Pe na Fanau Iesu iā Tesema?

E LĒ o taʻu maia e le Tusi Paia le aso na soifua mai ai Iesu. Ae o loo taʻua ai ni māfuaaga lelei e mafai ona faapea atu ai, e leʻi fanau o ia iā Tesema.

Ia manatunatu i le tau iā Tesema i Peteleema i le nofoaga na fanau mai ai Iesu. O le masina faa-Iutaia o Kiselu (e paʻū iā Novema/Tesema) o se masina mālūlū ma timuga. O le masina e sosoo ai o Tapeta (Tesema/Ianuari). O le taimi matuā mālūlū lenā o le tausaga, e fai ma toʻulu ai le kiona i nofoaga maualuluga. Seʻi o tatou faitau i le tala a le Tusi Paia e uiga i le tau i lenā vaipanoa.

Ua faaalia e Esera le tusitala o le Tusi Paia, o le masina lenei o Kiselu o se masina mālūlū ma timuga. Na faapea mai Esera, ina ua uma ona potopoto ane tagata i Ierusalema i “le masina lona iva [o Kiselu] o le aso lona lua sefulu o le masina,” na ia faamatala atili, na ʻlatou tetemū ona o le maligi o timuga.’ E tusa ai o le tau i le taimi lenā o le tausaga, na faapea ane tagata na faapotopotoina: ʻO le tau lea o timuga tetele, ma e lē mafai ona tutū i fafo.’ (Esera 10:9, 13; Ieremia 36:22) E lētioa la ona lē tuua i fafo i le pō e leoleo mamoe a latou lafu mamoe, i vaipanoa o Ierusalema pe a oo iā Tesema!

Peitaʻi ane, ua faaalia i le Tusi Paia na i le vao leoleo mamoe e leoleo a latou lafu i le pō na fanau mai ai Iesu. Na taʻua e Luka, o le taimi lenā, ʻsa iai leoleo mamoe sa nonofo i fafo i le pō ma vaavaai a latou lafu’ e lata ane i Peteleema. (Luka 2:8-12) Ia mātau mai, sa nonofo leoleo mamoe i le vao, ae e lē na ona savalivali i fafo i le ao. Na latou i fafo i le vao ma a latou lafu mamoe i le pō. Pe e talafeagai ona nonofo i le vao pe a fua i le mālūlū ma timuga o le tau i Peteleema iā Tesema? E leai. O lea la, ua faaalia i mea na tutupu ina ua fanau mai Iesu, e leʻi fanau o ia iā Tesema.a

O loo taʻua i le Tusi Paia le taimi tonu lava na maliu ai Iesu, ae e itiiti ni faamatalaga e iloa ai le taimi tonu na soifua mai ai o ia. Ua tatou manatua ai upu a le tupu o Solomona: “E sili le igoa lelei nai lo o le suāuu lelei, e sili foʻi le aso e oti ai nai lo o le aso e fanau mai ai.” (Failauga 7:1) E lētioa la ona saunia e le Tusi Paia le tele o faamatalaga e uiga i le galuega talaʻi ma le maliu o Iesu, ae e itiiti ni faamatalaga e uiga i lona aso soifua.