“Se Faailoga Mai le Lagi”

UA FAAPEA mai se faaupuga anamua: “A mūmū mai le lagi i le afiafi (o lona uiga e laofie), ua fiafia le auvaʻa, ae a mūmū mai le lagi i le taeao (o lona uiga e timuga ma matagi), ua nofouta le auvaʻa.” I aso nei, o satelite, o komepiuta e faaleleia ai suesuega o le tau, o le fua e fua aʻi ave o leo ma le malamalama (Doppler radar), ma isi lava auala faasaienitisi ua faaaogāina e vāʻai ai le tau. O nei valovaloga e masani lava ona fetaui lelei ma le faaupuga o loo i luga.

Na faatauanauina e fili faalelotu o Iesu “se faailoga mai le lagi,” o se faaaliga uigaese e faamaonia ai o ia o le Mesia. Na faapea mai o ia, “A oo i le afiafi ‘ua outou fai ane, E laofie; auā ua mūmū mai le lagi. O le taeao foi ua outou fai ane, E uaga le asō; auā ua mūmū mai, ma faamalumalu ifo le lagi. O outou tagata pepelo, ua outou iloa ona matauina amio a le lagi, a o faailoga o tausaga tou te le mafaia ea? O le tupulaga leaga ma le mulilulua ua saili mai se faailoga a e leai se faailoga e avatu i ai, ua na o le faailoga o Iona.”—Mataio 16:1-4.

Sa mafai e fili o Iesu ona faamatalaina le tau ae peitai na lē mafai ona latou faamatalaina mataupu faaleagaga. Mo se faataʻitaʻiga, e ā le “faailoga o Iona”? Ina ua mavae aso e tolu ma po e tolu sa iai Iona le perofeta a le Atua i le manava o se iʻa tele, ona talaʻi lea o ia i Nineva ma avea ai o se faailoga i lena aai o Asuria. Sa iai i le tupulaga a Iesu le “faailoga o Iona” ina o iai Keriso i le tuugamau mo se vaega o aso e tolu ma toe faatuina mai. Na faalauiloa atu e soʻo o Iesu le faamaoniga o lena mea na tupu, ma i lea na avea ai Iesu ma faailoga i lena tupulaga. —Mataio 12:39-41.

I se isi mea na tupu, sa fesili ai le au soʻo o Iesu ia te ia mo le “faailoga” o lona “faatasi” mai i le lumanai i le mana o le Malo. I lana tali atu, sa ia tuuina atu ai se faailoga tuufaatasi, e aofia ai faigataua, mafuie tetele, le lē lava o meaʻai ma le talaʻiga i le lalolagi atoa o le Malo faalelagi o le Atua ua faavaeina.—Mataio 24:3-14.

Po o e mātauina ea le faailoga o le faatasi mai lē vaaia o Keriso o se Tupu faalelagi? (1 Peteru 3:18) O ona vala o loo faataunuuina i lenei tupulaga. (Mataio 24:34) Ae ā i le lumanai? Ua faaalia mai e le Tusi Paia e lē na o le iʻuga o lenei faiga o mea ua latalata mai ae ua ia taʻuina mai foi le aso fou a le Atua ua folafola mai o le a lē pine ae malama mai mo le fanau a tagata.—2 Peteru 3:13.