Le Vai o le Ola

“INA fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 22:17) O “le vai o le ola”—o sauniuniga uma ia a le Atua mo lo tatou faaolataga e faavae i le taulaga togiola a Iesu Keriso. O loo avanoa pea nei sauniuniga ma e ave fua. Maeu le aao mafola o lo tatou Atua! Ae aisea ua faatusa ai na sauniuniga i vai?

O vai moni ua mafai ai ona ola laau i le palapala, e faalagolago foi i ai le ola o tagata. A leai ni vai ua pepē laau, ma lē mafai ai foi ona ola tagata. O le 65 pasene foi o lou tino o le vai. Ua fautuaina e nisi fomai popoto le tatau ona inuina le lua ma le ʻafa o kuata o le vai i le aso, ina ia tausia ai pea lena fua o le vai. O gaoioiga uma a lou tino—le faamalūina o meaai ma le aumaia i fafo o otaota o le tino—e manaomia ai le vai. E oti le tagata pe afai na te lē inuina se vai mo se vaiaso.

E faapea foi “le vai o le ola” o loo maua ai le ola faaleagaga. Afai tatou te teena le vai o le ola, o le a leai so tatou faamoemoe e faavavau. (Ioane 3:36) Afai tatou te talia, o le a tatou mauaina lena ola e faavavau. E letioa la naunau le fafine Samaria i lena vai ina ua fetalai atu Iesu ia te ia: “A o sē inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau”! (Ioane 4:14) Seʻi o tatou tago atu ia ma se faanaunauga faapena ma ave fua le vai o le ola.

[Ē Ana le Ata i le itulau 32]

Garo Nalbandian