Lipoti a Ē Faalauiloa le Malo
Talaʻiina le Tala Lelei i “le Tuluʻiga o le Lalolagi”
“E TALAʻIINA atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” Sa faapea ona fetalai atu ai Iesu i ona soʻo a o toetoe lava oo atu i lona maliu. E leʻi pine talu lona toetu mai, na ia faapea atili atu ai: “E fai foi outou ma molimau ia te au i Ierusalema ma Iutaia uma lava, ma Samaria, e oo lava i le tuluʻiga o le lalolagi.” (Mataio 24:14; Galuega 1:8) I aso nei, ua faataunuuina ai nei valoaga i le sili atu i le 200 atunuu e aofia ai ma le atunuu i Amerika i Saute o Peru.
E sili atu i le 32,000 Molimau o loo talaʻia le tala lelei i lena laufanua matagofie, ma o la latou oganuu e mautinoa lava e aofia ai nisi o vaega aupito mamao o le lalolagi: atumauga maualuluga o Anetesa, e oo atu lona maualuga i le va o le 14,000 ma le 15,000 futu [4,000 ma le 4,500 mita], faapea foi ma le vaomatua vevela o le Amasone, o i inā e pau lava le auala e mafai ona oo atu ai i tagata, e auala lea i nai tamai vaa. Ua lipotia mai e le lala i Peru e faapea:
◻ “I le vaifanua o le togāvao, e iai a matou paeonia faapito e toavalu ua tofia atu i nai tamai vaa e lua e taʻua o lanchas. O nei tamai vaa e mafai ona ō i le na o le tasi le futu [0.3 mita] le loloto o le vai, o lea sa mafai ai ona faalautele atu le talaʻiga o le tala lelei i le tele o vaifanua fou i vaitafe laiti. Seia oo mai i le taimi nei, o uso o loo faaaogāina nei tamai vaa ua mafai ona latou tuuina atu le faitau selau o afe o mekasini, tusi, ma Tusi Paia i le vaifanua o Peru e igoa o le Vanu o Amasone. Ma o se iʻuga tuusaʻo, ua faavaeina ai faapotopotoga fou e fa, faatasi ai ma vaega tu mamao ese e lima o loo lipotia mai ai le galuega ma le faia ai o sauniga. Ua faamoemoe faapea o nei vaega o le a lē pine ae avea o ni faapotopotoga.”
◻ O se tasi aai i le togāvao e tu faataamilo i se nofoaga e fetaʻiaʻi ai paipa e faatafe ai le suāuu agaʻi atu i le Anetesa, lea e faatafe atu ai le suāuu mai le togāvao e oo atu i mauga maualuluga o le Anetesa e oo atu lava i le talafatai i sisifo. Ona o le iai o tagata galulue i nei paipa suāuu, o lenei aai sa iai ni pa pia e 20 ma sa lauiloa o se nofoaga e onanā ma fiafia ai. Ae peitai, ina ua uma ona avatu e nei paeonia faapito se molimau maeʻaeʻa, e toatele na tali atu i le feau o le Malo, ma i le taimi nei ua na o le 4 pa pia o loo totoe ai i le aai! I le taimi o se asiasiga talu ai a le ovasia matagaluega, e 189 tagata na ō atu i le lauga lautele. Ua iai nei se vaega o tagata talaʻi e toafitu i le aai, ma le sili atu i le 45 tagata e auai i sauniga uma lava. E lē pine, faatasi ai ma faamanuiaga a Ieova, ae ao ona avea o se faapotopotoga.
◻ I se tasi o faapotopotoga mai faapotopotoga e 221 i le laumua o Peru o Lima, na taʻu mai ai e se tamaloa e 29 tausaga le auala na ia maua ai le upu moni. E 13 ona tausaga ae lē toe aʻoga loa, ma na auai o ia i se vaega o tagata faafia malolosi ma amata se faiga o fusu, faaaogāina o vailaau oona, ma faia amioga lē mamā. Ina ua mavae le lua tausaga i se auaunaga saisaitia i le vaegāʻau, sa amata ona iai ni ona faafitauli tau i le mafaufau. O lea, i le 1983, na faafesootai ai o ia e se tuafafine loto maulalo i le faiva i lea fale ma lea fale. Mo le uluai taimi, sa faalogo ai o ia e uiga i le lalolagi fou o le alofa ma le filemu. Sa amata se suesuega faale-Tusi Paia, ma faatasi ai ma le fesoasoani alofa mai le faapotopotoga ma le malosi mai ia Ieova, na mafai ai ona ia foia ona vaivaiga. I le 1986, na papatisoina ai o ia ma ua auauna nei o se auauna o le faiva i le faapotopotoga.
E moni lava, o upu a Iesu faapea o le a talaʻia atu le Malo i le “tuluʻiga o le lalolagi” ua faataunuuina i Peru faatasi ai ma ni iʻuga ofoofogia, ua maua ai aogā e le toatele i lena atunuu o ē o loo matelaina ma galala mo le upu moni.