E Aoga le Tofa Mamao

I se tasi taeao i Orotava, le motu o Tenerife na alu atu ai se tasi faalauiloa le Malo i se fale ma na tali mai se tagata mata moe. Ina ua vaai atu la le Molimau ua ia faateʻia le tagata lea, na ia faatoese i ai ma ofoina atu i se auala puupuu ni lomiga Kerisiano ma na ia taliaina.

Mulimuli ane ai, na asiasi atu lenei Molimau ma lana tane i lea tagata, lenei e igoa ia Isidro. Sa ia taʻua e ui lava ina ia faitauina soo le Tusi Paia, a e lē mafai lava ona ia malamalama i ai. Sa taliaina e Isidro se kopi o le tusi O Le Upu Moni e taʻiaʻi ai i le Ola Faavavau.

E ui ina sa lei i ai muamua se mea i totonu o vai laupepa o le Tusi Paia a Isidro i le uluai asiasiga a Molimau, ae ina ua o la toe foi atu, na o la matauina le faatumulia o lana Tusi Paia ma lana tusi Upu Moni i ata faalelotu. A o faia le talanoaga, na paʻu ifo se tasi o nei mea i luga o le fola. Sa uuina aʻe e le Molimau asiasi pepa ma tuu i luga o le laulau.

Mulimuli ane, na taʻuina atu e Isidro i Molimau sa faia o se mailei lenei mea, auā sa ia faalogo na susunuina e tagata porotesano faatusa faalelotu pe a o latou asiasi atu i aiga. E moni lava, o Molimau a Ieova e lē o ni porotesano, ae na manatu moni lava Isidro ia o le a la faapea ona fai. Peitai ane ina ua uma ona suesueina se mataupu faapito i le tusi o le Upu Moni, na tiaia loa e i laua ma lana avā mea faatupua uma mai i lo la aiga.

E ui i lea, e lei umi a e agaigai i luma faaleagaga Isidro ma lana avā ma sa fuafuaina e papatiso o ni Kerisiano moni. E le gata i lea, e ala i la la taumafaiga na amata ai ona suesueina e le toaono o la au aiga le Tusi Paia. O le toatolu o i latou na talanoaina le Tusi Paia ma Isidro lava ia—le tagata faaeteete mataalia na fafaguina i se taeao mai le moe taagulu ma ua faamanuiaina i le utagia ma le tofa mamao.