O le Laau e Vave Totogo Aʻe

MAI i laau e ʻaina o latou fua i le laufanua o le Metitirane, o le laau lea o le sekati o se tasi o laau e matuā mataʻina. I faaiʻuga o Ianuari po o Fepuari—e muamua lava i le tele o isi laau—ona totogo aʻe mai lona tulaga afu sa iai. Ma maeu se tulaga e faateʻia ai. E ufitia le laau atoa i se fuga lanu piniki vaivai po o ni fuga papae, le lanu paepae lea e tai pei o le sinasina o le lauao o se tagata matua.—Faatusatusa i le Failauga 12:5.

Sa taʻua e tagata Eperu anamua le sekati o le “laau mataala,” ona o lona vave fuga mai. O lenei faiga sa faaaogā e Ieova e faataʻitaʻia mai ai se feau tāua. I le amataga o le faiva a Ieremia, sa faaali atu ai ia te ia se faaaliga o se laau o le sekati. O le ā sa uiga i ai? Sa faamatala e Ieova e faapea: “Ou te mataala ina ia faia aʻu upu.”—Ieremia 1:12.

E pei lava ona vave ona totogo aʻe le laau o le sekati, na faapena foi la Ieova i se uiga faafaatusa ona ‘maleifua vave aʻe’ e aauina atu ana perofeta e lapataia ona tagata e uiga i le iʻuga o le lē usitai. (Ieremia 7:25) Ma sa lē malōlō o ia—sa ‘mataala pea’—seia oo ina faataunuuina ana afioga faavaloaga. O lea ina ua oo i le 607 T.L.M., i le taimi atofaina, na oo mai ai loa le faamasinoga a Ieova i le nuu aposetate o Iuta.

Ua valoia mai e le Afioga a le Atua se faamasinoga tali tutusa faapena o le a oo mai i lenei faiga leaga o mea o loo tatou ola ai. (Salamo 37:9, 10; 2 Peteru 3:10-13) I le faasino atu i lena gaoioiga faafaamasinoga, ua faamautinoa mai ai e le perofeta o Sapakuka ia i tatou e faapea: “Auā o le faaaliga ua tuuina mo ona aso ua tuupoina . . . a ia faatalitali pea i ai; auā e oo mai lava, e le faatuai mai.” (Sapakuka 2:3) O le fuga manaia o le sekati, ua faamanatu mai ai ia i tatou e faapea o le a mataala pea Ieova e tusa ai ma ana afioga ina ia faataunuuina.

[Ē Ana le Ata i le itulau 32]

Pictorial Archive (Near Eastern History) Est.