Mea e ao Ona Faia e Mātua mo le Fanau

E AUAI mātua uma lava i se gaoioiga lea e lē o malamalama atoatoa i ai tagata. E la te tuuina atu se vaega o la tino lea o le a oo ina tuputupu aʻe i totonu o le tinā, ma mulimuli ane ai avea ma se tagata. E lētioa lava a fai mai tagata, o ‘se vavega’ le fanau mai o se pepe.

Peitaʻi, e lē gata i inā tiute tauave a mātua pe a uma ona fananau tamaiti. E faalagolago atoatoa ia pepe i o latou mātua i le taimi e faatoʻā fananau mai ai, ma e lē lava le tausiga faaletino pe a faasolosolo ina matutua. E tatau ona maua e i latou le fesoasoani e ati aʻe ai o latou mafaufauga, o faalogona, o amioga faapea lo latou itu faaleagaga.

Ina ia lelei la lo latou tuputupu aʻe, e moomia faapitoa e le fanau le alofa o o latou mātua. E ui lava e tāua faaupuga alofa, ae e sili atu ona tāua le faaalia atu o le alofa e ala i gaoioiga. Ioe, e ao i mātua ona fai se faataʻitaʻiga lelei mo le fanau. E tatau ona iai ni taʻitaʻiga tau amio po o taʻiala i o latou olaga ma e manaʻomia a o laiti lava. E ono tulaʻi mai pe tutupu foʻi ni tulaga faanoanoa, pe a lē vave ona avatuina taʻiala i tamaiti a o laiti.

E pito i sili ona lelei taʻiala o loo maua i le Tusi Paia. E lē mafaatusalia aogā o faatonuga e faavae aʻe i le Tusi Paia. E ala i na faatonuga, e iloa ai e le fanau iti e lē o aʻoaʻoina i latou e se tagata, ae o loo sau mai i Lē na Foafoaina i latou, o lo latou Tamā o i le lagi. E sili atu la ona lelei fautuaga na, ma e lē mafaatusalia.

O loo faalaeiau e le Tusi Paia mātua ina ia tinoū e faamalamalama i a latou fanau le tāua o taʻiala saʻo, ina ia mafai ona manatua ma faatatauina e le fanau. Peitaʻi, a o faasolo ina matutua le fanau, e masani lava ona faigatā i mātua ona talanoa atu iā i latou e uiga i mataupu e sili ona tāua. O le a fesoasoani lenei tusi, Ia Faalogo i le Faiaʻoga Sili, e ʻalofia ai se tulaga faapena. O le a saunia e lenei tusi ni mataupu faaleagaga e mafai ona tou faitau faatasi i ai ma lau fanau. E lē gata i lea, ua tusiaina lenei tusi e faalaeiau ai le fanau iti, e fetalanoaaʻi ma lē o loo faitauina atu le tusi iā i latou.

O le a e mātauina, e faalaeiau e le tusi le faia o se sao o le fanau. Ua fuafuaina lelei le anoanoaʻi o fesili o loo iai i totonu o le tusi. E iai le vase faapea (—) o loo mulimuli mai i fesili, lea e faamanatu atu ai iā te oe e moomia ona e taofi ae faalaeiau le tamaitiiti e faaali mai sona manatu. E fiafia tele le fanau e fai so latou sao i se talanoaga. A lē faia se sao a le fanau, e vave lava ona mou lo latou uaʻi atu.

Ae sili atu i lenā, e fesoasoani fesili nei ina ia e iloa ai mea o loo mafaufau i ai le tamaitiiti. E moni atonu e sesē tali a le fanau iti. Peitaʻi, o fuaiupu o loo mulimuli mai i fesili taʻitasi, o le a fesoasoani i le tamaitiiti e ati aʻe ai le auala e mafaufau ai i le mea ua saʻo ma lelei.

O se vala mataʻina o le tusi lenei, o ata e sili atu i le 230 o loo iai. O loo iai fesili i tafatafa o le tele o ata nei ina ia faalaeiau le tamaitiiti e faaali mai sona manatu, e tusa ai ma ata ma mea na faitau i ai. O lea la, ia tagaʻi lelei faatasi ma le tamaitiiti i ata. O se auala matagofie lenā e aʻoaʻo ma tāmau ai i manatu lesona tāua ua uma ona aʻoaʻoina.

A oo ina iloa e le tamaitiiti faitau, ia faalaeiau i ai e faitau le tusi ma ia faitau atu foʻi iā te oe. O le faitau soo i ai, o le a pāʻia ai lona loto ma faapea ona manatuaina ai fautuaga lelei o i le tusi. Peitaʻi, ina ia māfana atili le lua faiā ma maua le vafealoaʻi ma lau tama, e tatau ona lua faitau faatasi e lē aunoa i le tusi.

Ua tele ina vāai ma faalogo le fanau iti i faiga matagā tau feusuaʻiga, faiga faataulaitu ma isi mea leaga faapena ia e leʻi taatele i aso ua mavae. O lea la, latou te moomia ai le puipuiga lea ua saunia e lenei tusi i se auala e logoleleia ma tuusaʻo. I le taimi e tasi, e ao foʻi ona faasino le fanau iti i le puna o le atamai sili, o lo tatou Tamā o i le lagi, o Ieova le Atua. O le mea lenā sa faia i taimi uma lava e le Faiaʻoga Sili. E matou te faamoemoe o le a fesoasoani moni lenei tusi iā te oe ma si ou aiga, e faaleleia atili ai o outou soifuaga auā le faafiafiaina o Ieova, ma faapea ona outou maua ai faamanuiaga e faavavau.