Tatalaina o le Vaega Mulimuli o Tusi Taai o le Sami Mate

IA SETEMA ua mavae, na iʻu ai ina tatalaina le vaega faaiʻu tau suesuega ua leva ona iai mo le faitau sefulu o tausaga. O se finauga ogoogo sa faia i le va o tagata aʻoga o Tusi Taai o le Sami Mate, sa foliga mai ua faaiʻuina, e ui lava atonu sa amataina foi se isi finauga fou.

O Tusi Taai o le Sami Mate sa mauaina i ni ana e latalata i le Sami Mate i le 1947 ma i tausaga na mulimuli mai ai. Sa avea na ma mea sili ona tāua i le faaalia o le matuā moni aʻiaʻi o mau o le Tusi Paia Eperu ma i le faasusuluina atu o le malamalama i tulaga faalotu i Palesitina a o iai Iesu i le lalolagi. (Isaia 40:8) Sa vave ona faasalalauina ma le magafagafa nisi o manusikulipi, ae i le 1991, toetoe lava 400 manusikulipi sa tumau pea ona leʻi faasalalauina ma sa lē mafai foi ona maua e le toatele o tagata aʻoga. E toatele sa lagona e pei ona lagona e le Polofesa o Ben Zion Wacholder, “sa tiga i le iloaina faapea, afai o le tulaga lea o faasalalauga i le taimi nei, o lona uiga tatou te oti uma lava ae leʻi maua e le lalolagi tusitusiga uma o tusi o le Sami Mate.”

Ae o lena tulaga na suia ia Setema i le tausaga ua mavae. Muamua, na faasilasila mai e le Polofesa o Wacholder ma sana aumea, o Martin Abegg, faapea ua la faaaogāina ma le lē mataofiofia se komepiuta e toe saunia mai ai tusi na matuā leoleomaluina. Ona faasilasila mai ai lea e le Faletusi i Huntington i San Marino, Kalefonia, U.S.A., faapea ua ia i latou ni ata na tapueina o uluai manusikulipi ma o le a mafai ona maua fua nei manusikulipi i tagata aʻoga taʻuleleia. E foliga mai, o se vaega o kopi na tapueina sa faia ina ia faamautinoa ai lo latou faasaoina. Ua teuina nei ni seti o ata i nofoaga eseese, ma i le iʻuga, na iʻu ina iai se kopi se tasi i le Faletusi i Huntington.

Na taʻua e le tasi tagata aʻoga lenei taimi o le tai liliu o mea tutupu ‘o tulaga faaleaʻoaʻoga e tutusa lona tāua ma le taimi na soloia ai i lalo le Pa o Perelini.’ Sa taʻua uma e faatonu aloaia le faasalalauina o tusi na faia i komepiuta ma le tatalaina o ata o se ‘gaoi.’ O le a faapena foi ona vevela mo ni tausaga le finauga e uiga i amio ma tulaga i le saʻo ma le sese. Ae i le taimi nei, e foliga mai o le a toatele tagata aʻoga faaopoopo o le a iʻu lava ina mafai ona saili atu le vaega atoa o Tusi Taai o le Sami Mate.

[Ata i le itulau 32]

Le suitulaga i se faamatalaga i le tusi a Sapakuka, o se tasi o Tusi Taai o le Sami Mate