Pe Mafai ona E Talitonu i le Tusi Paia?

“E MATUĀ talafeagai lava pe a faapea atu afai lua te fetaiai ma se tagata o lē faapea mai e lē talitonu i le evolusione, o lena tagata e lē iloa se mea, valea pe lē lelei le mafaufau.” E faapefea ona aafia oe i upu nei a se tagata suesue i mea tau le ola o Richard Dawkins? Afai e te talitonu i le Tusi Paia, ua faapena foi ona e talitonu i le foafoaga na i lo o le talitonu i le aʻoaʻoga o le evolusione. Pe o le uiga o lena mea, i le avea o se tagata talitonu i le Tusi Paia, ua e lē iloa se mea, valea, pe lē lelei lou mafaufau?

Seʻi manatu foi i lenei faamatalaga: “Ua faavaeina e tagata suesue o le Feagaiga Fou i tala atu o so o se masalosaloga tatau faapea, o le Iesu o uluai faamaumauga faa-Kerisiano, i sona vaega, ua o se tala fatu o mafaufauga faa-Kerisiano.” O nei upu mai The Weekend Australian na tautala i ai se polofesa o suesuega faalotu o se iunivesite ma o le tusitala o ni tusi e uiga i faamatalaga faalotu, o Dr. Robert W. Funk.

O Dr. Funk na amataina se fuafuaga ua lauiloa o le Semina a Iesu, o se vaega o ni tagata suesue a le Tusi Paia e sili atu i le selau o ē na latou iloiloina totoʻa faatasi fetalaiga a Iesu o loo lipotia mai i le Tusi Paia. Faatasi ai ma isi mea, na latou faaiʻua ai faapea, e leʻi fatuina e Iesu le Tatalo a le Alii; e leʻi fetalai mai Iesu faapea o ē agamalu e mau i le lalolagi pe faapea o ē faatupu le filemu o le a taʻua i latou o atalii o le Atua; ma e leʻi fetalai mai o ia faapea: “O aʻu nei o le toe tu ma le ola; o lē faatuatua mai ia te au . . . e ola lava ia.”—Ioane 11:25, 26; Mataio 5:5, 9; 6:9, 10.

E ui lava atonu e faateʻia oe i a latou faaiʻuga, ae o mea lava ia e masani ai. O na mea o ni iʻuga o faitioga i le Tusi Paia faaonaponei, ma e faapena foi manatu na aʻoaʻoina i Semina a lotu mo sina taimi. Atonu ua faamaaaina oe e oe lava i le faalogo atu i le tetee mai o saienitisi i le Tusi Paia. Ae ona ua lafo atu e taʻitaʻi lotu masalosaloga i le moni o faamaumauga a le Tusi Paia, atonu o le a e tau manatu ai pe lē o le taimi lenei e toe iloilo ai lou lava tulaga. Pe o se mea tatau le talitonu i le Tusi Paia ae o loo toatele tagata faimafaufau i lotu e manino lava e lē talitonu i ai?