai, na talia le upu moni e uiga iā Iesu Keriso.

Manatu e Ao Ona Manatua. O mea e te taʻua i au upu faaiʻu e ao ona fesootaʻi tuusaʻo i le matua o lau lauga. E ao ona mulimuli e avea o se upu faaiʻu talafeagai i manatu tāua ua uma ona e atiina aʻe. E ui ina atonu e te manaʻo e faaaofia ai ni upu autū mai lau matua, ae o lona toe taʻua tuusaʻo e tuu i lau faitalia.

I le tulaga masani, o le fuafuaga o lau tautalaga o le faalaeiau lea o isi ina ia gaoioi e tusa ai ma faamatalaga ua e taulimaina. O se tasi o fuafuaga autū o upu faaiʻu, o le faailoa atu lea iā i latou o mea e fai. Ina ua e filifilia lau matua ma manatu autū, pe sa e iloiloina ma le faaeteete pe aiseā e tāua ai le mataupu i lau aofia, ma o le ā lou sini e taulimaina ai? Afai o lea, ua e iloa la le gaoioiga o loo e manaʻo latou te faia. E manaʻomia loa ona e faamatala atu po o le ā lenā gaoioiga ma le auala atonu e faia ai?

E faaopoopo i le faailoaina atu i lau aofia o mea e fai, e ao i au upu faaiʻu ona saunia ai se uunaʻiga. E ao ona faaaofia ai ni māfuaaga tāua mo gaoioiga ma ni aogā atonu e mafai ona maua mai ai i le faia faapea. Afai e manatunatu ma le faaeteete ma faaupu lelei le fuaiupu faaiʻu, o le a faamalosia ai la le uigā o lau lauga atoa.

Ia manatua o lea o le a faaiʻuiʻu le lauga. E ao la ona faaalia lenā i mea e te taʻuina atu. E ao foʻi ona talafeagai le saosaoa o lou leo. Aua le faavavevaveina lau tautala seʻia oo lava i le faaiʻuga ona uma faafuaseʻi loa lea. I le isi itu, aua le teʻi lava ua fai atu lou leo . E ao ona lava ma totoe le lagonaina o lou leo ae aua le pa vale. O nai au fuaiupu faaiʻu lava e ao ona mātauina ai le faaiʻuga. O le auala e te taulimaina ai, e ao ona momoli atu ai le lagona faanatinati ma le naunautaʻi. Pe a sauniuni lau taulimaga, aua neʻi lē faataʻitaʻia au upu faaiʻu.

E faapeʻī le umi o au upu faaiʻu? O lenā mea e lē na o le uati e ao ona filifilia ai? E lē tatau ona faaumiumi le faiga o upu faaiʻu. O le talafeagai o lona umi e mafai ona filifilia i lona uigā i le aofia. O upu faaiʻu faigofie, tuusaʻo, ma mautinoa, e masani lava ona talisapaia. O ni upu faaiʻu e fai si umi atu e faaaofia ai se tala faatusa puupuu e mafai foʻi ona uigā pe afai e fuafua ma le faaeteete. Ia faatusatusa upu faaiʻu puupuu o le tusi atoa o Failauga, o loo maua i le Failauga 12:13, 14, ma upu faaiʻu o le Lauga i luga o le Mauga e sili ona puupuu, ua faamauina i le Mataio 7:24-27.

I le Faiva i le Fanua. E leai se isi mea o le a sili atu ona e fesagaʻi soo ai ma le manaʻoga mo ni upu faaiʻu na i lo o le faiva i le fanua. E ala i sauniuniga ma le naunau alofa i tagata, e tele ni mea lelei o le a e faataunuuina ai. O fautuaga sa talanoaina i itulau ua muamua atu, e mafai ona faatatauina ma le aogā pe a faafetaui i se lua talanoaga ma le tagata o le aiga.

E mafai ona puupuu tele se talanoaga. Atonu o loo pisi le tagata. O lau asiasiga atoa atonu e na o se minute le umi. Afai e talafeagai, e mafai ona e fai atu faapea: “Ua ou malamalama o lenā e te pisi. Ae seʻi oʻu faailoa atu iā te oe se manatu faalaeiau lea e tasi. Ua faaalia i le Tusi Paia o loo iai i Lē na Foafoaina i tatou se fuafuaga matagofie—ina ia avea lenei laueleele ma nofoaga e mafai ai e tagata ona olioli i le ola e faavavau. E mafai ona tatou iai i lenā Parataiso, ae e ao ona tatou aʻoaʻoina mea o loo manaʻomia e le Atua.” Pe atonu e te ofo atu foʻi e toe asiasi atu i se isi taimi talafeagai.

Afai ua faalavelavea le asiasiga ona ua musu faafuaseʻi—pe lē migao—le tagata o le aiga, o loo tele pea se lelei e mafai ona faataunuuina. Ia manatua le fautuaga o loo maua i le Mataio 10:12, 13 ma le Roma 12:17, 18. O lau tali filemu atonu e mafai ona suia ai lana vaaiga i Molimau a Ieova. O le a avea lenā o se taunuuga e sili ona lelei.

I le isi itu, atonu sa faia se lua talanoaga faamalieloto ma le tagata o le aiga. Aiseā e lē toe taʻua ai le manatu autū o loo e manaʻo e na te manatua? Ia faaaofia ai se uunaʻiga mo ia ina ia gaoioi i ai.

Afai e te mātauina se avanoa mo se isi talanoaga i se isi taimi, ia avatu i le tagata ni māfuaaga e tepa taulaʻi atu ai i se isi talanoaga. Ia fai se fesili—atonu o se fesili o loo talanoaina i le Reasoning From the Scriptures po o se lomiga sa fuafua mo le taulimaina o suʻesuʻega faale-Tusi Paia i aiga. Ia teu i manatu lou sini, e pei ona faaalia e Iesu ma ua faamauina i le Mataio 28:19, 20.

Po o loo e faaiʻuina se suʻesuʻega faale-Tusi Paia i se aiga? O le toe taʻua o le matua, o le a fesoasoani lea i le tagata suʻesuʻe ina ia manatua ai mea sa talanoaina. O le faaaogāina o fesili autalu o le a fesoasoani e tāmau ai manatu autū i le mafaufau o le tagata suʻesuʻe, aemaise pe afai e lē faatatopea lenā autaluga. O se fesili e faatatau i le faapefea i le mataupu sa suʻesuʻeina ona aogā i le tagata suʻesuʻe po o le faapefea ona ia fetufaaʻi ai ma isi, e mafai ona fesoasoani iā te ia e mafaufau ai i auala e faia ai se faatatauga aogā o mea ua ia aʻoaʻoina.—Faata. 4:7.

Ia manatua—o au upu faaiʻu e aafia ai le uigā o lau talanoaga atoa.