Ua Aauina Atu e Iesu Soo e Toʻa 70 e Talaʻi

Ua lata i le taufaaiʻuiʻuga o le tausaga e 32 T.A., ma pe tusa nei ma le tolu tausaga talu ona papatisoina Iesu. E leʻi leva tele atu le taimi na latou iai ma ona soo i le Tausamiga o Faleapitaga i Ierusalema, ma atonu o loo latou iai pea i se nofoaga e lē mamao ese mai i inā. (Luka 10:38; Ioane 11:1) Ua faaalu nei e Iesu le ono masina o loo totoe o lana faiva i Iutaia, ma le isi itu o le vaitafe o Ioritana i le itumalo o Perea. E manaʻomia foʻi ona talaʻi atu le tala lelei i nei vaipanoa.

Ina ua mavae le Paseka i le 30 T.A., na faaaluina ai e Iesu ni nai masina e talaʻi ai i Iutaia, ma agaʻi atu ai i Kalilaia e ui atu i Samaria. Ae ina ua oo i le vaitaimi o le Paseka i le 31 T.A., na taumafai ai tagata Iutaia i Ierusalema e fasiotia o ia. I le tausaga ma le ʻafa na sosoo ai, sa faaaluina ai e Iesu le tele o le taimi e talaʻi ai i le itu i mātū i Kalilaia, ma e toʻatele na avea ma ona soo i lenā taimi. Sa toleniina foʻi e Iesu ona aposetolo i Kalilaia, ma faatonuina i latou: “Ia talaʻi atu e faapea: ʻUa latalata mai le malo o le lagi.’” (Mataio 10:5-7) Peitaʻi, o lea ua faatulaga nei e Iesu se tauiviga e talaʻi atu ai i Iutaia.

Ua amata lenei tauiviga i le filifilia e Iesu o soo e toʻa 70, ma aauina atu i latou e taʻitoʻalua. O lona uiga e 35 paga o tagata talaʻi o le Malo ua ō atu i le oganuu, lea o loo ʻtele ai le saito e seleseleina, a ua toʻaitiiti le ʻaufaigaluega.’ (Luka 10:2) Ua muamua atu nei soo e toʻa 70 i aai uma ma nofoaga o le a maliu atu i ai Iesu. E tatau ona latou faamālōlōina tagata mamaʻi, ma faalauiloa atu le feʻau lea o loo folafolaina atu foʻi e Iesu.

E lē o taulaʻi atu la latou galuega i le aʻoaʻo atu i totonu o sunako. Ua faatonuina i latou e Iesu ina ia ō i fale o aiga, ma ua ia faapea atu: “Afai tou te ulu atu i se fale, ia muamua ona outou faapea atu, ʻIa filemu le aiga nei.’ Afai o iai i inā se tagata o le filemu, ia maua e ia lo outou filemu.” O le ā le feʻau e tatau ona latou faailoa atu? Ua fetalai atu Iesu: “Ia faapea atu iā i latou, ʻUa latalata mai le malo o le Atua iā te outou.’”—Luka 10:5-9.

E talitutusa faatonuga ua avatu e Iesu i ona soo e toʻa 70, ma faatonuga sa ia avatu i ona aposetolo e toʻa 12 i le tausaga ua mavae. Ua ia lapataʻia i latou e faapea, o le a lē talileleia i latou e tagata uma. Peitaʻi, o a latou taumafaiga o le a fesoasoani e sauniunia ai ē e talilelei mai. O lea, pe a taunuu atu le Matai, o le a naunau le toʻatele e faafeiloaʻi o ia ma aʻoaʻoina ai le tele o mea.

E leʻi umi ae toe foʻi ane paga e 35 o tagata talaʻi o le Malo iā Iesu. Ua latou faapea atu ma le olioli: “Le Alii e, ua usiusitaʻi mai foʻi temoni iā i matou ona o lou suafa.” Ua matuā faafiafiaina Iesu i lenā lipoti lelei. O lea, ua ia fetalai atu ai: “Ua ou iloa Satani ua paʻū ifo mai i le lagi e pei o le uila. Faauta! ua ou tuuina atu iā te outou le pule e soli ai i o outou vae ia gata ma akarava.”—Luka 10:17-19.

Ua faamautinoa atu e Iesu i ona soo, e mafai ona latou manumalo mai i le tele o tigā, e peiseaʻī o loo solia i o latou vae gata ma akarava i se uiga faafaatusa. Ua mafai ai foʻi ona latou mautinoa, pe a oo i le lumanaʻi o le a paʻū ifo mai i le lagi Satani. Ua fesoasoani atu nei Iesu i tagata talaʻi e toʻa 70, ina ia latou iloa le mea e sili ona tāua. Ua fetalai atu o ia: “Aua neʻi o outou olioli i lenei mea, ina ua usiusitaʻi agaga iā te outou. Ae ia olioli ona ua tusia o outou igoa i le lagi.”—Luka 10:20.

Ua matuā olioli Iesu ma viia lona Tamā i luma o le lautele, ona o le faaaogāina o ana auauna lotomaulalo i se auala e sili ona mataʻina. Ua fetalai atu o ia i ona soo: “E fiafia o ē ua vāai o latou mata i mea ua outou vāai i ai. Auā ou te fai atu iā te outou, E toʻatele perofeta ma tupu na fia vāai i mea ua outou vaavaai i ai, ae e leʻi mafai ona vāai i ai i latou. E fia faalogo foʻi i latou i mea ua outou faalogo i ai, ae e latou te leʻi lagonaina.”—Luka 10:23, 24.