O le ā le Tele o le a E Avatua mo Lenei Mea?

PE E te silafia se mea e sili ona tāua, o le a e faanaunau e faataulaga uma ai au mea totino ina ia e mauaina? Sa silafia e Iesu se mea faapena, ma sa ia taʻuina atu i ona soʻo.

Na ia fetalai atu: “E tusa foi le malo o le lagi ma le tagata faatauoa, ua sailiili penina lelei; ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau aʻi mai.”—Mataio 13:45, 46.

Sa lotomalie lenei tagata faatauoa e avatu ana mea uma ina ia fai ai ma ia le “penina,” le Malo o le Atua. Aiseā? Talu ai e leai se mea i lenei lalolagi e ono faatusatusa i ai. O le a foia e le Malo o le Atua faafitauli ia ua lē mafai ona foia e tagata, e pei o taua, le fiaʻai, le solitulafono ma faiga sauā. (Salamo 72:4-8, 13, 14) I lalo o lena Malo, e oo foi i le agasala, o faamaʻi ma le oti o le a lē toe iai. (Faaaliga 21:4, 5) E letioa la faapea mai le vaega lona lua o le Tatalo a le Alii (“Lo Matou Tamā”) e, “Ia oo mai lou malo”!—Mataio 6:9, 10.

O le ā o le a e avatua e saosaolaumea ai i faamanuiaga o le Malo? O le mea moni e maua fua faamanuiaga. Ae peitai, ina ia olioli i na faamanuiaga, e tatau ona e iloa po o le ā le Malo, ia talitonu i ai o se mea moni, ma ia faamuamua i lou olaga. Pe e mafai ona e faia lena mea? O loo iai ni faamatalaga i le Tusi Paia o le a fesoasoani ia te oe. Aiseā e lē faataga ai Molimau a Ieova e fesoasoani atu ia te oe i le aʻoaʻoina e uiga i le Malo o le Atua ma iloa ai le auala e aogā ai ia te oe e oo lava i le taimi lenei.