SUʻESUʻEGA 18

Ia Aʻoaʻoina e Lau Aofia ni Aogā

1 Korinito 9:19-23

AOTELEGA: Ia faagaee lau aofia e manatunatu i latou lava i le mataupu, ina ia maua ai e i latou lava se mea aogā.

Manatunatu i mea ua iloa e lau aofia. Nai lo o le toe taʻua o mea ua latou iloa, ia fesoasoani iā i latou ia fou lo latou vaai e faatatau i se mataupu.

Ia faaitiitia le taimi e talanoa ai i manatu ua masani ai ae ia tele le taimi e talanoa ai i ni manatu fou.
Suʻesuʻe ma manatunatu loloto. Pe a talafeagai, ia faaaofia mea moni e lē o iloa e le toʻatele po o mea o loo tutupu i le taimi nei e faataʻitaʻia ai manatu autū. Ia manatunatu loloto i lau mataupu ma lona fesootaʻiga i mea moni o loo e manaʻo e faamatala.

A o sauniuni lau lauga, ia faaosofia ou lava manatu e ala i le fesili ifo, ʻo le ā, aiseā, o anafea, o fea, o ai, ma e faapefea.’ Ia ola le auala e te aʻoaʻo atu ai e ala i le faatutū o nisi o na fesili ma taliina a o faagasolo lau mataupu.
Faamatala aogā o lau mataupu. Ia faamatala pe faapefea i mau ona fesoasoani i lau aofia i aso faisoo. Ia iloilo ni tulaga patino, amioga po o gaoioiga e malamalama i ai lau aofia.