O le Soifuaga o Iesu ma Lana Faiva

Faaalialia e Ala i Tala Faatusa i le Tovine

O LOO iai Iesu i le malumalu. Na seʻi faatoʻā uma lava ona faafememeaʻi e ia le au taʻitaʻi lotu o ē na tapā mai i le fia iloa, po o le pule a ai na ia faia ai nei mea. A o leʻi teʻa lo latou fenuminumiaʻi, ua fesili atu Iesu: “Pe ni a fa outou?” Ma i lea, e ala i se tala faatusa ua ia faaalia ai ia i latou po o le ā le ituaiga o tagata e iai moni i latou.

“Sa iai i se tasi tagata le fanau e toalua,” ua fetalai atu ai Iesu. “Na alu atu o ia i le ulumatua, ma ia fai atu, ‘Loʻu atalii e, seʻi e alu atu i le asō e galue i le tovine.’ I le tali mai na faapea atu ia lenei, ‘O le a ou alu’ a e leʻi alu o ia. Ua faalatalata atu i le lona lua, ua fai atu foi e ia le upu na muai fai atu ai. I le tali mai na faapea mai ai ia lenei, ‘Ou te lē alu.’ Ae mulimuli ane sa salamō o ia ma alu. O lē fea o le toalua lenei na faia le finagalo o lona tamā?” ua fesili atu ai Iesu.

“O le lona lua,” ua tali mai ai i latou o ē tetee ia te ia.

O lea ua faamatala atu ai Iesu: “E moni, ou te fai atu ia te outou, E muamua atu telona ma fafine talitane ia te outou i le malo o le Atua.” O le au ao lafoga ma fafine talitane, i ni āuga, na muai mumusu ai e auauna i le Atua. Ae i lea, e pei o le atalii lona lua, na salamō i latou ma auauna ia te ia. I le isi itu, o taʻitaʻi lotu, e pei o le atalii muamua, na faapea mai e auauna i le Atua, peitai, e pei ona matauina e Iesu: “Na sau Ioane [le Papatiso] ia te outou i le ala o le amiotonu, a e tou te lei talitonu ia te ia; a ua talitonu ia te ia telona ma fafine talitane; a o outou ua outou iloa foi lenei mea, a e lei salamo outou, ina ia talitonu ai ia te ia.”

Ua sosoo ai ma le faaalia e Iesu faapea o le lē taulau o nei taʻitaʻi lotu ua lē na o le tuulafoaia o le auaunaga i le Atua. E leai, ae ona o i latou moni lava o tagata leaga, fai amio leaga. “O le tasi matai,” ua faamatala atu ai e Iesu, “na fai le tovine, ua ia siosioina i le pa, ua eli ai le soligāvine, ua faia foi le ʻolo, ua tuuina atu e ia i e galulue i vine, ona alu malaga ai lea o ia i le nuu ese. Ua latalata ona po e matua ai le fuata, ona aauina atu ai lea e ia o ana auauna i e galulue i vine, ia maua ona fua. Ona pupue ai lea o e galulue i vine i ana auauna, ua latou sasa i le tasi, ma fasioti le isi, ma fetogi le tasi i maa. Ona toe aauina atu ai lea e ia o isi auauna e sili ona toatele i e na muamua; a ua faapea lava a latou amio ia te i latou.”

O “auauna” o perofeta ia na aauina atu e le “matai,” o Ieova le Atua, i “e galulue i vine” i lana “tovine.” O nei tagata galulue vine o sui taʻitaʻi o le nuu o Isaraelu, o le nuu lea ua faaalia e le Tusi Paia faapea o le “tovine,” a le Atua.

Talu ai ona sa agaleagaina ma fasiotia e “ē galulue i vine” “auauna,” ua faamatala ai e Iesu: “Mulimuli ane ua auina atu ai e ia [lē e ona le tovine] o lona atalii ia te i latou, ua faapea ane, Latou te ava mai i loʻu atalii. A o ia tagata galulue i vine, ua iloa atu lona atalii, ona latou fetautalatalai ai lea, O le suli lenei; o mai ia, tatou te fasiotia o ia, a e fai mo i tatou lona fanua. Ona latou pue ai lea ia te ia, ua lafo ia te ia i tua o le tovine, ona latou fasiotia ai lea.”

Ua fetalai atu nei Iesu i taʻitaʻi lotu, i lona fesili atu: “Pe a sau le alii e ona le tovine, se a se mea na te faia i na tagata galulue i vine?”

“E matuā faaumatia e ia na tagata amio leaga,” ua latou tali mai ai, “ona tuuina atu ai lea e ia o le tovine i nisi tagata galulue i vine, latou te avatu ia te ia ona fua i ona tausaga.”

I lea, ua folafolaina atu ai ma le lē iloa e taʻitaʻi lotu i ō latou lava luga le faamasinoga, talu ai ona o loo aofia i latou i “e galulue i vine” o le “tovine” faalemalo a Ieova o Isaraelu. O fua o loo faatalitalia e Ieova mai na tagata galulue i vine o le faatuatua i lona Alo, le Mesia moni. Ona o lo latou lē taulau ona fuaina mai o na fua, ua lapatai ai Iesu: “Tou te lei faitaulia lava ea i Tusi [Salamo 118:22, 23], O le maa na lafoaiina e tufuga fai fale, ua fai lea maa tulimanu aupitoaluga; o le mea lea na faia e le Alii, tatou te ofo ai pe a vaavaai atu i ai? O le mea lea ou te fai atu ai ia te outou, E aveesea le malo o le Atua ia te outou, a e tuuina atu i se nuu e au mai ai ona fua. O sē paū foi i luga o lea maa, e gāugau ai o ia; a o se tasi e paū ifo i ai le maa, e nutipalaina ai o ia.”

Ua iloa nei e tusiupu ma faitaulaga sili faapea o loo fetalai Iesu e uiga ia i latou, ma ua latou mananao ai e fasioti ia te ia, le “suli,” moni. O lea o le a aveesea ai le faaeaga o le avea ma pule o le Malo o le Atua mai ia i latou i le avea o se nuu, ma o le a foafoaina se nuu fou ‘o ē galulue i le tovine,’ se nuu o le a fua mai ai fua tatau.

Ona o le fefefe o taʻitaʻi lotu i le motu o tagata, o ē ua manatu ia Iesu o le perofeta, ua latou lē taumafai ai e fasiotia o ia i le taimi lea. Mataio 21:28-46; Mareko 12:1-12; Luka 20:9-19; Isaia 5:1-7.

◆ O ai ua fai ma sui o le fanau e toalua i le uluai tala faatusa a Iesu?

◆ O ai ua fai ma sui o le “matai,” le “tovine,” o “e galulue i vine,” o “auauna,” ma “le suli” i le tala faatusa lona lua?

◆ O le ā o le a tupu i ē ‘galulue i le tovine,’ ma o ai o le a suia i latou?