E Sili atu na i lo o ni Poutu Ofoofogia

Ua maofa tagata asiasi i poutu na maua i le Sami Metitirane i Kaisareia, o se taulaga o vaa anamua i le talafatai o Isaraelu. Sa fauina e Herota le Sili lenei taulaga o vaa ma faaigoa le aai e faamanatu ai Kaisara Aokuso.

Sa mauaina e tagata suesue i le eleele le tele o le aai, e aofia ai ma lona malae mataaga tele. Ua latou ō foi i lalo o le sami ina ia maua ai se malamalamaga i le auala na fauina ai felavasaiga eseese o le taulaga i luga o le matafaga.

Na lipotia mai e le The New York Times (Ianuari 8, 1991) le mauaina o ni poutu i toega o se maota o se tupu lena sa uluai ʻosoʻoso atu i le sami. O nei mea o ni poutu faapitoa ona o tusitusiga e iai igoa o nisi o kovana Roma sa leʻi iloa muamua. Sa taʻua ai foi le “leoleo” o vaa, o “le uluai tusitusiga lea sa mafai ona maua e uiga i le taulaga.”

Ua iloa e tagata aʻoga o le Tusi Paia faapea sa folau atu i ai le aposetolo o Paulo i lena taulaga i le faaiʻuga o ana malaga faamisionare e lua. I inei sa la nonofo ai ma Filipo le faievagelia, ma o mea na tutupu ia te ia sa tatau ona matuā faalaeiauina ai le au soʻo. (Galuega 18:21, 22; 21:7, 8, 16) E mafai ona tatou faitau i le tele o nei mea tutupu e faafiafiaina ai i le tusi o le Tusi Paia o Galuega a le au Aposetolo.

O lea o nei poutu i le matafaga e lē na o ni toegāmea lē aogā o talafaasolopito. Latou te faamanatu mai ai i mafaufau o Kerisiano o latou uluai uso, o ē na faasalalauina atu ma le mataalia le tala lelei i taulaga ma e oo lava i “tuluiga o le lalolagi.”—Galuega 1:8.

[Ē Ana le Ata i le itulau 32]

Garo Nalbandian