E Pei Lava o ni Se
PE SA e savalivali ea i se laufanua lanumeamata lafulemu i le taumafanafana ma vaaia ai le lē mafaitaulia o se o feosofi ese mai le mea o e ui atu ai? E foliga mai e iai na iniseti i so o se mea, e ui lava atonu e te lē o manatu mamafa i ai. E ui i lea, o na se e foliga mai e lē feai ma e faaletaua.
Peitai, o foliga faaletaua o se ua talafeagai ai ona latou faaatagiaina tagata. E ui ina atonu e manatu nisi tagata tautaua ia i latou faapea e sili ona tāua, ae e ese le manatu o Lē na Foafoaina i tatou. Na faapea mai lana perofeta o Isaia: “O ia lē tietie i luga o le faataaliolio o le lalolagi, a o e nonofo ai e tutusa i latou ma sē.”—Isaia 40:22.
O le silisiliese o Ieova le Atua, le malosi, ma le atamai, ua faamaualugaina ai o ia e sili mamao aʻe i le lalolagi o tagata faatauvaa, e pei ona sili o le tagata i lo o le se i le poto ma le malosi. Peitai, o le uiga silisili o le Atua, o le alofa. Ma o lona alofa lē mafaatusaina ua uunaia ai o ia e silasila alofa mai ia i tatou, fesoasoani ia i tatou, ma laveaiina i tatou—pe afai tatou te alolofa ma usiusitai ia te ia. O loo feutagai ma le alofa Ieova ma i tatou, e ui lava e pei i tatou o se e faaletaua. Na faapea mai le faisalamo: “O ai ea sē tusa ma Ieova lo tatou Atua, o lē faamaualugaina e ia lona afioaga? O lē faamaulaloina e ia ia ia e silasila mai i le lagi atoa ma le lalolagi. Na te faatulaiina mai le tagatālautele [“ē faamaulalo,” NW] nai le efuefu.”—Salamo 113:5-7.
E pei ona faamatalaina e lenei salamo, ua faasalafa atu ma le alofa e Ieova le fesoasoani i ē faamaulalo. Ioe, e fesoasoani o Ia i ē ‘o loo saili ma le loto maulalo i le Atua ina ia mafai ona latou maua moni o ia.’ (Galuega 17:27) O i latou ua maua moni le Atua—ma auauna ia te ia—ua tautele foi i latou i lana silafaga. (Faatusatusa i le Isaia 43:4, 10.) O le se faatauvaa ua faamanatu mai ai ia i tatou lo tatou lava tulaga faatauvaa ma le alofa o ‘Lē ona le malosi uma lava na Foafoaina i tatou, o lē e mafai ona avea tagata usiusitai ma ana uo ma maua lona alofa tunoa. Po o e faaalia ea le talisapaia mo le alofa o le Atua?