Aʻoaʻoga a le Malo o le Atua​—Toleniina o Auauna a le Tupu

UA E fiafia ina ua e vaai atu i le failauga i le pulelaa. O ia o se uso talavou mai i lau faapotopotoga, ma o lana lauga muamua lea i se fonotaga. Ua e maofa i le auala o loo toleni ai tagata o le Atua, a o e faalogologo i lana lauga. Ua e mātauina lona agaʻigaʻi i luma, pe a mafaufau i le taimi muamua na faia ai sana vaega i le pulelaa. Na mataʻina lona agaʻigaʻi i luma ina ua uma ona auai i le Aʻoga mo le Auaunaga Paeonia. A o patipati le aofia ina ua māeʻa lana lauga, ua e mafaufau i le auala o loo mauaina ai e tagata o le Atua le taʻitaʻiga.

Ua valoia e le Tusi Paia o le a iai le taimi ʻe aʻoaʻoina’ ai e Ieova ona tagata. (Isa. 54:13) O loo tatou ola i lenā taimi. Ua tatou mauaina na aʻoaʻoga i lomiga, sauniga, tauaofiaga, fonotaga, faapea le tele o aʻoga ua fuafua e sauniunia ai i tatou mo faaeaga eseese i le faalapotopotoga a Ieova. I lenei mataupu, o le a iloiloina ai pe faapefea i nei aʻoaʻoga ona avea ma faamaoniga maumaututū, ua pule le Malo o le Atua.